PONO YA BEIBELE
Lenyalo
Na lenyalo e fo ba tlemo ya segwera?
“Se Modimo a se tlemagantšego jokong go se be le motho yo a se aroganyago.”—Mateo 19:6.
SEO BEIBELE E SE BOLELAGO
Mahlong a Modimo, lenyalo le bolela mo gontši go feta thulaganyo feela ya segwera. Ke tlemo e kgethwa magareng ga monna le mosadi. Beibele e re: “Mathomong a tlholo ‘[Modimo] o ba dirile e le yo motona le yo motshadi. Ka lebaka le monna o tla tlogela tatagwe le mmagwe, gomme ba babedi ba e tla ba nama e tee‘ . . . Ka baka leo, se Modimo a se tlemagantšego jokong go se be le motho yo a se aroganyago.” *—Mareka 10:6-9; Genesi 2:24.
Mantšu a rego, “se Modimo a se tlemagantšego jokong,” ga a bolele gore manyalo a dirwa legodimong. Go e na le moo, ka go šupa go Mmopi e le Mothomi wa thulaganyo ya lenyalo, Beibele e gatelela bohlokwa bja tlemo ye. Banyalani bao ba lebelelago lenyalo la bona ka tsela yeo ba le tšea e le tlemo e kgethwa le ya sa ruri, ka go re’alo ba matlafatša maikemišetšo a bona a go dira gore lenyalo la bona le atlege. E bile ba oketša ditebelelo tša bona tša go atlega ge ba bala Beibele bakeng sa tlhahlo gore ba phethagatše dikarolo tša bona bjalo ka monna le mosadi.
Karolo ya monna ke efe?
“Monna ke hlogo ya mosadi wa gagwe.”—Baefeso 5:23.
SEO BEIBELE E SE BOLELAGO
E le gore lapa le šome gabotse, yo mongwe o swanetše go dira diphetho tša mafelelo ditabeng tša lapa. Beibele e nea monna boikarabelo bjoo. Eupša seo ga se mo nee tshwanelo ya gore e be mmušanoši goba mphenyašilo. E bile ga se mo dumelele gore a hlokomologe boikarabelo bja gagwe, ka go dira gore mosadi wa gagwe a se ke a mo hlompha le go mo imetša go sa nyakege. Go e na le moo, Modimo o letetše gore a šome ka thata bakeng sa go hlokomela mosadi wa gagwe le gore a mo godiše ka go mo lebelela e le molekane yo a ratwago kudu le yo a ka botwago. (1 Timotheo 5:8; 1 Petro 3:7) Baefeso 5:28 e re: “Banna ba swanetše go rata basadi ba bona bjalo ka mebele ya bona.”
Monna yo a ratago mosadi wa gagwe e le ka kgonthe o tšeela godimo bokgoni bja gagwe le ditalente tša gagwe gomme ka tlhompho o ela hloko dipono tša gagwe, kudukudu ditabeng tšeo di kgomago lapa. Ga se a swanela go gapeletša gore go dirwe dilo ka tsela ya gagwe feela ka gobane e le hlogo ya lapa. Ge monna yo a boifago Modimo e lego Aborahama a be a gana go kwa tšhišinyo e kwagalago ya mosadi wa gagwe tabeng e itšego ya lapa, Jehofa Modimo o ile a re go yena: “Theetša lentšu la mosadi wa gago.” (Genesi 21:9-12) Aborahama ka boikokobetšo o ile a kwa gomme lapa la gagwe le ile la thabela khutšo le botee, gaešita le ditšhegofatšo tša Modimo.
Karolo ya mosadi ke efe?
“Basadi ikokobeletšeng banna ba lena.”—1 Petro 3:1.
SEO BEIBELE E SE BOLELAGO
Pejana ga ge Modimo a ka bopela monna wa pele mosadi, o ile a re: “Ga go botse gore monna a tšwele pele a dula a nnoši. Ke tla mo direla mothuši yo e tlago go ba molekane yo a mo swanelago.” (Genesi 2:18) Molekane ke selo seo se dirago gore selo se felele goba se phethagale. Ka gona, Modimo o be a bopile mosadi, e sego gore a swane le monna goba a phenkgišane le yena, eupša gore e be modirišani wa gagwe. Bobedi bja bona ba be ba ka phethagatša taelo e tšwago go Modimo wa bona ya gore ba be le bana gomme ba tlatše lefase ka batho ba go swana le bona.—Genesi 1:28.
E le go thuša mosadi gore a phethagatše karolo ya gagwe, Modimo o mo neile dika tše swanetšego tša mmele, tša monagano gotee le tša maikwelo. Ge a diriša dika tše ka bohlale le ka lerato, o tlaleletša ka tekanyo e sa lekanywego katlegong ya lenyalo la gagwe gomme o thuša monna wa gagwe gore a ikwe a kgotsofetše e bile a šireletšegile maikwelong. Mahlong a Modimo, mosadi yo bjalo yo botse o swanelwa ke theto. *—Diema 31:28, 31.
^ ser. 5 Beibele e dumelela tlhalo motheong wa go se botege ga molekane ka tša thobalano.—Mateo 19:9.
^ ser. 14 Banyalani ba tla hwetša ditšhišinyo tše dintši tšeo di thušago bakeng sa lenyalo le bophelo bja lapa sehlogong seo se tšwelelago ka mehla ka go Phafoga! sa “Thušo Bakeng sa Lapa.”
You May Also Like
LAPA LA GAGO LE KA THABA
Kgopela Thušo ya Modimo Gore o be le Lenyalo le le Thabilego
Go diriša dipotšišo tše pedi tše bonolo go ka go thuša go kaonefatša lenyalo la gago.
DIPOTŠIŠO TŠA BEIBELE DI A ARABJA
Beibele e Re’ng ka Monna le Mosadi Bao ba Dulago Gotee ba se ba Nyalana?
Ditaelo tšeo di tšwago go Modimo di re botša seo re swanetšego go se dira gore malapa a rena a thabe, le gona melao ya gagwe e hola batho bao ba dulago ba e latela.
DIPOTŠIŠO TŠA BEIBELE DI A ARABJA
Beibele e Re’ng ka Manyalo a Batho ba Merafo e sa Swanego?
Ela hloko e mengwe ya melao ya motheo ya Beibele yeo e bolelago ka lenyalo le go lekana ga merafo.
DIPOTŠIŠO TŠA BEIBELE DI A ARABJA
Na go na le Seo Beibele e se Bolelago ka go Nyalana ga Batho ba Bong bjo bo Swanago?
Mothomi wa lenyalo o tloga a tseba seo se nyakegago gore lenyalo le tie le go thabiša.
DIPOTŠIŠO TŠA BEIBELE DI A ARABJA
Na go Nyala Basadi ba Bantši go Lokile?
Na ke Modimo yo a itšego monna a nyale basadi ba bantši? Ela hloko seo Beibele e se bolelago ka go nyala basadi ba bantši.
