ITALY ke naga ya dilo tše di fapafapanego—go tloga ka mabopo a menabo e metelele go fihla ka melokeloke ya dithaba tšeo di sa lekanego; go tloga ka selemo seo se fišago tšhiritšhiri ka borwa go fihla ka marega a tonyago kudu ka leboa. Gape ke naga ya dithabamollo, eupša ke dithabamollo tše sego kae feela—tše bjalo ka Stromboli le Thaba ya Etna—tšeo di thuthupago.

Italy ke e nngwe ya dinaga tše di nago le baagi ba bantši kudu kua Yuropa. E phatšitšwe ke batho ba ditšhaba tše dintši, tšeo di akaretšago Maaraba, Mabyzantium, Bagerika, Manorman le Bafenikia.

Naga yeo e humile ka matlotlo a histori le a tša bokgabo. Mašope a dinaga tša Gerika le Roma tša bogologolo goba meago ya Baroque le Renaissance e eme wa go bonagala ditoropong tše dintši tša Italy gotee le metseng ya gona. Diswantšho, dihlwadieme tša mmabole le methopo ya meetse di dirilwe ke borabokgabo ba bjalo ka Bernini, Michelangelo le Raphael.

Dijo di kgatha tema e bohlokwa bophelong bja letšatši le letšatši, gomme ditšo tše dintši di na le mokgwa wa tšona wa go apea. Gantši go jewa pasta pele, ke moka ya latelwa ke nama goba hlapi le merogo. Makhura a mohlware a dirišwa ka bontši, ka ge a tšweletšwa moo  ka boati. Pizza le risotto ke dijo tše di tumilego tša Mataliana.

Mataliana a tsebja ka go ba a borutho, go amogela baeng le go ba le bogwera. Mataliana a rata go boledišana le batho ba bangwe, ka go re’alo go tlwaelegile go bona batho ba boledišana mafelong a bulegilego a batho bohle goba ba boledišana ba tletše bophelo ge ba le gare ba itshepelela ditsejaneng.

Baagi ba bantši ba Italy ba ipolela gore ba tsena kereke ya Roma Katholika, eupša ke ba sego kae bao ba yago kerekeng ka mehla. Go thwe tutuetšo ya kereke e šetše e fokola nywageng ya morago bjale, ka ge batho ka kakaretšo ba hlokomologa melao yeo e lego kgale e le gona ya mabapi le go ntšha mpa le tlhalo.

Dihlatse tša Jehofa di a ata kua Italy. Di tsebja ka go ruta Beibele ka ge e le karolo ya bodiredi bja tšona bja phatlalatša gotee le ka go phela ka ditekanyetšo tša yona. Go na le diphuthego tše ka godimo ga tše 3 000 tša Dihlatse tša Jehofa nageng ka moka, gomme tše dintši tša diphuthego tše di fihlelela batho bao ba sa bolelego Setaliana. Go nyakega ga gore batho bašele ba rutwe Beibele go bonagala tabeng ya gore nywageng e lesome yeo e sa tšwago go feta, palo ya batho bašele e ipoeleditše gararo kua Italy.