Go tla Fetoga Eng?

“Setšhaba se ka se emišetše se sengwe tšhoša.”

“Ga go na modudi yo a tla rego: ‘Ke a babja.’”

“Lehu le ka se hlwe le sa ba gona.”

MANTŠU ao a lego ka mo godimo a ka bonagala eka ke toro feela. Eupša re ka kgodišega gore a tla phethagala. Ka baka la’ng? Ka gobane tšeo ga e fo ba dikholofetšo tša lefeela tša boradipolitiki bao ba se nago matla a go fetoša lefase la rena. Go e na le moo, dikholofetšo tšeo di tsopotšwego ka mo godimo di hwetšwa ka Beibeleng. *

Batho ba bantši ba nagana gore Beibele ke puku ya kgale yeo e se nago mohola mehleng ya rena. Na le wena o dumela seo? Ge e ba go le bjalo, o re’ng o sa naganišiše ka seo Beibele e se huperego? Therešo ke gore Beibele ke puku e nnoši e kgethwa yeo e bolelago ka histori ya batho go tloga mathomong. E hlalosa dilo tše di latelago:

● Kamoo batho ba ilego ba wela mathateng.—Baroma 5:12.

● Kamoo Modimo a rerilego go rarolla bothata.—Johane 3:16.

● Lebaka leo mebušo e ka se kgonego go fetoša lefase la rena.—Jeremia 10:23.

● Lebaka leo re ka botago kholofetšo ya Modimo ya gore o tla le fetoša.—Joshua 23:14.

Na ruri Modimo o tla fediša tlala, dintwa, bolwetši le lehu? O ka se belaele seo ka morago ga gore o dumele dilo tše di latelago:

1. Modimo o re bopile.

2. O a re rata.

3. O na le matla a go fetoša lefase.

4. O rerile go dira bjalo.

Ke’ng seo se ka dirago gore re dumele dintlha tšeo tše nne? Dihlatse tša Jehofa, tšeo di gatišitšego makasine wo, di go laletša gore o ikhweletše dikarabo ka thuto ya Beibele.

Mohlomongwe o na le Beibele eupša o e bala ka sewelo goba ga o e bale le gatee. Le batho bantši bao ba rego ba bala Beibele ba re go thata go e kwešiša. Ge e ba le wena o ikwa ka tsela yeo, re go laletša gore o ikgokaganye le Dihlatse tša Jehofa gore di go swarele thuto ya mahala ya Beibele. Batho ba dimilione lefaseng ka bophara ba holwa ke tokišetšo yeo. E šoma bjang?

Beke le beke, yo mongwe goba ba bangwe ba Dihlatse tša Jehofa ba ka tla lapeng la gago goba lefelong le lengwe leo o le ratago gore ba tle ba boledišane le wena ka Beibele mahala. Dipoledišano tše bjalo tša Beibele di tla go thuša go araba dipotšišo tše bjalo ka gore, Ke ka baka la’ng re tlaišega? Ke ka baka la’ng mebušo ya batho e se na matla a go fetoša lefase? Mmušo wa Modimo ke’ng, gona ke’ng seo o tlago go se dira seo mebušo ya batho e sa kgonego go se dira?

Ge o nyaka tsebišo e oketšegilego ya kamoo o ka holwago ke go ithuta Beibele, ikgokaganye le Dihlatse tša Jehofa tša lefelong la geno goba o ye Wepesaeteng ya www.pr418.com. O ka ba wa ngwalela aterese e swanetšego go tšeo di lego go letlakala 5 la makasine wo.

[Mongwalo wa ka tlase]