1-3. (a) Ke diphetho dife tšeo bafsa ba swanetšego go di dira, gona re ka swantšha boemo bja bona le eng? (Bona seswantšho se se lego ka mo godimo.) (b) Bafsa ba Bakriste ba ka thušwa ke’ng go dira diphetho tše dibotse?

A RE re o swanetše go yo phetha mabaka a bohlokwa toropong yeo e lego kgole kudu. E le gore o fihle toropong yeo, o swanetše go sepela leeto le le teleletelele ka pese. Ge o fihla renkeng ya dipese, o ikwa o hlakahlakanywa ke banamedi ba bantši le dipese tše dintši. Eupša sa go kgahliša ke gore o tseba moo o yago gona le pese yeo o sepelago ka yona! Ke ka baka la’ng seo se kgahliša? Ka gobane ge o ka namela pese yeo e yago moo o sa yego gona o tla timela.

² Lehono re ka swantšha bafsa le banamedi bao ba pese. Bafsa ba lebanwe ke leeto le le teleletelele, e sego la pese, eupša la bophelo. Ka go re’alo ba ka ikwa ba hlakahlakantšhwa ke dibaka tšeo di ba bulegelago, le diphetho tšeo ba swanetšego go di dira bophelong. Eupša lena bafsa, le tlo ipshina ka bophelo ge le ka tseba gore le nyaka go dira eng bophelong. Bjale potšišo ke gore: “Le swanetše go dira’ng gore le ipshine ka bophelo?”

³ Sehlogo se se araba potšišo ye ka go kgothaletša bafsa gore ba tshwenyege kudu ka go kgahliša Jehofa maphelong a bona. Se se bolela gore ba latele tlhahlo ya Jehofa ge ba dira diphetho dilong ka moka, go akaretša le ditabeng tša thuto, mošomo, maikarabelo a lapa le tše  dingwe. Le gona se se bolela gore ba ipeele dipakane tša moya. Bafsa bao ba lekago ka matla go hlankela Jehofa ba ka kgodišega gore Jehofa o tla ba šegofatša.—Bala Diema 16:3.

4. Re tlo ithuta ka’ng sehlogong se?

⁴ Go bohlokwa kudu gore bafsa ba ipeele dipakane tša moya. Ka baka la’ng? Re tlo kwa mabaka a mararo sehlogong se. Mabaka a mabedi a mathomo a bontšha gore ge re lwela go fihlelela dipakane tša rena tša moya, segwera sa rena le Jehofa se a gola. Lebaka la boraro le bontšha gore go na le mehola yeo e tlišwago ke go tseba e sa le pele dipakane tšeo re nyakago go di fihlelela ka mokgatlong wa Jehofa.

5. Lebaka la mathomothomo la gore re ipeele dipakane tša moya ke lefe?

⁵ Lebaka la mathomothomo la gore re ipeele dipakane tša moya ke gore re nyaka go bontšha Jehofa gore re leboga lerato leo a re bontšhago lona le seo a re diretšego sona. Mopsalme o boletše gore: “Ke mo gobotse go go leboga wena Jehofa . . . Gobane o dirile gore ke thabe ka baka la modiro wa gago, wena Jehofa; ke goelela ka lethabo ka baka la mediro ya diatla tša gago.” (Ps. 92:1, 4) Ge e ba o le mofsa, nagana ka dilo tše dibotse tšeo Jehofa a go diretšego tšona bophelong. O go neile bophelo, Beibele le phuthego. Go oketša moo, o go holofeditše bophelo bjo bo sa felego, e bile o go thušitše gore o be le tumelo. O ka bontšha gore o leboga ditšhegofatšo tše ka go etiša dilo tša moya pele bophelong bja gago. Le gona seo se tla go dira gore o batamela kgauswi kudu le Jehofa.

6. (a) Dipakane tša moya di re thuša bjang gore re dule re na le tswalano e botse le Jehofa? (b) Ke dipakane dife tšeo bana ba ka ipeelago tšona?

⁶ Lebaka la bobedi ke gore ge o dutše o šoma ka thata go fihlelela dipakane tša moya, o kgahliša Jehofa e bile segwera sa gago le yena se tla tia le go feta. Moapostola Paulo o itše: “Modimo ga se yo a sa lokago moo a ka lebalago modiro wa lena le lerato leo le le bontšhitšego leineng la gagwe.” (Baheb. 6:10) Le ge o le yo monyenyane o ka ipeela dipakane. Christine o be a na le mengwaga e lesome ge a be a ipeela pakane ya go bala ka mehla diphihlelo tša bana babo rena bao ba botegago le dikgaetšedi. Toby o be a na le mengwaga e 12 ge a be a ipeela pakane ya go fetša Beibele pele a ka kolobetšwa. Maxim o be a na le mengwaga e 11 gomme moratho wa gagwe Noemi a na le mengwaga e 10 ge ba be ba kolobetšwa. Ba ile ba ipeela pakane ya go yo hlankela Bethele. Ka gona, e le gore ba dule ba naganne ka pakane ye, ba ile ba phara fomo ya go hlankela Bethele lebotong ka ntlong ya gabo bona. Ke ka baka la’ng le wena o sa ipeele dipakane gomme wa šoma ka thata gore o di fihlelele?—Bala Bafilipi 1:10, 11.

7, 8. (a) Go ipeela dipakane go thuša bjang gore go dira diphetho go be bonolo? (b) Ke ka baka la’ng mofsa yo mongwe a ile a kgetha go se ye yunibesithing?

⁷ Lebaka la boraro la gore o ipeele dipakane tša moya o sa le mofsa ke lefe? Bafsa ba na le diphetho tše dintši tšeo ba swanetšego go di dira. Tše dingwe tša diphetho tšeo ba swanetšego go di dira di mabapi le thuto goba mošomo. Go dira diphetho go swana le go kgetha tsela yeo o swanetšego go sepela ka yona ge o fihlile moo ditsela e bago tše pedi. Ge e ba o tseba moo o yago gona go tla ba bonolo gore o kgethe tsela ya maleba. Ka mo go swanago, ge o tseba dipakane tšeo o nyakago go di fihlelela go tla ba bonolo gore o dire diphetho. Diema 21:5 e re: “Maano a motho yo mafolofolo a a mo hola.” Ge o ipeela dipakane o sa le yo monyenyane, o tlo atlega ka pela bophelong. Se ke seo se ilego sa diragalela Damaris ge a be a swanetše go dira phetho e bohlokwa kudu bophelong bja gagwe ge e be e sa le mofsa.

⁸ Damaris o ile a phasa marematlou ka dihlora. Nkabe a ile a ya yunibesithi go ithuta tša molao ntle le go ntšha sente. Eupša o ile a kgetha go yo šoma pankeng. Ke ka baka la’ng a ile a dira phetho yeo? O re: “Ge ke be ke sa le ngwana ke ile ka ipeela pakane ya gore ge ke fetša sekolo ke tlo ba mmulamadibogo. Seo se be se e ra gore ke tle ke šome mošomo wa nakwana. Ke nnete gore ge nkabe  ke ile yunibesithi ke be ke tlo gola tšhelete e ntši, eupša go be go tlo ba boima gore ke hwetše mošomo woo o tlago go ntumelela gore ke šome ka nakwana.” Ga bjale Damaris o na le mengwaga e 20 e le mmulamadibogo. Damaris o ikwa bjang ka phetho yeo a e dirilego e sa le yo mofsa? O re: “Pankeng yeo ke šomago go yona ke kgona go boledišana le boramolao ba bantši bao ba šomago mošomo woo le nna nka bego ke o šoma ge nkabe ke ile ka ithutela tša molao. Eupša ba bantši ba bona ga ba thabišwe ke mešomo ya bona. Ge nkabe le nna ke ile ka ya yunibesithi, mohlomongwe nkabe ke lla go swana le bona, eupša phetho ya ka e dirile gore ke fetše mengwaga e mentši ke thabile tirelong ya Jehofa.”

9. Ke ka baka la’ng re ikgantšha ka bafsa bao ba hlankelago Jehofa?

⁹ Lefaseng ka moka, bafsa ba bantši ba hlankela Jehofa ka dipelo tša bona ka moka, e bile re swanetše go ba reta. Ba neetše Jehofa maphelo a bona e bile ba tshwenyegile kudu ka go fihlelela dipakane tša moya. Bafsa ba bjalo ba ipshina ka bophelo kudu mola ka nako e swanago ba ithuta go latela tlhahlo ya Jehofa dilong ka moka tšeo ba di dirago. Dilo tšeo di akaretša thuto, mošomo le dilo tše dingwe. Solomone o ngwadile gore: “Bota Jehofa ka pelo ya gago ka moka. Mo ele hloko ditseleng tša gago ka moka gomme yena o tla letliša ditsela tša gago.” (Die. 3:5, 6) Jehofa o bona bafsa bao ba lego ka phuthegong ya gagwe ba le bohlokwa kudu go yena. O ba rata kudu, o a ba šireletša, o a ba hlahla e bile o a ba šegofatša.

10. (a) Ke ka baka la’ng go ya tšhemong go swanetše go tla pele maphelong a rena? (b) O ka dira’ng gore o kgone go hlalosa ditumelo tša gago gabotse?

¹⁰ Ge o nyaka go kgahliša Jehofa bophelong bja gago, o tlo ikwa o nyaka go botša batho ba bangwe ka yena. Jesu Kriste o itše: “Ditaba tše dibotse di swanetše go bolelwa pele.” (Mar. 13:10) Ka ge re phela mehleng ya bofelo, batho ba swanetše go kwa ditaba tše dibotse. Ka gona go ya tšhemong e swanetše go ba selo seo se tlago pele maphelong a rena. Na o ka ipeela pakane ya gore o ye tšhemong kutšwanyana? Na o ka bula madibogo? Eupša go thwe’ng ge e ba o sa rate go ya tšhemong? Le gona o ka dira’ng gore o kgone go hlalosa ditumelo tša gago gabotse? O ka dira dilo tše tše pedi: (1) Lokišetša gabotse, (2) o se ke wa tlogela go botša batho ba bangwe dilo tšeo o ithutilego tšona ka Jehofa. Ge o ka dira dilo tše, o tla rata tšhemo kudu gomme wa hwetša lethabo leo le sa bapišwego le selo.

11, 12. (a) Bafsa ba ka itokišetša bjang go botša batho ba bangwe ka Jehofa? (b) Mofsa yo mongwe o ile a dira’ng gore a botše bana bao a tsenago le bona ka klaseng ka Jehofa?

¹¹ O ka lokišetša bjang go boledišana le motho ka Beibele? O ka thoma ka go nyaka karabo ya potšišo yeo motho yo o tsenago le yena sekolo a ka e botšišago, go swana le yeo e rego: “Ke ka Baka La’ng o Dumela Gore Modimo o Gona?” Wepesaete ya rena ya jw.org/nso e na le dihlogo tšeo di tlago go go thuša go araba potšišo ye ka mantšu a gago. Eya ka tlase ga DITHUTO TŠA BEIBELE > BAFSA. Ge o le moo o tla bona letlakala la go itekola leo le rego: “Ke ka Baka La’ng ke Dumela Gore Modimo o Gona?” Letlakala leo la go itekola le tla go thuša gore o kgone go bolela karabo ka mantšu a gago. O ka diriša mangwalo a a mararo go hlalosa tumelo ya gago: Baheberu 3:4, Baroma 1:20 le Psalme 139:14. Matlakala ao a tlo go thuša gore o kgone go araba dipotšišo tše dingwe tše dintši.—Bala 1 Petro 3:15.

¹² Botša bana bao o tsenago le bona sekolo gore ba tsene wepesaeteng ya jw.org gore ba hwetše ditaba tša go kgahliša mo go yona. Luca o ile a dira sona seo. Ka letšatši le lengwe ka klaseng ya gagwe ba be ba bolela ka dikereke tše di fapafapanego. Luca o ile a lemoga gore puku ya gagwe ya sekolo e bolela maaka ka Dihlatse tša Jehofa. Gaešita le ge Luca a be a tšhogile o ile a kgopela morutiši wa gagwe gore a mo dumelele go bontšha klase gore puku yeo e bolela maaka. Luca o ile a hlalosa ditumelo tša gagwe, a ba a bontšha klase ka moka wepesaete ya jw.org. Morutiši wa Luca o ile a nea  morutwana yo mongwe le yo mongwe ka klaseng ya gagwe mošomo wa gae wa gore a yo bogela bidio yeo e rego: O ka Fenya Bomphenyašilo Ntle le go lwa. Luca o ile a thaba kudu ka gobane o ile a kgona go botša bana bao a tsenago le bona ka klaseng ka Jehofa.

13. Ke ka baka la’ng re sa swanela go fela matla ge re kopana le mathata?

¹³ Gaešita le ge o ka kopana le mathata bophelong o se ke wa fela matla, eupša tšwela pele o šoma ka thata gore o fihlelele dipakane tša gago. (2 Tim. 4:2) Katharina o be a na le mengwaga e 17 ge a be a ipeela pakane ya gore a botše motho yo mongwe le yo mongwe yo a šomago le yena ka Jehofa. Monna yo mongwe o be a fela a mo hlaba ka mantšu, eupša Katharina ga se a ka a fela matla. Boitshwaro bja gagwe bjo bobotse bo ile bja dira gore Hans, e lego motho yoo a bego a šoma le yena, a bale dikgatišo tša rena, a ithute Beibele gomme mafelelong a kolobetšwe. Ka ge Katharina a be a se sa šoma moo, o be a sa tsebe gore go ile gwa šala go eba le motho yo a ilego a ithuta Beibele ka baka la boitshwaro bja gagwe. Nagana kamoo a ilego a ikwa ka gona ge ka morago ga mengwaga e 13 a be a dutše le lapa la gagwe ka Holong ya Mmušo gomme modulasetulo a rola Hans e le seboledi sa moeng! Ruri Katharina o ile a thabišwa ke gore ga se a ka a fela matla a go botša batho bao a bego a šoma le bona ka Jehofa!

14, 15. (a) Ke’ng seo bafsa ba swanetšego go se gopola ge dithaka tša bona di ba gapeletša go dira dilo tšeo di di dirago? (b) Bafsa ba ka dira’ng gore ba se latele dithaka tša bona?

¹⁴ Go fihla ga bjale, sehlogo se se go thušitše go bona gore o ka dira eng gore o kgahliše Jehofa. Le gona se go thušitše go bona kamoo o ka ipeelago dipakane tša moya. Mohlomongwe dithaka tša gago di phelela menate, mohlomongwe e bile di go laletša gore o be le tšona menateng yeo. Eupša ge nako e dutše e eya, o tlo swanelwa ke go ba bontšha gore dipakane tša gago tša moya di bohlokwa kudu go wena. O se ke wa dumelela dithaka tša gago di go palediša go fihlelela dipakane tša gago tša moya. Ka gona o naganne ka mohlala wa pese woo re boletšego ka wona mathomong a sehlogo se, na o be o ka namela pese yeo e yago lefelong leo o sa le tsebego fela ka gobane o bona banamedi ba yona ba ipshina? Ruri o ka se dire seo!

 ¹⁵ Ka gona, o ka dira’ng gore o dule o tiile ge dithaka tša gago di go gapeletša go dira dilo tšeo di di dirago? Phema go ba mafelong ao go ka bago thata gore o gane go dira seo dithaka tša gago di se dirago. (Die. 22:3) Le gona, nagana ka ditlamorago tše di kwešago bohloko tšeo di ka tlišwago ke go dira dilo tšeo dithaka tša gago di di dirago. (Bagal. 6:7) Le gona o se ke wa nagana gore ga o hloke keletšo. Go ba le boikokobetšo go tlo go thuša gore o theetše ge batswadi ba gago le bana beno le dikgaetšedi bao ba godilego moyeng ba go eletša.—Bala 1 Petro 5:5, 6.

16. Anega phihlelo yeo e bontšhago bohlokwa bja go ikokobetša.

¹⁶ Ka ge Christoph a be a ikokobeditše o ile a kgona go amogela keletšo e botse yeo a ilego a e newa. Ka morago ga gore a kolobetšwe, o ile a thoma go itšhidulla ka mehla lefelong la go itšhidulla. Lefelong leo, dithaka tša gagwe di ile tša mmotša gore a be le tšona sehlopheng sa tšona sa dipapadi. O ile a boledišana le mogolo yo mongwe ka taba yeo, gomme mogolo yoo a mmotša gore pele a ka dira phetho a nagane ka dilo tšeo di ka senyago segwera sa gagwe le Jehofa, tša go swana le go rata phadišano le dilo tše dingwe. Christoph o ile a no ya sehlopheng seo. Eupša ge nako e dutše e eya o ile a bona gore dipapadi tšeo ba di bapalago di kotsi e bile di na le bošoro. O ile a yo boledišana le bagolo ba bangwe gomme ka moka ga bona ba mo eletša ba diriša Mangwalo. Christoph o re: “Jehofa o ile a nnea baeletši ba babotse kudu, le gona ke ile ka mo theetša le ge go ntšere nako.” Na o ikokobeditše kudu moo e lego gore ge o newa keletšo o a e amogela?

17, 18. (a) Ke’ng seo Jehofa a se nyakelago bafsa lehono? (b) O ka dira’ng gore o se tlo itsholela diphetho tša gago ge o šetše o gotše? Nea mohlala.

¹⁷ “Wena lesogana [goba kgarebe], thabela bofsa bja gago, le gona anke pelo ya gago e go thabiše bosoganeng [goba bokgarebeng] bja gago.” (Mmo. 11:9) Jehofa o nyaka gore bafsa ba thabe. Sehlogo se se re bontšhitše tsela e nngwe yeo bafsa ba ka thabago ka yona. Dulang le naganne ka dipakane tša lena tša moya, le go dula le gopola ka Jehofa selong se sengwe le se sengwe seo le se rerago. Ge o ka diriša seo o ithutilego sona sehlogong se e sa le ka pela, Jehofa o tlo go hlahla, a go šireletša le go go šegofatša. Nagana ka dikeletšo tše botse tšeo Jehofa a go neago tšona ka Lentšung la gagwe gomme o di diriše. E nngwe ya tšona ke e rego: “Gopola Mmopi wa gago yo Mogolo matšatšing a bofseng bja gago.”—Mmo. 12:1.

¹⁸ Ga go na motho yo a tlago go dula e le mofsa. Bafsa ba gola ka pela. Ka manyami, batho ba bantši ge ba gotše ba itsholela gore ba ile ba ipeela dipakane tša go se re selo, e bile sa go kweša bohloko le go feta ke gore ba bangwe ga se ba ka ba ipeela dipakane bophelong. Eupša bafsa bao ba etišago Mmušo wa Modimo pele maphelong a bona ba tlo iteboga ge ba gotše gore ba ile ba diriša bofsa bja bona go hlankela Jehofa. Ka mohlala, ge Mirjana e be e sa le mofsa, o be a kgona go bapala dipapadi tše dintši. O ile a kgopelwa gore a tsenele dipapadi tša Winter Olympic eupša yena a kgetha go tsenela tirelo ya nako e tletšego. Ka morago ga mengwaga e fetago e 30, Mirjana o sa le tirelong ya nako e tletšego gotee le monna wa gagwe. Mirjana o re go tuma, go ba le maemo le go huma ga di dire gore motho a thabe e le ka kgonthe. O re dipakane tša go di phala ka moka tšeo motho a ka ipeelago tšona ke go hlankela Modimo le go thuša batho ba bangwe gore ba mo tsebe.

19. Ke ka baka la’ng go le bohlokwa go dula o swaregile ka go hlankela Jehofa o sa le yo mofsa?

¹⁹ Re swanetše go reta bafsa ba phuthegong ya gabo rena ka gobane go sa šetšwe mathata ao ba kopanago le wona bophelong, ba dula ba swaregile ka go hlankela Jehofa. Ba dira se ka go ipeela dipakane tša moya, le go etiša pele mošomo wa go botša batho ka Jehofa. Le gona ga ba dumelele batho bao ba sa ratego Modimo gore ba fetoše dipakane tša bona tša moya. Ka gona, bafsa ba ka kgodišega gore ge ba šoma ka thata Jehofa o tla ba šegofatša. Bafsa, tsebang gore le na le bana babo lena le dikgaetšedi bao ba le ratago le bao ba le thekgago. Le gona ge le ikgafa modirong wa Jehofa le tla atlega.