KA BOHLABELA bja Noka ya Motoyasu kua Toropong ya Hiroshima, Japane, go na le lešope leo bogolo bja moago wa lona o senyegilego ga e sa le go tloga ka 1945. Ke ka baka la’ng o sa ka wa agwa lefsa mola go fetile nywaga e ka bago e 70?

Ge o feditšwe go agwa ka 1915, moago wo wa mabato a mararo wo o agilwego ka ditena le leraga o be o šomišwa e le holo ya go bapatša tša intaseteri. Eupša seo se ile sa fetoga mesong ya August 6, 1945, ka 8:15. Ka nako yeo, pomo ya pele ya athomo ya tša ntwa e ile ya thuthupa mo e ka bago dimithara tše 550 godimo ga toropo, mo e nyakilego go ba ka godimo ga holo ye. Batho bao ba bego ba le ka gare ba ile ba hwa le semeetseng. Eupša karolo ya ka gare ya moago wo e ile ya šala e eme.

Ka ge o tlogetšwe o sa fetošwa, go ya ka makasine wa UNESCO *, moago wo ke “leswao leo le bonagalago le leo le lego matla leo le ilego la emeletšana le sebetša se matla seo se kilego sa dirwa ke motho.” Ka 1996 moago wo o ile wa ngwalwa go UNESCO World Heritage List bjalo ka Segopotšo sa Khutšo sa Hiroshima.

Lega go le bjalo, dikgopotšo tše bjalo tša nakong e fetilego ga se tša thibela ntwa, yeo gantši e bakwago ke boikgogomošo, botšhaba, le lehloyo la semorafo, la bodumedi le la meloko. Ka gona, na go tla dula go na le ntwa?

Karabo ya Beibele ke aowa! Psalme 46:9 e re: “[Modimo] o fediša dintwa go fihla pheletšong ya lefase. O robaganya bora gomme a ripaganya lerumo; dikoloi tša ntwa o di tšhuma mollong.” Ka nako e swanago, Modimo o tla tšeela pušo ya batho legato a diriša pušo ya gagwe ya lefase ka moka, e lego Mmušo wa Modimo wo o lego ka tlase ga Jesu Kriste, yo a kgethilwego go ba “Kgoši ya dikgoši.”—Kutollo 11:15; 19:16.

Ka morago ga moo, dikgopotšo tša ntwa di ka se be bohlokwa. Jesaya 65:17 e re: “Dilo tša pele”—dikgateletšo tša lehono le bohloko—“di ka se sa gopolwa, e bile di ka se sa rotoga pelong.”