Morwa wa gago wa nywaga e mehlano o bapala ka phapošing e nngwe. * Go se go ye kae, o kwa go thubega selo. O kitimela ka phapošing yeo gomme o hwetša morwa wa gago a eme pele ga sebjana sa letsopa seo se thubegilego. Go lewa ke dihlong ga gagwe go go botša ditaba ka moka.

O befetšwe, o botšiša morwa wa gago gore: “Na ke wena o thubilego sebjana sela?”

O araba ka go akgofa o re: “Aowa Mma, ga se nna!”

Ga se la mathomo ngwana wa gago wa nywaga e mehlano a bolela maaka ka selo seo se lego molaleng. Na o swanetše go tshwenyega?

Go bolela maaka ka tsela le ge e le efe ga se gwa loka. Beibele e re Jehofa Modimo o hloile “leleme la maaka.” (Diema 6:16, 17) Molao wo o bego o neilwe Isiraele o be o ganetša ka mo go feletšego motho le ge e le ofe yoo a bego a radia motho yo mongwe.—Lefitiko 19:11, 12.

Eupša, maaka ga a swane. Maaka a mangwe a kotsi; a bolelwa ka morero wa go gobatša motho yo mongwe. Maaka a mangwe a bolelwa ge motho a le ka tlase ga kgateletšego, mohlomongwe e le ge a leka go phema dihlong goba kotlo. (Genesi 18:12-15) Le ge go bolela maaka go fošagetše, maaka a mangwe a kotsi go feta a mangwe. Ge e ba ngwana wa gago a boletše maaka, ela hloko nywaga ya gagwe le lebaka leo ka lona a sa kago a bolela therešo.

O swanetše go rarolla bothata bjo ge ngwana wa gago e sa le yo monyenyane. Ngaka David Walsh o ngwadile gore: “Bana ba ithuta thuto e bohlokwa ge ba bolela therešo, kudukudu ge go le thata. Go re re be le ditswalano tše dibotse go nyakega gore re botege, gomme maaka a senya potego e bjalo.” *

Lega go le bjalo, o se ke wa tšhoga. Taba ya gore ngwana wa gago o boletše maaka ga e bolele gore ke yo mobe. Gopola gore Beibele e re: “Bošilo bo kgokeletšwe pelong ya mošemane.” (Diema 22:15) Bana ba bangwe ba bontšha bošilo bjo bjalo ka go bolela maaka, mohlomongwe ba nagana gore ke tsela e bonolo ya go phema kotlo. Ka gona, tsela yeo o arabelago ka yona e bohlokwa.

Leka go hwetša lebaka leo ngwana wa gago a bolelago maaka. Na o tšhaba kotlo? Na ga a nyake go go nyamiša? Ge e ba ngwana wa gago a bolela maaka gore a kgahliše bagwera ba gagwe, na ke ka gobane a se a gola ka mo go lekanego go kwešiša phapano magareng ga selo sa kgonthe le sa boikgopolelo? Ge e ba o tseba lebaka leo ka lona ngwana wa gago a bolelago maaka, o tla kgona go mo phošolla gakaone.—Molao wa motheo wa Beibele: 1 Bakorinthe 13:11.

Ka dinako tše dingwe mmotše go e na le go mmotšiša. Boemong bjoo bo hlalositšwego mathomong, mma yo a bego a šetše a tseba seo se diragetšego, o ile a botšiša morwa wa gagwe a galefile gore: “Na ke wena o thubilego sebjana sela?” Ngwana o ile a bolela maaka, mohlomongwe e le ge a tšhaba kgalefo ya Mmagwe. Eupša go e na le go botšiša ngwana ka go mo latofatša, mohlomongwe mma a ka ba a ile a fo re: “Aowa hle, o thubile sebjana!” Ka go mmotša go e na le go mmotšiša, mma ga a dire gore ngwana a lekege go bolela maaka—e bile o mo thuša gore a hlagolele mokgwa wa go botega.—Molao wa motheo wa Beibele: Bakolose 3:9.

Mo rete ge a botega. Ka tlhago bana ba rata go kgahliša batswadi ba bona, ka gona diriša tshekamelo yeo. Dira gore ngwana wa gago a tsebe gore potego ke selo sa bohlokwa ka gae gomme o letetše gore le yena a bolele therešo.—Molao wa motheo wa Beibele: Baheberu 13:18.

Hlalosetša ngwana wa gago ka mo go kwagalago gore go bolela maaka go senya potego gomme go ka tšea nako go e aga gape. Mo kgothaletše go ba le mekgwa e mebotse ka go mo reta ge a bolela therešo. Ka mohlala, o ka re: “Ke a thaba ge o botega.”

Bea mohlala. Go molaleng gore o ka se letele ngwana wa gago gore a bolele therešo ge e ba a go kwa o bolela mantšu a swanago le a rego, “Mmotše gore ga ke gona” mola o sa nyake go bolela le motho founong goba gore, “Ga ke ye felo lehono, ke a babja” mola o fo nyaka go iketla.—Molao wa motheo wa Beibele: Jakobo 3:17.

Diriša Beibele. Melao ya yona ya motheo le dipego tša yona tša kgonthe di dira gore motho a botege. Puku ya Ithute go Morutiši yo Mogolo, yeo e gatišitšwego ke Dihlatse tša Jehofa, e ka go thuša gore o nweletše melao ya motheo ya Beibele ngwaneng wa gago. Kgaolo 22 e na le sehlogo se se rego: “Lebaka Leo ka Lona re sa Swanelago go Bolela Maaka.” (Bala karolo e tsopotšwego go sona lepokising le le rego: “ Puku ya go Thuša Ngwana wa Gago.”) Puku ya