Ga se ra swanela go no nagana gore ka ge balatedi ba 70 ba be ba se gona ge Jesu a thoma Selalelo sa Morena, go ra gore ba be ba mo tšhabetše goba ba be ba sa swanelege. Jesu o be a no nyaka go ba le baapostola ba gagwe feela ka nako yeo.

Banna bao ba 12 le batho ba bangwe ka moka ba 70 e be e le balatedi ba Jesu. Jesu o ile a kgetha banna ba 12 go balatedi ba bantšhi bao a bego a na le bona gomme a ba bitša baapostola. (Luka 6:12-16) O be a le Galilea ge a “bitša baapostola ba gagwe ba lesomepedi” gomme “a ba roma gore ba ye go bolela ka Mmušo wa Modimo le go fodiša.” (Luka 9:1-6) Ka morago ge Jesu a be a le Judea, o ile a “hlaola ba bangwe ba masomešupa gomme a ba roma ka babedi ka babedi.” (Luka 9:51; 10:1) Jesu o be a na le balatedi ba gagwe mafelong a fapafapanego bao ba bego ba ruta ka yena.

Bajuda bao ba ilego ba ba balatedi ba Jesu ba be ba keteka paseka ngwaga o mongwe le o mongwe, mohlomongwe le ba malapa a bona. (Ek. 12:6-11, 17-20) Pele ga ge Jesu a ka bolawa, o ile a ya le baapostola ba gagwe Jerusalema. Eupša pasekeng yeo ga se a bitša balatedi ba gagwe bao ba tšwago Judea, Galilea le Perea. Jesu o be a nyaka go keteka paseka yeo le baapostola ba gagwe feela. O ba boditše gore: “Ke kganyogile kudu go ja Paseka ye le lena pele ke tlaišega.”—Luka 22:15.

Go be go na le lebaka leo le kwagalago la gore Jesu a dire seo. E se kgale, Jesu o be a tlo bolawa gore e be “kwana ya Modimo yeo e tlošago sebe sa lefase.” (Joh. 1:29) O be a tlo bolaelwa Jerusalema, moo go bego go direlwa Modimo dihlabelo. Kwana ya Paseka e be e gopotša Baisiraele gore Jehofa o ba lokolotše Egepeta. Eupša sehlabelo sa Jesu se be se tlo lokolla batho ka moka sebeng le lehung. (1 Bakor. 5:7, 8) Ka baka la seo Jesu a se dirilego, baapostola ba 12 e be e tlo ba batho ba mathomo ba go bopa phuthego ya Bokriste. (Baef. 2:20-22) Motse o mokgethwa e lego Jerusalema o be o na le “maswika a lesomepedi a motheo” ao a bego a ngwadilwe “maina a lesomepedi a baapostola ba lesomepedi ba kwana.” (Kut. 21:10-14) Baapostola bao ba botegago ba be ba tlo bapala karolo e bohlokwa kudu morerong wa Modimo. Ke ka baka leo Jesu a bego a nyaka go keteka Paseka ya mafelelo le bona le gore ba be gona tiragalong yeo e bego e tlo ba gona ka moragonyana yeo e bitšwago Selalelo sa Morena.

Balatedi ba Jesu ba 70 le ba bangwe gape, ba be ba se gona ge a eja dijo tša mafelelo le baapostola ba gagwe. Eupša balatedi ba Jesu ka moka bao ba botegago ba be ba tlo holwa ke Selalelo sa Morena. Ge nako e dutše e eya, Bakriste bao ba tloditšwego ba be ba tlo tsena kgweranong ya Mmušo yeo Jesu a boditšego baapostola ba gagwe ka yona bošegong bjoo.—Luka 22:29, 30.