1. Ke ka baka la’ng Jesu a ile a swantšha balatedi ba gagwe le dinku?

JESU o ile a swantšha segwera seo a nago le sona le balatedi ba gagwe le tswalano yeo dinku di nago le yona le modiši wa tšona. (Joh. 10:14) Papišo ye e ya swanelega. Dinku di tseba modiši wa tšona e bile di kgona go dira seo a di botšago sona. Monna yo mongwe yoo a bego a etetše naga e nngwe o ile a bona se se direga. O itše: “Re be re nyaka go tšea dinku tšeo dinepe gomme ra di bitša gore di tle kgauswi le rena. Eupša ga se tša tla ka gobane di be di sa tsebe mantšu a rena. Mošemanyana yo a di dišago o ile a tla gomme ge a di bitša tša mo latela.”

2-3. (a) Balatedi ba Jesu ba bontšha bjang gore ba theetša lentšu la gagwe? (b) Re tlo boledišana ka’ng sehlogong se le se se latelago?

² Seo monna yoo a ilego a se bona se re gopotša mantšu ao Jesu a ilego a a botša dinku tša gagwe goba balatedi ba gagwe. O itše: “Di tla theetša lentšu la ka.” (Joh. 10:16) Eupša ka ge Jesu a le legodimong re ka theetša lentšu la gagwe bjang? Re bontšha gore re theetša lentšu la gagwe ka go dira dilo tšeo a re rutilego tšona.​—Mat. 7:24, 25.

³ Sehlogong se le se se latelago re tlo ithuta ka dilo tše dingwe tšeo Jesu a re rutilego tšona. Re tlo bona gore Jesu o re re swanetše go dira eng le gore ga se ra swanela go dira eng. A re thomeng pele ka go ithuta dilo tše pedi tšeo modiši wa rena yo botse a rego re tlogele go di dira.

4. Go ya ka Luka 12:29, ke’ng seo se ka dirago gore re ‘tshwenyege kudu’?

⁴ Bala Luka 12:29. Jesu o ile a kgothaletša balatedi ba gagwe gore ba ‘lese go tshwenyega kudu’ ka dilo tšeo ba di hlokago.  Re a tseba gore keletšo ya Jesu e dula e re hola. Re nyaka go diriša keletšo ye, eupša ka dinako tše dingwe ga go bonolo gore re e diriše. Ka baka la’ng?

5. Ke ka baka la’ng batho ba bangwe ba ka tshwenyega ka dilo tšeo ba di hlokago?

⁵ Batho ba bangwe ba ka tshwenyega ka dilo tšeo ba di hlokago, go swana le dijo, diaparo le madulo. Ge e ba ba dula nageng yeo batho ba bantši ba se nago sa bona e bile ba hloka mešomo, go ka ba thata gore ba hwetše tšhelete e lekanego gore ba hlokomele malapa a bona. Goba mohlomongwe motho yoo a bego a šoma e bile a hlokomela lapa a ka ba a hlokofetše, gomme seo sa dira gore lapa le hloke tšhelete ya go reka dilo tšeo le di hlokago. Le gona batho ba bantši ba ka ba ba ile ba lahlegelwa ke mošomo ka baka la bolwetši bja corona. (Mmo. 9:11) Ge e ba re kile ra welwa ke a mangwe a mathata a, re ka latela bjang keletšo ya Jesu ya gore re lese go tshwenyega?

6. Hlalosa gore moapostola Petro o ile a diragalelwa ke’ng.

⁶ Ka letšatši le lengwe ge moapostola Petro le baapostola ba bangwe ba nametše sekepe ba le ka lewatleng la Galilea, go ile gwa tsoga ledimo le legolo ke moka ba bona Jesu a sepela godimo ga metse. Petro o ile a re: “Morena, ge e ba e le wena, ntaele gore ke tle go wena ke sepela godimo ga meetse.” Ka morago ga gore Jesu a mmotše gore “a tle” go yena, Petro o ile a fologa sekepe ke moka “a ya go Jesu a sepela godimo ga meetse.” Go ile gwa direga’ng ka morago? “ge a lebelela ledimo, a tšhoga, gomme eitše ge a thoma go nwelela, a goeletša a re: ‘Morena, mphološe!’” Jesu o ile a otlolla letsogo la gagwe gomme a mo phološa. Nakong ya ge Petro a be a lebeletše Jesu, o ile a kgona go sepela godimo ga meetse.  Eupša ka morago ga gore Petro a lebelele ledimo, o ile a tšhoga kudu ke moka a thoma go nwelela.​—Mat. 14:24-31.

7. Re ka ithuta’ng mohlaleng wa Petro?

⁷ Re ka ithuta mohlaleng wa Petro. Ge Petro a be a thoma go fologa sekepe gomme a tsena ka lewatleng, o be a sa nagane gore o tlo tšhoga gomme a thoma go nwelela. O be a nyaka go sepela godimo ga meetse go fihlela a fihla moo Jesu a bego a le gona. Eupša go e na le gore a lebelele Jesu, o ile a thoma go tšhošwa ke ledimo. Ke nnete gore lehono re ka se kgone go sepela godimo ga meetse go swana le Petro, eupša re swanetše go kgotlelela mathata a rena. Ge e ba re ka se ithekge ka Jehofa gomme ra tlogela go nagana ka dilo tše dibotse tšeo a re tshepišitšego tšona, re tlo imelwa ke mathata a rena gomme ra se sa ba le tumelo e tiilego go yena. Ka gona le ge re ka welwa ke mathata a magolo, re swanetše go dula re tshepa gore Jehofa o tlo re thuša. Re ka dira seo bjang?

8. Re ka thušwa ke’ng gore re se tshwenyege kudu ka dilo tšeo re di hlokago?

⁸ Go e na le gore re tshwenyege ka mathata a rena, re swanetše go tshepa Jehofa. Gopola gore Tatago rena yo lerato Jehofa o tshepiša gore o tlo re hlokomela ge e ba re mo etiša pele maphelong a rena. (Mat. 6:32, 33) Ke kgale a direla batho ba gagwe dilo tšeo a ba tshepišago tšona. (Doit. 8:4, 15, 16; Ps. 37:25) Ge e ba Jehofa a kgona go hlokomela dinonyana le matšoba, seo se re kgonthišetša gore ga se ra swanela go belaela ka gore re tlo ja eng goba ra aparang. (Mat. 6:26-30; Bafil. 4:6, 7) Go no swana le ge batswadi bao ba ratago bana ba bona ba ba hlokomela ka dilo tšeo ba di hlokago, Tatago rena wa legodimong le yena o a re hlokomela. Ruri Jehofa o tlo re hlokomela!

9. O ithuta’ng mohlaleng wa banyalani ba bangwe?

⁹ A re boneng mohlala woo o bontšhago gore Jehofa o re nea dilo tšeo re di hlokago. Ka letšatši le lengwe banyalani ba bangwe bao ba lego tirelong ya nako e tletšego, ba ile ba feta ba tšea dikgaetšedi tše dingwe tšeo di bego di dula lefelong leo go dulago batho bao ba tšwago dinageng tše dingwe ka koloi ya bona ya kgale. Ngwanabo rena yoo o re: “Ka morago ga diboka re ile ra mema dikgaetšedi tšeo gore di tle di je le rena. Eupša re ile ra lemoga gore re be re feletšwe ke dijo.” Go ile gwa direga’ng ka morago? Ngwanabo rena yoo o re: “Ge re fihla gae, re ile ra hwetša dipeke tše pedi tše dikgolo tšeo di nago le dijo mojakong wa rena. Re be re sa tsebe gore di be di beilwe ke mang moo. Ruri Jehofa o be a re hlokomela!” Ka moragonyana, koloi ya banyalani bao e ile ya senyega. Ba be ba e hloka gore ba kgone go ya tšhemong, eupša ba be ba se na tšhelete ya go e lokiša. Nakong ya ge koloi yeo e be e le karatšheng yeo go lokišwago dikoloi, monna yo mongwe o ile a tla gomme a botšiša gore: “Ke koloi ya mang ye?” Ngwanabo rena yoo o ile a re ke ya gagwe e bile e senyegile. Monna yoo o ile a re: “Seo ga se bothata. Mosadi wa ka o nyaka koloi ya go swana le ye, ka mmala wona wo. O e rekiša bokae?” Ngwanabo rena yoo o ile a rekiša koloi yeo gomme a kgona go ba le tšhelete yeo e lekanego ya go reka koloi e nngwe. O itše: “Re be re thabile kudu letšatšing leo. Re be re tseba gore seo ga se sa direga ka phošo, Jehofa o be a re thuša.”

10. Psalme 37:5 e re kgothatša bjang gore re se ke ra tshwenyega ka dilo tšeo re di hlokago?

¹⁰ Ge e ba re theetša modiši yo botse gomme ra tlogela go tshwenyega kudu ka dilo  tšeo re di hlokago, re ka kgodišega gore Jehofa o tlo re thuša. (Bala Psalme 37:5; 1 Pet. 5:7) Nagana ka mathata ao re boletšego ka ona go serapa 5. Mohlomongwe ke go tloga kgale Jehofa a diriša hlogo ya lapa goba mongmošomo wa gago go go thuša gore o be le dilo tšeo o di hlokago letšatši le letšatši. Ge e ba hlogo ya lapa e se sa kgona go go hlokomela goba wa lahlegelwa ke mošomo, Jehofa o tla go hlokomela ka ditsela tše dingwe. Le gona o tla kgonthišetša gore o ba le dilo tšeo o di hlokago. A re boledišaneng ka selo se sengwe seo modiši yo botse a re kgothaletšago gore re se ke ra se dira.

11. Go ya ka Mateo 7:1, 2, Jesu o ile a re re tlogele go dira’ng, gona ke ka baka la’ng go ka ba thata go dira bjalo?

¹¹ Bala Mateo 7:1, 2. Jesu o be a tseba gore batho ga se ba phethagala le gore ba dula ba šetša mafokodi a ba bangwe. Ke ka baka leo a itšego: “Tlogelang go ahlola.” Re ka leka ka thata gore re se ahlole Bakristegotee le rena le ge ka dinako tše dingwe go ka ba thata go dira bjalo. Re ka dira’ng ge e ba re lemoga gore re fela re šetša mafokodi a batho ba bangwe? Theetša mantšu a Jesu e bile o leke ka thata gore o se sa ahlola ba bangwe.

12-13. Go naganišiša ka tsela yeo Jehofa a bego a lebelela Dafida ka yona go ka re thuša bjang gore re se ke ra ahlola ba bangwe?

¹² Go naganišiša ka mohlala wa Jehofa go ka re thuša gore re se ke ra ahlola ba bangwe. O lebelela dilo tše dibotse feela go batho. Nagana gore o ile a swara Dafida bjang ge a be a dirile dibe tše dikgolo. Ka mohlala, o ile a otswa le Batseba a ba a dira gore le monna wa gagwe a bolawe. (2 Sam. 11:2-4, 14, 15, 24) Seo Dafida a ilego a se dira se ile sa kweša yena le lapa la gagwe ka moka bohloko. (2 Sam. 12:10, 11) Ka letšatši le lengwe, Dafida o ile a se ithekge ka Jehofa gomme a bala madira le ge Jehofa a be a sa mo laela gore a a bale. Dafida a ka ba a ile a dira se ka ge a be a bona gore o na le madira a mantši. Go ile gwa direga eng ka morago? Baisiraele bao e ka bago ba 70 000 ba ile ba bolawa ke bolwetši!​—2 Sam. 24:1-4, 10-15.

¹³ Ge nkabe o be o dula Isiraele ka nako yeo, o be o tlo lebelela Dafida bjang? Na o be o tlo mo ahlola gomme wa bona okare Jehofa ga se a swanela go mo lebalela? Jehofa ga se a ka a mo ahlola. O ile a gopola gore Dafida o be a dutše a mo hlankela ka go botega e bile o be a itshola go tšwa pelong. Ka gona Jehofa o ile a lebalela Dafida. Le gona o be a tseba gore Dafida o be a mo rata kudu le gore o be a nyaka go dira dilo tšeo di lokilego. Na ga o leboge gore Jehofa o lebelela dilo tše dibotse go rena.​—1 Dikg. 9:4; 1 Dikor. 29:10, 17.

14. Ke’ng seo se ilego sa thuša Bakriste gore ba se ahlole ba bangwe?

¹⁴ Ka ge Jehofa a se a letela gore re phethagale, le rena ga se ra swanela go letela gore batho ba bangwe ba phethagale, eupša re swanetše go lebelela dilo tše dibotse go bona. Gantši go bonolo gore re bone mafokodi a batho ba bangwe le go ba swaya-swaya diphošo. Eupša motho yo a ratago Jehofa o kgona go dirišana le batho ba bangwe go e na le go šetša mafokodi a ba bangwe. Ka mohlala, re ka bona taamane e sa kgahliše, eupša ge motho yo a nago le temogo a ka e lebeledišiša gabotse, o tla bona gore ge e ka pholišiwa e ka ba le mohola. Go swana le Jehofa le Jesu, re swanetše go lebelela dilo tše dibotse go ba bangwe go e na le go šetša mafokodi a bona.

15. Go nagana ka maemo a batho ba bangwe go ka re thuša bjang gore re se ke ra ba ahlola?

 ¹⁵ Ka ntle le go lebelela dika tše dibotse feela, ke eng se sengwe gape seo se ka re thušago gore re se ke ra ba ahlola? Leka go nagana ka tsela yeo bophelo bja bona bo lego ka yona. Nagana ka mohlala wo. Ka letšatši le lengwe ge Jesu a be a le tempeleng o ile a bona mohlologadi yo mongwe a neela ka ditšhelete tše pedi tša tšhipi tša theko e nyenyane. Ga se a ka a botšiša gore: “Ke ka baka la’ng a sa neele ka tšhelete e ntši?” Go e na le gore Jesu a lebelele tšhelete yeo mohlologadi yoo a bego a neela ka yona, o ile a kwešiša maemo a gagwe gomme a mo reta ka gobane o dirile sohle seo a ka se kgonago gore a ntšhe moneelo woo.​—Luka 21:1-4.

16. O ka ithuta’ng mohlaleng wa Veronica?

¹⁶ Re ka swantšha bohlokwa bja go lebelela maemo a batho ba bangwe le seo se ilego sa diragalela Veronica. O be a kopanela le kgaetšedi yoo a bego a godiša ngwana a nnoši. Veronica o itše: “Ke be ke bona e ka ga ba tšee diboka le tšhemo di le bohlokwa. Ka gona ke ile ka thoma go se sa ba lebelela gabotse. Ka letšatši le lengwe ke ile ka ya le kgaetšedi yoo tšhemong gomme o ile a mpotša gore ngwana wa gagwe o na le bolwetši bja monagano. O be a dira sohle seo a ka se kgonago gore a hlokomele lapa la gagwe le go le thuša gore le be le segwera se sebotse  le Jehofa. Ka ge ngwana wa gagwe a babja, ka dinako tše dingwe o be a bona go le kaone gore a ye dibokeng tše dingwe. Ke be ke sa nagane gore bophelo bja gagwe bo be bo le thata ka tsela ye. Gona bjale ke rata kgaetšedi yoo kudu e bile ke a mo hlompha ka gobane o dira sohle seo a ka se kgonago gore a hlankele Jehofa.”

17. Jakobo 2:8 e re laela gore re dire’ng, gona re ka dira seo bjang?

¹⁷ Re swanetše go dira’ng ge e ba re lemoga gore re ahlotše Mokristegotee le rena? Re swanetše go gopola gore go bohlokwa gore re rate bana babo rena le dikgaetšedi. (Bala Jakobo 2:8.) Le gona, re ka rapela Jehofa go tšwa pelong gomme re mo kgopele gore a re thuše gore re tlogele go ahlola ba bangwe. Re ka phela ka go dumelelana le seo re se rapeletšego ka gore re fetše nako re na le motho yoo re mo ahlolago. Seo se tla re thuša gore re mo tsebe gakaone. Re ka mo kgopela gore a šome le rena tšhemo goba ra mo mema gore a tle a je le rena. Ge re dutše re tseba motho yoo gakaone, re tla leka go ekiša mohlala wa Jehofa le wa Jesu wa gore re lebelele dilo tše dibotse go yena. Ka go dira bjalo, re tla be re bontšha gore re theetša taelo ya modiši yo botse ya gore re tlogele go ahlola.

18. Re ka bontšha bjang gore re theetša lentšu la modiši yo botse?

¹⁸ Go swana le ge dinku di theetša lentšu la modiši wa tšona, le balatedi ba Jesu ba theetša lentšu la gagwe. Ge re leka ka thata go tlogela go tshwenyega ka dilo tšeo re di hlokago le go ahlola batho ba bangwe, Jehofa le Jesu ba tlo šegofatša maiteko ao re a dirago. Eka re ka tšwela pele re theetša lentšu la modiši yo botse go sa šetšwe gore re “mohlatswana” goba “dinku tše dingwe.” (Luka 12:32; Joh. 10:11, 14, 16) Sehlogong se se latelago re tlo boledišana ka dilo tše pedi tšeo Jesu a boditšego balatedi ba gagwe gore ba di dire.