NONYANA ye e bitšwago emperor penguin e ka kgona go sesa ka lebelo le le makatšago ka gare ga meetse gomme ka morago ya fofela godimo ga lehlwa ka lona lebelo leo. E kgona bjang go dira seo?

Ela hloko: Nonyana ya emperor penguin e swara moya mafofeng a yona. Se ga se šireletše feela nonyana ye maemong a tonyago kudu eupša se e thuša go sesa ka lebelo leo le ipoeleditšego gabedi goba gararo go feta leo e bego e ka kgona go sesa ka lona. Bjang? Borathutamahlale ba diphedi tša ka lewatleng ba šišinya gore e kgona go dira seo ka gore e ntšhe dipudula tše dinyenyane magareng ga mafofa a yona. Ge dipudula tšeo di etšwa, di fokotša go gohlana ga mafofa ao, ka go re’alo nonyana ya kgona go sesa ka lebelo.

Se se kgahlišago ke gore baentšineare ba be ba dutše ba ithuta ditsela tšeo ka tšona ba ka dirago gore dikepe di sese ka lebelo ka gore di ntšhe dipudula mahlakoreng a tšona e le gore di fokotše kgohlano yeo e bago gona mebeleng ya tšona. Lega go le bjalo, banyakišiši ba a dumela gore ba thatafalelwa ke go dira dinyakišišo tše di oketšegilego ka gobane “go raragana ga mafofa a nonyana ya penguin go dira gore go be thata gore motho a hlame sefo e swanago le mafofa ao.”

O nagana eng? Na mafofa a nonyana ya emperor penguin a bile gona ka tlhagelelo? Goba na a hlamilwe?