1. Ke eng seo Jesu Kriste a tlago go se dira e se kgale?

 RE PHELA nakong yeo go nago le diphetogo tše dikgolo! E se kgale Jesu o tlo ahlola motho yo mongwe le yo mongwe yo a phelago mo lefaseng. Jesu o ile a hlalosa gore go tlo direga eng pele kahlolo yeo e e ba gona ka go nea balatedi ba gagwe “pontšho” ya go ba gona ga gagwe le ya “bofelo bja tshepedišo ya dilo.” (Mat. 24:3) Pontšho yeo, go bolelwa ka yona go Mateo kgaolo 24 le 25, Mareka kgaolo 13 le Luka kgaolo 21.

2. Re tlo ithuta ka eng sehlogong se, gona go ithuta ka seo go tlo re hola bjang?

² Jesu o ile a diriša dipapišo tše tharo gore nea ditemošo tšeo di ka re thušago. O dirišitše papišo ya dinku le dipudi, ya dikgarebe tše bohlale le tša mašilo le ya ditalente. Papišo e nngwe le e nngwe e tlo re thuša go kwešiša gore Jesu o tlo ahlola batho go ya ka dilo tšeo ba bego ba di dira. Ge re dutše re boledišana ka dipapišo tše, re tlo bona dilo tšeo re ka ithutago tšona le gore re ka di diriša bjang. Papišo ya mathomo yeo re tlo boledišanago ka yona, ke ya dinku le dipudi.

DINKU LE DIPUDI

3. Jesu o tlo ahlola batho neng?

³ Papišong ya gagwe ya dinku le dipudi, Jesu o boletše gore o tlo ahlola batho go ya ka tsela yeo ba arabelago ka yona ge ba ekwa ditaba tše dibotse le go thekga bana babo bao ba tloditšwego. (Mat. 25:​31-46) Nakong ya “masetlapelo a magolo,” Jesu o tlo ahlola batho gore ke dinku goba ke dipudi pele ga Haramagedone. (Mat. 24:21) Go swana le ge modiši a kgetholla dinku go dipudi, Jesu le yena o tlo kgetholla bao ba thekgago balatedi ba gagwe ba tloditšwego go bao ba sa ba thekgego.

4. Ke ka baka la’ng re ka tshepa gore Jesu o tlo ahlola gabotse? (Jesaya 11:​3, 4) (Bona le sa letlakala la ka ntle.)

 ⁴ Jesu, yo Jehofa a mo kgethilego gore a ahlole, o tlo ahlola batho ka toka. (Bala Jesaya 11:​3, 4.) O tlo ahlola batho a lebeletše tsela yeo ba dirago dilo ka yona, ba naganago ka yona, dilo tšeo ba di bolelago le kamoo ba thekgago bana babo ba tloditšwego. (Mat. 12:​36, 37; 25:40) Jesu o tla be a tseba gore ke bomang bao ba thekgago bana babo bao ba tloditšwego go dira mošomo wa bona. a Tsela e kaone yeo motho a ka thušago bana babo Kriste ke ka go ba thuša go bolela ditaba tša dibotse. Jesu o tlo ahlola bao ba thekgago bana babo gore ke ba ‘lokilego’ e bile ba ka kgona go phela go ya go ile mo lefaseng. (Mat. 25:46; Kut. 7:​16, 17) Wo, e tlo ba moputso wo o kgahlišago kudu! Ge batho bao ba ka dula ba botega ba tlo dira gore maina a bona a dule a “ngwadilwe pukung ya bophelo.”—Kut. 20:15.

5. Re ithuta’ng go papišo ya dipudi le dinku, gona ke bomang bao papišo ye e ba holago kudu?

⁵ Dulang le botega. Papišo ya Jesu ya dinku le dipudi e bolela kudu ka batho bao ba nago le kholofelo ya go tlo phela mo lefaseng. Ba bontšha gore ba a botega ka go thuša bana babo Kriste ge ba bolela ditaba tše dibotse le ka go theetša sehlopha se senyenyane sa bana babo rena ba tloditšwego bao Jesu a ba kgethilego gore ba etelele pele ka mokgatlong wa gagwe. (Mat. 24:45) Bao ba nago le kholofelo ya go phela legodimong le bona ba swanetše go kwa temošo yeo Jesu a boletšego ka yona papišong yeo. Ka baka la’ng? Ka gobane Jesu o a tseba gore ba dira dilo bjang, ba nagana bjang le dilo tšeo ba di bolelago. Ba swanetše go dula ba botega. Ge e le gabotse, Jesu o boletše ka dipapišo tše dingwe tše pedi tše di bolelago le batlotšwa ka go lebanya. Dipapišo tšeo, go bolelwa ka tšona go Mateo 25. Ga bjale a re boleleng ka papišo ya dikgarebe tše bohlale le tša mašilo.

DIKGAREBE TŠE BOHLALE LE TŠA MAŠILO

6. Dikgarebe tše hlano di bontšhitše bjang gore di bohlale? (Mateo 25:​6-10)

⁶ Ge Jesu a be a bolela ka papišo ya dikgarebe, o boletše ka dikgarebe tše lesome tšeo di bego di ile go gahlanetša monyadi. (Mat. 25:​1-4) Dikgarebe tšeo ka moka di be di nyaka go thekga monyadi. Jesu o hlalošitše gore dikgarebe tša hlano di be di le bohlale, mola tše dingwe tše hlano e le “mašilo.” Dikgarebe tšeo tše bohlale di be di itokišitše e bile di ntšhitše mahlo dinameng. Di be di ikemišeditše go emela monyadi le ge a be a ka fihla bošego. Ke ka baka leo di tlilego le mabone le makhura a ona. E bile dikgarebe tšeo di tlile le makhura a oketšegilego gore le ge monyadi a ka latelwa di dule di na le mabone. Dikgarebe tše di be di dula di le komana madula a bapile. (Bala Mateo 25:​6-10.) Ge monyadi a fihla, dikgarebe tšeo tše bohlale di ile tša ya go ipshina le monyadi. Bakriste bao ba tloditšwego ba swana le dikgarebe tšeo tše bohlale, ka gobane le bona ba swanetše go dula ba botega ge ba letetše monyadi e lego Jesu Kriste. b (Kut. 7:​1-3) Go diregile’ng ka dikgarebe tšela tše hlano tša mašilo?

7. Go ile gwa direga’ng ka dikgarebe tše hlano tša mašilo, gona ka baka la’ng?

⁷ Dikgarebe tšela tše hlano tša mašilo di be di se tša itokiša ge monyadi a fihla. Mabone a  bona a be a le kgauswi le go tima, mola ba be ba se na makhura a lekanego. Ge monyadi a fihla ba be ba se gona ka ge ba be ba ile go nyaka makhura. Ge monyadi a fihla, “dikgarebe tšeo di bego di itokišitše tša tsena le yena monyanyeng wa lenyalo, ke moka mojako wa tswalelwa.” (Mat. 25:10) Ge dikgarebe tšela tša mašilo di boa go reka gomme di nyaka go tsena, monyadi o ile a di botša gore: “ga ke le tsebe.” (Mat. 25:​11, 12) Dikgarebe tšeo di be di sa itokišetša go emela monyadi go ba go fihla a etla. Bjale bao ba tloditšwego ba ithuta’ng?

8-9. Bakriste ba tloditšwego ba ka ithuta’ng papišong ya dikgarebe tše lesome? (Bona le seswantšho.)

⁸ Dulang le itokišitše e bile le ntšhitše mahlo dinameng. Ge Jesu a be a hlalosa ka papišo ya dikgarebe tše lesome, o be a sa re gore go tlo ba le dihlopha tše pedi tša batlotšwa. O be a sa re gore go tlo ba le sehlopha seo se tlago go dula se botega go fihla mafelelong ke moka se sengwe sa palelwa ke go dula se botega. Eupša o be a lemoša batlotšwa gore ba ka diragalelwa ke eng ge ba ka se dule ba botega. Ba ka se hwetše moputso wa bona wa go ya legodimong. (Joh. 14:​3, 4) Re kgona go bona gore taba ye ga se papadi! Go sa šetšwe gore re ya legodimong goba re tlo phela mo lefaseng, ka moka ga rena re swanetše go tšea keletšo yeo Jesu a boletšego ka yona ya dikgarebe tše lesome e le bohlokwa. Yo mongwe le yo mongwe wa rena o swanetše go dula a itokišitše e bile a ikemišeditše go kgotlelela go fihla mafelelong.—Mat. 24:13.

⁹ Ka morago ga gore Jesu a rute balatedi ba gagwe ka papišo ya dikgarebe tše lesome, yeo e bego e tlo ba thuša gore ba dule ba ntšhitše mahlo dinameng, o ile a ba ruta le ka papišo ya ditalente. O be a nyaka go ruta balatedi ba gagwe gore ba šome ka thata.

DITALENTE

10. Makgoba a mabedi a bontšhitše bjang gore a a botega? (Mateo 25:​19-23)

¹⁰ Ge Jesu a be a bolela ka papišo ya ditalente, o boletše ka makgoba a mabedi ao a  bego a botega le lekgoba le letee leo le bego le sa botege. (Mat. 25:​14-18) Makgoba a a mabedi a ile a bontšha mong wa bona gore a be a botega ka go šoma ka thata. Pele mong wa bona a ka sepela, o ile a ba nea ditalente tšeo e bego e le tšhelete e ntšhi kudu. Makgoba a mabedi a be a šoma ka thata kudu le go diriša tšhelete ya mong wa bona gabotse. Ke ka baka la’ng re realo? Ka gobane ge mong wa bona a boa, o hweditše ba okeditše tšhelete yeo a bego a ba neile yona. Mong wa bona o ile a ba reta gomme a ba botša gore “thaba le mong wa gago.” (Bala Mateo 25:​19-23.) Bjale go ile gwa direga’ng ka lekgoba la boraro? Le dirile’ng ka tšhelete yeo mong wa lona a bego a le neile yona?

11. Go ile gwa direga’ng ka lekgoba la sebodu, gona ka baka la’ng?

¹¹ Lekgoba la boraro ba be ba le neile talente e tee eupša le be le le “sebodu.” Mong wa lona o be a letetše gore a diriše tšhelete yeo gabotse. Eupša lekgoba leo le ile la kgetha go epela talente yeo. Ge mong wa lekgoba leo a be a boa o ile a no mmušetša talente e tee yeo a bego a mo neile yona. Lekgoba leo le be le sa tšeele mošomo wa lona godimo. Go e na le gore lekgoba leo le ikokobetše le kgopele tshwarelo gore le paletšwe ke go oketša tšhelete ya mong wa lona, le ile la bitša mong wa lona gore ke monna wa go nyaka “dilo ka šiši.” Lekgoba le le ile la kwatiša mong wa lona, e bile o ile a mo tšeela talente yeo a ba a mo raka.—Mat. 25:​24, 26-30.

12. Lehono re ka re makgoba a mabedi a go botega a emela bo mang?

¹² Makgoba a mabedi ao a bego a botega, a swantšhetša Bakriste ba ba tloditšwego ba botegago. Mong wa bona e lego Jesu o ba mema gore ba thabe le yena. Ba hwetša moputso wa bona wa go phela legodimong e lego tsogo ya pele. (Mat. 25:​21, 23; Kut. 20:5b) Mohlala wa lekgoba la sebodu o lemoša Bakriste ba tloditšwego. Bjang?

13-14. Bakriste ba tloditšwego ba ithuta’ng papišong ya ditalente? (Bona le seswantšho.)

¹³ Šoma ka thata. Le papišong ye, Jesu o be a sa re gore Bakriste ba tloditšwego le bona ba tlo tšwafa, o be a ba lemoša gore go tlo  direga eng ge ba ka se sa ba le mafolofolo. Ba tla be ba paletšwe ke go dira sohle se ba se kgonago gore ba “kgonthišetše go bitšwa le go kgethwa ga [bona],” gomme ba ka se sa ya legodimong.—2 Pet. 1:10.

¹⁴ Dipapišo tšeo Jesu a ilego a bolela ka tšona e lego ya dikgarebe le ya ditalente, di bontšha gabotse gore Bakriste ka moka ba swanetše go dula ba itokišitše, ba ntšhitše mahlo dinameng le go šoma ka thata. Na go na le se sengwe gape seo Jesu a ilego a se bolela go lemoša Bakriste ba tloditšwego? Se gona! Go Mateo 24:​40, 41 re hwetša mantšu ao Jesu a ilego a a bolela go lemoša Bakriste ba tloditšwego.

KE MANG A TLAGO GO “TŠEWA”?

15-16. Lengwalo la Mateo 24:​40, 41 le thuša bjang Bakriste ba tloditšwego gore ba dule ba phakgame?

¹⁵ Pele Jesu a ka bolela ka dipapišo tšela tše tharo, o boletše ka kahlolo ya mafelelo yeo e tlago go ba gona go Bakriste ba tloditšwego. O boletše ka banna ba babedi bao ba šomago tšhemong le basadi ba babedi bao ba šilago lwaleng. Banna bao ba be ba dira mošomo wa go swana, le basadi bao ba be ba dira mošomo wa go swana, eupša Jesu o ile a re “yo mongwe o tla tšewa gomme yo mongwe a tlogelwa.” (Bala Mateo 24:​40, 41.) Jesu o kgothaleditše barutiwa ba gagwe gore: “Dulang le phakgame gobane ga le tsebe letšatši leo Morena wa lena a tlago ka lona.” (Mat. 24:42) Jesu o ile a bolela selo se se swanago ka morago ga gore a bolele ka dikgarebe tše lesome. (Mat. 25:13) Go bonagala mantšu ao Jesu a a boletšego go Mateo 24:42 le Mateo 25:13 a sepedišana. Jesu o tlo tšea feela Bakriste bao ba tloditšwego bao ba dulago ba botega go yo dula le yena legodimong.—Joh. 14:3.

¹⁶ Dulang le phakgame. Mokriste yo mongwe le yo mongwe yo a tloditšwego ge a ka se dule a phakgame, a ka se kgoboketšwe le “bakgethwa” ba bangwe. (Mat. 24:31) Ka ge le rena re le bahlanka ba Modimo, re swanetše go kwa keletšo yeo Jesu a e neilego batlotšwa ya gore ba dule ba phakgame le go botega.

17. Re swanetše go ikwa bjang ge Jehofa a tlotša batho ka moya wa gagwe o mokgethwa lehono?

¹⁷ Ka morago ga gore re ithute ka Jehofa le go mo tseba gabotse, re a tshepa gore o tlo ahlola gabotse. Ga re belaele gore nakong ye re phelago go yona, go na le Bakriste bao Jehofa a ba kgethilego gore e be batlotšwa. c Re gopola seo Jesu a ilego a se bolela ka bašomi bao ba ilego ba thoma go šoma mo e ka bago ka iri ya lesometee serapeng sa merara. (Mat. 20:​1-16) Batho bao ba ilego ba thoma go šoma serapeng sa merara mosegare, ba ile ba gola tšhelete ya go lekana le ya bao ba ilego ba thoma go šoma mesong. Ka mo go swanago, ge Bakriste bao ba tloditšwego ba ka dula ba botega ba tlo hwetša moputso o swanago. Jesu a ka se lebelele gore ba kgethilwe neng go ba batlotšwa.

THEETŠA DITEMOŠO

18-19. Re ithutile’ng dipapišong tše tše tharo?

¹⁸ Re ithutile’ng sehlogong se? Re ithutile gore papišo ya go bolela ka dinku le dipudi e thuša bao ba tlago go phela mo lefaseng go ya go ile gore ba dule ba botegela Jehofa gona bjale le nakong ya masetlapelo a magolo. E se kgale Jesu o tlo ahlola bao ba bego ba botega gore ba swanetše ke “bophelo bjo bo sa felego.”—Mat. 25:46.

¹⁹ Re ithutile le ka dipapišo tše pedi tšeo Jesu a di dirišitšego go lemoša Bakriste ba tloditšwego. Papišong ya dikgarebe tše lesome,  Jesu o hlalositše kamoo tše hlano di ilego tša ba bohlale ka gona. O bontšhitše gore di be di itokišitše e bile di ntšhitše mahlo dinameng, di ikemišeditše go letela monyadi go ba go fihla a e tla. Mola dikgarebe tše hlano tša mašilo di be di se tša itokiša, ke moka monyadi a ba ganetša ba tsena lenyalong la gagwe. Le rena re swanetše go leta go ba go fihla Jesu a e tla go fediša lefase le le lebe la Sathane. Ke moka papišong ya Jesu ya ditalente re kwele ka makgoba a mabedi ao a ilego a šoma ka thata. Ba ile ba šoma ka thata gore ba kgahliše mong wa bona gomme o ile a ba amogela. Eupša o ile a raka mohlanka wa sebodu. Re ithuta’ng? Re ithuta gore re swanetše go dula re šoma ka thata go hlankela Jehofa go ba go fihla mafelelong. Ra ba ra ithuta le gore Bakriste bao ba tloditšwego ba swanetše go dula ba phakgame e le gore ba hwetše kabelo ya bona ya go ya legodimong. Bakriste ba tloditšwego ba fela pelo ya go “kgobokanywa gotee” gore ba be le Jesu Kriste kua legodimong. Ke moka ka morago ga ntwa ya Haramagedone Bakriste ba tloditšwego e tlo ba monyadiwa wa kwana.—2 Bathes. 2:1; Kut. 19:9

20. Ke eng seo Jehofa a tlago go se direla batho bao ba kwago ditemošo tša gagwe?

²⁰ Le ge nako ya gore Jesu a tle a ahlole e batamela, ga se ra swanela go tšhoga. Ge re dula re botegela Jehofa o tlo re nea “matla a fetago a tlwaelegilego” gore re “atlege . . . le go ema pele ga Morwa wa motho.” (2 Bakor. 4:7; Luka 21:36) Go sa šetšwe gore re tlo phela legodimong goba mo lefaseng re tlo thabiša Jehofa ge re ekwa ditemošo tšeo Jesu a boletšego ka tšona dipapišong tša gagwe . Ka ge Jehofa e le Modimo yo a lokilego o tlo “ngwala maina a rena” ka pukung ya bophelo.—Dan. 12:1; Kut. 3:5.