Gantši ge wena le molekane wa gago le ngangišana, o rotoša ditaba tša nakong e fetilego gomme o lokeletša dikgopi tša kgale tšeo nkabego di rarolotšwe kgale. Bothata ke’ng? Go ka direga gore yo mongwe wa lena goba bobedi bja lena ga le tsebe tsela ya go lebalela.

Le ka ithuta. Lega go le bjalo, sa pele elang hloko lebaka leo go ka bago thata gore monna le mosadi ba lebalelane.

Matla a taolo. Banna le basadi ba bangwe ba gana go lebalela balekane ba bona e le gore motho a laole molekane wa gagwe ka tsela e itšego. Ka gona, ge go rotoga ngangišano, ba diriša seo se diregilego nakong e fetilego gore ba laole balekane ba bona.

Go boloka sekgopi. Mabadi a dikgopi tša nakong e fetilego a ka tšea nako e telele go fola. Molekane yo mongwe a ka re: ‘Ke a go lebalela’ eupša a sa dutše a bolokile sekgopi sa nakong e fetilego—mohlomongwe a duma go itefeletša.

Go nyamišwa. Batho ba bangwe ba tsena lenyalong ba nagana gore bophelo bo tla swana le nonwane e itšego ya tša marato. Ka gona ge go rotoga diphapano, ba gana go fetola dipono tša bona, ba ipotšiša gore go tla bjang gore balekane ba bona bao ba bego ba nagana gore ba swanelana le bona ba be le pono e fapanego. Go ba le ditebelelo tše di sa kwagalego go ka dira gore motho a sekamele go swayeng diphošo go e na le gore a lebalele.

Go se kwešišane. Balekane ba bantši ba gana go lebalela ka gobane ba sa kwešiše gore go lebalela go bolela eng. Ka mohlala ba bolela gore:

Ge e ba ke mo lebalela, ke tla be ke nyenyefatša phošo yeo a e dirilego.

Ge e ba ke mo lebalela, ke swanetše go lebala seo se diragetšego.

Ge e ba ke mo lebalela, ke gona ge ke ipiletša mathata.

Ruri go lebalela ga go bolele le setee sa dilo tšeo di lego ka mo godimo. Lega go le bjalo, go lebalela go ka ba thata—kudukudu magareng ga monna le mosadi.

Kwešiša seo go lebalela go se akaretšago. Ka dinako tše dingwe, ka Beibeleng polelwana “go lebalela” e bolela “go tlogela.” Ka gona ga se ka mehla go lebalela go nyakago gore o lebale selo seo se diragetšego goba go nyenyefatša phošo e itšego. Ka dinako tše dingwe go bolela go fo tlogela taba, bakeng sa go hola wena le lenyalo la gago.

Ela hloko ditlamorago tša go se lebalele. Ditsebi tše dingwe di bolela gore go boloka sekgopi go ka bea bophelo bja gago kotsing e kgolo ya go hlaselwa ke malwetši mmeleng le maikwelong, go akaretša bolwetši bja kgateletšego ya monagano le bja madi a magolo—re se sa bolela ka tshenyo yeo go e bakago lenyalong la gago. Beibele e bolela gabotse ge e re: “Bontšhanang botho, le šokelane ka bonolo, le lebalelane ka bolokologi.”—Baefeso 4:32.

Ela hloko mehola ya go lebalela. Go lebalelana go dira gore wena le molekane wa gago le botane go e na le gore le balelane diphošo. Ka morago seo se le thuša gore le se swarelane dikgopi gomme sa dira gore lerato la lena le gole.—Molao wa motheo wa Beibele: Bakolose 3:13.

Eba le pono ya kgonthe ka dilo. Go bonolo go ba yo a lebalelago ge e ba o amogela seo molekane wa gago a lego sona, mafokodi a gagwe le tše dingwe. Puku ya Fighting for Your Marriage e re: “Ge e ba o lebiša tlhokomelo go seo o sa se hwetšago, go bonolo go lebala seo o šetšego o se hweditše. Ke dilo dife tšeo o nyakago go di šetša boemong bjo?” Gopola gore ga go na motho yo a phethagetšego—go akaretša le wena.—Molao wa motheo wa Beibele: Jakobo 3:2.

Eba le tekatekano. Nakong e tlago ge o kgopišitšwe ke selo seo molekane wa gago a se boletšego goba a se dirilego, ipotšiše gore: ‘Na ruri seo se bohlokwa? Na ke swanetše go letela gore a nkgopele tshwarelo, goba na nka fo tshediša mahlo seo se diregilego gomme ka tšwela pele ka bophelo?’—Molao wa motheo wa Beibele: 1 Petro 4:8.

Ge e ba go nyakega, boledišanang ka bothata. Ka boleta, hlalosa seo se go kgopišitšego le lebaka leo le dirilego gore o ikwe ka tsela yeo. O se ke wa mo naganela goba go mmotša tšeo o mo naganelago tšona, ka ge se se tla fo dira gore molekane wa gago a ikemelele. Go e na le moo, e fo hlalosa kamoo ditiro tša molekane wa gago di go kgomilego ka gona.