• “Go be go bonagala eka monna wa ka o dula a dira bohlotlolo.”

• “Ke be ke ikwa ke lewa ke dihlong, ke sa kgahliše e bile ke se na mohola.”

• “Ke be ke sa kgone go bolela le motho ka se. Ke ekwa bohloko ke nnoši.”

• “Ke be ke ikwa okare Jehofa ga a na taba le nna.”

Mantšu a a ka mo godimo a bontšha kamoo mosadi a kwago bohloko ka gona ge monna wa gagwe a bogela diswantšho le dibidio tša batho bao ba sa aparago. Le gona ge e ba monna a be a dira seo ka dikgwedi goba ka mengwaga e mentši, mosadi wa gagwe a ka ikwa eka a ka se sa mo tshepa gape. Mosadi yo mongwe o itše: “Ke ile ka ipotšiša gore ‘monna yo a lego kgauswi le nna ke mang? Na go na le dilo tše dingwe tšeo a di utago?’”

Sehlogo se, se ngwaletšwe go thuša mosadi yoo monna wa gagwe a bogelago diswantšho le dibidio tša batho ba sa aparago. a Se tlo bolela ka melao ya motheo ya Beibele yeo e ka mo kgothatšago le go mo kgonthišetša gore Jehofa o nyaka go mo thekga, le go mo thuša go bona gore a ka kgona go ba le khutšo le go dula e le mogwera wa Jehofa. b

Le ge o ka se laole selo se sengwe le se sengwe seo monna wa gago a se dirago, eupša go na le dilo tše dingwe tšeo o ka di dirago gore o be le khutšo ya monagano. Nagana ka tše di latelago.

O se ke wa ipea molato. Mosadi a ka ipona molato ge monna wa gagwe a bogela diswantšho le dibidio tša batho bao ba sa aparago. Alice c o be a ikwa eka ga a kgahle monna wa gagwe. O ile a ipotšiša gore, “Ke ka baka la’ng monna wa ka a ka lebelela basadi ba bangwe nna ke le gona?” Basadi ba bangwe ba ipona molato ka baka la tsela yeo ba arabelago ka yona ka gobane ba nagana gore ba gakatša boemo. Danielle o re: “Ke be ke ipona ke le mosadi yo a dulago a galefile e bile a senya lenyalo la gagwe.”

Ge eba o ikwa ka tsela yeo, tseba gore Jehofa ga a go bone molato ka lebaka la dilo tšeo monna wa gago a di dirago. Jakobo 1:14 e re: “Yo mongwe le yo mongwe o lekwa ka go gogwa le go goketšwa ke kganyogo ya gagwe.” (Baroma 14:12; Bafil. 2:12) Go e na  le gore Jehofa a go sole, o tšeela godimo potego ya gago.—2 Dikor. 16:9.

Go bohlokwa go kwešiša gore ge e ba monna a bogela diswantšho le dibidio tša batho bao ba sa aparago, seo ga se bolele gore mosadi wa gagwe ga a bohlokwa. Ditsebi di bolela gore go bogela diswantšho le dibidio tša batho bao ba sa aparago go tliša dikganyogo tšeo go se nago mosadi yo a ka di kgotsofatšago.

O se ke wa tshwenyega kudu. Catherine o boletše gore tsela yeo monna wa gagwe a bogelago diswantšho le dibidio tša batho bao ba sa aparago ka yona e dirile gore a fetše nako e telele a sa ipshine ka bophelo. Frances o itše: “Ka mehla ke tshwenyega kudu ge ke sa tsebe gore monna wa ka o kae. Ke fetša letšatši ka moka ke hlakahlakane.” Basadi ba bangwe ba boletše gore ba ikwa ba lewa ke dihlong ge ba na le Bakriste ba bangwe bao ba tsebago ka bothata bjoo banna ba bona ba nago le bjona. Ba bangwe ba bolela gore ba ikwa ba le noši ka gobane ba nagana gore ga go na motho yo a kwešišago bothata bjo ba lebeletšanego le bjona.

Ke ga tlhago go ikwa ka tsela yeo. Eupša ge o ka fetša nako e ntši o nagana ka dilo tšeo, o tlo tshwenyega le go feta. Ka gona, leka go dula o tshwenyega ka segwera sa gago le Jehofa. Go dira bjalo go tlo go thuša gore o kgone go kgotlelela.—Ps. 62:2; Baef. 6:10.

O ka thušwa ke go bala le go naganišiša ka basadi ba ka Beibeleng bao Jehofa a ilego a ba thuša ka morago ga gore ba mo rapele. O be a sa tloše mathata a bona, eupša o be a ba thuša gore ba be le khutšo. Ka mohlala, Hannah o be a “kwele bohloko moyeng” ka baka la bothata bjo a bego a lebeletšane le bjona. Eupša ka morago ga gore “a rapele nako e telele pele ga Jehofa,” o ile a ba le khutšo le ge a be a sa tsebe ge e ba bothata bja gagwe bo tla loka goba aowa.—1 Sam. 1:10, 12, 18; 2 Bakor. 1:3, 4.

Kgopela bagolo ba phuthego gore ba go thuše. Ba swana le “lefelo la go tšhabela phefo le lefelo la go utela ledimo.” (Jes. 32:2.) Ba ka kgona le go šišinya kgaetšedi yo mongwe yo o ka bolelago le yena gomme a go nea kgothatšo.—Die. 17:17.

Na o ka kgona go thuša monna wa gago gore a tlogele mokgwa wa go bogela diswantšho le dibidio tša batho bao ba sa aparago? Mohlomongwe o ka kgona go mo thuša. Beibele e bontšha gore batho ba babedi ba ka kgona go fenya ge ba elwa le lenaba le matla. (Mmo. 4:9-12) Dipego di bontšha gore ge banyalani ba šoma gotee go thušana go tlogela go bogela diswantšho le dibidio tša batho bao ba sa aparago, ba ka kgona go fenya bothata bjoo ke moka ba boa ba tshepana.

 Ke nnete gore go ithekgile ka molekane wa gago gore na o tloga a nyaka go tlogela go bogela diswantšho le dibidio tša batho bao ba sa aparago na. Na o kgopetše Jehofa gore a mo nee matla le go kgopela bagolo gore ba mo thuše? (2 Bakor. 4:7; Jak. 5:14, 15) Na go na le dilo tšeo di ka mo thušago gore a pheme go bogela diswantšho le dibidio tša batho bao ba sa aparago, tše bjalo ka go fokotša tsela yeo a dirišago didirišwa tša elektroniki ka gona goba go phema maemo ao a ka dirago gore a lekege? (Die. 27:12) O ikemišeditše go amogela thušo e bile o go botša nnete? Ge eba go le bjalo, o ka kgona go mo thuša.

O ka mo thuša bjang? Nagana ka mohlala wo. Felicia o nyalane le Ethan, yo a ilego a lemalela go bogela diswantšho le dibidio tša batho bao ba sa aparago ge e be e sa le yo monyenyane. Felicia o dira gore go be bonolo gore monna wa gagwe a bolele le yena ge a ikwa a nyaka go bogela diswantšho le dibidio tša batho bao ba sa aparago. Ethan o re: “Ke bolela le mosadi wa ka ke lokologile e bile ke mmotša dilo ka moka. Ka lerato o nthuša gore ke pheme dilo tšeo di ka dirago gore ke lekege le go dula a hlola gore na ke ikwa bjang, e bile o nthuša le gore ke se ke ka diriša inthanete kudu.” Felicia o kwešwa bohloko ke bothata bjo Ethan a nago le bjona bja go nyaka go bogela diswantšho le dibidio tša batho bao ba sa aparago. Felicia o re: “Go galefa ga ka le go kwa bohloko ga se gona go ka dirago gore monna wa ka a tlogele mokgwa wo o mobe. Ka morago ga gore re boledišane gomme a tsebe kamoo go bogela diswantšho le dibidio tša batho bao ba sa aparago go nkwešago bohloko ka gona, o dira sohle seo a ka se kgonago gore a se ke a di bogela le go dira gore ke mo tshepe gape.”

Dipoledišano tša mohuta wo di ka thuša monna gore a se hlwe a bogela diswantšho le dibidio tša batho bao ba sa aparago, e bile di ka thuša mosadi gore a boele a tshepe monna wa gagwe. Ge monna a ikemišeditše go botša mosadi wa gagwe ka mafokodi ao a nago le ona, dilo tšeo a di dirago le gore o mo kae, gona go tlo ba bonolo gore mosadi wa gagwe a mo tshepe ka gobane ga a sa mo utela selo.

Na o nagana gore le wena o ka kgona go thuša monna wa gago ka tsela e swanago? Ge e ba go le bjalo, mohlomongwe le ka bala sehlogo se le go boledišana ka sona. Monna wa gago o tloga a nyaka go tlogela mokgwa wo o mobe le go dira gore o kgone go mo tshepa gape. Go ena le gore monna wa gago a galefe ge o nyaka go bolela le yena ka bothata bjo, o swanetše go kwešiša gore wena o ikwa bjang. O swanetše go mo thuša go tlogela mokgwa wo o mobe le go leka go bula sebaka sa gore le tshepane. Ka moka ga lena le swanetše go tseba gore ke ka baka la’ng batho ba e ba le bothata bja go bogela diswantšho le dibidio tša batho bao ba sa aparago e le gore le tsebe seo le swanetšego go se dira gore bothata bjo bo fele. d

 Ge e ba le bona eka poledišano ya lena e ka feleletša ka gore le ngangišane, le ka kgopela mogolo yoo ka moka ga lena le ka ikwago le lokologa ge le na le yena gore a be gona gomme a le hlahle ge le dutše le boledišana. Gopola gore le ge molekane wa gago a ka tlogela go bogela diswantšho le dibidio tša batho bao ba sa aparago, go ka go tšea nako gore o mo tshepe gape. O se ke wa fela matla. Naganišiša le ka dilo tše dinyenyane tšeo le ka bago le kaonefaditše go tšona lenyalong la lena. Letela gore ge nako e dutše e eya e bile le sa fele pelo, lenyalo la lena le ka boa la tia gape.—Mmo. 7:8; 1 Bakor. 13:4.

Ge e ba monna wa gago a ka boela a bogela diswantšho le dibidio tša batho bao ba sa aparago ka morago ga go tlogela ka nakwana, seo ga se bolele gore ke ya pala e a leswa. Ge e ba a šetše a lemaletše mokgwa wo ka nako e telele, a ka thatafalelwa ke go o tlogela ka nako e telele. Ka nako e nngwe a ka boela mokgweng wo o mobe ka morago ga go o phema ka mengwaga e mentši. E le gore a se ke a boela mokgweng wo a šetšego a kgonne go o tlogela, o swanetše go diriša mekgwa ka moka yeo e ka mo thušago go o phema. (Die. 28:14; Mat. 5:29; 1 Bakor. 10:12) O swanetše go hlagolela “matla a tutuetšago monagano” le go ithuta go “hloya dilo tše mpe,” tšeo di akaretšago go bogela diswantšho le dibidio tša batho bao ba sa aparago gotee le mekgwa ka moka e sa hlwekago e bjalo ka go fogohla goba go swaraswara ditho tša bong ka morero wa go ikgotsofatša ka tša thobalano. (Baef. 4:23; Ps. 97:10; Baroma 12:9) Na o ikemišeditše go fetoša tsela yeo a dirago dilo ka yona? Ge e ba go le bjalo ka nnete ga se ya pala e a leswa. e

Bjale, o swanetše go dira eng ge e ba molekane wa gago a sa nyake go lwantšha mokgwa wo? O ka ikwa eka molekane wa gago o go nyamišitše, o a go galefiša e bile ga a go botegele. Tlogelela dilo ka diatleng tša Jehofa gore o kgone go ba le khutšo. (1 Pet. 5:7) Tšwela pele o batamela kgauswi le Jehofa ka go ithuta, go rapela le go naganišiša. Ge o dira bjalo, kgodišega gore le yena o tla batamela kgauswi le wena. Ka ge Jesaya 57:15 e bontšha, Jehofa o ba Kgauswi le bao ba “setlegilego e bile ba kokobetše moyeng,” gore a kgone go ba thuša. Lwela go ba Mokriste yo mokaonekaone. Kgopela bagolo gore ba go thuše. Gomme o kgodišege gore ka letšatši le lengwe molekane wa gago o tla fetoga.—Baroma 2:4; 2 Pet. 3:9.