MANTŠU ao a bolela’ng? A šupa boemo bja monagano wa motho le tsela yeo a ikwago ka yona. “Mohlaki” o dula a nagana ka se se fošagetšego, e lego seo se dirago gore matšatši a gagwe e be “a mabe” goba ao a nyamišago. Ka mo go fapanego, “wa pelo e lokilego” o leka go lebiša tlhokomelo go se se nepagetšego, e lego boemo bja kgopolo bjo bo mo neago khutšo ya ka gare, bja dira gore ‘a dule a le monyanyeng.’

Ka moka re na le mathata ao a ka re amogago lethabo ka tekanyo e itšego. Lega go le bjalo, re ka kgona go dira dilo tše dingwe tšeo di re thušago gore re dule re thabile dinakong tša mathata. Ela hloko seo Beibele e se bolelago.

• O se ke wa dumelela dipelaelo tša gosasa di go imela lehono. Jesu Kriste o itše: “Le se ke la belaela mabapi le la gosasa; le tla ba le dipelaelo tša lona tše di le lekanego. Go oketša mathata ao letšatši le lengwe le le lengwe le tlago le ona ga go nyakege.”—Mateo 6:34, Good News Translation.

• Leka go lebiša tlhokomelo dilong tše dibotse tšeo di ilego tša go diragalela. Ge e le gabotse, ge o ikwa o nyamile, ke ka baka la’ng o sa ngwale lelokelelo la dilo tšeo tše dibotse gomme wa naganišiša ka tšona? Le gona, o se ke wa dula o nagana ka diphošo tša nakong e fetilego goba ditiro tše mpe. Ithute go tšona, gomme o tšwele pele ka bophelo. Swana le mootledi yo a gašago mahlo seiponeng sa koloi gomme a sa dule a se tsepeletše. Le gona, gopola gore “[Modimo] o lebalela e le ka kgonthe.”—Psalme 130:4.

• Ge o imetšwe ke dipelaelo, bolela le motho yo a ka kgonago go go kgothatša. Diema 12:25 e re “pelaelo . . . e imela” pelo ya rena, “eupša lentšu le lebotse le tla e thabiša.” ‘Lentšu leo le lebotse’ le ka tšwa go setho sa lapa goba mogwera yo a ka botwago, e lego motho yo a sa swayaswayego diphošo goba yo a gononelago, eupša e le yo ‘a dulago a na le lerato ka dinako tšohle.’—Diema 17:17.

Dipolelo tše bohlale tšeo di hwetšwago ka Beibeleng di thušitše ba bantši gore ba hwetše lethabo leo le oketšegilego bophelong, gaešita le dinakong tše thata. Eka le wena dipolelo tšeo tše bohlokwa di ka go thuša.