1. Go ya ka Baefeso 6:10-13, e nngwe ya ditsela tše di kgahlišago tšeo ka tšona Jehofa a bontšhago gore o na le taba le rena ke efe? Hlalosa.

E NNGWE ya ditsela tše di kgahlišago tšeo ka tšona Jehofa a bontšhago gore o na le taba le rena ke ka go re thuša go lwa le manaba a rena. Manaba ao ke bomang? Ke Sathane le batemona ba gagwe. Jehofa o re lemoša ka manaba a, le gona o re nea dilo tšeo re di hlokago gore re kgone go lwa le ona. (Bala Baefeso 6:10-13.) Ge e ba re amogela thušo ya Jehofa e bile re ithekga ka yena ka mo go feletšego, re ka kgona go ganetša Diabolo ka mo go feletšego. Re ka kgona go ba le tumelo ya go swana le yeo moapostola Paulo a bego a na le yona. O ngwadile gore: “Ge e ba Modimo a ema le rena, ke mang yo a tlago go lwa le rena?”—Baroma 8:31.

2. Re tlo ithuta ka’ng sehlogong se?

² Ka ge re le Bakriste ba therešo, ga re rate go hlwa re bolela kudu ka Sathane le batemona ba gagwe. Eupša re rata go dula re swaregile ka go ithuta ka Jehofa le go mo hlankela. (Ps. 25:5) Lega go le bjalo, re swanetše go tseba dilo tšeo Sathane a di dirišago go fora batho. Ka baka la’ng? Ka gobane ga re nyake go forwa ke maano a gagwe. (2 Bakor. 2:11) Sehlogong se, re tlo ithuta ka selo se segolo seo Sathane le batemona ba gagwe ba se dirišago go fora batho. Le gona re tlo ithuta ka dilo tšeo re ka di dirago gore re kgone go ba ganetša.

3-4. (a) Go dirišana le meoya e mebe go bolela’ng? (b) Lehono go dirišana le meoya e mebe go tumile gakaaka’ng?

³ Gantši Sathane le batemona ba gagwe ba timetša batho ba diriša meoya e mebe. Batho bao ba dirišanago le meoya e mebe ba ipotša gore ba tseba goba ba kgona go laola dilo tšeo  gantši batho ba bangwe ba sa kgonego go di tseba goba go di laola. Ka mohlala, ba bangwe ba nagana gore ba ka tseba bokamoso ka go porofeta goba go diriša dinaledi go botša batho ka bokamoso. Ba bangwe ba ka itira eka ba be ba bolela le batho bao ba hwilego. Ba bangwe ba a loya goba ba dira maleatlana, le gona ba ka leka go foša motho yo itšego ka moleko. *

⁴ Lehono go dirišana le meoya e mebe go tumile gakaaka’ng? Go ya ka nyakišišo yeo e dirilwego dinageng tše 18 kua Latin America le dihlakahlakeng tša Caribbean, go hweditšwe gore motho o tee go ba bararo o dumela go maleatlana le boloi, e bile mo e ka bago palo ya batho bao ka moka ba dumela gore go a kgonega gore batho ba boledišane le bahu. Go ile gwa dirwa nyakišišo e nngwe dinageng tše 18 tša Afrika. Nyakišišong yeo go hweditšwe gore motho o tee go ba babedi o dumela gore boloi bo ka thuša batho goba bja ba gobatša. Ke therešo gore kae le kae mo re dulago gona re swanetše go itšhireletša go dirišaneng le meoya e mebe. Go feta moo, Sathane o nyaka go timetša “lefase ka moka.”—Kut. 12:9.

5. Jehofa o ikwa bjang ka go dirišana le meoya e mebe?

⁵ Jehofa ke “Modimo wa therešo.” (Ps. 31:5) Ka gona o ikwa bjang ka go dirišana le meoya e mebe? O go hloile kudu! Jehofa o ile a botša Baisiraele gore: “Go wena go se ke gwa hwetšwa motho yo a fetišago morwa goba morwedi wa gagwe mollong, senoge, ramalea goba motho yo a dirišago dipheko goba moloi, goba yo a fošago ba bangwe ka meleko goba yo a dirišanago le meoya e mebe goba sedupe goba motho le ge e le ofe yo a botšišago dilo bahung. Ka gobane motho yo mongwe le yo mongwe yo a dirago dilo tše ke selo se se šišimišago go Jehofa.” (Doit. 18:10-12) Bakriste ga ba sa le ka tlase ga Molao woo Jehofa a bego a o file Baisiraele. Eupša re a tseba gore tsela yeo Jehofa a ikwago ka yona ka go dirišana le meoya e mebe ga se ya fetoga.—Mal. 3:6.

6. (a) Sathane o diriša bjang meoya e mebe go tlaiša batho? (b) Go ya ka Mmoledi 9:5, go direga’ng ka rena ge re ehwa?

⁶ Jehofa o re lemoša ka kotsi ya go dirišana le meoya e mebe ka gobane o a tseba gore Sathane o e šomiša go tlaiša batho. Sathane o diriša meoya e mebe go bolela maaka a go swana le gore bahu ba sa phela kaekae. (Bala Mmoledi 9:5.) Le gona Sathane o diriša meoya e mebe gore batho ba dule ba boifa le gore ba hlanogele Jehofa. Morero wa gagwe ke gore batho bao ba dirišanago le meoya e mebe ba bote meoya yeo go e na le go bota Jehofa.

7. Jehofa o re botša’ng mabapi le Sathane le batemona ba gagwe?

⁷ Go etša ge re boletše pejana, Jehofa o re botša seo re swanetšego go se dira e le gore re se ke ra timetšwa ke Sathane le batemona ba gagwe. A re boleleng ka tše dingwe tša dilo tšeo re ka di dirago go ganetša Sathane le batemona ba gagwe.

8. (a) Tsela e kaone kudu ya go gana maaka a Sathane le batemona ba gagwe ke efe? (b) Psalme 146:4 e pepentšha bjang maaka ao Sathane a a bolelago mabapi le bahu?

⁸ Bala Lentšu la Modimo gomme o naganišiše ka lona. Ye ke tsela e kaone kudu ya go gana maaka a Sathane le batemona ba gagwe.  Lentšu la Modimo le swana le tšhoša e bogale yeo e ka kgonago go pepentšha maaka a Sathane. (Baef. 6:17) Ka mohlala, le re botša gore batho bao ba phelago ba ka se kgone go bolela le bahu. (Bala Psalme 146:4.) E bile le re botša gore ke Jehofa feela yo a ka re botšago nnete ka dilo tšeo di sa tlago go direga. (Jes. 45:21; 46:10) Ge re bala Lentšu la Modimo le go naganišiša ka lona ka mehla, re tlo kgona go gana le go hloya maaka ao Sathane le batemona ba gagwe ba nyakago re a dumela.

9. Ke mekgwa efe ya go dirišana le meoya e mebe yeo re swanetšego go e phema?

⁹ Gana go dira selo le ge e le sefe seo se sepedišanago le meoya e mebe. Ka ge re le Bakriste ba therešo, ga re dire selo le ge e le sefe seo se sepedišanago le meoya e mebe. Ka mohlala, ga re ye dingakeng tša ditaola goba baporofeteng, e bile ga re leke go bolela le bahu ka tsela le ge e le efe. Ka ge re boletše sehlogong se se fetilego, re phema mekgwa yeo e tlwaetšwego ya go boloka bahu yeo e sepedišanago le thuto ya gore bahu ba a phela kaekae. Le gona ga re diriše dinaledi goba mekgwa e mengwe ya maleatlana gore re tsebe ka bokamoso. (Jes. 8:19) Re a tseba gore mekgwa yeo e kotsi kudu gomme e ka dira gore re dirišane le Sathane le batemona ba gagwe.

10-11. (a) Batho ba bangwe ba kua Efeso ba ile ba dira’ng ka morago ga gore ba ithute therešo? (b) Go ya ka Bakorinthe ba Pele 10:21, ke ka baka la’ng re swanetše go ekiša Bakriste bao ba Efeso, gona re ka dira seo bjang?

¹⁰ Lahla dilo ka moka tšeo di sepedišanago le meoya e mebe. Batho ba bangwe bao ba bego ba dula Efeso lekgolong la pele la mengwaga ba be ba dirišana le meoya e mebe. Ka morago ga gore ba ithute therešo, ba ile ba dira diphetogo tše dikgolo. Beibele e re: “Ba bantši ba bao ba bego ba dira malea ba kgobokanya dipuku tša bona gomme ba di fiša pele ga mang le mang.” (Dit. 19:19) Batho ba ba ile ba dira sohle seo ba ka se kgonago gore ba ganetše meoya e mebe. Dipuku tša bona tša maleatlana  di be di tura kudu. Eupša go e na le gore ba di rekiše goba ba di fe batho ba bangwe, ba ile ba di fiša. Ba be ba se na taba le gore di be di tura gakaakang, eupša sa bohlokwa go bona e be e le go kgahliša Jehofa.

¹¹ Re ka ekiša Bakriste bao bjang? E ka ba mo gobotse go lahla selo le ge e le sefe seo re nago le sona seo se ka bago se sepedišana le meoya e mebe. Se se akaretša dipheta, metlamo, goba dilo le ge e le dife tšeo batho ba di aparago goba ba di dirišago gore ba itšhireletše go meoya e mebe.—Bala 1 Bakorinthe 10:21.

12. Re swanetše go ipotšiša dipotšišo dife mabapi le dilo tšeo re ithabišago ka tšona?

¹² Hlokomela dilo tšeo o ithabišago ka tšona. Ipotšiše gore: ‘Na ke bala dipuku, dimakasine goba ditaba tše itšego Inthaneteng tšeo di sepedišanago le meoya e mebe? Go thwe’ng ka mmino wo ke o ratago, dimubi le mananeo a thelebišene ao ke a bogelago goba dipapadi tša bidio tšeo ke ratago go di bapala? Go dilo tšeo ke ithabišago ka tšona, na go na le tšeo di sepedišanago le botemona? Na di bontšha dilo tše bjalo ka di-vampire, di-zombie, dipoko goba maleatlana? Na di dira gore boloi goba go foša ba bangwe ka meleko go bonagale eka e no ba go ithabiša?’ Ke therešo gore ga se ditori ka moka tšeo di bolelago ka dilo tšeo di sa kago tša direga tšeo re ka phethago ka gore di na le botemona. Pele o kgetha dilo tšeo o nyakago go ithabiša ka tšona, kgonthišetša gore dilo tšeo di tla go thuša go sepelela kgole le selo le ge e le sefe seo Jehofa a se hloilego. Re swanetše go dira sohle seo re se kgonago go ba le “letswalo le le se nago bosodi” pele ga Modimo wa rena.—Dit. 24:16. *

13. Re swanetše go phema go dira’ng?

¹³ Phema go bolela ditori tšeo di nago le  botemona. Tabeng ye, re nyaka go ekiša Jesu. (1 Pet. 2:21) Pele Jesu a ka tla mo lefaseng, o be a dula legodimong gomme o be a tseba mo gontši ka Sathane le batemona ba gagwe. Eupša ga se a ka a bolela ditori tša dilo tšeo Sathane le batemona ba gagwe ba bego ba di dira. Jesu o be a nyaka go dula a ruta batho ka Jehofa, e sego go dula a bolela ka Sathane. Re ka ekiša Jesu ka go se bolele ditori tša mabapi le batemona. Go e na le moo, seo re se bolelago se swanetše go bontšha gore ‘dipelo tša rena di thabišwa kudu ke taba e botse,’ e lego therešo ya Beibele.—Ps. 45:1.

14-15. (a) Ke ka baka la’ng re se ra swanela go boifa meoya e mebe? (b) Re tseba bjang gore Jehofa o šireletša batho ba gagwe lehono?

¹⁴ O se ke wa boifa meoya e mebe. Lefaseng le le lebe leo re phelago go lona, re ka diragalelwa ke dilo tše mpe. Re ka welwa ke dikotsi, ra babja goba ra hwa goba go hwelwa re sa letela. Eupša ga se ra swanela go nagana gore mathata ao re a bakelwa ke batemona. Beibele e hlalosa gore “nako le ditiragalo tšeo di sa letelwago” di ka diragalela motho le ge e le ofe. (Mmo. 9:11) Ge e le gabotse, Jehofa o bontšhitše gore o na le matla go feta batemona. Ka mohlala, ga se a dumelela Sathane a bolaya Jobo. (Jobo 2:6) Mehleng ya Moshe, Jehofa o ile a bontšha gore o na le matla go feta boramalea ba Egipita. (Ek. 8:18; 9:11) Ka morago ga moo, Jehofa o ile a fa Jesu matla a go raka Sathane le batemona ba gagwe legodimong. Le gona kgauswinyane Jesu o tla ba lahlela sekoting moo ba ka se kgonego go gobatša motho le ge e le ofe.—Kut. 12:9; 20:2, 3.

¹⁵ Re bona bohlatse bjo bontši bja gore Jehofa o šireletša batho ba gagwe lehono. Nagana ka se: Re botša batho therešo le go ba ruta yona lefaseng ka moka. (Mat. 28:19, 20) Se se dira gore re pepentšhe mediro ka moka e mebe ya Diabolo. Ke nnete gore ge nkabe Sathane a na le matla, o be a ka re thibela go dira mošomo wo, eupša o palelwa ke go re thibela. Ka gona ga se ra swanela go boifa meoya e mebe. Re a tseba gore “Jehofa yena mahlo a gagwe a lebeletše gohle lefaseng ka moka gore a bontšhe matla a gagwe bakeng sa bao ba mmotegelago ka dipelo ka moka.” (2 Dikor. 16:9) Ge e ba re botegela Jehofa, batemona ba ka se re tlaiše.

16-17. Nea mohlala wo o bontšhago gore go nyakega sebete go ganetša meoya e mebe.

¹⁶ Go nyakega gore re be le sebete gore re ganetše meoya e mebe, kudukudu ge ba leloko le bagwera bao ba re ratago ba re gapeletša go dira dilo tšeo Jehofa a sa di nyakego. Jehofa o šegofatša bao ba bontšhago sebete. Nagana ka mohlala wa kgaetšedi yo a bitšwago Erica yoo a dulago Ghana. Erica o be a na le mengwaga e 21 ge a be a thoma go ithuta Beibele le Dihlatse tša Jehofa. Ka ge tatagwe e be e le moruti yo a bego a dira dilo tša maleatlana, o be a nyaka gore Erica a je nama yeo a bego a e diriša go direla medingwana ya gagwe dihlabelo. Ge Erica a be a gana go ja nama yeo, ba gabo ba be ba bona a nyatša medimo yeo. Lapa la gabo le be le nagana gore medimo yeo e be e tla ba otla ka go dira gore ba hlakane hlogo le go babja.

¹⁷ Lapa la gabo Erica le ile la mo gapeletša gore a latele moetlo woo, eupša o ile a gana gaešita le ge seo se be se bolela gore o be a tla swanelwa ke go tloga ka gae. Dihlatse tše dingwe tša Jehofa di ile tša dula le yena. Ka go re’alo, Jehofa o ile a šegofatša Erica ka go mo nea lapa le lefsa, e lego badumedigotee le yena bao ba ilego ba ba bjalo ka bana babo ba kgonthe. (Mar. 10:29, 30) Le ge ba gabo ba ile ba mo lahla gaešita le go fiša dilo tša gagwe, Erica o ile a dula a botegela Jehofa, a kolobetšwa gomme ga bjale ke mmulamadibogo wa ka mehla. Erica ga a boife batemona. Ge Erica a bolela ka lapa la gabo o re: “Ke dula ke rapela Jehofa letšatši le letšatši gore a thuše lapa la gešo gore le ithute ka yena gomme le bone gore go mo hlankela go tliša ditšhegofatšo tše dintši.”

18. Re tlo hwetša ditšhegofatšo dife ge e ba re bota Jehofa?

¹⁸ Ga se gore ka moka ga rena re tla lekwa go swana le Erica. Eupša ka moka ga rena re swanetše go ganetša meoya e mebe gomme re bote Jehofa. Ge e ba re dira bjalo, Jehofa o tla re šegofatša kudu e bile re ka se timetšwe ke maaka a Sathane. Le gona re ka se dumelele go boifa batemona go re dira gore re se sa hlankela Jehofa. Go feta moo, re tlo matlafatša segwera sa rena le Jehofa. Morutiwa Jakobo o ngwadile gore: “Ikokobeletšeng Modimo; eupša le ganetše Diabolo, yena o tla le tšhaba. Batamelang Modimo gomme o tla le batamela.”—Jak. 4:7, 8.