“Ke tlaletšwe, ke iname ka mo go feteletšego; letšatši ka moka ke be ke itshepelela ke nyamile.”—Psalme 38:6.

SEO BANYAKIŠIŠI BA SE BOLELAGO

Motho yo mongwe le yo mongwe o fela a ikwa a nyamile, eupša kgateletšego e tseneletšego ya monagano ke tšharakano yeo e fokodišago yeo e tšwelago pele gomme e tsenatsenana le bophelo bja motho bja letšatši le letšatši. Go swanetše go lemogwa gore ga se ditsebi ka moka tšeo di dumelelanago tabeng ya seo go thwego ke go nyama mo go tlwaelegilego le seo se bakago kgateletšego ya monagano. Lega go le bjalo, go kaone go bolela gore batho ba bangwe ba ba le maikwelo a tseneletšego ao a fošagetšego, ao ka dinako tše dingwe a sepedišanago le maikwelo a go ikwa o se na mohola le go ikwa o le molato ka tsela e feteletšego.

SEO BEIBELE E SE BOLELAGO

Beibele e bolela ka banna le basadi ba bantši bao ba ilego ba ba le maikwelo a fošagetšego. Ka mohlala, Hanna o be a kwele “bohloko moyeng”—polelwana yeo e fetoletšwego e le “dipelo tšeo di kwelego bohloko” le go “gateletšega kudu.” (1 Samuele 1:10) Boemong bjo bongwe moporofeta Eliya o be a nyamile kudu moo a ilego a rapela Modimo gore a tšee bophelo bja gagwe!—1 Dikgoši 19:4.

Bakriste ba lekgolong la pele la nywaga ba be ba laetšwe gore ba ‘bolele ka mo go homotšago le bao ba nyamilego.’ (1 Bathesalonika 5:14) Go ya ka puku e nngwe ya ditšhupetšo, polelwana “meoya e nyamilego” e ka šupa go bao “ka nakwana ba gateleditšwego ke dikgateletšo tša bophelo.” Go molaleng gore gaešita le banna le basadi ba mehleng ya Beibele ka dinako tše dingwe ba be ba ikwa ba gateletšegile.

“Tlholo yohle e tšwela pele e tsetsela gotee gomme e ekwa bohloko gotee.”—Baroma 8:22.

SEO BEIBELE E SE BOLELAGO

Beibele e ruta gore bolwetši bo bakilwe ke go rabela ga batho ba babedi ba pele. Ka mohlala, Psalme 51:5 e re: “Ke belegwe gabohloko ke na le molato, le gona mma o nkimile ke na le sebe.” Le gona, Baroma 5:12 e hlalosa gore “ka motho o tee [motho wa pele, Adama] sebe se tsene lefaseng gomme lehu la tsena ka sebe, ka go re’alo lehu le aparetše batho bohle gobane bohle ba dirile sebe.” Ka ge re abetšwe go se phethagale go Adama, yo mongwe le yo mongwe wa rena o tsenwa ke bolwetši gabonolo, bobedi mmeleng le maikwelong. Ka baka la seo, Beibele e re “tlholo yohle e tšwela pele e tsetsela gotee gomme e ekwa bohloko gotee.” (Baroma 8:22) Lega go le bjalo, Beibele gape e nea kholofelo yeo go sego ngaka yeo e ka e neago—kholofetšo ya Modimo ya lefase le lefsa la khutšo moo malwetši ka moka le ditšharakano, go akaretša le kgateletšego ya monagano, di tla bego di se sa le gona.—Kutollo 21:4.

“Jehofa o kgauswi le ba dipelo tše di robegilego; o phološa ba meoya e nyamilego o šoro.”—Psalme 34:18.

LEBAKA LEO GO LEGO BOHLOKWA

O ka se kgone go laola maemo a gago ka mehla, gomme ka dinako tše dingwe o tla welwa ke dilo tše mpe. (Mmoledi 9:11, 12) Lega go le bjalo, go na le dilo tše šomago tšeo o ka di dirago e le gore maikwelo a fošagetšego a se ke a laola bophelo bja gago.

SEO BEIBELE E SE BOLELAGO

Beibele e bolela gore bao ba babjago ba nyaka ngaka. (Luka 5:31) Ka gona ge e ba o tshwenywa ke go fetofetoga ga maikwelo mo go fokodišago, ga se phošo go nyaka thušo ya tša kalafo. Beibele gape e gatelela bohlokwa bja thapelo. Ka mohlala, Psalme 55:22 e re: “Lahlela maima a gago go Jehofa, gomme yena o tla go thekga. Le ka mohla a ka se dumelele gore moloki a šišinyege.” Thapelo ga e fo ba tsela ya gore o ikwe o le kaone, ke go boledišana ka tsela ya kgonthe le Jehofa Modimo, yo a lego “kgauswi le ba dipelo tše di robegilego.”—Psalme 34:18.

O ka holega gape ka go tšhollela mogwera wa gago wa kgauswi sa mafahleng. (Diema 17:17) Daniela yo e lego yo mongwe wa Dihlatse tša Jehofa o re: “Modumedigotee le nna o ile a mphegelela ka boleta gore ke bolele ka kgateletšego ya ka ya monagano. Le ge ke tšere nywaga e mentši ke phema poledišano e bjalo, go se go ye kae ile ka lemoga gore ke sona seo ke bego ke dutše ke se nyaka. Ke ile ka makatšwa ke kamoo ke ilego ka ikwa ke imologile ka gona ka morago ga moo.”