1-2. Ke ka baka la’ng re thaba ge re thuša le go nea batho ba bangwe?

 GE JEHOFA a be a re bopa, o dirile gore re thabe kudu ge re nea le go thuša ba bangwe go feta ge bona ba re direla. (Dit. 20:35) Na se se ra gore ga re thabe ge batho ba bangwe ba re thuša le go re nea dilo tše itšego? Aowa. Ka moka ga rena re a thaba ge motho yo mongwe a re nea mpho. Eupša re thaba kudu ge e le rena re neago batho ba bangwe. Ke ka baka la’ng go nea go re hola kudu go feta go amogela?

² Ke ka gobane go nea go dira gore re thabe kudu, e bile Jehofa ga a re kgethele gore re nee batho ba bangwe eng. Re thaba kudu ge re nyakana le ditsela tšeo re ka thušago batho ba bangwe ka tšona le go dira sohle seo re ka se kgonago go ba thuša. Go thabiša kudu go bona kamoo Jehofa a re bopilego ka gona.—Ps. 139:14.

3. Ke ka baka la’ng re re Jehofa ke “Modimo yo a thabilego”?

³ Beibele e bolela gore re thaba kudu ge re nea batho ba bangwe, ke ka baka leo e hlalosago Jehofa e le “Modimo yo a thabilego.” (1 Tim. 1:11) Jehofa ke yena wa mathomo wa go nea, e bile ga go yo a ka neago go feta yena. Ke ka baka leo Moapostola Paulo a boletšego gore “gobane ka yena re na le bophelo, re a sepela e bile re gona” (Dit. 17:28) Re a tseba gore “Mpho e nngwe le e nngwe e botse le neo e nngwe le e nngwe e phethagetšego e tšwa godimo.”—Jak. 1:17.

4. Re ka thušwa ke’ng gore re thabe kudu?

⁴ Ka moka ga rena re a tseba gore re nyaka go dula re thabišwa  ke go nea le go thuša batho ba bangwe. Re ka thušwa ke go ekiša tsela yeo Jehofa a neago batho ba bangwe. (Baef. 5:1) Ka ge re tlo ithuta gore re ka ekiša Jehofa bjang, re tlo bona le gore re ka dira’ng ge re bona okare batho ba bangwe ga ba tšeele godimo dilo tšeo re ba direlago tšona. Dilo tše ka moka di tlo re thuša gore re dule re nyaka go nea batho ba bangwe le go dula re thabile.

EKIŠA JEHOFA KA GO RATA GO NEA

5. Ke dilo dife tšeo Jehofa a re direlago tšona?

⁵ Ke dilo dife tšeo di re bontšhago gore Jehofa o rata go nea? A re boneng mehlala e se go kae. Jehofa o re nea dilo tšeo re di hlokago e lego dijo, diaparo le lefelo la go dula. Le ge a ka se dule a re nea dilo tša maemo a godimo, o tlo dula a re nea dilo tšeo re di hlokago. (Ps. 4:8; Mat. 6:31-33; 1 Tim. 6:6-8) Na Jehofa o re nea dilo tšeo re di hlokago ka gobane a gapeletšega? Aowa! Bjale ke ka baka la’ng a re thuša?

6. Re ithuta’ng go Mateo 6:25, 26?

⁶ Jehofa o re nea dilo tšeo re di hlokago ka gobane a re rata. Re bona se ka mantšu ao Jesu a boletšego go Mateo 6:25, 26. (Bala.) Jesu o dirišitše tlholo go re hlalosetša kamoo Jehofa a re hlokomelago ka gona. O boletše ka dinonyana gore: “Ga di bjale peu goba go buna goba go kgobela dintlong tša polokelo.” O tšwetše pele ka gore: “Tatago lena wa legodimong o a di fepa.” Ka morago ga go bolela dilo tše ka moka o ile a botšiša gore: “Na ga le bohlokwa go di feta?” Jesu o be a leka go re ruta’ng? O be a re ruta gore Jehofa o rata bahlanka ba gagwe kudu go feta diphoofolo. Ka ge Jehofa a kgona go hlokomela diphoofolo, le rena re a tshepa gore o tla re hlokomela! Jehofa o swana le tate yo lerato, o hlokomela lapa la gagwe ka gobane a le rata.—Ps. 145:16; Mat. 6:32.

7. Ke tsela efe e nngwe yeo re ka ekišago Jehofa ka yona? (Bona le seswantšho.)

⁷ Re ka ekiša Jehofa ka go nea batho ba bangwe dilo tšeo ba di hlokago ka gobane re ba rata. Ka mohlala, na go na le Mokriste gotee le wena yo o mo tsebago yo a hlokago dijo goba diaparo? Jehofa a ka go diriša gore o thuše motho yoo ka go mo nea dilo tšeo a di hlokago. Batho ba Jehofa ba tsebega ka go thušana ge go na le mathata. Ka mohlala, nakong ya Covid bana babo rena ba be ba thušana ka go fana dijo, diaparo le dilo tše dingwe tše bohlokwa. Ba bangwe ba be ba  neela go thekga modiro wa lefaseng ka moka. Seo se dirile gore bana babo rena lefaseng ka moka ba hwetše thušo. Bana babo rena le dikgaetšedi bao ba kgonnego go thuša, ba kwešišitše gabotse mantšu ao a lego go Baheberu 13:16 ao a rego: “Le se ke la lebala go dira botse le go abelana le ba bangwe dilo tšeo le nago le tšona, gobane Modimo o kgahlišwa ke dihlabelo tše bjalo.”

8. Jehofa o re nea matla a gore re kgone go dira’ng? (Bafilipi 2:13)

⁸ Jehofa ke yena a re neago matla. Ke Ramatlaohle. O thabela go re nea matla ao re a hlokago e le gore re mo hlankele. (Bala Bafilipi 2:13.) Na go na le nako yeo o ilego wa kgopela Jehofa gore a go fe matla a go kgona go ganetša teko e itšego goba go kgotlelela mathata? Mohlomongwe o no hloka matla a go kgotlelela mathata letšatšing lona leo. Ge o bona Jehofa a araba thapelo ya gago ka go go nea matla, o ka dumelelana le mantšu ao moapostola Paulo a ilego a a ngwala ge a be a re: “Ka gona ke kgona go dira dilo ka moka ka ge Morena a mpha matla.”—Bafil. 4:13

9. Re ka diriša bjang matla a rena go thuša ba bangwe? (Bona le seswantšho.)

⁹ Ka ge re le lerole, re ka diriša matla a rena go thuša ba bangwe. Re ka se kgone go nea batho ba bangwe matla goba mafolofolo. Eupša re ka diriša matla a rena goba mafolofolo a rena go ba thuša. Ka mohlala, re ka thuša batho bao ba tšofetšego ka go ba ela mabenkeleng, go ba thuša go hlwekiša ka gae le go ba direla dilo tše dingwe tšeo ba di hlokago. E bile ge e ba go kgonega, re ka ithaopela go hlwekiša Holo ya Mmušo goba go thuša ka go e hlokomela. Ge re ka diriša matla a rena ka tsela ye, re tlo kgona go thuša bana babo rena le dikgaetšedi.

10. Re ka kgothatša bjang ba bangwe ka seo re se bolelago?

¹⁰ Dilo tšeo re di bolelago di ka kgona go tiiša ba bangwe. Na go na le motho yo o tsebago gore o tlo thaba ge o ka mo reta? Ge e ba a le gona, mo rete! Goba na o tseba motho yo a hlokago go kgothatšwa? Ge e ba o mo tseba, hle mo kgothatše! O ka kgetha go mo etela, wa mo founela goba wa mo romela molaetša. O se ke wa tshwenyega kudu gore o tla reng. Mantšu a mabedi a mararo ao o a boletšego a ka thuša ngwaneno gore a kgone go kgotlelela mathata ao a lebeletšanego le ona.—Die. 12:25; Baef. 4:29.

11. Jehofa o nea ba bangwe bjang bohlale bja gagwe?

¹¹ Jehofa o re nea bohlale. Jakobo o ngwadile go re: “Ge e ba mang le mang wa lena a hloka bohlale, a a tšwele pele a kgopela Modimo, gobane o fa bohle kudu ka ntle le go  goboša.” (Jak. 1:5) Mantšu a a re bontšha gore Jehofa ga a timane ka bohlale bja gagwe. O re nea bjona. Jakobo o bontšhitše gore ge Jehofa a re nea bohlale ga a re goboše. Jehofa ga a nyake gore re tšhabe go mo kgopela bohlale bja gagwe. Go e na le moo, o nyaka gore re mo kgopele bjona re lokologile.—Die. 2:1-6.

12. Ke ditsela dife tšeo re ka thušago ba bangwe ka tšona?

¹² Rena re ka ekiša Jehofa bjang? Re ka ekiša Jehofa ka go ruta ba bangwe dilo tšeo re di tsebago. (Ps. 32:8) Bahlanka ba Jehofa ba na le dibaka tše dintšhi tša go ruta ba bangwe. Ka mohlala, ba thuša bao ba sa thomago go ya tšhemong. Bagolo ba thuša bahlanka ba bodiredi le bana babo rena bao ba kolobeditšwego go dira dikabelo tša bona gabotse ka phuthegong. Ba thuša bana babo rena bao ba sa ba felele pelo. Le gona bao ba kgonago go hlokomela meago ya mokgatlo ba tlwaetša batho ba bangwe gore le bona ba kgone go hlokomela meago yeo.

13. Re ka dira’ng gore re ekiše tsela yeo Jehofa a tlwaetšago ba bangwe ka yona?

¹³ Batho bao ba tlwaetšago ba bangwe ba leka ka thata go ekiša kamoo Jehofa a tlwaetšago ba bangwe ka gona. Jehofa o thabela go nea batho bohlale bja gagwe. Le rena re nyaka go swana le Jehofa, re thabele go tlwaetša batho ba bangwe. Ga se ra swanela go tšhaba go tlwaetša ba bangwe re nagana gore ba tlo re tšeela legato. Ba bangwe ba re: ‘Ka ge ba se ba tlwaetšwa ke motho le bona ba ka se tlwaetše ba bangwe.’ Bahlanka ba Jehofa ga se ba swanela go nagana bjalo. Go e na le moo, re thabela go tlwaetša ba bangwe le go dira sohle seo re ka se kgonago go ba thuša. (1 Bathes. 2:8) Re tshepa gore mafelelong le bona ba tlo “swanelegela gabotse go ruta ba bangwe.” (2 Tim. 2:1, 2) Ge e ba re ikemišeditše go thušana re tlo thaba, e bile le bao re ba tlwaetšago le bona ba tlo thaba.

GE BA BANGWE BA SA LEBOGE

14. Batho ba bantšhi ba dira’ng ge re ba thuša?

¹⁴ Gantšhi re tlwaetše gore ge re thuša batho ba bangwe ba re leboge. Ba ka re leboga ka go re ngwalela molaetša goba go re leboga ka tsela e itšego. (Bakol. 3:15) Re thaba kudu ge batho ba bangwe ba leboga dilo tšeo re ba diretšego tšona.

15. Re ka thušwa ke’ng ge batho ba bangwe ba sa re leboge?

¹⁵ Ka dinako tše dingwe, batho ba bangwe ba ka no se leboge dilo tšeo re ba diretšego tšona. Ba ka no se leboge nako yeo re e feditšego re ba thuša goba tšhelete yeo re e dirišitšego go ba thuša. Ge e ba se se ka re diragalela, re ka thušwa ke’ng gore re se ke ra nyama? Re ka thušwa ke go gopola lengwalo la sehlogo, Ditiro 20:35. Ga re thabišwe ke gore batho ba bangwe ba a re leboga ge re ba thušitše, ka gobane re ka thabela go nea batho ba bangwe le ge ba sa re leboge. Bjang? A re boneng ditsela tše sego kae tšeo di ka re thušago go thaba.

16. Re ka thušwa ke’ng gore re dule re nea batho ba bangwe re thabile?

¹⁶ Dula o ekiša Jehofa. Jehofa o dula a re nea dilo tše dibotse le ge re sa mo leboge. (Mat. 5:43-48) Jehofa o re botša gore adimang “le sa holofele go boelwa ke selo,” gobane “moputso wa lena e tla ba o mogolo.” (Luka 6:35) “Selo” seo go bolelwago ka sona mo temaneng ye se akaretša le go lebogwa ke ba bangwe. O se ke wa nyama ge batho ba bangwe ba sa go leboge. Dula o gopola gore Jehofa ke yena a tlago go go putsa ka ge o rata go nea ba bangwe.—Die. 19:17; 2 Bakor. 9:7.

17. Lengwalo la Luka 14:12-14 le re ruta’ng?

 ¹⁷ Selo se sengwe seo se ka re thušago go ekiša Jehofa ge re nea batho ba bangwe ke go gopola seo Jesu a se boletšego go Luka 14:12-14. (Bala.) Ga se phošo go thuša batho bao o tsebago gore le wena ba tlo go thuša. Re swanetše go dira’ng ge e ba re lemoga gore re be re thuša batho ba bangwe re letetše gore le bona ba tla re thuša? Re ka leka go diriša seo Jesu a ilego a re botša sona. Re ka thuša batho bao re tsebago gabotse gore ba ka se kgone go re thuša. Re tlo thaba go tseba gore re ekiša Jehofa. Go direla batho ba bangwe dilo re sa letele selo, go tlo re thuša gore le ge ba sa re leboge re dule re thabile.

18. Ke eng seo re sa swanelago go se dira, gona ka baka la’ng?

¹⁸ O se ke wa belaela maikemišetšo a batho ba bangwe. (1 Bakor. 13:7) Ge e ba batho ba bangwe ba sa re leboge, re ka ipotšiša gore: ‘Ba lebetše goba ba dira ka boomo?’ Mohlomongwe go ka ba go na le mabaka a mangwe ao a dirilego gore ba palelwe ke go re leboga. Ba bangwe ba ka thabela dilo tšeo re ba direlago tšona eupša ba hwetša go le thata go hlalosa kamoo ba ikwago ka gona. Mohlomongwe ba ka jewa ke dihlong ka ge e le bona ba tlwaetšego go thuša ba bangwe. Ge re rata bana babo rena le dikgaetšedi re ka se belaele maikemišetšo a bona. Seo se tlo re thuša gore re dule re nea batho ba bangwe re thabile.—Baef. 4:2

19-20. Ke ka baka la’ng re sa swanela go felela ba bangwe pelo? (Bona le seswantšho.)

¹⁹ O se ke wa felela ba bangwe pelo. Kgoši e bohlale Solomone o ile a ngwala go re: “Lahlela borotho bja gago ka meetseng, ka gobane o tla bo hwetša gape ka morago ga matšatši a mantšhi.” (Mmo. 11:1) Mantšu a a re ruta gore batho ba bangwe ba ka tla ba re leboga ka morago ga nako. Kgaetšedi yo mongwe o ile a diragalelwa ke se.

²⁰ Mengwaga e mentšhi e fetilego mosadi wa molebeledi wa tikologo o ile a ngwalela kgaetšedi yo a sa tšwago go kolobetšwa lengwalo. O ile a mo kgothaletša gore a dule a  botegela Modimo. Ka morago ga mengwaga e seswai kgaetšedi yoo a hweditše lengwalo leo, o ile a ngwalela mosadi yola wa molebeledi wa tikologo lengwalo. O mo ngwaletše gore: “Ke go ngwalela lengwalo le ke nyaka go go tsebiša gore o nthušitše kudu mengwageng e fetilego le ge wena o be o sa tsebe.” O tšwetše pele ka go hlalosa gore: “Lengwalo la gago le nkgothaditše kudu. Temana yeo o nngwaletšego yona nka se tsoge ke e lebetše.” a O ile a hlalosa le ka mathata ao a ilego a kopana le ona, o itše: “Ke be ke se sa nyaka selo, ke lapišitšwe ke go ba Mokriste, e bile ke nyaka go tlogela dilo ka moka. Eupša ke ile ka gopola temana yela o ilego wa nngwalela yona, e ile ya nthuša gore ke se ke ka fela matla. Lengwalo leo o ilego wa nngwalela lona le temana yeo o ilego wa nkgothatša ka yona, ke tšona tšeo ke bego ke itshwareletše ka tšona mengwaga ka moka e seswai.” Mosadi wa molebeledi wa tikologo o ile a thaba kudu ge a hwetša lengwalo la kgaetšedi yoo le ge go be go fetile nako e telele! Le rena re ka thuša batho ba bangwe eupša ba tla ba re leboga ka morago ga nako e telele.

21. O ikemišeditše go dira’ng gore o dule o ekiša Jehofa?

²¹ Re ithutile gore Jehofa o re bopile go swana le yena. Le ge re thabišwa ke go hwetša dimpho, Jehofa o dirile gore re thabe le go feta ge re nea batho ba bangwe. Re a thaba ge re thuša bana babo rena, e bile re a thaba ge ba re leboga. Le ge motho yo re mo thušitšego a ka se re leboge ga se ra swanela go nyama, ka gobane re a tseba gore re ekišitše Jehofa. Dula o gopola gore ge o nea ba bangwe, “Jehofa a ka kgona go go nea tše dintšhi kudu go feta [tšeo].” (2 Dikor. 25:9) Ga go na motho yo a ka neago go phala Jehofa! Le gona ga go yo a ka re putsago go feta Jehofa. A re direng sohle seo re ka se kgonago gore re ekiše Jehofa ka go rata go thuša batho ba bangwe.