Ge re itokišeletša go ithuta, re ka ipotšiša gore, ‘Ke tlo ithuta’ng?’ Eupša re swanetše go gopola gore le ge go na le dilo tšeo re letetšego go ithuta tšona, seo ga se bolele gore ga gona dilo tše diswa tšeo Jehofa a nyakago re di tseba. Re ka dira’ng gore re kwe seo Jehofa a re rutago sona?

Rapelela bohlale. Kgopela Jehofa a go thuše go naganišiša ka seo a nyakago o ithuta ka sona gona bjale. (Jak. 1:5) O se ke wa no kgotsofalela dilo tšeo o šetšego o di tseba.—Die. 3:​5, 6.

Dumelela matla a lentšu la Modimo a šoma bophelong bja gago. “Lentšu la Modimo le a phela.” (Baheb. 4:12) Nako e nngwe le e nngwe ge re bala Beibele re ka ithuta selo se seswa. Eupša seo se tlo direga feela ge re ikemišeditše go ithuta dilo tšeo Jehofa a re rutago tšona.

Thabela dilo ka moka tšeo Jehofa a di dirišago go re ruta. Dilo tšeo a di dirišago go re ruta di swana le “monyanya wa dijo tša makhura.” (Jes. 25:6) O se ke wa phaela ka thoko dilo tšeo o naganago gore o ka se thabele go di bala. Ge o ka di bala di tlo go thuša gore o be motho yo mokaone e bile o tlo thabela go ithuta ka Jehofa.