“Ke paletšwe kae?” Potšišo ye e ile ya tshwenya Michael, * wa Afrika Borwa. Gaešita le ge a lekile ka thata go ba tate yo botse, nako le nako ge a be a nagana ka morwa wa gagwe wa lerabele wa nywaga e 19, o be a ipotšiša ge e ba nkabe a ile a ba motswadi yo mokaone.

Ka mo go fapanego, Terry, yo a dulago Sepania, o bonagala a atlegile bjalo ka tate. Morwa wa gagwe, Andrew, o re: “Dilo tše dintši tšeo ke di gopolago ka tate ge ke be ke sa le yo monyenyane ke ge a be a mpalela, a bapala le nna e bile a eya maeto le nna e le gore re fetše nako re le gotee. O be a dira gore ke thabele go ithuta.”

Ke therešo gore go ba tate yo botse ga go bonolo. Eupša go na le melao ya motheo yeo e ka thušago. Botate ba bantši ba hweditše gore bona le malapa a bona ba a holega ge ba diriša bohlale bjo bo hwetšwago ka Beibeleng. A re hlahlobeng e nngwe ya keletšo e holago ya Beibele yeo e ka thušago botate.

Bjalo ka tate, o bontšha bana ba gago bjang gore ba bohlokwa go wena? Ga go pelaelo gore go na le dilo tše dintši tšeo o di direlago bana ba gago, go akaretša le boikgafo bjoo o bo dirago bakeng sa go ba fepa le go ba nea legae le le swanetšego. O be o ka se direle bana ba gago dilo tšeo ge nkabe ba se bohlokwa go wena. Lega go le bjalo, ge e ba o sa fetše nako e lekanego le bana ba gago, ba ka phetha ka gore o tshwenyegile kudu ka dilo tše dingwe, tše bjalo ka mošomo wa gago, bagwera ba gago, goba dilo tšeo o itlošago bodutu ka tšona, go feta bona.

Tate o swanetše go thoma neng go fetša nako le bana ba gagwe? Mma o thoma go ba le tswalano le ngwana wa gagwe ge a sa le ka popelong. Dibeke tše e ka bago tše 16 ka morago ga go ima, ngwana yo a sego a hlwa a belegwa a ka thoma go kwa. Lebakeng leo tate le yena a ka thoma go aga tswalano ya moswananoši le ngwana wa gagwe yo a sego a hlwa a belegwa. A ka theetša ge pelo ya ngwana e bethabetha, a kwa ge a raga, a bolela le yena le go mo opelela.

Molao wa Motheo wa Beibele: Mehleng ya Beibele, banna ba be ba tšea karolo go ruteng bana ba bona. Botate ba ile ba kgothaletšwa gore ba fetše nako le bana ba bona ka mehla, ka ge seo se bontšhwa ke mantšu a Beibele a lego go Doiteronomio 6:6, 7, ao a rego: “Mantšu a ao ke go laelago ona lehono, o a bee pelong ya gago; o a nweletše ngwaneng wa gago, o bolele ka ona ge o dutše ntlong ya gago, ge o sepela tseleng, ge o robala le ge o tsoga.”

Gore o be le dipoledišano tše di kgahlišago le bana ba gago, o swanetše go theetša ka kelohloko. O swanetše go hlagolela bokgoni bja go theetša ntle le go befelwa.

Ge bana ba gago ba nagana gore o tlo befelwa kapejana le go thoma go ba ahlola, ba ka ikwa ba thatafalelwa ke go go ntšhetša sa mafahleng. Eupša ge o ba theetša o theošitše maswafo, o tla bontšha gore o ba kgahlegela e le ka kgonthe. Le bona ba tla ikwa ba nyaka go go botša seo ba se naganago le kamoo ba ikwago ka gona.

Molao wa Motheo wa Beibele: Bohlale bjo bo hwetšwago ka Beibeleng bo itlhatsetše e le bjo bo holago dikarolong tše dintši tša bophelo bja letšatši le letšatši. Ka mohlala, Beibele e re: “Motho yo mongwe le yo mongwe a akgofele go kwa, a diege go bolela a be a diege go galefa.” (Jakobo 1:19) Botate bao ba dirišago molao wo wa motheo wa Beibele ba boledišana gakaone le bana ba bona.

Le ge o ikwa o ferekane goba o befetšwe, tayo yeo o ba layago ka yona e swanetše go bontšha gore ka lerato o tshwenyegile ka gore ngwana wa gago a holege nako e telele. Tayo yeo e akaretša keletšo, phošollo, thuto le kotlo e nyakegago.

Go feta moo, tayo e šoma kudu ge tate a reta bana ba gagwe ka mehla. Seema sa mehleng ya bogologolo se re: “Lentšu leo le bolelwago ka nako e swanetšego le swana le diapola tša gauta sebjaneng sa silifera.” (Diema 25:11) Theto e thuša bana gore ba be le dika tše dibotse. Bana ba atlega ge ba elwa hloko le ge ba tšeelwa godimo. Tate yo a tsomago dibaka tša go reta bana ba gagwe o tla ba thuša gore ba be le boikholofelo le go ba tutueletša gore ba se ke ba lapa go leka go dira se se nepagetšego.

Molao wa Motheo wa Beibele: “Lena botate, le se ke la befediša bana ba lena e le gore ba se nyame.”—Bakolose 3:21.

Tsela yeo tate a kgathago tema ya gagwe bjalo ka monna yo a nyetšego ruri e tla kgoma bana ba gagwe. Sehlopha se sengwe sa ditsebi tša kgolo ya bana se hlalosa gore: “Se sengwe sa dilo tše kaonekaone tšeo tate a ka di direlago bana ba gagwe ke go hlompha mmago bona. . . . Tate le mma bao ba hlomphanago e bile ba dira gore bana ba bona ba tsebe seo ba dira gore bana ba bona ba ikwe ba šireletšegile.”—The Importance of Fathers in the Healthy Development of Children. *

Molao wa Motheo wa Beibele: “Banna, tšwelang pele le rata basadi ba lena . . . Yo mongwe le yo mongwe wa lena a rate mosadi wa gagwe bjalo ka ge a ithata.”—Baefeso 5:25, 33.

Botate bao ba ratago Modimo ka pelo ka moka ba ka nea bana ba bona bohwa bjo bohlokwahlokwa—tswalano ya kgauswi le Tatago bona wa legodimong.

Ka morago ga nywagasome a šoma ka thata go godiša bana ba tshelelago, Antonio, yo mongwe wa Dihlatse tša Jehofa, o ile a hwetša lengwalo le le latelago leo le tšwago go yo mongwe wa barwedi ba gagwe, le re: “Tate yo a rategago, ke fo ba ke nyaka go go leboga ge o nkgodišitše gore ke rate Jehofa Modimo, go ithata gotee le go rata moagišani wa ka—ke gore, go ba motho yo a nago le tekatekano. O mpontšhitše gore o rata Jehofa le gore o a nthata. Ke a leboga, Tate, ge o ile wa etiša Jehofa pele bophelong bja gago le ge o ile wa swara bana ba gago bjalo ka dimpho tše tšwago go Modimo!”

Molao wa Motheo wa Beibele: “O rate Jehofa Modimo wa gago ka pelo ya gago ka moka, ka moya wa gago ka moka le ka matla a gago ka moka. Mantšu a ao ke go laelago ona lehono, o a bee pelong ya gago.”—Doiteronomio 6:5, 6.

Go molaleng gore go na le mo gontši mo go akaretšwago tabeng ya go ba tate go feta dintlha tše tše hlano le gore gaešita le ge o leka ka thata go ba tate yo botse, ge e le gabotse o ka se be tate yo a phethagetšego. Eupša o ka ba tate yo botse go ithekgile ka bokgole bjoo o dirišago melao ye ya motheo ka tsela e lerato le e lekalekanego. *