Batho ba bangwe ba bolela gore ga go kgonege go reta ngwana ka mo go feteletšego. Ba bangwe ba bolela gore go dula o reta ngwana go ka mo senya.

Go sa šetšwe gore o reta ngwana wa gago gakaakang, o swanetše go ela hloko tsela yeo o mo retago ka yona. Ke theto ya mohuta ofe yeo e ka mo tutuetšago? Ke ya mohuta ofe yeo e ka mo paledišago go dira tšwelopele? O ka mo nea bjang theto yeo e tlago go mo hola?

Ditheto ga di swane. Nagana ka se.

Theto yeo e feteletšego e ka ba kotsi. Batswadi ba bangwe ba nea bana ba bona theto yeo e sa swanelago e le ge ba leka go ba thuša gore ba ikholofele. Ngaka David Walsh o lemoša gore bana “ba hlalefile kudu moo ba kgonago go bona ge e ba motswadi a feteletša gomme ba phetha ka gore ga se a tiiša ka seo a se bolelago. Ba a tseba ge theto e sa ba swanele, gomme ba ka phetha ka gore ba se sa mmota.” *

Theto yeo e theilwego bokgoning e lokile. A re re ngwana wa gago o na le bokgoni bja go thala. Ke ga tlhago gore o ikwe o nyaka go mo reta ka baka la se, e lego seo se ka mo tutueletšago go kaonefatša bokgoni bja gagwe le go feta. Eupša go ka ba le seo se mo gogelago morago. Theto yeo e theilwego bokgoning feela e ka dira gore ngwana wa gago a nagane gore o swanetše go hlagolela feela bokgoni bjoo bo itlelago gabonolo. A ka ba a phema go ithuta dilo tše difsa ka ge a boifa gore o tla palelwa. A ka ipotša gore: ‘Ga go na lebaka la gore ke itapiše ka go dira selo seo ke se nago bokgoni bja sona.’

Theto yeo e theilwego maitekong ke e kaonekaone. Bana bao ba retwago ka lebaka la boikgafo bja bona le kgotlelelo e sego feela ka lebaka la bokgoni bja bona ba lemoga therešo e bohlokwa ya gore go hlagolela bokgoni go nyaka go se fele pelo le maiteko. Puku ya Letting Go With Love and  Confidence e bolela gore ge ba tseba seo, “ba ntšha ka ga tšhwene e le gore ba atlege. Le ge ba sa atlege, ga ba itšee ba paletšwe eupša ba itebelela e le diithuti.”

Reta maiteko e sego bokgoni feela. Go botša ngwana wa gago gore “ke a bona gore o ile wa ikgafa go seo o se thadilego” go ka ba le mehola go feta go mmotša gore “o na le bokgoni bja tlhago.” Dipolelo tše ka bobedi di nea theto eupša polelwana ya bobedi e ka fetiša kgopolo ya gore bokgoni bja tlhago ke bjona feela bjo ngwana wa gago a ka bago le bjona.

Ge o reta maiteko a ngwana wa gago, o mo ruta gore a ka kaonefatša bokgoni bja gagwe ge a itlwaetša. Ngwana wa gago a ka ithuta go dira dilo tše difsa ka kgodišego.—Molao wa motheo wa Beibele: Diema 14:23.

Thuša ngwana wa gago go lebeletšana le go se atlege. Gaešita le batho ba go loka ba dira diphošo, mohlomongwe gantši. (Diema 24:16) Eupša ka morago ga phošo e nngwe le e nngwe ba a emelela, ba ithuta go yona gomme ba tšwela pele ka bophelo. O ka thuša ngwana wa gago bjang go hlagolela pono yeo e botse?

Tšwela pele o tsepamišitše kgopolo maitekong a gagwe. Ela hloko mohlala o latelago. A re re o dula o botša morwedi wa gago gore: “O kgona dipalo ka tlhago” eupša a se atlege molekong wa gagwe wa dipalo. A ka nagana gore o lahlegetšwe ke bokgoni bja gagwe gomme a se bone bohlokwa bja go leka go kaonefatša.

Lega go le bjalo, ge o tsepamiša kgopolo maitekong o thuša ngwana wa gago go hlagolela go ba le kgotlelelo. O thuša morwedi wa gago go lebelela go se atlege e se go palelwa. Go e na le gore a hwe matwa, a ka leka tsela e nngwe goba a šoma ka thata.—Molao wa motheo wa Beibele: Jakobo 3:2.

Swaya diphošo ka tsela e agago. Ge o swaya ngwana wa gago diphošo ka tsela ya maleba, se se tla mo thuša go e na le go mo gobatša. Gape, ge e ba o dula o mo nea theto e swanetšego, ga go pelaelo gore ngwana wa gago o tla amogela dikeletšo tša kamoo a ka kaonefatšago ka gona gomme katlego ya gagwe ya tlišetša bobedi bja lena lethabo.—Molao wa motheo wa Beibele: Diema 13:4.