Go ya ka dipalopalo tša Lefapha la tša Temo, nakong e itšego ngwageng wa 2012, 14.5 lekgolong ya badudi ba U.S. e lego palomoka ya batho ba dimilione tše 49, ba be “ba sa kgone go reka dijo tše di lekanego bakeng sa go fepa ditho tša malapa a bona ka moka.”

Nyakišišo yeo e dirilwego ka baithuti ba yunibesithing e hweditše gore mo e ka bago 56 lekgolong ya basadi le 41 lekgolong ya banna ba dumetše gore ba ipolaiša bjala, gomme nyakišišo yeo e re (banna) ba nwa mapotlelo a seswai ka go latelana mola (basadi) ba enwa mapotlelo a tshela ka go latelana.

Borathutamahlale bao ba dirilego diteko tša go iša ga botelele bja dimithara tša mo e ka bago tše 11 000 ka bodikela bja Lewatle la Pacific, ba hweditše gore dipaketheria le diphedi tše dingwe tše dinyenyane-nyenyane di hwetšagala ka boati moo—go sa šetšwe leswiswi, kgateletšo e matla gotee le dithempheretšha tše tonyago kudu. Pejana, go be go naganwa gore diphedi di ka hwetšwa ka sewelo moo.

E le ka maikemišetšo a go lwantšha go oketšega ga batho ba nonnego kudu, morago bjale balaodi ba Dubai ba holofeditše badudi grama e tee ya gauta, yeo e ka bitšago R390, ge ba ka fokotša boima bja mebele ya bona ka khilograma. E le gore ba hwetše gauta yeo, batho ba be ba swanetše go ingwadiša gomme ba fokotše boima bja mebele ya bona bonyenyane ka dikhilograma tše pedi kgweding ya Ramadan.