1-3. (a) Bakriste ba bontšhitše bjang gore ba rata go bokana gotee? (Bona seswantšho se se lego ka mo godimo.) (b) Re tlo ahlaahla’ng sehlogong se?

GE Corinna a be a na le nywaga e 17, mmagwe o ile a swarwa gomme a romelwa kampeng ya tlaišo ya kgole le gagabo. Ka morago, Corinna le yena o ile a išwa kampeng ya Siberia yeo e bego e le kgole le gagabo ka dikhilomithara tše dikete. Ge a le moo, o be a šoma polaseng gomme a swarwa bjalo ka lekgoba. Ka dinako tše dingwe o be a gapeletšwa go yo šoma ka ntle le ge go be go tonya kudu mola a be a se na diaparo tše borutho. Go sa šetšwe seo, Corinna le kgaetšedi yo mongwe ba ile ba phetha ka gore ba tla dira selo le ge e le sefe gore ba tloge polaseng yeo gomme ba ye dibokeng tša phuthego.

² Corinna o itše: “Re ile ra tloga mošomong mantšiboa gomme ra ya seteišeneng sa diterene seo se lego bokgole bja dikhilomithara tše 25. Terene e ile ya tloga ka iri ya bobedi mesong, gomme ya sepela diiri tše tshela go fihla seteišeneng se sengwe. Ke moka re ile ra fologa, ra sepela ka maoto leeto la dikhilomithara tše lesome gore re fihle dibokeng.” Corinna o  ile a thaba kudu gore o tšere leeto leo. O itše: “Dibokeng tšeo, re ile ra ithuta Morokami le go opela dikopelo tša Mmušo. Seo se ile sa re matlafatša le go re aga tumelong.” Dikgaetšedi tše tše pedi di ile tša boela polaseng ka morago ga matšatši a mararo, eupša mong wa polase ga se a ka a lemoga le gore ba be ba se gona.

³ Ga e sa le go tloga kgale batho ba Jehofa ba rata go bokana gotee. Ka mohlala, Bakriste ba lekgolong la pele la nywaga ba be ba rata go bokana gotee gore ba rapele Jehofa le go ithuta ka yena. (Ditiro 2:42) Ke therešo gore le wena o rata go ya dibokeng. Eupša go swana le bana beno le dikgaetšedi ka moka, o ka hwetša go le thata go ya dibokeng ka mehla. Mohlomongwe o šoma diiri tše dintši goba o dula o swaregile goba o dula o lapile. Ka gona, ke’ng seo se ka re thušago go dira sohle seo re ka se kgonago gore re be gona dibokeng? ^[1] (Bona tlhaloso.) Re ka kgothaletša bjang barutwana ba rena ba Beibele le ba bangwe gore ba be gona dibokeng ka mehla? Sehlogo se se tla hlalosa mabaka ao ka wona go ba gona dibokeng (1) go re holago, (2) go thušago ba bangwe le (3) go thabiša Jehofa. ^[2]—Bona tlhaloso.

4. Diboka di re thuša bjang go ithuta ka Jehofa?

⁴ Dibokeng re a rutwa. Seboka se sengwe le se sengwe se re thuša go ithuta ka mo go oketšegilego ka Jehofa. Ka mohlala, diphuthego tše dintši di sa tšwa go ithuta puku ya Batamela Kgaufsi le Jehofa Thutong ya Beibele ya Phuthego. O ile wa ikwa bjang ge re be re ahlaahla dika tša Jehofa le ge o be o ekwa kamoo bana beno ba ikwago ka gona ka yena? Ga go pelaelo gore seo se ile sa dira gore o rate Jehofa le go feta. Ge re le dibokeng, re ithuta gape ka mo go oketšegilego ka Beibele ka go theetša dipolelo le dipontšho le ka go theetša ka kelohloko ge Beibele e balwa. (Nehemia 8:8) Le gona nagana ka dilo tše dintši tšeo re di hwetšago beke le beke ge re lokišetša mmalo wa Beibele gomme re ekwa seo bana babo rena ba ithutilego sona go wona.

5. Diboka di go thušitše bjang go diriša seo o ithutilego sona ka Beibeleng le go kaonefatša tsela yeo o bolelago ditaba tše dibotse?

⁵ Diboka di re ruta go diriša seo re ithutago sona ka Beibeleng. (1 Bathesalonika 4:9, 10) Ka mohlala, na o kile wa ba sebokeng sa Thuto ya Morokami gomme wa kwa thuto yeo e go tutueletša go dira ka mo go oketšegilego tirelong ya Jehofa, go kaonefatša dithapelo tša gago goba go lebalela ngwaneno goba kgaetšedi? Seboka sa gare ga beke se re ruta kamoo re ka bolelago ditaba tše dibotse le kamoo re ka thušago ba bangwe go kwešiša therešo ya Beibele.—Mateo 28:19, 20.

6. Diboka tša rena di re kgothatša bjang le go re matlafatša?

⁶ Diboka di a re kgothatša. Lefase la Sathane le leka go fokodiša tumelo ya rena le gona le ka re dira gore re ikwe re gateletšegile e bile re nyamile. Eupša diboka  tša rena di a re kgothatša e bile di re fa matla a go tšwela pele re hlankela Jehofa. (Bala Ditiro 15:30-32.) Gantši re ahlaahla kamoo diporofeto tša ka Beibeleng di ilego tša phethagala ka gona. Se se ka re thuša gore re kgodišege le go feta gore dikholofetšo tša Jehofa tša nakong e tlago di tla phethagala. Bana babo rena le dikgaetšedi ga ba re kgothatše feela ge ba nea dipolelo, eupša ba re kgothatša le ge ba araba le go tumiša Jehofa ka go mo opelela go tšwa pelong. (1 Bakorinthe 14:26) Le gona ge re boledišana le bona pele le ka morago ga diboka, re ikwa re lapologile ka gobane re ba le bagwera ba bantši bao ba re ratago kudu.—1 Bakorinthe 16:17, 18.

7. Ke ka baka la’ng go le bohlokwa kudu gore re be gona dibokeng?

⁷ Ge re le dibokeng, re hwetša thušo ya moya wa Modimo o mokgethwa. Jesu o diriša moya wo o mokgethwa go hlahla diphuthego. Ge e le gabotse, o re boditše gore re swanetše go “[kwa] seo moya o se botšago diphuthego.” (Kutollo 2:7) Moya o mokgethwa o ka re thuša gore re ganetše diteko le go bolela ditaba tše dibotse ka sebete. Le gona o ka re thuša go dira diphetho tše bohlale. Ke ka baka leo re swanetšego go dira sohle seo re ka se kgonago gore re be gona dibokeng gore re hwetše thušo ya moya wa Modimo.

8. Bana babo rena ba holega bjang ge ba re bona dibokeng, ba ekwa re araba e bile re opela? (Bona le lepokisi le le rego, “ Ka Mehla o Tloga Dibokeng a Ikwa a le Kaone.”)

⁸ Ge re le dibokeng, re ba le dibaka tša go bontšha bana babo rena le dikgaetšedi gore re a ba rata. Ba bantši ka diphuthegong tša gabo rena ba na le mathata. Moapostola Paulo o ngwadile gore ‘re hlokomelaneng seng sa rena,’ goba re tshwenyegeng ka ba bangwe. (Baheberu 10:24, 25) Re ka bontšha gore re na le taba le bana babo rena ge re eba gona dibokeng gore re kgothatšane. Ge re eya dibokeng, re bontšha bana babo rena gore re nyaka go ba le bona le go bolela le bona, e bile re ba bontšha gore re  na le taba le kamoo ba ikwago ka gona. Le gona re a ba kgothatša ge ba re kwa re araba e bile re opela go tšwa pelong.—Bakolose 3:16.

9, 10. (a) Hlalosa kamoo mantšu a Jesu ao a lego go Johane 10:16 a re thušago go kwešiša bohlokwa bja go bokana gotee le bana babo rena. (b) Ge re eba gona dibokeng ka mehla, re ka thuša bjang motho yo lapa la gabo le mo hloilego?

⁹ Ge re eya dibokeng, re thuša phuthego gore e dule e le boteeng. (Bala Johane 10:16.) Jesu o ile a itshwantšha le modiši gomme a swantšha balatedi ba gagwe le mohlape. Nagana ka se: Ge e ba dinku tše pedi di le thabeng, tše dingwe tše pedi di le moeding gomme e tee e le lefelong le itšego, na dinku tšeo tše tlhano ke mohlape? Aowa, ka gobane mohlape wa dinku o dula gotee gomme o latela modiši wa wona. Ka tsela e swanago, ga se ra swanela go arogana le bana babo rena ka go se tle dibokeng. Re swanetše go bokana gotee gore re be karolo ya “mohlape o tee” gomme re latele “modiši o tee.”

¹⁰ Diboka tša rena di re thuša gore re be ngatana e tee bjalo ka lapa leo le thabilego. (Psalme 133:1) Ba bangwe ba bana babo rena ka phuthegong ba hloilwe ke ba malapa a gabo bona, e ka ba batswadi ba bona goba bana ba gabo bona. Eupša Jesu o ba holofeditše gore ba tla ba karolo ya lapa leo le tlago go ba rata le go ba hlokomela. (Mareka 10:29, 30) Ge e ba o eba gona dibokeng ka mehla, o ka swana le tate go motho yo mongwe ka phuthegong, wa ba mmagwe, ngwanabo goba kgaetšedi ya gagwe. Ge re nagana ka seo, re tutueletšega go dira sohle seo re ka se kgonago gore re be gona dibokeng ka moka.

11. Go ba gona dibokeng go re thuša bjang go nea Jehofa seo se mo swanetšego?

¹¹ Ge re le dibokeng, re nea Jehofa seo se mo swanetšego. Ka ge Jehofa e le Mmopi wa rena, re swanetše go mo leboga, re mo godiše le go mo tumiša. (Bala Kutollo 7:12.) Re ka dira se dibokeng ge re rapela Jehofa, re mo opelela le ge re bolela ka yena. Ruri diboka di re nea sebaka se sebotse sa go tumiša Jehofa beke e nngwe e nngwe le e nngwe!

12. Jehofa o ikwa bjang ge re ekwa taelo ya gagwe ya gore re be gona dibokeng?

¹² Jehofa o re bopile, ka gona re swanetše go mo kwa. O re laetše gore re dule re bokana gotee, kudukudu ge bofelo bo dutše bo batamela. Ka gona ge re ekwa taelo yeo, Jehofa o a thaba. (1 Johane 3:22) O a bona gore re tloga re nyaka go ba gona dibokeng gomme o tšeela godimo maiteko ka moka ao re a dirago gore re be moo.—Baheberu 6:10.

13, 14. Diboka di re batametša bjang kgauswi le Jehofa le Jesu?

¹³ Ge re eya dibokeng, re bontšha Jehofa gore re nyaka go batamela kgauswi kudu le yena le Morwa wa gagwe. Ge re le dibokeng, re ithuta Beibele gomme ra ithuta seo Jehofa a rego re swanetše go se dira le kamoo re swanetšego go phela ka gona. (Jesaya 30:20, 21) Gaešita le ge batho bao e sego Dihlatse tša Jehofa ba tlile dibokeng, ba a bona gore Jehofa o a re hlahla. (1 Bakorinthe 14:23-25) Jehofa o hlahla diboka tša rena ka moya wa gagwe o mokgethwa, le gona seo re ithutago sona ge re le moo se tšwa go yena. Ka gona ge re le dibokeng, re theetša seo Jehofa a se bolelago, ra kwa kamoo a re ratago ka gona gomme ra batamela kgauswi kudu le yena.

¹⁴ Jesu, yena Hlogo ya phuthego, o itše: “Moo go lego ba babedi goba ba bararo ba kgobokane gotee ka leina la ka, le nna ke gona gare ga bona.” (Mateo 18:20) Le gona Beibele e re Jesu ‘o sepela gare’ ga diphuthego. (Kutollo 1:20–2:1) Go molaleng gore Jehofa le Jesu ba na le rena gomme ba a re matlafatša ge re le dibokeng. O nagana gore Jehofa o ikwa bjang ge a bona gore o dira sohle seo o ka se kgonago gore o batamele kgauswi le yena le Morwa wa gagwe?

15. Ge re eya dibokeng, re bontšha Modimo bjang gore re nyaka go mo kwa?

¹⁵ Ge re eya dibokeng, re bontšha Jehofa gore re nyaka go mo kwa. Jehofa ga a re gapeletše go dira seo a rego re se dire. (Jesaya 43:23) Ka gona ge re kgetha go kwa taelo ya gagwe ya gore re be gona dibokeng, re bontšha gore re a mo rata le gore re dumela gore o na le tshwanelo ya go re botša seo re swanetšego go se dira. (Baroma 6:17) Ka mohlala, re tla dira’ng ge mothwadi wa rena a nyaka gore re šome kudu moo re palelwago ke go ba gona dibokeng ka mehla? Goba a re re mmušo o laela gore batho bao ba bokanago gotee go rapela Jehofa ba lefišwe, ba golegwe  goba ba otlwe ka tsela e nngwe e šoro. Le gona a re re ka dinako tše dingwe o no kgetha go se ye dibokeng eupša wa swarega ka dilo tše dingwe. Maemong a ka moka, re swanetše go dira phetho ya seo re tlago go se dira. (Ditiro 5:29) Eupša nako le nako ge re kgetha go kwa Jehofa, re a mo thabiša.—Diema 27:11.

16, 17. (a) Re tseba bjang gore diboka di be di le bohlokwa kudu go Bakriste ba lekgolong la pele la nywaga? (b) Ngwanabo rena George Gangas o be a ikwa bjang ka diboka tša Bokriste?

¹⁶ Go tloga ka Pentekoste ya ngwaga wa 33, Bakriste ba ile ba bokana gotee ka mehla gore ba rapele Jehofa. Ba ile “ba tšwela pele ba ikgafela thutong ya baapostola, go abelaneng [goba go bokaneng] le ba bangwe.” (Ditiro 2:42) Le gona ga se ba ka ba kgaotša go bokana gotee gaešita le ge ba be ba tlaišwa ke mmušo wa Roma le baetapele ba bodumedi ba Bajuda. Le ge maemo a be a le thata, ba ile ba dira sohle seo ba ka se kgonago go tšwela pele ba bokana gotee.

¹⁷ Le lehono, bahlanka ba Jehofa ba tšeela diboka godimo le gona ba thabela go ba go tšona. George Gangas, yo e bilego setho sa Sehlopha se Bušago ka nywaga ya ka godimo ga e 22, o itše: “Go bokana le bana babo rena go ntlišetša lethabo le legolo kudu le go nkgothatša. Ke rata go fihla kapela Holong ya Mmušo, le gona ge go kgonega ke be gare ga bao ba tlogago mafelelong. Ke thaba kudu ge ke boledišana le batho ba Modimo. Ge ke le gare ga bona ke ikwa ke le gae ga mahlaku, ke le paradeiseng ya moya.” O okeditše ka gore: “Selo seo ke dulago ke nagana ka sona le go se rata ke go ba gona dibokeng.”

18. O ikwa bjang ka diboka, gona ke eng seo o ikemišeditšego go se dira?

¹⁸ Na le wena o ikwa bjalo ka go hlankela Jehofa? Ge e ba go le bjalo, tšwela pele o dira sohle seo o ka se kgonago go ba gona dibokeng ka mehla, le ge go le thata. Bontšha Jehofa gore ikwa go swana le Kgoši Dafida, yo a itšego: “Jehofa, ke ratile ntlo yeo o dulago go yona.”—Psalme 26:8.