Sehlogong seo, re ithutile gore go na le taba e tee feela yeo e kgomago batho le barongwa, e lego go kgethagatšwa ga leina la Jehofa le legolo. Taba e nngwe ke ya bogoši bja gagwe, e lego tsela e di phalago tšohle ya go buša. Tsela ye e sepedišana le go kgethagatšwa ga leina la Jehofa. Le gona, taba ya gore go na le batho ba go botegela Modimo e sepedišana le go kgethagatšwa ga leina la Jehofa.

Ke ka baka la’ng gona bjale taba ya bohlokwa kudu e akaretša leina la Jehofa le go le kgethagatša? A re boleleng ka mabaka a mararo.

Lebaka la pele ke gore, Sathane o ile a senya Modimo leina kua serapeng sa Edene. Potšišo yeo Sathane a e botšišitšego Efa e ile ya dira gore go bonagale e ka Modimo o a timana e bile o gatelela batho bao a ba bušago. Ke moka Sathane o ile a ganetšana le mantšu ao Modimo a a boletšego, ge e le gabotse o ile a re Modimo o na le maaka. O ile a senya Jehofa leina. O ile a thoma go bitšwa “Diabolo,” yeo e bolelago gore ke “mothomeletši.” (Joh. 8:44) Efa o ile a tshepa maaka ao a Sathane gomme a se sa kwa Modimo, a rabela kgahlanong le bogoši bja Modimo. (Gen. 3:1-6) Go fihla le lehono, Sathane o sa dutše a senya Modimo leina le go phatlalatša maaka mabapi le kamoo Jehofa a dirago dilo ka gona. Gantši batho bao ba theetšago maaka ao a Sathane, ga ba kwe Jehofa. Batho ba Modimo bona ba lebelela go senywa ga leina la Jehofa e le selo se kgopo. Ka baka la maaka ao a Sathane, batho ba bantši ba a tlaišega e bile go tletše bokgopo mo lefaseng.

Lebaka la bobedi, leo le holago tlholo ka moka ke gore, Jehofa o ikemišeditše go kgethagatša leina la gagwe le go tloša kgobošo ka moka kgahlanong le lona. Seo se tloga se le bohlokwa go Jehofa. Ke ka baka leo a rego: “Ke tla kgethagatša leina la ka le legolo.” (Hesek. 36:23) Jesu o boletše ka mo go kwagalago ka seo se swanetšego go ba bohlokwa kudu dithapelong tša bahlanka ka moka ba Jehofa ge a be a re: “Leina la gago a le kgethagatšwe.” (Mat. 6:9) Beibele e bolela gantši ka bohlokwa bja go kgethagatšwa ga leina la Jehofa. Nagana ka mehlala ye e sego kae: “Bolelang ka letago la leina la Jehofa.” (1 Dikor. 16:29; Ps. 96:8) “Opelelang letago la leina la gagwe.” (Ps. 66:2) “Ke tla tagafatša leina la gago go iša mehleng ya neng le neng.” (Ps. 86:12) E nngwe ya dinako tšeo Jehofa a ilego a bolela ka yena ka go lebanya, e bile tempeleng kua Jerusalema ge Jesu a be a re: “Tate, tagafatša leina la gago.” Jehofa o ile a araba ka gore: “Ke le tagafaditše, gomme ke tla buša ke le tagafatša.”—Joh. 12:28. a

Lebaka la boraro ke gore, leina la Modimo le sepedišana le morero wa gagwe wa mathomong. Nagana ka se: Ke mogato ofe wa mafelelo wo o tlago go latela ka morago ga Pušo ya Kriste ya Mengwaga e Sekete? Na barongwa le batho ba tlo ikwa bjang ka go kgethagatšwa ga leina la Modimo ka nako yeo? E le gore re kgone go araba  potšišo ye, a re boleleng ka dilo tše pedi, e lego go botega ga batho le bogoši bja legohle. Na ka nako yeo batho ba tlo swanelwa ke go itlhatsela gore ba a botega? Aowa. Ba tla be ba lekilwe ka mo go feletšego e bile ba phethagetše. Ba tla be ba hweditše bophelo bjo bo sa felego. Go ka se sa hlokagala go hlatsela gore tsela ya Modimo ya go buša e di phala ka moka, ka gobane bao ba tla bego ba le mo lefaseng le bao ba tla bego ba le legodimong e tla be e le batee e bile ba tla amogela go bušwa ke Jehofa. Ka nako yeo leina la Modimo e tlo ba lona le bohlokwa kudu go batho ba gagwe

Ka nako yeo, motho yo mongwe le yo mongwe o tlo tseba therešo ka Jehofa e bile leina la gagwe le tla ba le kgethagaditšwe ka mo go feletšego. Leina la Jehofa e tlo ba selo sa bohlokwa kudu go bahlanka ba gagwe ba legodimong le lefaseng. Ka baka la’ng? Ka gobane ba tlo bona Jehofa a tšwela pele a dira dilo tše di kgahlišago. Nagana ka se: Ka ge Jesu a tla be a bušeditše pušo go Jehofa, Modimo e tlo ba “dilo tšohle go yo mongwe le yo mongwe.” (1 Bakor. 15:28) Ka morago ga seo, batho bao ba lego mo lefaseng ba tlo thabela “tokologo ya letago ya bana ba Modimo.” (Baroma 8:21) Ke moka Jehofa o tlo dira gore lapa la gagwe leo le bopšago ke batho ba mo lefaseng le barongwa bao ba lego legodimong le be le botee.—Baef. 1:10.

Dilo tše ka moka di tlo dira gore lapa la Jehofa la bao ba lego legodimong le bao ba lego lefaseng ba ikwe bjang? Re tlo ba le lebaka la gore re dule re tagafatša leina le lebotse la Jehofa. Mopsalme Dafida o ile a budulelwa go ngwala gore: “A go retwe Jehofa Modimo . . . A go retwe leina la gagwe la letago go iša mehleng ya neng le neng.” (Ps. 72:18, 19) Re tlo dula re hwetša mabaka a maswa le ao a kgahlišago a gore re kgethagatše leina la Jehofa go iša mehleng ya neng le neng.

Leina la Jehofa le bolela se sengwe le se sengwe ka yena. Selo sa bohlokwa seo leina la Modimo le re gopotšago sona ke lerato la gagwe. (1 Joh. 4:8) Re tlo dula re gopola gore Jehofa o re bopile, a re nea sehlabelo le go re buša ka tsela e kaone ka gobane a re rata. Re tšwela pele re bona lerato leo a le bontšhago tlholo ya gagwe ka moka go ya go ile. Re tlo nyaka go batamela Tatago rena wa legodimong le go mo opelela ditumišo tša ka mo go sa felego.—Ps. 73:28.