Ba bangwe ba lemogile gore bafsa bao ba fetšago nako e ntši ba diriša inthanete  . . .

• ba ka thoma go e lemalela.

• ba ka hlaselwa inthaneteng goba bona ba hlasela ba bangwe.

• ba ka thoma go bogela diswantšho tša batho bao ba sa aparago ka phošo goba ka boomo.

GO LEMALELA

Dilo tše dingwe tšeo di lego inthaneteng go swana le dipapadi, di hlametšwe gore go be thata go di tlogela. Puku ya Reclaiming Conversation e re: “Mananeo a difouno a hlametšwe gore re dule re swere founo.” Babapatši ba dira tšhelete ka dipapatšo tšeo di tšwelelago didirišweng tša rena tša elektroniki. Ge re fetša nako e ntši re le mananeong ao a nago le dipapatšo, bona ba dira tšhelete.

SEO O KA NAGANAGO KA SONA: Na bana ba gago ba bonagala okare ba ka se kgone go phela ka ntle le didirišwa tša elektroniki? O ka ba thuša bjang gore ba diriše nako ya bona gabotse? —BAEFESO 5:15, 16.

GO HLASELWA GOBA GO HLASELA INTHANETENG

Gantši ge batho ba bangwe ba tsene inthaneteng, ba ba bogale, ba a rogana e bile ga ba na taba le maikwelo a batho ba bangwe. Seo se dira gore ba hlasele ba bangwe.

Batho ba bangwe ba dira dilo tšeo di sego botse inthaneteng ka ge ba nyaka go bonwa goba go tuma. Goba motho a ka kwa bohloko goba a ikwa a se a swarwa gabotse ge a bona gore batho ba be ba dirile moletlo, eupša yena ba se ba mo mema.

SEO O KA NAGANAGO KA SONA: Na bana ba gago ba phara dilo tša go se kgahliše inthaneteng? (Baefeso 4:31) Ba ikwa bjang ge ba ba bangwe ba dira dilo tše itšego ba se ba ba mema?

DISWANTŠHO TŠA BATHO BAO BA SA APARAGO

Matšatši a go bonolo go hwetša goba go bona diswantšho tša batho bao ba sa aparago inthaneteng. Le ge didirišwa tše dintši tša elektroniki di dumelela batswadi go laola seo bana ba bona ba se bonago, ga se ka mehla seo se kgonegago. Ka gona ngwana a ka kgona go bona diswantšho tša batho bao ba sa aparago.

Go romela goba go amogela melaetša ya thobalano ka founo. Mafelong a mangwe, bafsa bao ba romelanago melaetša ya thobalano ka founo ba ka bonwa molato wa go romela diswantšho tša bana bao ba sa aparago.

SEO O KA NAGANAGO KA SONA: O ka thuša bjang bana ba gago gore ba se ke ba duma go bogela goba go romela diswantšho tša batho bao ba sa aparago inthaneteng?—BAEFESO 5:3, 4.

TLWAETŠA BANA BA GAGO

Le ge go le bonolo gore bana ba diriše thekinolotši, ba sa hloka thušo. Puku ya Indistractable e re: Go fa ngwana founo ya go kgona go tsena inthaneteng pele a ka kgona go e diriša gabotse, go swana le go mo tlogela a fofela ka gare ga letamo la go rutha mola a sa kgone go rutha.”

Kgetha ditšhišinyo tšeo o ka ratago go di diriša goba o ingwalele tša gago.

• Go boledišana le ngwanaka gore a se ke a phara goba go bolela dilo tšeo di sa kgahlišego inthaneteng

• Go thuša ngwanaka gore a fenye maikwelo a go ikwa okare batho ga ba mo nyake

• Go dira sohle seo nka se kgonago go šireletša ngwanaka ka go thibela diwepesaete tša go se kgahliše

• Go fela ke tšea founo ya ngwanaka go bona gore e na le eng, le gore o e diriša go bogela eng

• Go botša ngwanaka gore a ka fetša nako e kaakang letšatši le lengwe le lengwe a diriša didirišwa tša gagwe tša elektroniki

• Go thibela ngwanaka go diriša founo ka kamoreng bošego

• Go bea molao wa gore go se be le yo a dirišago sedirišwa sa elektroniki ge lapa le eja mmogo