1. Go ya ka Baheberu 12:1, re swanetše go dira’ng gore re kitime lebelo la bophelo go fihla mafelelong?

 BEIBELE e swantšha bophelo bja rena bja Bokriste le lebelo. Batho bao ba kitimago go fihla mafelelong ba tlo putswa ka bophelo bjo bo sa felego. (2 Tim. 4:7, 8) Re swanetše go dira sohle seo re ka se kgonago gore re dule re kitima, kudu ka gobane re kgauswi le go fihla mafelelong. Moapostola Paulo yo a ilego a kgona go kitima go fihla mafelelong, o boletše ka dilo tšeo di ka re thušago gore re kgone go thopa lebelo le. O re boditše gore re ‘apole boima bjo bongwe le bjo bongwe. . . re kitime ka kgotlelelo lebelo leo le beilwego pele ga rena.’—Bala Baheberu 12:1.

2. ‘Go apola boima bjo bongwe le bjo bongwe’ go bolela eng?

² Ge Paulo a be a ngwala gore re “[apole] boima bjo bongwe le bjo bongwe,” na o be a e ra gore Mokriste ga se a swanela go ikarabela ka selo? Aowa. Go e na le moo, o be a e ra gore re se ke ra tshwenyega ka dilo tšeo di se nago mohola. Boima bja mohuta wo bo ka re šitiša go kitima le go dira gore re lape. E le gore re kgone go kgotlelela, re swanetše go lemoga dilo tšeo di se nago mohola tšeo di ka re šitišago le go di tlogela kapelapela. Eupša ka nako e swanago, re swanetše go lemoga gore go na le dilo tše bohlokwa tšeo re swanetšego go ikarabela ka tšona. Ge e ba re ka se lemoge boikarabelo bjoo re ka no se sa kgona go dula re le lebelong. (2 Tim. 2:5) Ke eng seo re swanetšego go ikarabela ka sona?

3. (a) Go ya ka Bagalatia 6:5, re swanetše go rwala morwalo ofe? (b) Re tlo ithuta ka eng sehlogong se, gona ka baka la’ng?

³ Bala Bagalatia 6:5. Paulo o ile a bolela ka selo se sengwe seo re swanetšego go se rwala. O ngwadile gore “yo mongwe le  yo mongwe o tla rwala morwalo wa gagwe.” Paulo mo o bolela ka selo seo Modimo a se letetšego go yo mongwe le yo mongwe wa rena, e lego “morwalo” woo re swanetšego go o rwala ka borena. Sehlogong se re tlo kwa gore morwalo wa rena ke eng le gore re ka o rwala bjang. Le gona, re tlo kwa ka merwalo ye e se nago mohola yeo re ka bago re e rwele yeo re swanetšego go ithuta go e lahla. Go rwala morwalo wa rena le go lahla morwalo woo re sa swanelago go o rwala, go tlo re thuša gore re kgone go kitima lebelo le la bophelo ka katlego.

4. Ke ka baka la’ng go se boima go phethagatša tshepišo yeo re e dirilego ya go hlankela Jehofa? (Bona le seswantšho.)

⁴ Re tshepišitše Jehofa gore re tlo mo hlankela. Ge re be re ineela go Jehofa, re ile ra mo tshepiša gore re tlo mo hlankela le go dira seo a se nyakago. Re swanetše go phethagatša seo re se tshepišitšego. Go dula re dira seo re se tshepišitšego ge re be re ineela go Jehofa, ke boikarabelo bjo bogolo eupša ga bo boima. Re kgona go dira se ka gobane Jehofa o re  bopile re na le kganyogo ya go dira seo a se nyakago. (Kut. 4:11) O re bopile ka seswantšho sa gagwe, e bile re na le kganyogo ya go nyaka go mo hlankela. Ka baka leo re kgona go gwerana le yena le go thabela go dira dilo tšeo a di nyakago. (Ps. 40:8) Ge re dira dilo tšeo Modimo a di nyakago e bile re latela Morwa wa gagwe, re “hweletša meoya ya [rena] tapologo.”—Mat. 11:28-30.

5. Ke eng seo se ka go thušago go re o phele ka go dumelelana le seo o se tshepišitšego Jehofa? (1 Johane 5:3)

⁵ O ka rwala bjang morwalo wo? Go na le dilo tše pedi tšeo di ka go thušago. Sa pele, tšwela pele o rata Jehofa. O ka dira seo ka go naganišiša ka dilo tše dibotse tšeo a go diretšego tšona le ditšhegofatšo tšeo o tlago go di hwetša nakong e tlago. Ge o tšwela pele o rata Jehofa, go tlo ba bonolo gore o mo kwe. (Bala 1 Johane 5:3.) Sa bobedi, ekiša mohlala wa Jesu. O ile a kgona go dira dilo tšeo Modimo a di nyakago ka gobane o be a dula a rapela Jehofa a mo kgopela gore a mo thuše, e bile a naganišiša ka moputso woo a tlago go o hwetša. (Baheb. 5:7; 12:2) Go swana le Jesu, rapela Jehofa o mo kgopele gore a go nee matla e bile o dule o naganišiša ka kholofelo yeo o nago le yona ya bophelo bjo bo sa felego. Ge o dutše o rata Modimo e bile o ekiša Morwa wa gagwe, o tlo kgona go phethagatša keno yeo o e diretšego Jehofa.

6. Ke ka baka la’ng re swanetše go phethagatša boikarabelo bja rena ka gae? (Bona le seswantšho.)

⁶ Boikarabelo bja rena ka gae. Re swanetše go rata Jehofa le Jesu go feta ba malapa a gabo rena ge re dutše re kitima lebelo le la bophelo. (Mat. 10:37) Se ga se bolele gore re swanetše go tlogela maikarabelo a rena a ka gae bjalo ka ge eka a re šitiša go thabiša Modimo le Kriste. Eupša e le gore Jehofa Modimo le Jesu Kriste ba re amogele, re swanetše go phethagatša boikarabelo bja rena bja ka gae. (1 Tim. 5:4, 8) Ge re dira seo re tlo thaba. Jehofa o a tseba gore malapa a tlo thaba ge monna le mosadi ba ratana e bile ba hlomphana, ge batswadi ba rata bana ba bona e bile ba ba tlwaetša, le ge bana ba ekwa batswadi ba bona.—Baef. 5:33; 6:1, 4.

7. O ka phethagatša bjang boikarabelo bja gago bja ka lapeng?

⁷ O ka rwala morwalo wo bjang? Go sa šetšwe boikarabelo bjo o nago le bjona bja ka lapeng, tshepa keletšo ya Beibele e bohlale go ena le go ithekga ka maikwelo a gago, setšo sa geno, goba seo batho bao go thwego ke ditsebi ba se bolelago. (Die. 24:3, 4) Diriša dikgatišo tšeo di theilwego Beibeleng ka botlalo. Dikgatišo tše di na le ditšhišinyo tša kamoo o ka dirišago melao ya motheo ya Beibele ka gona. Ka mohlala, sehlogo seo se rego, “Thušo Bakeng sa Lapa” se na le boitsebišo bjoo bo ka thušago banyalani, batswadi le baswa go lebeletšana le mathata ao ba kopanago le ona lehono. b Ikemišetše go diriša seo Beibele e se bolelago le ge ba lapa la geno ba ka se se diriše. Ge o dira bjalo lapa la geno le tlo thaba gomme le wena o tlo thabela go šegofatšwa ke Jehofa.—1 Pet. 3:1, 2.

8. Diphetho tšeo re di dirago di ka re kgoma bjang?

⁸ Re ikarabela ka diphetho tšeo re di dirago. Jehofa o re neile tokologo ya go itirela diphetho e bile o nyaka re thabišwa ke go dira diphetho tše dibotse. Eupša ga a tloše ditlamorago tšeo di tlišwago ke go dira diphetho tše mpe. (Bagal. 6:7, 8) Ge e le gabotse seo re se bjalago  ke sona seo re tlago go se buna. Re ka ikhwetša re lewa ke letswalo ge re dirile diphetho tše mpe. Eupša go tseba gore re ikarabelela ka diphetho tša rena go ka re dira gore re ipobole dibe tša rena, re lokiše diphošo tša rena e bile re pheme go di bušeletša. Go gata megato yeo go ka re thuša gore re dule re kitima lebelo le la bophelo.

9. O ka dira’ng ge e ba o ile wa dira phetho e mpe? (Bona le seswantšho.)

⁹ O ka rwala morwalo woo bjang? Ge e ba o ka se kgone go fetoša phetho e mpe yeo o e dirilego, amogela boemo bja gago. Lemoga gore go na le dilo tše dingwe tšeo o ka se di fetošego. O se ke wa itshenyetša nako ka go bona ba bangwe molato goba go ipona molato ka diphetho tše mpe tšeo o di dirilego. Go e na le moo amogela diphetho tšeo o di dirilego ke moka o tšwele pele ka bophelo. Ge e ba o lewa ke letswalo ka baka la phetho e mpe yeo o e dirilego, ikokobetše gomme o rapele Jehofa o amogele phošo ya gago le go mo kgopela gore a go lebalele. (Ps. 25:11; 51:3, 4) Kgopela bao o ba fošeditšego tshwarelo, ge e ba go kgonega, kgopela le bagolo gore ba go thuše. (Jak. 5:14, 15) Ithute diphošong tša gago gomme o leke go phema go di bušeletša. Ge o dira bjalo o ka kgodišega gore Jehofa o tlo go gaugela le go go nea thekgo yeo o tlogago o e hloka.—Ps. 103:8-13.

10. Ke ka baka la’ng go nyaka go dira dilo tšeo o ka se kgonego go di dira go swana le morwalo o boima? (Bagalatia 6:4)

¹⁰ Go nyaka go dira dilo tše o ka se kgonego go di dira. Re ka ikimetša ka go nyaka go dira le dilo tšeo re ka se kgonego go di dira le ka go ipapetša le batho ba bangwe. (Bala Bagalatia 6:4.) Ge e ba re dula re ipapetša le batho ba bangwe re ka feleletša re na le moya wa phadišano. (Bagal. 5:26) Ge e ba re leka go dira dilo tšeo batho ba bangwe ba di dirago le ge re ka se kgone go di dira, re ka feleletša re ikgobatša. Beibele e re botša gore “go diega ga selo seo se letetšwego go bolaiša pelo.” Ka gona go tlo nyamiša kudu go nyaka go dira selo seo re tsebago gore se ka se tsoge se diregile! (Die. 13:12) Go dira bjalo go ka re lapiša le go re fetša matla le gona go ka re šitiša go kitima lebelo la bophelo.—Die. 24:10.

11. Ke eng seo se tlago go go thuša gore o pheme go nyaka go dira dilo tšeo o ka se kgonego go di dira?

¹¹ O ka rola bjang morwalo woo? O se ke wa nyaka go dira dilo tše dintši go feta tšeo Jehofa a di letetšego go wena. Ga se a letela gore o dire dilo tšeo o ka se kgonego go di dira. (2 Bakor. 8:12) Kgodišega gore Jehofa ga a go bapetše le batho ba bangwe. (Mat. 25:20-23) O a thaba ge o mo hlankela ka pelo ka moka, o mmotegela e bile o kgotlelela. Amogela gore mengwaga ya gago, tsela yeo o phelago ka yona le maemo a gago, di ka go šitiša go dira dilo tše itšego gona bjale. Go swana le Barasilai, o se ke wa amogela ditokelo tše itšego ge o lemoga gore o tlo palelwa ke go di dira. (2 Sam. 19:35, 36) Go swana le Moshe, amogela thušo gomme o nee ba bangwe maikarabelo ge go hlokega gore o dire bjalo. (Ek. 18:21, 22) Ge o ikokobeditše, o ka se nyake go dira dilo tšeo o tsebago gore di tlo go lapiša gomme wa palelwa ke go kitima lebelo la bophelo.

12. Na re ikarabelela ka diphetho tše mpe tšeo batho ba bangwe ba di dirago? Hlalosa.

¹² Go ikwa o ikarabelela ka diphetho tše mpe tšeo batho ba bangwe ba di dirago. Re ka se tšeele batho ba bangwe diphetho e bile re ka se thibele dilo tše mpe tšeo di ka diregago ka lebaka la diphetho tše mpe tšeo ba di dirilego. Ka mohlala, ngwana wa gago a ka kgetha go tlogela go hlankela Jehofa. Phetho yeo e ka kweša batswadi bohloko kudu. Eupša batswadi  bao ba iponago phošo ka baka la diphetho tša bana ba bona, ba ithweša morwalo o boima kudu. Ga se morwalo woo Jehofa a letetšego gore ba o rwale.—Baroma 14:12.

13. Motswadi o swanetše go dira’ng ge ngwana a dira phetho e mpe?

¹³ O ka lahla bjang morwalo woo? Tseba gore Jehofa o neile yo mongwe le yo mongwe wa rena tokologo ya go ikgethela seo a nyakago go se dira. Se se akaretša le ge e ba motho a kgetha go mo hlankela goba go se mo hlankele. Jehofa o a tseba gore o motswadi yo a sa phethagalago. O no nyaka gore o dire sohle se o ka se kgonago gore o thuše ngwana wa gago. Diphetho tšeo ngwana wa gago a di dirago ke boikarabelo bja gagwe, e sego bja gago. (Die. 20:11) Eupša o ka tshwenyega kudu ka diphošo tšeo wena o di dirilego bjalo ka motswadi. Ge e ba go le bjalo, botša Jehofa kamoo o ikwago ka gona gomme o mo kgopele gore a go lebalele. O a tseba gore o ka se fetoše diphošo tše o di dirilego. Le gona o nyaka gore o tlogele ngwana wa gago gore a bune seo a se bjetšego. Dula o tseba gore ge ngwana wa gago a ka dira maiteko a go boela go Jehofa, O tlo mo amogela.—Luka 15:18-20.

14. Ke ka baka la’ng re sa swanela go dula re ipona molato?

¹⁴ Go dula o ipona molato. Re ikwa re le molato ge re dirile sebe. Eupša go dula re ipona molato ke morwalo o boima woo re swanetšego go o rola. Bjale re ka tseba bjang ge e ba re ipona molato ka mo go feteletšego? Re ka kgodišega gore Jehofa o a re lebalela ge e ba re ipobola dibe tša rena, re itshola e bile re dira sohle seo re ka se kgonago gore re se ke ra bušeletša dibe tšeo. (Dit. 3:19) Ka morago ga gore re gate megato yeo, Jehofa ga a nyake gore re tšwele pele re ipona molato. O a tseba gore re tlo kwa bohloko kudu ge re ka dula re ipona molato. (Ps. 31:10) Ge re ka dula re nyamile re ka palelwa ke go kitima lebelo la bophelo.—2 Bakor. 2:7.

15. O ka thušwa ke eng gore o se ke wa dula o ipona molato? (1 Johane 3:19, 20) (Bona le seswantšho.)

¹⁵ O ka lahla bjang morwalo woo? Ge e ba o  dula o ipona molato, gopola gore Jehofa o go “lebalela e le ka kgonthe.” (Ps. 130:4) Go bontšha gore o lebalela bao ba tlogago ba itshola, o tshepiša gore: “Nka se sa gopola sebe sa bona.” (Jer. 31:34) Se se ra gore Jehofa a ka se sa gopola diphošo tše o di dirilego nakong e fetilego. Ka gona, o se ke wa nagana gore ditlamorago tša dibe tše o di dirilego nakong e fetilego ke lebaka la gore Jehofa ga se a go lebalela. O se ke wa dula o nyamišwa ke gore ga o sa kgona go dira dilo tše itšego ka mokgatlong wa Jehofa ka baka la dibe tše o di dirilego nakong e fetilego. Jehofa ga a dulele go nagana ka dibe tša gago, ka gona le wena ga se wa swanela go dira bjalo.—Bala 1 Johane 3:19, 20.

16. Bjalo ka batho bao ba lego lebelong, re swanetše go lemoga eng?

¹⁶ Ge re dutše re kitima lebelo le la bophelo, re swanetše go kitimela gore re ‘hwetše moputso.’ (1 Bakor. 9:24) Re ka kgona go dira seo ge e ba re tseba phapano magareng ga merwalo yeo re swanetšego go e rwala le yeo re swanetšego go e rola. Sehlogong se re kwele ka mehlala e sego kae ya merwalo yeo re swanetšego go e rwala le yeo re swanetšego go e lahla. Eupša go na le mehlala e mengwe e mentši. Jesu o boletše gore re ka “imelwa ke bojagobe, go nwa kudu le dipelaelo.” (Luka 21:34) Lengwalo le le Mangwalo a mangwe a ka go thuša gore o tsebe dilo tšeo o ka kaonefatšago go tšona gore o kgone go dula o kitima lebelo le la bophelo.

17. Ke ka baka la’ng re ka kgodišega gore re tlo thopa lebelo le la bophelo?

¹⁷ Re ka kgodišega gore re tlo thopa lebelo le la bophelo ka gobane Jehofa o tlo re nea matla ao re a hlokago. (Jes. 40:29-31) Ka gona, o se ke wa fela matla! Ekiša moapostola Paulo yo a ilego a šoma ka thata gore a fihlelele moputso wo o bego o beilwe ka pele ga gagwe. (Bafil. 3:13, 14) Ga go na motho yo a ka go kitimelago legato lebelong le la bophelo. Eupša Jehofa a ka go thuša gore o atlege. A ka go thuša le gore o rwale merwalo ya gago le go lahla yeo e se nago mohola. (Ps. 68:19) Ge Jehofa a go thuša, o tlo kgona go kitima lebelo le ka kgotlelelo gomme wa le thopa!