1. Petro o ile a ikwa bjang ka morago ga gore Jesu a mo thuše go swara dihlapi ka mohlolo?

 PETRO o feditše bošego ka moka a rea dihlapi eupša a sa sware selo. Jesu o itše go yena: “Eyang moo go išago tlase le theošeng malokwa a lena gore le sware dihlapi.” (Luka 5:4) Le ge Petro a be a belaela ge e ba a tla swara dihlapi, eupša o ile a dira seo Jesu a mo laetšego sona. Malokwa a bona a ile a thoma go kgaoga ka baka la dihlapi tše dintši tšeo ba bego ba di swere. Ge Petro le bao a bego a šoma le bona ba sa tšwa go bona mohlolo woo Jesu a o dirilego, ba ile ba “tlabega kudu.” Petro o ile a re: “Tloga go nna Morena, gobane ke motho wa sebe.” (Luka 5:​6-9) Petro o be a ikwa a sa swanelege go ba pele ga Jesu.

2. Ke ka baka la’ng go le bohlokwa gore re naganišiše ka mohlala wa Petro?

² Petro o be a bolela therešo. E be e le “motho wa sebe.” Beibele e bontšha gore ka dinako tše dingwe o be a dira dilo tšeo ka morago a itsholelago tšona. Na le wena ka dinako tše dingwe o ikwa go swana le Petro? Na go na le bofokodi bjo o lwantšhanago le bjona? Ge e ba go le bjalo, o ka kgothatšwa ke go ithuta ka mohlala wa Petro. O ka dira seo bjang? Nagana ka se, Jehofa a ka ba a ile a kgetha go dira gore diphošo tšeo Petro a di dirilego di se ke tša ngwalwa ka Beibeleng. Eupša o ile a dumelela gore di ngwalwe gore re kgone go ithuta se sengwe go tšona. (2 Tim. 3:​16, 17) Ge re ithuta ka mafokodi ao Petro a bego a lwantšhana le ona, seo se tlo re thuša go kwešiša gore Jehofa ga se a letela gore re phethagale. O nyaka gore re kgotlelele go sa šetšwe mafokodi a rena.

3. Ke ka baka la’ng re swanetše go kgotlelela?

 ³ Ke ka baka la’ng go le bohlokwa gore re kgotlelele? Go na le polelwana yeo e rego: Maleka ga se makgona, makgona ke maboeletša. Ka mohlala, motho yo a bapalago mmino a ka fetša mengwaga e mentši a ithuta ka seletšo se itšego sa go bapala mmino. A ka palelwa ke go diriša seletšo seo ka nako e telele, eupša ge a ka tšwela pele a itlwaetša, o tlo feleletša a kgona go se diriša. Le ge a ka kgona go diriša seletšo seo gabotse, eupša ka dinako tše dingwe a ka fela a dira diphošo. Eupša ga se a swanela go fela matla. O tlo tšwela pele a kaonefatša go bokgoni bjo a nago le bjona. Ka mo go swanago, le rena re ka nagana gore re fentše bofokodi bjo itšego, eupša bja no fela bo boa. Re swanetše go lwela go dula re kaonefatša. Le rena re ka bolela goba ra dira dilo tšeo re ka itsholelago tšona mafelelong, eupša ga re fele matla ka gobane Jehofa o tlo re thuša gore re kaonefatše. (1 Pet. 5:10) A re boneng mohlala wa Petro wa go kgotlelela. Kwelobohloko yeo Jesu a e bontšhitšego Petro go sa šetšwe diphošo tšeo a bego a di dira, e ka re kgothaletša gore le rena re tšwele pele re hlankela Jehofa.

4. Ke’ng seo Petro a se boletšego ka yena go Luka 5:​5-10, gona Jesu o ile a mo kgonthišetša ka’ng?

⁴ Beibele ga e re botše gore ke ka baka la’ng Petro a ile a ipolela gore ke “motho wa sebe” le gore ke dibe dife tšeo a bego a nagana ka tšona. (Bala Luka 5:​5-10.) Eupša a ka ba a ile a dira diphošo tše dikgolo. Jesu o be a tseba gore Petro o tšhogile, mohlomongwe ka gobane a be a nagana gore ga a swanelege. Le gona Jesu o be a tseba gore Petro a ka kgona go dula a botega. Ka botho, Jesu o ile a botša Petro gore a ‘tlogele go boifa.’ Petro o ile a holega kudu ka gobane Jesu o be a mo tshepa. Ka morago Petro le ngwanabo e lego Andrea ba ile ba tlogela kgwebo ya bona ya go rea dihlapi gomme ba ba balatedi ba Mesia e lego phetho yeo e ilego ya dira gore ba be le ditšhegofatšo tše di kgahlišago.—Mar. 1:​16-18.

5. Petro o ile a hwetša ditšhegofatšo dife ka ge a se a ka a dumelela poifo e mo thibela go ba molatedi wa Jesu?

⁵ Ge Petro e be e le molatedi wa Jesu, o ile a bona dilo tše dintši tše di kgahlišago. O bone ge Jesu a be a fodiša balwetši, a leleka batemona, le ge a be a tsoša le bahu. b (Mat. 8:​14-17; Mar. 5:​37, 41, 42) Le gona Petro o ile a bona pono ya ge Jesu e le Kgoši ya Mmušo wa Modimo, e lego selo seo a bego a ka se tsoge a se lebetše. (Mar. 9:​1-8; 2 Pet. 1:​16-18) Ge nkabe Petro e be e se molatedi wa Jesu, o be a ka se bone dilo tšeo a  di bonego. O swanetše goba a ile a thabišwa ke gore ga se a dumelela mafokodi a gagwe a dira gore a se ke a thabela ditšhegofatšo tšeo!

6. Na Petro o ile a kgona go fenya mafokodi ao a nago le ona kapelapela? Hlalosa.

⁶ Go sa šetšwe dilo tšeo Petro a ilego a di bona le go di kwa, o be a sa dutše a lwantšhana le mafokodi a gagwe. Nagana ka mehlala ye e sego kae. Petro o ile a ganetša Jesu ge a be a hlalosa kamoo boporofeta bja mabapi le go tlaišwa le go hwa ga gagwe go tlago go phethagala ka gona. (Mar. 8:​31-33) Le gona, Petro le baapostola ba bangwe ba be ba dula ba ngangišana ka gore ke mang yo mogolo gare ga bona. (Mar. 9:​33, 34) Bošegong bja pele ga lehu la Jesu, Petro o ile a hlasela monna yo mongwe gomme a mo kgaola tsebe. (Joh. 18:10) Bjona bošegong bjoo Petro o ile a tšhoga kudu ka baka la seo batho ba bego ba se nagana ka yena gomme a latola Jesu ka makga a mararo. (Mar. 14:​66-72) Seo se ile sa dira gore Petro a lle ga bohloko.—Mat. 26:75.

7. Petro o ile a newa tokelo efe ka morago ga gore Jesu a tsošwe?

⁷ Jesu ga se a ka a lahla moapostola yo yoo a bego a nyamile o šoro. Ka morago ga gore Jesu a tsošwe, o ile a nea Petro sebaka se sengwe sa gore a mmontšhe gore o tloga a mo rata. Jesu o ile a nea Petro tokelo ya gore a hlokomele dinku tša gagwe. (Joh. 21:​15-17) Petro o ile a dira seo Jesu a bego a mo kgopetše sona. O be a le Jerusalema ka letšatši la Pentekoste, gomme a ba gare ga batho ba mathomo bao ba ilego ba tlotšwa ka moya o mokgethwa.

8. Petro o ile a dira phošo efe e kgolo kua Antiokia?

⁸ Petro o ile a swanelwa ke go lwantšhana le mafokodi ao a bego a na le ona le ka morago ga gore e be Mokriste yo a tloditšwego. Ka 36 C.E., Petro o be a le gona ge Koronelio yo e bego e se Mojuda e bile a se a bolla a be a tlotšwa ka moya o mokgethwa, e lego seo se bego se bontšha gore “Modimo ga a bebe sefahlego” le gore batho bao e sego Bajuda e ka ba karolo ya phuthego ya Bokriste. (Dit. 10:​34, 44, 45) Ka morago ga moo, Petro o ile a lokologa go ja gotee le Bakriste bao e bego e se Bajuda, e lego selo seo a bego a ka se tsoge a se dirile. (Bagal. 2:12) Eupša Bakriste ba bangwe ba Bajuda ba be ba sa nyake Bakriste bao e lego Bajuda le Bakriste bao e sego Bajuda ba eja mmogo. Ge ba bangwe ba etla Antiokia, Petro o ile a tlogela go ja le Bakriste bao e sego Bajuda, mohlomongwe ka gobane a tšhaba go kgopiša Bakriste bao e lego Bajuda. Ge moapostola Paulo a bona seo Petro a se dirilego o ile a mo kgalemela pele ga batho. (Bagal. 2:​13, 14) Petro o ile a kgotlelela go sa šetšwe diphošo tšeo a di dirilego. O thušitšwe ke eng?

9. Johane 6:​68, 69 e bontšha bjang gore Petro o be a botega?

⁹ Petro ga se a ka a dumelela selo se mo šitiša go ba molatedi wa Jesu ka gobane a botega. Ka nako e nngwe Petro o ile a bontšha gore o a botega ge Jesu a be a bolela selo se sengwe seo balatedi ba gagwe ba bego ba sa se kwešiše. (Bala Johane 6:​68, 69.) Batho ba bantši ba ile ba tlogela go ba balatedi ba Jesu ka ntle le go nyaka go kwešiša gore o be a e ra gore’ng. Eupša Petro yena ga se a ka a tlogela go latela Jesu. O be a botega e bile o ile a bolela gore Jesu “o na le mantšu a bophelo bjo bo sa felego.”

10. Jesu o bontšhitše bjang gore o tshepa Petro? (Bona le seswantšho.)

¹⁰ Jesu ga se a ka a lahla Petro. Bošegong bja mafelelo bja bophelo bja Jesu bja mo lefaseng, o be a tseba gore Petro le baapostola ba bangwe ba tlo mo tšhabela. Le ga go le bjalo, Jesu o be a tshepa gore Petro o tla boa gomme a dula a botega. (Luka 22:​31, 32) Jesu o be a tseba gore “moya o mafolofolo eupša nama e a fokola.” (Mar. 14:38) Ka gona, ga se a ka a lahla moapostola yoo wa gagwe le ka morago ga gore a mo  latole. Ka morago ga gore Jesu a tsošwe bahung o ile a tšwelela go Petro ge a be a le noši. (Mar. 16:7; Luka 24:34; 1 Bakor. 15:5) Seo se ile sa kgothatša moapostola yoo yo a bego nyamile o šoro!

11. Jesu o kgonthišeditše Petro bjang gore Jehofa o tlo mo thekga?

¹¹ Jesu o ile a kgonthišetša Petro gore Jehofa o tlo mo hlokomela. Jesu yo a tsošitšwego o ile a thuša Petro le baapostola ba bangwe gore ba sware dihlapi tše dintši. (Joh. 21:​4-6) Ga go pelaelo gore mohlolo wo, o ile wa kgonthišetša Petro gore Jehofa a ka kgona go mo hlokomela ka dilo tšeo a di hlokago. Mohlomongwe Petro o ile a gopola mantšu a Jesu a gore Jehofa o tlo hlokomela bao ba ‘tsomago Mmušo pele.’ (Mat. 6:33) Dilo tše ka moka di thušitše Petro gore a etiše pele mošomo wa go bolela ditaba tše dibotse go e na le kgwebo ya gagwe ya go rea dihlapi. O ile a bolela ditaba tše dibotse ka Pentekoste ya 33 C.E., le go thuša ba dikete gore ba amogele therešo. (Dit. 2:​14, 37-41) Ka morago o ile a thuša Basamaria le batho bao e sego Bajuda gore ba ithute ka Kriste. (Dit. 8:​14-17; 10:​44-48) Jehofa o dirišitše Petro ka tsela e makatšago gore a tliše batho ba mehuta ka moka ka phuthegong.

12. Mohlala wa Petro o tlo re thuša bjang ge re dutše re lwantšhana le mafokodi ao re nago le ona?

¹² Jehofa a ka re thuša gore re kgotlelele. Go ka no se be bonolo gore re kgotlelele kudu ge e ba re tshwentšwe ke bofokodi bjo itšego ka nako e telele. Ka dinako tše dingwe mafokodi a rena a ka bonala a le thata go feta ao Petro a bego a na le ona. Eupša Jehofa a ka re thuša gore re se ke ra fela matla. (Ps. 94:​17-19) Ka mohlala, ngwanabo rena yo mongwe o be a ratana le batho ba bong bjo bo swanago le bja gagwe mengwaga e mentšinyana pele e ka ba Hlatse. O ile a fetoša bophelo bja gagwe ka mo go feletšego gomme a tlogela mekgwa yeo. Eupša ka dinako tše dingwe, o be a dula a lwantšhana le dikganyogo tše di fošagetšego. O ile a thušwa ke eng gore a kgotlelele? O re: “Jehofa o a re matlafatša.” O oketša ka gore: “Ke ithutile gore ge Jehofa a re nea moya wa gagwe, re ka kgona go phela ka tsela yeo a nyakago re phela ka yona . . . Jehofa o be a dutše a ntiriša. Le gona go sa šetšwe diphošo tšeo ke nago le tšona, o sa tšwela pele a mmatlafatša.”

13. Re ka ekiša bjang mohlala wa Petro wo go bolelwago ka ona go Ditiro 4:​13, 29, 31? (Bona le seswantšho.)

¹³ Re ithutile gore Petro o ile a dira diphošo tše dintši ka baka la go boifa batho. Eupša Petro o  ile a kgona go bontšha sebete ka morago ga gore a kgopele Jehofa gore a mo matlafatše. (Bala Ditiro 4:​13, 29, 31.) Le rena re ka kgona go lebeletšana le dilo tšeo di re boifišago. Nagana ka seo se ilego sa diragalela ngwanabo rena Horst wa moswa yo a bego a dula Nazi kua Germany. Ka makga a mmalwa, o ile a fenywa ke kgateletšo yeo a bego a e hwetša sekolong ke moka a bolela gore, “Hitler o tla re phološa!” Go e na le gore batswadi ba Horst ba mo omanye, ba ile ba mo rapelela ke moka ba kgopela Jehofa gore a mo fe sebete. Horst o ile a ba le matla a go ema a tiile ka baka la thušo ya batswadi ba gagwe le go ithekga ka Jehofa. Ka morago o ile a bolela gore: “Jehofa ga se a ka a ntahla.” c

14. Bagolo bao ba nago le lerato ba ka thuša bjang bao ba ikwago ba nyamile?

¹⁴ Jehofa le Jesu ba ka se tsoge ba re lahlile. Ka morago ga gore Petro a latole Jesu gararo o be a sa tsebe gore a dire’ng. Na o be a tla tlogela go ba molatedi wa Kriste goba o be a tla kgotlelela? Jesu o ile a lopa Jehofa gore a thuše Petro gore a se ke a felelwa ke tumelo. Jesu o ile a botša Petro ka thapelo yeo a ba a mo kgonthišetša gore o tla kgona go tiiša bana babo. (Luka 22:​31, 32) Go gopola mantšu ao a Petro go ka ba go ile gwa kgothatša Petro. Ge re swanetše go dira diphetho tše bohlokwa maphelong a rena, Jehofa a ka diriša badiši ba lerato gore ba re nee thušo yeo re e hlokago e le gore re kgone go kgotlelela. (Baef. 4:​8, 11) Ngwanabo rena Paul yo a hlanketšego bjalo ka mogolo ka nako e telele o nea thušo e bjalo. O botša bao ba ikwago eka ba nyaka go tlogela Jehofa gore ba naganišiše kamoo a ba thušitšego ka gona gore ba hwetše therešo. Ke moka o ba kgonthišetša gore ka baka la ge Jehofa a na le botho bjo bogolo, a ka se tsoge a ba lahlile. O phetha ka gore: “Ke bone ba bantši bao  ba bego ba nyamile ba kgotlelela ka baka la thušo ya Jehofa.”

15. Mohlala wa Petro le wa Horst o bontšha bjang gore seo se bolelwago ke Mateo 6:33 ke therešo?

¹⁵ Go no swana le ge Jehofa a ile a thuša Petro le baapostola ba bangwe, le rena ge re ka etiša Mmušo wa gagwe pele o tlo re thuša ka dilo tšeo re di hlokago. (Mat. 6:33) Horst yo re boletšego ka yena pejana, o be a nyaka go ba mmulamadibogo ka morago ga Ntwa ya Bobedi ya Lefase. O be a diila kudu e bile a ipotšiša ge e ba a tla kgona go itlhokomela le go dula a le tirelong ya nako e tletšego. O ile a dira’ng? O ile a leka Jehofa go bona ge eba a tla mo hlokomela ka go fetša beke ka moka a na le molebeledi wa tikologo tšhemong. Ge beke e fela o ile a makala ge molebeledi wa tikologo a be a mo nea omfolopo yeo e bego e se ya ngwalwa gore e tšwa go mang. Ka gare ga yona, go be go na le tšhelete e lekanego yeo e bego e tla mo thuša ka dikgwedi tše mmalwa ge e dutše e le mmulamadibogo. Horst o ile a bona gore Jehofa o tlo kgona go mo hlokomela. O ile a fetša bophelo bja gagwe ka moka a etiša Mmušo wa Modimo Pele.—Mal. 3:10.

16. Ke ka baka la’ng go le bohlokwa gore re ithute ka mohlala wa Petro le dilo tšeo a di ngwadilego?

¹⁶ Petro o swanetše go ba a ile a thaba kudu ka ge Jesu a se a ka a mo tlogela! Jesu o ile a tšwela pele a tlwaetša Petro gore e be moapostola yo a botegago le go ba mohlala o mobotse go Bakriste. Tsela yeo Jesu a tlwaeditšego Petro ka yona e re ruta dithuto tše dintši tše bohlokwa. Mangwalo a mabedi a buduletšwego ao Petro a a ngwaletšego diphuthego lekgolong la pele la mengwaga e bile ao ga bjale e lego karolo ya Beibele, a na le dithuto tše bohlokwa. Sehlogong se se latelago re tlo boledišana ka dilo tše sego kae go tšwa mangwalong ao, le ka tsela yeo re ka a dirišago ka yona lehono.