Go Rata Bošoro

LEFASE la lehono le rata bošoro. Ke therešo gore e šetše e le kgale bošoro bo tšweletšwa boithabišong. Lega go le bjalo, mokgatlo wa Media Awareness Network o re “nywageng ya morago bjale, go šetše go na le dikgopolo tše di fapafapanego ka bošoro. E nngwe ya tšona ke gore bo atile le go feta.” Ka lehlakoreng le lengwe, “bo tšweletšwa ka diswantšho, ka thobalano e bile bo tletše bosehlogo.” Ela hloko dilo tše di latelago.

Mmino: Mokgatlo wo go boletšwego ka wona ka mo godimo o re dikoša tšeo di tletšego mantšu a bošoro “di amogelwa ka diatla tše pedi intasetering ya mmino.” Dikoša tše dingwe di tletše maroga e bile di kgothaletša polao le go kata, gaešita le go katwa ga basadi goba bomma.

Dipapadi tša Bidio: Makasine wa bao ba fišegelago dibidio wa kua Brithania o itše: “Therešo e sa kgahlišego ke gore dipapadi tša bidio di kgothaletša tšhollo ya madi. O okeditše ka gore: “Motho o swanetše go rata bošoro go fihla bokgoleng bjo itšego gore a tle a rate dipapadi tša bidio.” Ka mohlala, papadi e nngwe yeo e ratwago kudu  e kgothaletša babapadi go tula basadi ka dipatla go fihlela ba ehwa. Balaodi ba bangwe ba phagamego ba dumela gore dipapadi tša bidio, le ge di ka ba di kgahliša, di ka kgoma bana gampe go feta kamoo thelebišene e ba kgomago ka gona.

Difilimi: Dinyakišišo di bontšha gore bošoro, thobalano le maroga di atile kudu difiliming e bile o ka se nape o bota seo batšweletši ba se ngwadilego ge ba bontšha gore e ka bogelwa ke batho ba nywaga e mekae. Go oketša moo, bošoro ga bo dirwe feela ke batho bao go thwego ke ba babe. Go ya ka nyakišišo e nngwe, mo e ka bago seripagare sa bošoro bjo bo tšwelelago thelebišeneng, difiliming le dipapading tša bidio bo dirwa ke batho bao ba bonagalago ba lokile.

Dipego tša ditaba: Molao wa motheo wo o hlahlago batšweletši ba bantši ba ditaba tša thelebišene ke wa gore: “Dintšhi di gokwa ke monkgo.” Ditaba ke kgwebo e kgolo e bile boraditaba ba a tseba gore babogedi ba gokwa ke bošoro le gore ge go na le batho ba bantši bao ba bogelago, babapatši e ba ba bantši, e lego bona ba thekgago mananeo a thelebišene ka ditšhelete dinageng tše dintši.

Diwepesaete: Inthaneteng go hwetšagala diswantšho tša boikgopolelo le tša kgonthe tša go tlaišwa, go kgaola batho ditho, go senywa ga mebele ya batho le dipolao. Bana ba bantši ba ya diwepesaeteng tše.

Na Phatlalatšo ya Bošoro e ka go Kgoma?

Na batho ba kgongwa ke bošoro bjo bo lego thelebišeneng, difiliming, dipukung, mminong le mekgweng e mengwe ya go ithabiša? Ke therešo gore bao ba iphedišago ka go phatlalatša bošoro ba bolela gore ditšweletšwa tša bona ga di gobatše batho. Eupša ela hloko se: E le gore lefase la kgwebo le kgome menagano ya batho, le lefa ditolara tše dibilione bakeng sa dipapatšo, tšeo bontši bja tšona di ka bago di bapalwa ka metsotswana ya ka tlase ga e 30 feela. Ka gona, na go a kwagala go phetha ka gore filimi ya metsotso e 90, yeo e ka bago e na le senatla se se gobogilego goba se sešoro, e ka se kgome batho, kudukudu menagano e menanana ya bana?

Mmopi wa rena, Jehofa Modimo, o tseba tshekamelo ya batho go feta kamoo re e tsebago ka gona. O re boditše’ng ka go ikgweranya le batho ba bašoro—go akaretša le bao ba re thabišago ka diphatlalatšo tše di tumilego? Ela hloko ditemana tše di latelago tša Beibele:

● “Jehofa yena o hlahloba moloki gotee le yo kgopo, moya wa Gagwe o hloile le ge e le mang yo a ratago bošoro.”—Psalme 11:5.

● “O se ke wa gwerana le mang le mang yo bogale; o se ke wa tlwaelana le motho wa sebefedi, gore o se tlwaelane le ditsela tša gagwe gomme wa beela moya wa gago molaba.”—Diema 22:24, 25.

Go ba gona re ka se nape re phema ditutuetšo tše mpe ka mo go feletšego. Eupša re ka kgetha boithabišo bja rena le batho bao re gweranago le bona. Ka gona ipotšiše gore: ‘Ke nyaka go ba motho wa mohuta mang?’ Ke moka o gwerane le batho ba mohuta wona woo, batho bao ba nago le ditekanyetšo le dipakane tšeo o nyakago go ba le tšona.—Diema 13:20.

Le ge bagwera le boithabišo bjo re bo kgethago bo ka kgoma pono ya rena ka bošoro, go na le dilo tše dingwe tšeo le tšona di ka re kgomago. E le gore e ka ba eng tšona tšeo?

[Seswantšho go letlakala 4]

Boithabišo bjo re bo kgethago bo ka kgoma pono ya rena ka bošoro