Mantšu ao a dirišitšwego ka Seheberu a dira gore taba ye e kwešišwe ka ditsela tše dintši. Ka gona, mabaka a a latelago a re thuša go kwešiša kgopolo ya nnete ditemaneng tšeo

1. Ela hloko ditemana tša psalme yeo ka moka. Go temana 12 go dirišitšwe polelwana “ke moka.” Polelwana yeo e bontšha gore ditemana 12 go ya go 14 di bolela ka ditšhegofatšo tšeo di tlago go hwetšwa ke baloki, e lego bao ba kgopelago Jehofa gore a ‘ba lokolle le go ba hlakodiša’ go batho babe (temana 11). Kgopolo ye e tšwelela gape go temana 15. Temaneng ye, polelwana “go thaba” e tšwelela gabedi. Makgeng ao ka moka e šupa go baloki, e lego batho bao “Modimo wa bona e lego Jehofa!”

2. Kwešišo ye e dumelelana le ditemana tše dingwe tša Beibele tšeo go tšona Jehofa a holofetšago go šegofatša bahlanka ba gagwe bao ba botegago. Psalme ye e bontšha kholofelo e tiilego yeo Dafida a bego a na le yona ya gore ka morago ga gore Jehofa a phološe setšhaba sa Baisiraele manabeng a sona, o be a tla se šegofatša ka go se nea lethabo le go atlegiša mediro ya diatla tša sona. (Lef. 26:9, 10; Doit. 7:13; Ps. 128:1-6) Ka mohlala, Doiteronomio 28:4 e re: “Go tla šegofatšwa bana ba gago, seenywa sa mmung wa gago le tšeo di tswetšwego ke diruiwa tša gago, e lego dinamane tša dikgomo tša gago, diputšanyana le dikwanyana tša mohlapeng wa gago.” Ke therešo gore nakong ya ge go be go buša morwa wa Dafida e lego Solomone, setšhaba se ile sa ba le khutšo gomme sa atlega go tšeo se bego se di dira. Go oketša moo, dilo tšeo di bego di direga ge Solomone a be a buša di bontšha seo se tlago go direga mmušong wa Mesia.—1 Dikg. 4:20, 21; Ps. 72:1-20.

Re phetha ka gore kwešišo ye, yeo e nepagetšego ya Psalme 144 e dira gore psalme ye ka moka e re bontšhe gabotse kholofetšo yeo bahlanka ba Jehofa e lego kgale ba e letetše. Kholofetšo yeo ke ya gore Modimo a fediše batho ba babe gomme a tlišetše baloki khutšo le go atlegiša mediro ya bona.—Ps. 37: 10, 11.