Wena le molekane wa gago le sa tšwa go ngangišana. O ipotša gore ‘Ga go hlokagale gore ke kgopele tshwarelo. Ga se nna ke thomilego!’

O kgetha go tlogela taba yeo, eupša se se dira gore le se lokologe. O nagana gape ka go kgopela tshwarelo, eupša ga o kgone go bolela mantšu a a bonolo a rego: “Ke kgopela tshwarelo.”

Boikgantšho. Charles * e lego monna yo a nyetšego o dumela ka gore: “Ka dinako tše dingwe boithati bo dira gore ke thatafalelwe ke go bolela gore ‘Ke kgopela tshwarelo.’” Go ikgantšha go ka go dira gore o be le dihlong tša go amogela gore o bile le karolo ngangišanong ya lena.

Pono ya gago. O ka ipotša gore o swanetše go kgopela tshwarelo feela ge e ba e le wena o bakilego bothata. Mosadi yo a lego lenyalong e lego Jill o re: “Go bonolo go bolela gore ke ‘kgopela tshwarelo’ ge e ba ke tseba gore ke nna ke nago le molato. Eupša go thata ge e ba bobedi bja rena re boletše mantšu ao re itsholelago ona. Ke ra gore, lebaka la gore ke kgopele tshwarelo ke lefe ge e ba bobedi bja rena re sentše?”

O ka itokafatša le go feta ge e ba o nagana gore seo se diregilego e tloga e le molato wa molekane wa gago. Monna yo a lego lenyalong e lego Joseph o re: “Ga se gantši o ka bolelago gore o kgopela tshwarelo kudukudu ge o kgodišegile gore ga o na molato.”

Tsela yeo o godišitšwego ka yona. Mohlomongwe o godišeditšwe lapeng leo go bego go kgopelwa tshwarelo ka sewelo. Ge e ba go le bjalo, o ka ba o se wa ithuta go amogela diphošo tša gago. Ka ge o se wa itlwaetša go kgopela tshwarelo gakaalo ge o sa le yo monyenyane, o ka thatafalelwa ke go dira bjalo ge o šetše o godile.

Nagana ka molekane wa gago. Leka go nagana kamoo o ilego wa ikwa ka gona ge motho yo mongwe a be a go kgopela tshwarelo. Ke ka baka la’ng o sa dire gore molekane wa gago a ikwe ka tsela yeo? Le ge o nagana gore ga o na molato, o ka kgopela tshwarelo ka ge molekane wa gago a kwele bohloko goba ka baka la tsela yeo o ilego wa itshwara ka yona o se wa ikemišetša. Mantšu a bjalo a ka dira gore molekane wa gago a ikwe a le kaone.—Molao wa motheo wa Beibele: Luka 6:31.

Nagana ka lenyalo la gago. O se ke wa lebelela go kgopela tshwarelo e le go palelwa eupša go lebelele e le tsela ya go atlegiša lenyalo la gago. Go oketša moo, Diema 18:19 e bontšha gore motho yo a bolokago sekgopi “o tiile go feta sebo.” Ga go bonolo go dira khutšo ge e ba motho a na le moya o bjalo wa go ikemela. Ka lehlakoreng le lengwe, ge o kgopela tshwarelo go bjalo ka ge eka o tima mollo. Ge e le gabotse, o etiša lenyalo la gago pele.—Molao wa motheo wa Beibele: Bafilipi 2:3.

Kgopela tshwarelo ka pela. Ke therešo gore ge e ba o se na molato o ka thatafalelwa ke go kgopela tshwarelo. Eupša diphošo tša molekane wa gago ga di lokafatše tsela e mpe yeo o arabelago ka yona. Ka gona o se ke wa dikadika go kgopela tshwarelo, o ipotša gore taba yeo e tla feta le nako. Ge o kgopela tshwarelo o ka nolofaletša le molekane wa gago gore le yena a kgopele tshwarelo. Le gona ge e ba o dula o itlwaetša, go kgopela tshwarelo go tla ba bonolo go wena.—Molao wa motheo wa Beibele: Mateo 5:25.

Bontšha gore o tiišitše. Go lokafatša ditiro tša gago ga go swane le go kgopela tshwarelo bakeng sa tšona. Le gona, go bolela gore, “Ke maswabi ge o tšeetše taba yeo godimo” mohlomongwe ka maikwelo a go gegea, ga se go kgopela tshwarelo le gatee! Amogela gore o ikarabela ka ditiro tša gago le taba ya gore molekane wa gago o kwele bohloko, go sa šetšwe gore o molato goba ga o molato.

Ikemišetše go lebana le ditherešo. Ka boikokobetšo amogela gore o tla dira diphošo. Go ba gona, ka moka re dira diphošo! Le ge o nagana gore ga o na molato, tšea gore mohlomongwe ga o tsebe ditaba ka botlalo. Beibele e re: “Yo a bolelago pele tshekong o bonala a nepile go fihlela ge wa gabo a etla gomme a mmotšološiša.” (Diema 18:17) Go tla ba bonolo gore o kgopele tshwarelo le go amogela mafokodi a gago ge e ba o sa ikgogomoše.