GE PHOOFOTŠWANA ye e thoma go robala nako e telele, thempheretšha ya mmele wa yona e a theoga. E theoga gakaaka’ng? Thempheretšha ya dihlora tše dintši tša fase tša kua arctic e ile ya theoga ka go fetišiša—ge e be e theogile go fihla go tekanyo ya -2,9 ya di-degree Celsius! Ka thempheretšha yeo, re be re ka letela gore mabjoko a tšona a kgahle. Sehlora sa fase sa kua arctic se kgona bjang go phela ka thempheretšha yeo?

Ela hloko: Lebakeng le lengwe le le lengwe la dibeke tše pedi goba tše tharo ge sehlora sa fase sa kua arctic se robetše nako e telele, se a itšhikinya gore se boele thempheretšheng e tlwaelegilego ya mmele wa sona ya 36,4°C ke moka sa dula se le bjalo ka diiri tše 12 go ya go tše 15. Banyakišiši ba re gaešita le ge nako ye ya go ikwa se ruthetše mmeleng e le e kopana, e kgatha tema go phedišeng bjoko bja sona. Go oketša moo, nakong ya ge sehlora sa fase sa kua arctic se robetše nako e telele, go bonagala hlogo ya sona e dula e ruthetše go feta mmele ka moka. Nakong ya diteko tša laporatoring, go hweditšwe gore thempheretšha ya molala wa sehlora seo go boletšwego ka sona ka mo godimo ga se ya ka ya theoga go feta 0,7°C.

Ge sehlora se se etšwa moo se bego se robetše nako e telele, go tšea diiri tše pedi gore bjoko bja sona bo thome go šoma ka tsela e tlwaelegilego. Ge e le gabotse, nyakišišo e nngwe e bontšha gore bjoko bja sehlora sa fase sa kua arctic bo šoma gakaone le go feta ka morago ga go robala nako e telele! Ditsebi di tlabilwe kudu ke selo se seo se makatšago seo di se hweditšego. Di se bapiša le dimela tšeo di hlogago mo go swelego matšatši a sego kae ka morago ga go fišwa ga hlaga.

Banyakišiši ba holofela gore go ithuta ga bona ka sehlora sa fase sa kua arctic go tla ba thuša gore ba kwešiše ka botlalo bokgoni bja bjoko bja motho. Morero wa bona ke gore ba ithute mo go oketšegilego ka go thibela goba go dirolla go senyega ga disele moo go bakwago ke malwetši a bjoko, go akaretša le bolwetši bja Alzheimer.

O nagana eng? Na bjoko bjo bo kgotlelelago bja sehlora sa fase sa kua arctic bo bile gona ka tlhagelelo? Goba na bo hlamilwe?