Ge ngwana wa gago wa nywaga e mebedi a ferekane, o a goeletša, a kibakiba fase gomme a itahlela fase. O ipotšiša gore: ‘Na ngwan’aka o phetše gabotse? Na o dira matepe ka gobane ke sa dire dilo gabotse? Na o tla ka a lahla mokgwa wo?’

O ka kgona go thuša ngwana wa gago wa nywaga e mebedi go fetoša mokgwa wa gagwe. Lega go le bjalo, thoma ka go ela hloko lebaka la gore a dire matepe.

Bana ba banyenyane ga ba kgone go laola maikwelo a bona. Seo ka bosona se ka dira gore ngwana wa gago a fele a tepelela. Eupša ga go felele moo.

Nagana ka phetogo yeo ngwana a lebanago le yona ge a na le nywaga e ka bago e mebedi. Ge a sa tšwa go belegwa, batswadi ba gagwe ba be ba mo direla dilo tšohle. Ka mohlala, ge a be a lla, ba be ba etla ba kitima. Ba ipotšiša gore, ‘Na ngwana yo o a babja? Na o nyaka dijo? Na o nyaka go homotšwa? Na o nyaka go fetošwa mongato?’ Batswadi ba be ba dira se se nyakegago go kaonefatša boemo. Seo se be se lokile ka gobane ngwana o ithekgile ka mo go feletšego ka batswadi ba gagwe.

Lega go le bjalo, ge ngwana a na le nywaga e ka bago e mebedi, o thoma go lemoga gore batswadi ga ba sa mo direla tšohle tšeo a di nyakago. Ge e le gabotse, go e na le gore bona ba direle ngwana seo a se nyakago, ba letela gore ngwana a dire seo bona ba se nyakago. Ga bjale dilo di fetogile, eupša ngwana wa nywaga e mebedi a ka no se amogele diphetogo ka ntle le go itwela—mohlomongwe ka go dira matepe.

Ge nako e dutše e eya, gantši ngwana o thoma go kwešiša gore batswadi ba gagwe ga se feela bahlokomedi ba gagwe eupša gape ke bahlahli ba gagwe. Mohlomongwe a ka thoma go bona gore o swanetše go ‘kwa batswadi ba gagwe.’ (Bakolose 3:20) Ge boemo bo sa le bjalo, ngwana a ka leka go se fele pelo ga batswadi ba gagwe kamoo a ka kgonago ka gona ka go tepelela a sa fetše.

Eba le kwešišo. Ngwana wa gago ga se mothwana yo mogolo. Go se be le phihlelo ya go swaragana le maikwelo a gagwe go ka dira gore a feteletše dilo ge a ferekane. Leka go bona dilo go ya ka pono ya gagwe.—Molao wa motheo wa Beibele: 1 Bakorinthe 13:11.

Dula o theošitše maswafo. Ge ngwana wa gago a dira matepe, go ka se thuše ge o ka galefa. Go fihla bokgoleng bjoo bo kgonegago, hlokomologa matepe ao gomme o se ke wa tšeega maikwelo. Go gopola lebaka la go direga ga matepe go tla go thuša gore o dule o theošitše maswafo.—Molao wa motheo wa Beibele: Diema 19:11.

O se ke wa fetofetoga. Ge o nea ngwana wa gago selo se sengwe le sengwe seo a se nyakago, go na le kgonagalo ya gore a dire matepe nakong e tlago ge a nyaka se sengwe. Boledišana le ngwana wa gago o theošitše maswafo gomme o mmontšhe gore o tiišitše ka seo o se bolelago.—Molao wa motheo wa Beibele: Mateo 5:37.

O se ke wa fela pelo. O se ke wa letela gore matepe a fele ka bjako, kudukudu ge e ba o be o tlwaeditše ngwana wa gago gore o tla hwetša seo a se nyakago ge e ba a tepelela. Lega go le bjalo, ge e ba o dira dilo gabotse gomme o dula o tsepame, mohlomongwe matepe a ka fokotšega. Mafelelong, a tla felela sa ruri. Beibele e re: “Lerato ga le fele pelo.”—1 Bakorinthe 13:4.

Leka le go dira se se latelago:

• Ge matepe a thoma, swara ngwana wa gago (ge e ba go kgonega) gomme o mo thibele go dira seo a nyakago go se dira eupša o sa mo gobatše. O se ke wa mo kgadimola. Mo lete go fihlela a homola. Mafelelong, ngwana o tla lemoga gore matepe ga se a mo hola ka selo.

• Eba le lefelo leo o ka beago ngwana wa gago ge a dira matepe. Mmotše gore a ka tšwa ge a theošitše maswafo, gomme o mo tlogele ka moo.

• Ge ngwana wa gago a dira matepe le le gare ga batho, mo tloše moo a bonwago ke batho. O se ke wa ineela ka gobane a itira sebogwa. Ge o ka ineela, ngwana wa gago o tla ba le kgopolo ya gore ge a dira matepe, o tla hwetša selo le ge e le sefe seo a se nyakago.