NGWAGA wa go feta, banna ba diketekete ba ile ba kgethwa gare ga Dihlatse tša Jehofa lefaseng ka bophara, gore e be bagolo le bahlanka ba bodiredi. Ge e ba o le yo mongwe wa bana babo rena bao ba rategago, go molaleng gore o thabela kabelo ya gago e mpsha.

Lega go le bjalo, kabelo yeo e ka go tšhošanyana. Jason, e lego mogolo yo e lego yo mofsa o re: “Ge ke be sa tšwa go kgethwa, ke ile ka ikwa ke imelwa ke maikarabelo a go ba mogolo.” Moshe le Jeremia ba ile ba ikwa ba sa swanelege ge Jehofa a be a ba nea dikabelo tše difsa. (Ek. 4:10; Jer. 1:6) Ge e ba le wena o ikwa go swana le banna ba, o ka dira’ng gore o se sa ikwa ka tsela yeo gomme wa dira tšwelopele kabelong ya gago? Nagana ka mohlala wa Timotheo, e lego morutiwa wa Mokriste.—Dit. 16:1-3.

Go ka direga gore Timotheo o be a le mengwageng ya bo-20 ge moapostola Paulo a be a mo kgopela gore a sepele le yena modirong wa boromiwa. Ka ge Timotheo e be e sa le yo monyenyane, go ka direga gore o be a sa itshepe, goba mohlomongwe a dikadika go ya kabelong ya gagwe e mpsha. (1 Tim. 4:11, 12; 2 Tim. 1:1, 2, 7) Eupša ka morago ga mengwaga e lesome, Paulo o ile a botša phuthego ya Filipi gore: “Nna ke holofetše Morena Jesu gore ke romele Timotheo go lena kgauswinyane . . . Gobane ga ke na yo mongwe yo a nago le kgopolo e swanago le ya gagwe.”—Bafil. 2:19, 20.

Ke’ng seo se dirilego gore Timotheo e be mogolo yo a kgahlišago ka tsela ye? Ekwa ka dilo tše tshela tšeo o ka ithutago tšona mohlaleng wa gagwe.

1. O be a rata batho kudu. Paulo o ile a botša bana babo ba kua Filipi gore: “[Timotheo o tlo] hlokomela e le ka kgonthe dilo tše di lego mabapi le lena.” (Bafil. 2:20) Ruri Timotheo o be a rata batho. O be a tloga a nyaka go ba thuša gore ba be le tswalano e botse le Jehofa. Le gona o ile a dira bjalo ka go rata.

O se ke wa swana le mootledi wa pese yo a tshwenyegilego feela ka go fihla ka nako boema-peseng, go e na le go tshwenyega ka go nametša batho. William, e lego mogolo yo a hlomphegago, e bile a na le mengwaga e fetago e 20 e le mogolo, o eletša banna bao ba sa tšwago go kgethwa ka gore: “Ratang bana babo lena. Šetšang dinyakwa tša bona go e na le go šetša dilo tša phuthego feela.”

2. O be a rata go ruta batho ka Modimo. Ge Paulo a be a bontšha phapano magareng ga Timotheo le Bakriste ba bangwe, o itše: “Ba bangwe ka moka ba nyaka tšeo di kgahlago bona, e sego Kriste Jesu.” (Bafil. 2:21) Paulo o ngwadile lengwalo le a le Roma. O ile a lemoga gore bana babo ba moo ba be ba swaregile kudu ka dilo tša bona. Ba ile ba fihla le bokgoleng bja gore ba se sa hlankela Modimo ka dipelo tša bona ka moka. Eupša Timotheo o be a se ka tsela yeo! Ge go be go bulega dibaka tša gore a yo bolela ditaba tše dibotse, o be a ikwa go swana le Jesaya yo a itšego: “Ke nna yo! Roma nna.”—Jes. 6:8.

O ka dira’ng gore o kgone go ba le nako ya go dira dilo tša gago le tša Modimo? Sa pele, tseba dilo tšeo di swanetšego go tla pele bophelong bja gago. Paulo o itše: “Le kgonthišetše dilo tše bohlokwa kudu.” (Bafil. 1:10) Dira gore dilo tša Modimo di tle pele  bophelong bja gago. Sa bobedi, phela bophelo bja go se be le dilo tše dintši. Phema dilo tšeo di ka go jelago nako le matla. Paulo o ile a kgothaletša Timotheo gore: “Tšhaba dikganyogo tša bofsa, eupša phegelela toko, tumelo, lerato, khutšo.”—2 Tim. 2:22.

3. O be a šoma ka thata tirelong e kgethwa. Paulo o ile a gopotša Bafilipi ka gore: “Le tseba bohlatse bjo [Timotheo] a itlhatsetšego ka bjona, gore o ile a hlankela le nna go tšwetšeng pele ditaba tše dibotse go swana le ngwana a na le tatagwe.” (Bafil. 2:22) Timotheo o be a sa tšwafe. O ile a šoma ka thata le Paulo, gomme seo sa napa se dira gore ba ratane le go feta.

Lehono go na le mošomo o montši ka mokgatlong wa Modimo. Mošomo woo o kgotsofatša kudu, e bile o dira gore re be kgauswi le bana babo rena le dikgaetšedi. Ka gona ipeele pakane ya gore o be “le mo gontši mo [o] go dirago modirong wa Morena.”—1 Bakor. 15:58.

4. O be a diriša seo a bego a ithuta sona. Paulo o ngwaletše Timotheo gore: “O latetše thuto ya ka kgauswi, tsela ya ka ya bophelo, morero wa ka, tumelo ya ka, go se fele pelo ga ka, lerato la ka, kgotlelelo ya ka.” (2 Tim. 3:10) Ka ge Timotheo a be a diriša seo a ithutilego sona, o ile a swanelega go newa maikarabelo a oketšegilego.—1 Bakor. 4:17.

Na o na le motho yo a go thušago dilong tša moya, yo a go beelago mohlala e bile a go eletša? Ge e ba a se gona, ke ka baka la’ng o sa ikhweletše yena? Tom, yo e bilego mogolo ka mengwaga e mentši o gopola ka gore: “Mogolo yo a nago le phihlelo o ile a bontšha gore o na le taba le nna gomme a nnea tlwaetšo e botse kudu. Ke be ke dula ke kgopela keletšo ya gagwe gomme ke e diriša. Seo se ile sa nthuša gore ke itshepe kutšwanyana.”

5. O be a dula a itlwaetša. Paulo o kgothaleditše Timotheo gore: “Itlwaetše gomme pakane ya gago e be go bontšha boineelo go Modimo.” (1 Tim. 4:7) Ramabelo a ka ba le motho yo a mo hlahlago, eupša le yena o swanetše go itlwaetša. Paulo o kgothaleditše Timotheo gore: “Tšwela pele o ikgafela go baleng phatlalatša, go eletšeng le go ruteng.  . . . Eleletša ka dilo tše; nwelela go tšona, gore tšwelopele ya gago e bonagale go batho bohle.”—1 Tim. 4:13-15.

Le wena o swanetše go kaonefatša bokgoni bja gago. Eba morutwana yo mafolofolo gomme o dule o tseba dilo tša moragorago tša mokgatlo wa rena. Le gona, o se ke wa itshepa kudu—mohlomongwe wa nagana gore o na le phihlelo e ntši kudu moo e lego gore o ka kgona go dira dilo ka bowena ntle le go dira nyakišišo. Ekiša Timotheo ka go ‘itlhokomela ka mehla, le go hlokomela go ruta ga gago.’—1 Tim. 4:16.

6. O be a ithekga ka moya wa Jehofa. Ge Paulo a be a nagana ka bodiredi Timotheo o ile a mo gopotša gore: “Hlokomela boikarabelo bjo bjo bobotse ka moya o mokgethwa wo o dutšego ka go rena.” (2 Tim. 1:14) E le gore Timotheo a etiše bodiredi bja gagwe pele, o be a swanetše go ithekga ka moya wa Modimo.

Donald, yo e bilego mogolo ka mengwaga e mentši o re: “Banna bao ba kgethilwego ba swanetše go tšeela godimo tswalano ya bona le Modimo. Bao ba dirago bjalo ba tla ‘sepela ka matla a sa felego.’ Ge e ba ba rapelela moya wa Modimo gomme ba ithuta go ba le dienywa tša moya, bana babo bona ka phuthegong ba tlo thabela go ba le bona.”—Ps. 84:7; 1 Pet. 4:11.

Go thabiša kudu go bona bana babo rena ba bantši bao ba sa tšwago go kgethwa ka phuthegong—go swana le wena—ba dirišwa ke Jehofa. Jason, yo go boletšwego ka yena mathomong, o re: “Ga e sa le ke e ba mogolo, ke ithutile dilo tše dintši kudu e bile ga ke sa inyatša. Ga bjale ke thabela kabelo ya ka kudu gomme ke e lebelela e le tokelo e kgahlišago kudu!”

Na o tla dumelela Jehofa gore a tšwele pele a go diriša? Ithute go Timotheo. Ke moka le wena o tla ba tšhegofatšo go batho ba Modimo.