Mabel wa kua Argentina, o be a dula a swaregile gomme a šoma e le setsebi sa go thuša go tsošološa ditho tša mmele (physical-rehabilitation therapist). Ka 2007, o ile a thoma go ikwa a lapile kudu gomme a fela a opša ke hlogo o šoro letšatši le letšatši. O re: “Ke ile ka ya dingakeng tše dintši gomme ke lekile mehuta ka moka ya dihlare, eupša ga go seo se nthušitšego.” Mafelelong Mabel o ile a ya go dira skene sa MRI, seo se ilego sa bontšha gore o na le serurugi bjokong. O re: “Ke be ke maketše! Ke be ke sa dumele gore ke be ke phela le lenaba le ka gare ga ka.

“Le gona, ke be ke sa kwešiše gore boemo bja ka bo be bo mpefetše gakaaka’ng go fihlela ke buiwa. Ge ke be ke tsoga ka phapošing ya balwetši bao ba hlokago tlhokomelo e kgolo, ke be ke sa kgone go šutha. Ke be ke kgona feela go lebelela siling. Pele ke buiwa ke be ke dula ke swaregile e bile ke kgona go ikemela. Gateetee ke ge ke sa kgone go dira selo. Matšatši ao ke a feditšego phapošing yeo a be a tletše ka kgakanego le mašata a didirišwa tša kalafo, dialamo tša tšhoganetšo le go tsetla ga balwetši ba bangwe. Ke be ke ikwa ke dikologilwe ke bohloko le tlaišego.

“Lehono, nka re ke kaonefetše go fihla bokgoleng bjo itšego. Ke kgona go sepela ntle le go thušwa le go intšha ka dinako tše dingwe. Eupša mahlo a ka a bona dilo gabedi gomme mešifa ya ka ga se ya tšwa e šoma gabotse.”

O se ke wa nyema moko. Go Diema 17:22, Beibele e re: “Pelo e thabilego e etša sehlare se se fodišago, eupša moya o nyamilego o omiša marapo.” Mabel o gopola gore: “Ge ke dutše ke fola, ke be ke lebeletšana le ditlhohlo tšeo balwetši ba ka ba ilego ba lebeletšana le tšona. Ke be ke ekwa bohloko kudu ge ke be ke itšhidulla gomme ka dinako tše dingwe ke be ke nagana le go tlogela. Ke ile ka lwantšha dikgopolo tše bjalo tše fošagetšego, ka ge ke tseba gore maiteko ao a tla tliša dipheletšo tše dibotse.”

Eba le kholofelo gore o kgone go kgotlelela. Mabel o re: “Beibele e nthušitše go tseba lebaka leo ka lona go diregago masetlapelo. Eupša gape ke a tseba gore ge letšatši le lengwe le lengwe le feta, le re batametša kgauswi le nako yeo bohloko bo tla bego bo fedile sa ruri.” *

Gopola gore Modimo o tshwenyegile ka wena. (1 Petro 5:7) Mabel o gopola kamoo se se mo thušitšego ka gona ge a re: “Ge ke be ke yo buiwa, ke ile ka bona go nepagala ga Jesaya 41:10, moo Modimo a rego: ‘O se ke wa boifa gobane ke na le wena.’ Ke be ke ikwa ke atetšwe ke khutšo ka ge ke tseba gore Jehofa Modimo o be a tshwenyega ka seo se ntiragaletšego.”

Na o be o tseba? Beibele e ruta gore go tla tla nako yeo batho ba ka se sa hlwago ba tlaišwa ke mathata a tša maphelo.—Jesaya 33:24; 35:5, 6.