1. Ka morago ga gore Adama le Efa ba se kwe Jehofa kua tšhemong ya Edene, Jehofa o ile a nea kgothatšo efe?

JEHOFA ke Modimo yo a neago kgothatšo. O be a dutše a dira bjalo ga e sa le go tloga Adama le Efa ba dira sebe. Gateetee ka morago ga gore Adama le Efa ba se kwe Jehofa kua tšhemong ya Edene, Jehofa o ile a bolela boporofeta bjo bo bego bo tlo nea ditlogolo tša Adama kholofelo. Ka nako yeo ditlogolo tšeo di be di se tša tšwa di e ba gona. Dilo di be di se tša napa di senyagalela sa ruri. Ge boporofeta bjo bo lego go Genesi 3:15 bo kwešišitšwe, bo be bo tla nea batho kholofelo ya gore mafelelong “noga ya kgale,” e lego Sathane Diabolo, o tla fedišwa, gotee le mediro ya gagwe ka moka e mebe.—Kut. 12:9; 1 Joh. 3:8.

2. Jehofa o ile a kgothatša Noa bjang?

² Mohlanka wa Jehofa e lego Noa o phetše mehleng ya batho bao ba bego ba sa rate Modimo, moo e lego gore batho bao ba bego ba ekwa Jehofa e be e le ditho tša lapa la gagwe feela. Ka ge Noa a be  a phela le batho bao ba bego ba rata bošoro le bao ba bego ba eba le thobalano ka tsela e gobogilego, nkabe a ile a fela matla. (Gen. 6:4, 5, 11; Juda 6) Eupša Jehofa o ile a mo kgothatša e le gore a be le sebete gomme a tšwele pele a ‘sepela le Yena.’ (Gen. 6:9) Jehofa o ile a botša Noa gore o be a tlo fediša batho bao ba babe gomme a mmotša seo a bego a swanetše go se dira e le gore lapa la gagwe le tle le phologe. (Gen. 6:13-18) Jehofa o ile a bontšha Noa gore ke Modimo yo a kgothatšago.

3. Jehofa o ile a kgothatša Joshua bjang? (Bona seswantšho seo se lego mathomong a sehlogo.)

³ Ge nako e dutše e eya, Joshua o ile hwetša kabelo e boima ya gore a yo fihliša batho ba Modimo Nageng ya Kholofetšo. Joshua o be a swanetše go yo fenya madira a matla ao a bego a dula nageng yeo. Dilo tšeo ka moka di be di ka dira gore Joshua a boife. Ka ge Jehofa a be a tseba seo, o ile a botša Moshe gore a yo matlafatša Joshua. Jehofa o itše: “Roma Joshua, o mo kgothatše o be o mo matlafatše, ka gobane ke yena a tlago go eta setšhaba se pele go tshelela ka mošola, le gona ke yena a tlago go dira gore se tšee naga yeo o tlago go e bona gore e be bohwa bja sona.” (Doit. 3:28) Pele Joshua a ka phetha kabelo ya gagwe, Jehofa o ile a mo kgothatša ka gore: “Na ga se ka go laela gore o be le sebete gomme o tie matla? O se ke wa boifa goba wa tšhoga, ka gobane Jehofa Modimo wa gago o na le wena gohle moo o yago gona.” (Josh. 1:1, 9) Ruri seo se ile sa kgothatša Joshua kudu!

4, 5. (a) Jehofa o ile a kgothatša batho ba gagwe bjang nakong e fetilego? (b) Jehofa o ile a kgothatša Morwa wa gagwe bjang?

⁴ Jehofa o be a sa fo kgothatša motho ka o tee ka o tee eupša gape o be a kgothatša batho e le sehlopha. Ge Jehofa a be a kgothatša Bajuda bao ba bego ba le bothopša kua Babilona o boletše gore ba se ke ba boifa ka gobane o na le bona. Ba se ke ba lealea gobane ke yena Modimo wa bona. O itše o tla ba matlafatša le go ba thuša, a ba swara ka go tia ka seatla sa gagwe sa le letona sa toko. (Jes. 41:10) Bakriste ba lekgolong la pele la mengwaga ba ile ba kgothatšwa ka tsela e swanago, le lehono batho ba Modimo ba sa kgothatšwa.—Bala 2 Bakorinthe 1:3, 4.

⁵ Jesu le yena o ile a kgothatšwa ke Tatagwe. Ge a be a kolobetšwa, o ile a kwa lentšu le etšwa legodimong le re: “Yo ke Morwa wa ka, morategi, yo ke mo amogetšego.” (Mat. 3:17) Ruri mantšu ao a swanetše go ba a ile a matlafatša Jesu ge a be a phetha bodiredi bja gagwe bja mo lefaseng!

6. Seswantšho sa ditalente se re kgothatša bjang?

⁶ Jesu o ile a ekiša mohlala wa Tatagwe. Seswantšho sa ditalente seo a boletšego ka sona boporofeteng bja mabapi le bofelo bja tshepedišo ye ya dilo, se kgothaletša batho go botega. Seswantšhong seo, mong wa ditalente o ile a kgothatša yo mongwe le yo mongwe wa bahlanka ba botegago ka gore: “O dirile gabotse, mohlanka yo botse le yo a botegago! O botegile dilong tše dinyenyane. Ke tla go bea gore o hlokomele dilo tše dintši. Thaba le mong wa gago.” (Mat. 25:21, 23) Ruri mantšu ao a re kgothaletša gore re tšwele pele re hlankela Jehofa ka go botega!

7. Jesu o ile a kgothatša baapostola ba gagwe ka tsela efe, gona ke ka baka la’ng a ile a kgothatša Petro kutšwanyana?

⁷ Gantši baapostola ba Jesu ba be ba ngangišana ka gore ke mang yo e lego yo mogolo gare ga bona, eupša Jesu ka go se fele pelo o ile a ba kgothaletša gore ba ikokobetše le gore e be bahlanka, e sego babuši. (Luka 22:24-26) Petro o ile a nyamiša Jesu ka makga a mmalwa. (Mat.  16:21-23; 26:31-35, 75) Eupša go e na le gore Jesu a se sa mo amogela, o ile a mo kgothatša gomme a mo kgetha gore e be yena a matlafatšago bana babo.—Joh. 21:16.

8. Hesekia o ile a kgothatša bjang balaodi ba bahlabani le batho ba Juda?

⁸ Gaešita le pele ga ge Morwa wa Modimo a ka tla mo lefaseng gore a bee mohlala o mobotse wa kamoo re ka kgothatšago ba bangwe, bahlanka ba botegago ba Jehofa ba be ba tseba gore ba swanetše go kgothatša ba bangwe. Ge Hesekia a be a tšhošetšwa ke Baasiria, o ile a kgoboketša balaodi ba bahlabani le batho ba Juda gore a ba kgothatše. Beibele e re: “Ke moka setšhaba sa matlafatšwa ke mantšu ao” a gagwe.—Bala 2 Dikoronika 32:6-8.

9. Puku ya Jobo e re ruta’ng mabapi le go nea kgothatšo?

⁹ Re ka ithuta kamoo re ka kgothatšago ba bangwe mohlaleng wa Jobo. Gaešita le ge yena ka boyena a be a hloka go kgothatšwa, o ile a ruta bahomotši ba gagwe ba bararo kamoo ba ka kgothatšago batho ba bangwe ka gona. O ile a ba botša gore ge nkabe a be a le boemong bja go swana le bja bona, o be a tla ba ‘matlafatša ka mantšu a molomo wa gagwe, le gona dikhomotšo tša melomo ya gagwe di be di tla okobatša mahloko a bona.’ (Jobo 16:1-5) Mafelelong, Jobo ile a hwetša kgothatšo go Elihu le go Jehofa ka boyena.—Jobo 33:24, 25; 36:1, 11; 42:7, 10.

10, 11. (a) Ke ka baka la’ng morwedi wa Jefeta a be a hloka go kgothatšwa? (b) Lehono ke bomang bao le bona ba hlokago go kgothatšwa?

¹⁰ Motho yo mongwe yo a bego a hloka go kgothatšwa ke morwedi wa Jefeta. Pele Moahlodi Jefeta a ka yo lwa le Baamoni, o ile a enela Jehofa gore ge e ba a ka mo thuša go fenya ntweng, motho wa mathomo yo a bego a tlo mo gahlanetša ka morago ga gore a fenye, o be a tla mo neela gore a hlankele tirelong e kgethwa taberenakeleng. Ka gona, go ile gwa direga gore motho yoo, yo a ilego a tšwa go tlo mo gahlanetša e be morwedi wa gagwe wa mathomo le wa mafelelo. Jefeta o ile a kwa bohloko kudu. Eupša o ile a phethagatša keno ya gagwe gomme a romela morwedi wa gagwe gore a yo hlankela kua Shilo taberenakeleng bophelo bja gagwe ka moka.—Baa. 11:30-35.

¹¹ Gaešita le ge seo se be se le thata go Jefeta, se ka ba se be se le thata le go feta go morwedi wa gagwe, yoo ka go rata a ilego a dira dilo ka go dumelelana le phetho ya tatagwe. (Baa. 11:36, 37) Go hlankela taberenakeleng go be go bolela gore morwedi wa gagwe o be a ka se nyalwe, a ka se be le bana le gona leina la Jefeta le bohwa bja gagwe di be di tlo hwelela. Ka gona, motho yoo a bego a tloga a hloka go homotšwa le go kgothatšwa e be e le morwedi wa Jefeta. Beibele e re: “Baisiraele ba ile ba ba le mokgwa wo, wa gore: Ngwageng o mongwe le o mongwe barwedi ba Baisiraele ka matšatši a mane ba be ba eya go reta morwedi wa Jefeta wa Mogileada.” (Baa. 11:39, 40) Ruri Bakriste bao ba sego ba nyala goba go nyalwa e le gore ba dire “dilo tša Morena” kutšwanyana, le bona ba hloka go retwa le go kgothatšwa!—1 Bakor. 7:32-35.

12, 13. Petro o ile a ‘matlafatša bana babo’ bjang?

¹² Bošegong bja pele Jesu a bolawa, o ile a botša moapostola Petro gore: “Simone, Simone, bona! Sathane o le kganyogile gore a le fefere bjalo ka korong. Eupša ke go lopetše gore tumelo ya gago e se ke ya fela, gomme wena ge o šetše o itshotše o matlafatše bana beno.”—Luka 22:31, 32.

 ¹³ Petro o ile a ba kokwane ya phuthego ya Bokriste ya lekgolong la pele la mengwaga. (Bagal. 2:9) O ile a kgothatša bana babo ka go ba beela mohlala wa go ba sebete ka Pentekoste le ka morago ga moo. Ka morago ga go hlankela Jehofa ka mengwaga e mentši, o ile a ngwalela Bakristegotee le yena gore: “Ke le ngwaletše mantšu a sego kae . . . e le gore ke le nee kgothatšo le bohlatse bjo matla bja gore bjo ke botho bjo bogolo bja therešo bja Modimo. Emang le tiile go bjona.” (1 Pet. 5:12) Mangwalo a Petro a ile a tšwela pele a kgothatša Bakriste mengwageng e fetilego go ba go fihla le lehono. Ruri re hloka kgothatšo ye ge re dutše re letetše gore dikholofetšo tša Jehofa di phethege!—2 Pet. 3:13.

14, 15. Mangwalo a moapostola Johane a be a dutše a kgothatša Bakriste bjang?

¹⁴ Moapostola Johane le yena e be e le kokwane ya phuthego ya Bokriste ya lekgolong la pele la mengwaga. Ebangedi e kgahlišago yeo a e ngwadilego ya mabapi le bodiredi bja Jesu, e be e dutše e kgothatša Bakriste mengwageng e makgolo e fetilego—gaešita le gona bjale. Ebangedi yeo ke yona feela e nago le mantšu ao Jesu a a boletšego a gore lerato ke lona le tlago go hlaola barutiwa ba gagwe ba therešo.—Bala Johane 13:34, 35.

¹⁵ Mangwalo a Johane a mararo le ona a na le matlotlo a mangwe a therešo. Ge re ikwa re imelwa ke sebe, na ga re ikwe re imologa ge re bala gore “madi a Jesu . . . a re hlwekiša sebeng sohle”? (1 Joh. 1:7) Le gona ge re dula re ikwa re le molato, na ga re ikwe re leboga le go feta ge re bala gore “Modimo ke yo mogolo go feta dipelo tša rena”? (1 Joh. 3:20) Johane ke yena feela a ngwadilego gore “Modimo ke lerato.” (1  Joh. 4:8, 16) Lengwalong la gagwe la bobedi le la boraro o laela Bakriste gore ba  tšwele pele ba “sepela therešong.”—2 Joh. 4; 3 Joh. 3, 4.

16, 17. Moapostola Paulo o ile a kgothatša bjang Bakriste ba lekgolong la pele la mengwaga?

¹⁶ Lekgolong la pele la mengwaga, moapostola Paulo o ile a kgothatša bana babo kutšwanyana. Ka morago ga gore Jesu a hwe, ba bantši ba baapostola ba ile ba šala Jerusalema, e lego moo sehlopha se bušago se ilego sa dula gona. (Dit. 8:14; 15:2) Bakriste ba kua Judea ba ile ba botša batho ka Kriste. Batho bao ba be ba šetše ba dumela go Modimo o tee. Ka lehlakoreng le lengwe, moya o mokgethwa o ile wa roma moapostola Paulo gore a yo bolela ka Modimo go Baroma, Bagerika le batho bao ba bego ba rapela medimo e mentši.—Bagal. 2:7-9; 1 Tim. 2:7.

¹⁷ Paulo o ile a ya nageng yeo ga bjale e tsebjago e le Turkey, gotee le nageng ya Gerika le Italy. O ile a botša batho bao e bego e se Bajuda ditaba tše dibotse a ba a hloma le diphuthego tša Bokriste dinageng tšeo. Batho bao, bao ga bjale ba bego ba fetogile Bakriste, ba ile ba “tlaišega diatleng tša batho ba nageng ya gabo [bona]” gomme ba be ba hloka go kgothatšwa. (1 Bathes. 2:14) Mo e ka bago ka ngwaga wa bo-50 C.E., Paulo o ile a ngwalela phuthego e nyenyane ya kua Thesalonika gore: “Ka mehla re leboga Modimo ge re gopola ka lena bohle dithapelong tša rena, gobane re gopola modiro wa lena wa tumelo re sa kgaotše le boitapišo bja lena bjo lerato le kgotlelelo ya lena.” (1 Bathes. 1:2, 3) Le gona o ile a ba kgothaletša gore ba matlafatšane ka go ba botša gore: “Tšwelang pele le kgothatšana e bile le agana.”—1 Bathes. 5:11.

18. Sehlopha se bušago sa lekgolong la pele la mengwaga se ile sa kgothatša Filipi bjang?

¹⁸ Sehlopha se bušago sa lekgolong la pele la mengwaga se ile sa kgothatša bao ba etelelago pele ka phuthegong le Bakriste ka kakaretšo. Ge moebangedi Filipi a be a botša Basamaria ka Kriste, ditho tša sehlopha se bušago di ile tša mo thekga kudu. Ka gona, di ile tša roma Petro le Johane bao le bona e bego e le ditho tša sehlopha seo gore ba yo rapelela bao e bego e sa tšwa go ba Bakriste gore ba hwetše moya o mokgethwa. (Dit. 8:5, 14-17) Ruri Filipi le Bakriste bao, ba swanetše go ba ba ile ba kgothatšwa ke thekgo ya sehlopha se bušago!

19. Bakriste ba lekgolong la pele la mengwaga ba ile ba ikwa bjang ka lengwalo leo sehlopha se bušago se ba ngwaletšego lona?

¹⁹ Ka morago, ka ge Molao wa Moshe o be o laela Bajuda gore ba bolle, sehlopha se bušago se ile sa swanelwa ke go dira phetho ya ge e ba Bakriste bao e sego Bajuda ba swanetše go bolla. (Dit. 15:1, 2) Se hlahlwa ke moya o mokgethwa le Mangwalo, Sehlopha se bušago se ile sa phetha ka gore go be go se sa hlokagala gore Bakriste bao ba bolle. Ka gona se ile sa ngwalela diphuthego lengwalo mabapi le taba yeo. Ka morago se ile sa roma baemedi ba sona gore ba iše lengwalo leo diphuthegong. Mafelelo e bile afe? Pego e re: “Eitše ge le badilwe, mašaba a thabela kgothatšo yeo.”—Dit. 15:27-32.

20. (a) Lehono Sehlopha se Bušago se kgothatša bjang bana babo rena lefaseng ka moka? (b) Sehlogo se se latelago se tlo araba potšišo efe?

²⁰ Lehono, Sehlopha se Bušago sa Dihlatse tša Jehofa se kgothatša bana babo rena le dikgaetšedi bao ba lego tirelong e kgethegilego ya nako e tletšego, gotee le bana babo rena le dikgaetšedi lefaseng ka moka. Go swana le bana babo rena ba lekgolong la pele la mengwaga, le rena re thabela kgothatšo yeo! Go oketša moo, ka 2015 Sehlopha se Bušago se ile sa gatiša poroutšha ya Boela go Jehofa, yeo e kgothatšago bana babo rena le dikgaetšedi lefaseng ka moka. Eupša na bana babo rena bao ba eteletšego pele ka phuthegong ke bona feela ba swanetšego go ekiša Jehofa tabeng ya go kgothatša ba bangwe? Sehlogo se se latelago se tlo araba potšišo ye.