“Yo mongwe le yo mongwe yo a tšwelago pele a lebeletše mosadi e le gore a mo kganyoge o šetše a hlotlotše le yena pelong ya gagwe.”—Mateo 5:28.

LEBAKA LEO KA LONA GO TSEBA SEO GO LEGO BOHLOKWA

Lehono diswantšho tša batho bao ba sa aparago di tumile kudu e bile di hwetšagala go feta le ge e le neng pele. Ge e ba o duma go kgahliša Modimo le go phela bophelo bjo bo thabišago, o swanetše go tseba kamoo Modimo a ikwago ka gona ka diswantšho tša batho bao ba sa aparago.

SEO BEIBELE E SE BOLELAGO

Beibele ga e bolele ka diswantšho tša batho bao ba sa aparago ka go lebanya. Lega go le bjalo, go diriša diswantšho tša batho bao ba sa aparago go thulana le melao e mentši ya motheo ya Beibele.

Ka mohlala, Beibele e bolela ka go lebanya gore ge monna yo a nyetšego a “[tšwela] pele a lebeletše mosadi” yo a sego a nyalana le yena, a hlagolela kganyogo ya go robala le yena, seo se ka lebiša bohlotlolong. Molao wa motheo wa mantšu ao a Beibele o šoma go yo mongwe le yo mongwe, yo a lego lenyalong le yo a sego lenyalong, yo a “tšwelago pele a lebeletše” diswantšho tša batho bao ba sa aparago ka kganyogo ya go tsenela boitshwaro bjo bo gobogilego bja thobalano. Boitshwaro bjo bjalo ruri ga bo kgahle Modimo.

“Ka gona bolayang mekgwa . . . yeo e lego dithong tša mebele ya lena, e lego bootswa, go se hlweke, kganyogo e gobatšago le megabaru.”—Bakolose 3:5.

SEO BATHO BA SE BOLELAGO

Banyakišiši ba bangwe ga ba dumele gore go na le kgokagano e kgolo magareng ga diswantšho tša batho bao ba sa aparago le ditiro tša kgonthe tša thobalano e sa amogelegego. Lega go le bjalo, na go diriša diswantšho tša batho bao ba sa aparago ga go amogelege go Modimo?

SEO BEIBELE E SE BOLELAGO

Beibele e hlalosa “metlae e lešago dihlong” e le yeo e sa amogelegego le yeo e gobogilego. (Baefeso 5:3, 4) Diswantšho tša batho bao ba sa aparago e ka ba bjang tšeo di sa ganetšwego? Lehono diswantšho tša batho bao ba sa aparago di akaretša diswantšho tšeo di bogelwago tša ditiro tša kgonthe tša bohlotlolo, bosodoma le dibopego tše dingwe tša bootswa. Ruri go bogela ka phišego ditiro tše bjalo tše di gobogilego tša thobalano go tloga go sa kgahle Modimo go feta polelo yeo e gobogilego.

Banyakišiši ba tšwela pele ba ngangišana ka kgonagalo ya gore batho ba dire dilo tšeo ba di naganago tše di hlohleletšwago ke diswantšho tša batho bao ba sa aparago. Eupša Beibele e thekga e le ka kgonthe kgopolo ya gore diswantšho tša batho bao ba sa aparago di senya bomoya bja motho e bile di tloga di sa kgahle Modimo. Beibele e nea temošo ye: “Bolayang ditho tša lena tša mmele tše di lego . . . mabapi le bootswa [le] kganyogo ya botona le botshadi.” (Bakolose 3:5) Bao ba dirišago diswantšho tša batho bao ba sa aparago ba dira seo se fapanego—go e na le gore ba bolaye dikganyogo tšeo, ba a di hlagolela le go di gakatša.

“Tsomang se se lokilego, e sego se sebe . . . Hloyang se sebe le rate se se botse.”—Amose 5:14, 15.

SEO BEIBELE E SE BOLELAGO

Beibele e bolela ka bao ba gobogilego boitshwarong bja thobalano, matagwa le mahodu bao ba ilego ba kgona go tlogela mekgwa ya bona yeo e gobatšago. (1 Bakorinthe 6:9-11) Bjang? Ka go diriša bohlale bjoo bo hwetšwago Lentšung la Modimo, ba ithutile go hloya se sebe.

Go a kgonega go ithuta go hloya diswantšho tša batho bao ba sa aparago ka go naganišiša ka kelohloko ka ditlamorago tšeo di sa kgahlišego tša mokgwa wo o mobe. Thuto e nngwe ya morago bjale yeo e phatlaladitšwego ke Yunibesithi ya Mmušo ya Utah e utolotše gore babogedi ba bangwe ba diswantšho tša batho bao ba sa aparago ba ba le “kgateletšego ya monagano, ditswalano tše di senyegilego, ba ikarola bathong,” le ditlamorago tše dingwe tšeo di nyamišago. Go feta moo, bjalo ka ge go hlalositšwe pejana, go bogela diswantšho tša batho bao ba sa aparago ga go kgahle Modimo, e bile go gobatša kudu. Go aroganya batho le Mmopi.

Beibele e ka re thuša go ithuta go rata se sebotse. Ge re tšwela pele re ithuta Beibele, lerato la rena la go rata ditekanyetšo tša yona tša boitshwaro le tla gola. Lerato leo le tla re thuša go ema re tiile kgahlanong le diswantšho tša batho bao ba sa aparago le go ikwa go swana le mopsalme yo a ilego a ngwala gore: “Selo le ge e le sefe seo se se nago mohola nka se se bee pele ga mahlo a ka.”—Psalme 101:3.