1-2. (a) Bophelo bo be bo le bjang kua Judea ge Paulo a be a ba ngwalela lengwalo? (b) Ke ka baka la’ng Bakriste bao ba be ba tloga ba hloka lengwalo leo?

 Bakriste ba Baheberu bao ba bego ba dula Jerusalema le Judea ba ile ba ba le mathata ka morago ga lehu la Jesu. Ka morago ga gore go be le phuthego ya Bokriste, bana babo rena ba ile ba tlaišwa kudu. (Dit. 8:1) Mengwaga e ka bago e 20 ka morago, balatedi ba Jesu ba ile ba ba le mathata a ditšhelete, mohlomongwe ka baka la tlala le bodiidi tšeo di ilego tša ba gona nageng yeo. (Dit. 11:​27-30) Ka bo 61 C.E., Bakriste ba be ba sa tlaišwe kudu, eupša nakong e tlago ba be ba tlo tlaišwa le go feta. Ka nako yeo moapostola Paulo o ile a ba ngwalela lengwalo leo le ba kgothatšago, leo ba bego ba tloga ba le hloka.

² Lengwalo leo Paulo a le ngwaletšego Baheberu le be le le nakong ka gobane ba be ba tlo tlaišwa e se kgale. Paulo o ile a nea Bakriste keletšo yeo e bego e tlo ba thuša gore ba kgotlelele masetlapelo ao a bego a tlo ba wela e se kgale. Go fedišwa ga tshepedišo ya Sejuda, yeo Jesu a bego a boletše ka  yona go be go batamela. (Luka 21:20) Paulo le Bakriste bao ba bego ba le Judea ba be ba sa tsebe gabotse gore seo se be se tlo direga neng. Bakriste bao ba be ba ka diriša nako e šetšego gore ba lwele go ba le dika tša go swana le tumelo le kgotlelelo.—Baheb. 10:25; 12:​1, 2.

3. Ke ka baka la’ng Bakriste lehono ba swanetše go ithuta lengwalo leo Paulo a ilego a le ngwalela Baheberu?

³ Re tlo welwa ke masetlapelo a magolo a go feta ao a ilego a wela Bakriste ba Baheberu. (Mat. 24:21; Kut. 16:​14, 16) Re tlo boledišana ka keletšo yeo Jehofa a ilego a e nea Bakriste bao, yeo e ka re holago le lehono.

‘PHEGELELANG KGOLONG’

4. Bakriste ba Bajuda ba ile ba ba le mathata afe? (Bona le seswantšho.)

⁴ Bajuda bao ba ilego ba ba Bakriste ba ile ba swanelwa ke go dira diphetogo tše di kgolo gomme seo se be se se bonolo. Jehofa o be a kgethile Bajuda gore e be setšhaba sa gagwe. Jerusalema e be e le sedulo sa Mmušo wa Modimo mo lefaseng, gomme tempele e be e dirišetšwa borapedi bjo bo hlwekilego. Bajuda ka moka bao ba botegago ba be ba latela molao wa Moshe woo ba bego ba o rutwa ke baetapele ba bona. Melao yeo e be e bolela ka dijo tšeo ba di jago, lebollo, le gore ba sware bjang batho bao e bego e se Bajuda. Eupša ka morago ga lehu la Jesu, Jehofa o ile a se sa amogela dihlabelo tšeo ba bego ba di dira. Go be go se bonolo gore Bajuda bao ba fetogilego Bakriste ba tlogele tsela yeo ba bego ba tlwaetše go hlankela Jehofa ka yona. (Baheb. 10:​1, 4, 10) Bakriste bao ba godilego moyeng ba go swana le moapostola Petro, le bona ba ile ba thatafalelwa ke go amogela diphetogo tšeo. (Dit. 10:​9-14; Bagal. 2:​11-14) Bakriste bao ba ile ba thoma go tlaišwa ke baetapele ba bodumedi bja Sejuda ka baka la ditumelo tša bona tše mpsha.

5. Bakriste ba be ba swanetše go kgotlelela’ng?

⁵ Bakriste ba Baheberu ba be ba tlaišwa ke dihlopha tše pedi tša batho. Sehlopha sa mathomo e be e le sa baetapele ba Bajuda seo se bego se ba swara bjalo ka bahlanogi. Mola  Bakriste ba bangwe ba be ba gapeletša ba bangwe ka phuthegong gore ba tšwele pele ba diriša e mengwe ya melao ya Moshe mohlomongwe e le gore ba se ke ba tlaišwa. (Bagal. 6:12) Ke eng seo se bego se ka thuša Bakriste bao gore ba dule ba botegela Jehofa?

6. Paulo o ile a kgothaletša badumedi gotee le yena gore ba dire’ng? (Baheberu 5:14–6:1)

⁶ Paulo o ile a kgothaletša badumedi gotee le yena gore ba bale Lentšu la Modimo ka mo go tseneletšego. (Bala Baheberu 5:14–6:1.) Paulo o ile a diriša mangwalo a Seheberu go bontšha bana babo gore tsela ya Bokriste ya go hlankela Jehofa e phala ya Sejuda. a Paulo o be a tseba gore go ithuta lentšu la Modimo ka mo go tseneletšego go be go tlo thuša Bakriste bao gore ba lemoge dithuto tša maaka gomme ba se ke ba arošwa.

7. Lehono Bakriste ba hlakana le mathata afe?

⁷ Go swana le Bakriste ba Baheberu, le rena re kopana le boitsebišo goba dithuto tšeo di ganetšanago le melao ya Jehofa ya go loka. Gantšhi baganetši ba rena ba hlasela ditumelo tša rena tšeo di theilwego Beibeleng tša boitshwaro le thulaganyo ya go kgaola. Ba bolela gore re a kgetholla e bile re sehlogo. Tsela yeo batho ba naganago ka yona le yeo ba dirago dilo ka yona e fapana le tsela yeo Jehofa a dirago dilo ka yona. (Die. 17:15) Re swanetše go tseba dilo tšeo baganetši ba rena ba ka di dirišago go re nyamiša goba go re aroša.—Baheb. 13:9.

8. Ke’ng seo se ka re thušago gore re dule re le Bakriste bao ba tiilego moyeng?

⁸ Re swanetše go diriša keletšo yeo Paulo a e neilego Bakriste ba Baheberu ya gore ba phegelele kgolong. Se se bolela gore re swanetše go bala Beibele ka mo go tseneletšego le go nagana go swana le Jehofa. Se se swanetše go dirwa le ka morago ga go ineela le go kolobetšwa. Go sa šetšwe gore re na le nako e kaaka’ng re le ka phuthegong, ka moka ga rena re swanetše go bala le go ithuta lentšu la Modimo ka mehla. (Ps. 1:2) Go dula re ithuta Beibele ka mehla go tlo re thuša gore re be le tumelo e tiilego, e lego seka seo Paulo a kgothaleditšego Bakriste gore ba be le sona.—Baheb. 11:​1, 6.

‘EBANG LE TUMELO YEO E LEBIŠAGO GO PHEDIŠWENG GA MOYA’

9. Ke ka baka la’ng go be go le bohlokwa gore Bakriste ba Baheberu ba be le tumelo e tiilego?

⁹ Bakriste ba Baheberu ba be ba swanetše go ba le tumelo e tiilego gore ba tle ba kgone go phologa masetlapelo ao a bego a tlo wela Judea. (Baheb. 10:​37-39) Jesu o be a lemošitše balatedi ba gagwe gore ba swanetše go tšhabela dithabeng ge ba bona madira a dikologa Jerusalema. Keletšo ya gagwe e be e tlo thuša Bakriste ka moka bao ba bego ba dula Jerusalema le bao ba bego ba dula Judea. (Luka 21:​20-24) Gantšhi ge mašole a hlasela, batho bao ba dulago magaeng ba be ba tšhabela motseng wa Jerusalema ka ge go be go na le maboto ao a bego a tlo ba šireletša. Go be go bonagala go sa kwagale gore batho ba tšhabele dithabeng, ka gona go be go nyakega tumelo gore motho a dire bjalo.

10. Go ba le tumelo e tiilego go be go tlo thuša Bakriste gore ba dire’ng? (Baheberu 13:17)

¹⁰ Bakriste ba Baheberu ba swanetše go tshepa bao Jesu a bego a ba diriša go hlahla phuthego. Go ka direga gore bao ba bego ba etelele pele ba ile ba nea ditaelo tšeo di bego di thuša phuthego gore e latele tlhahlo ya Jesu ka nako ya maleba le ka thulaganyo.  (Bala Baheberu 13:17.) Lentšu la Segerika e lego “[e] kwang” leo le dirišitšwego go Baheberu 13:​17, le ka ba le šupa gore motho o swanetše go kwa ka gobane a tshepa motho yo a mo neago tlhahlo. Seo ga se bolele gore o no latela tlhahlo ya gagwe ka gobane a neilwe matla. Bakriste ba Baheberu ba be ba swanetše go tshepa bao ba etelelago pele, pele masetlapelo a magolo a etla. Ge e ba Bakriste bao, ba be ba ka theetša bao ba etelelago pele nakong ya ge dilo di ba sepelela gabotse, go be go tlo ba bonolo gore ba ba kwe nakong ya masetlapelo.

11. Ke ka baka la’ng lehono go le bohlokwa gore Bakriste ba be le tumelo e tiilego?

¹¹ Lehono re swanetše go ba le tumelo go swana le Bakriste ba Baheberu. Ka gobane batho ba bantšhi ga ba dumele gore lefase le le kgauswi le go fela e bile ba a re kwera ka gobane re dumela seo. (2 Pet. 3:​3, 4) Go na le dilo tšeo Beibele e re botšago tšona tšeo di tla go go direga nakong ya masetlapelo a magolo, eupša ga e re botše dilo ka moka. Re swanetše go tshepa gore bofelo bo tlo tla ka nako yeo Jehofa a e beilego le gore nakong yeo o tla re hlokomela.—Habak. 2:3.

12. Ke’ng seo se tlago go re thuša go phologago masetlapelo a magolo?

¹² Re swanetše go tshepa batho bao Jehofa a ba beilego gore ba re etelele pele e lego “mohlanka yo a botegago le wa temogo.” (Mat. 24:45) Ge masetlapelo a magolo a thoma, re ka hwetša ditaelo tšeo di ka re phološago, go no swana le ge Bakriste ba Baheberu ba ile ba hwetša taelo ya gore ba tšhabele dithabeng ge mašole a Roma a dikologa Jerusalema. Gona bjale go bohlokwa kudu gore re tshepe batho bao Jehofa a ba beilego gore ba etelele mokgatlo wa gagwe pele. Ge re palelwa ke go kwa ditaelo gona bjale, re ka se kgone go di latela nakong ya masetlapelo a magolo.

13. Ke ka baka la’ng keletšo yeo e ngwadilwego go Baheberu 13:5 e be e le bohlokwa?

¹³ Ge Bakriste ba Baheberu ba be ba emetše go tšhaba, ba be ba swanetše go phela bophelo bjo bonolo, ba se ke ba “rata tšhelete.” (Bala Baheberu 13:5.) Bakriste ba bangwe ba phetše nakong ya ge go be go na le tlala le bodiidi. (Baheb. 10:​32-34) Le ge Bakriste bao ba be ba ikemišeditše go kgotlelela mathata, ba bangwe ba bona ba ile ba thoma go kitimiša tšhelete gore ba se sa diila le gore e ba šireletše. Re a tseba gore tšhelete e be e ka se ba šireletše ge Jerusalema e be e tlo fedišwa. (Jak. 5:3) Batho bao ba bego ba rata dilo tša bona ba be ba tlo thatafalelwa ke go tšhaba le go di tlogela.

14. Tumelo e tlo re thuša bjang go lebelela tšhelete le dilo tšeo re nago le tšona?

¹⁴ Ge re na le tumelo e tiilego e bile re tshepa gore e se kgale Jehofa o tlo fediša lefase le le lebe, re ka se nagane gore go ba le tšhelete goba dilo tše dintšhi go bohlokwa. Nakong ya masetlapelo a magolo, tšhelete e ka se be le mohola. Beibele e re: “Silifera ya bona ba tla e lahlela mekgotheng,” ka gobane “silifera ya bona goba gauta ya bona e ka se kgone go ba hlakodiša letšatšing la kgalefo ya Jehofa.” (Hesek. 7:19) Go e na le gore re kitimiše go dira tšhelete, re ka kgetha go phela bophelo bjo bonolo e le gore re kgone go hlankela Jehofa. Re swanetše go phema go tsena dikolotong goba le go ba le dilo tše dintšhi tšeo di ka hlokago nako ya rena gore re di hlokomele. Re swanetše go ba šedi gore re seke ra rata dilo tšeo re nago le tšona kudu. (Mat. 6:​19, 24) Ge bofelo bo dutše bo batamela, re swanetše go kgetha gore re tshepa Jehofa goba dilo tšeo re nago le tšona.

 ‘GO NYAKEGA GORE RE KGOTLELELE’

15. Ke ka baka la’ng go be go nyakega gore Bakriste ba Baheberu ba be le kgotlelelo?

¹⁵ Bakriste ba kua Judea ba be ba swanetše go kgotlelela ge ba dutše ba hlankela Jehofa ka gobane ba be ba tlo welwa ke mathata. (Baheb. 10:36) Le ge Bakriste ba bangwe ba Baheberu ba ile ba tlaišwa kudu, ba bangwe ba bona ga se ba ka ba tlaišwa ka ge ebile Bakriste nakong ya ge go be go na le khutšo. Paulo o ile a gopotša Bakriste bao gore ba swanetše go dula ba botega le ge ba tlo tlaišwa kudu. Ba be ba swanetše go botega go swana le Jesu. (Baheb. 12:4) Bajuda ba bantšhi ba be ba thoma go galefa le go ba ba šoro ge ba bona Bajuda ba bangwe ba fetoga Bakriste. Pejana ga moo, lešaba le ile la hlasela Paulo ge a be a bolela ditaba tše dibotse kua Jerusalema. Bajuda ba fetago ba 40 ba ile ba “itlama ka keno ya thogako, ba bolela gore ba ka se je goba ba nwa go fihlela ge ba bolaile Paulo.” (Dit. 22:22; 23:​12-14) Le ge Bakriste bao ba be ba hloilwe le go tlaišwa, ba be ba swanetše go tšwela pele ba rapela gotee, ba bolela ditaba tše dibotse le go tiiša tumelo ya bona.

16. Lengwalo leo Paulo a ilego a le ngwalela Baheberu le tlo re thuša bjang go kgotlelela ge re tlaišwa? (Baheberu 12:7)

¹⁶ Ke’ng seo se be go se tlo thuša Bakriste ba Baheberu go kgotlelela mathata? Ba be ba tlo thušwa ke go nagana ka mehola ya go ba le kgotlelelo. Paulo o boletše gore ge Mokriste a kgotlelela mathata gagwe, Jehofa a ka diriša sebaka seo go mo tlwaetša. (Bala Baheberu 12:7.) Tlwaetšo yeo e ka dira gore Mokriste yoo a be le dika tša go kgahliša Jehofa. Ge Bakriste bao ba Baheberu ba be ba bona mehola ya go kgotlelela, go be go tlo ba bonolo gore ba dule ba kgotlelela.—Baheb. 12:11.

17. Paulo o be a ithutile’ng ka go kgotlelela go tlaišwa?

¹⁷ Paulo o ile a kgothaletša Bakriste ba Baheberu gore ba se ke ba fela matla ge ba kgotleletše  mathata. Paulo o be a tseba seo a bolelago ka sona. Ka ge Paulo le yena a ile a tlaiša Bakriste, o be a tseba gabotse gore Bakriste ba be ba tlaišwa bjang. Le yena o ile a kgotlelela ge a be a tlaišwa. Ka morago ga gore e be Mokriste o ile a tlaišwa ka ditsela tše dintšhi. (2 Bakor. 11:​23-25) Paulo o be a tseba gore go hlokega eng gore motho a kgotlelele. O gopoditše Bakriste bao gore ge ba kgotleletše mathata ga se ba swanela go itshepa eupša ba swanetše go tshepa Jehofa. Paulo o be a ka bolela a kgodišegile gore: “Jehofa ke mothuši wa ka; nka se boife.”—Baheb. 13:6.

18. Go tseba seo se tlago go direga e se kgale go tlo re thuša bjang go kgotlelela ge re tla be re tlaišwa?

¹⁸ Ba bangwe ba bana babo rena gona bjale ba kgotleletše ka gore ba tlaišwa. Re ka bontšha gore re a ba rata ka go ba rapelela e bile ka nako e nngwe re ka ba thuša ka dilo tšeo ba di hlokago. (Baheb. 10:33) Beibele e re botša gore ge e le gabotse “bohle bao ba ratago go phela ka boineelo go Modimo tswalanong le Kriste Jesu le bona ba tla hlomarwa.” (2 Tim. 3:12) Ke ka baka leo ka moka ga rena re swanetšego go itokišetša maemo a thata ao a tlago. Re swanetše go tshepa Jehofa ka mo go feletšego gona bjale le gore mohlang wa tlalelo o tla re thuša. Ka nako ya maleba o tlo imolla batho ka moka bao ba mmotegelago.—2 Bathes. 1:​7, 8.

19. Gona bjale re ka dira’ng gore re itokišeletše masetlapelo a magolo? (Bona le seswantšho.)

¹⁹ Ga re belaele gore lengwalo leo Paulo a ilego a le ngwalela Baheberu le ile la thuša Bakriste ba lekgolong la pele la mengwaga gore ba tle ba kgone go kgotlelela mathata ao ba bego ba tlo lebeletšana le ona. Paulo o ile a kgothaletša bana babo gore ba ithute Mangwalo ka mo go tseneletšego le go a kwešiša. Go dira bjalo go be go tlo ba thuša gore ba lemoge dithuto tšeo di be di tlo fokodiša tumelo ya bona. O ile a ba kgothaletša le gore ba tiiše tumelo ya bona gore ba tle ba kgone go latela taelo ya Jesu le go kwa bao ba etelelago pele ba sa ngongorege. O thušitše Bakriste bao gore ge ba dutše ba kgotleletše mathata a bona, ba bone seo e le tlwaetšo e tšwago go Tatago bona yo lerato. Le rena re ka swana le Bakriste bao, ra bona go kgotlelela e le sebaka se sebotse sa go tlwaetšwa ke Jehofa. Seo se tlo re thuša gore re kgone go kgotlelela go fihla mafelelong.—Baheb. 3:14.