1-2. (a) Sathane o ile a fora batho bjang go tloga mathomong? (b) Re tlo ithuta ka’ng sehlogong se?

SATHANE yo e lego “tatago maaka,” ga e sa le a fora batho go tloga mathomong. (Joh. 8:44) Maaka ao a a bolelago a akaretša dithuto tša maaka tša mabapi le lehu le bophelo bja ka morago ga lehu. Dithuto tše dintši tšeo di ratwago kudu tša mabapi le lehu di tšwa tabeng ya go boifa meoya ya bahu. Ka baka leo, bana babo rena ba bantši le dikgaetšedi ba swanelwa ke ‘go lwela tumelo ya bona ka matla’ ge go na le yo a hlokofetšego ka gae goba mo motseng.—Juda 3.

² Ke’ng seo se ka go thušago gore o dule o dira seo Beibele e se rutago mabapi le lehu ge e ba o lebeletšane le teko e bjalo? (Baef. 6:11) O ka dira’ng go kgothatša le go matlafatša Mokristegotee le wena yo a ka bago a gapeletšwa go latela mekgwa yeo Modimo a sa e ratego? Sehlogo se se tla re ruta kamoo Jehofa a re thušago ka gona ge re le maemong ao. Sa pele, a re kweng seo Beibele e se rutago mabapi le lehu.

3. Maaka a Sathane a bakile’ng?

³ Modimo o be a se a rera gore batho ba hwe. Eupša e le gore Adama le Efa ba phele ka mo go sa felego, ba be ba swanetše go kwa taelo ya Jehofa yeo e rego: “Ge e le sehlare sa go tseba botse le bobe o se ke wa ja tša sona, gobane mohlang o ka jago tša sona o tla hwa lehu.” (Gen. 2:16, 17) Eupša Sathane o ile a tsena ditaba gare ke moka a senya. O ile a diriša noga gomme a bolela le Efa a re: “Le ka se hwe lehu.” Ka manyami, Efa o ile a dumela maaka ao ke moka a ja seenywa seo. Ka morago monna wa gagwe le yena o ile a ja seenywa seo. (Gen. 3:4, 6) Maaka ao a Sathane a ile a dira gore batho ba be le sebe le go hwa.—Baroma 5:12.

4-5. Sathane o tšwetše pele a fora batho bjang?

 ⁴ Go etša ge Modimo a be a boletše, Adama le Efa ba ile ba hwa. Eupša Sathane o ile a no tšwela pele a bolela maaka ka lehu. Ka morago ga moo, o ile a thoma go bolela maaka a mangwe. A mangwe a maaka ao ke gore mmele wa motho o a hwa eupša moya wa gagwe o tšwela pele o phela kaekae. Batho ba bantši ba boditšwe maaka ao go fihla le lehono.—1 Tim. 4:1.

⁵ Ke ka baka la’ng batho ba bantši gakaaka ba dumela maaka a Sathane? Sathane o tseba kamoo batho ba ikwago ka gona ka lehu, ka gona o diriša seo go ba fora. Ka ge Modimo a re bopile gore re phele ka mo go sa felego, ga re nyake go hwa. (Mmo. 3:11) Lehu ke lenaba la rena.—1 Bakor. 15:26.

6-7. (a) Na Sathane o kgonne go uta therešo mabapi le lehu? Hlalosa. (b) Therešo yeo e lego ka Beibeleng e re thuša bjang gore re se ke ra boifa bahu?

⁶ Le ge Sathane a ile a leka go uta therešo mabapi le lehu, lehono re a tseba gore go direga eng ka rena ge re hwile. Ge e le gabotse, gona bjale batho ba bantši kudu ba tseba seo Beibele e se rutago mabapi le seo se diregago ka bahu le kholofelo yeo re nago le yona ka bona. (Mmo. 9:5, 10; Dit. 24:15) Go tseba therešo ye go a re kgothatša, go dira gore re se ke ra boifa goba ra ikhwetša re tšhošwa ke go se tsebe gore go direga eng ka bahu. Ka mohlala, ga re boife bahu e bile ga re boife gore go na le seo se ka ba diragalelago. Re a tseba gore ga ba phele e bile ba ka se re gobatše. Go no swana le ge ba robetše boroko bjo bogolo. (Joh. 11:11-14) Le gona ka ge bahu ba sa tsebe selo, nako go bona ga e bolele selo. Ka gona ge bahu ba tsošwa, gaešita le bao ba nago le mengwaga e mentši ba hlokofetše, go tlo no swana le ge eka ba ithobaletše maabane.

⁷ Na ga o dumele gore therešo mabapi le lehu e a kwagala e bile e bonolo? E fapana kgole le maaka a gakantšhago batho ao Sathane a a bolelago. Maaka ao ga a gakantšhe batho feela, eupša a senya le Mmopi wa rena leina. E le gore re kwešiše gabotse gore Sathane o sentše dilo gakaakang, re tlo araba dipotšišo tše di latelago: Maaka ao Sathane a a boletšego a sentše bjang leina la Jehofa? A dirile bjang gore batho ba nagane gore ga go bohlokwa gore ba dumele sehlabelong sa topollo sa Kriste? A dirile bjang gore batho ba tlaišege kudu le go kwa bohloko?

8. Go ya ka Jeremia 19:5, maaka ao Sathane a a bolelago mabapi le lehu a senya leina la Jehofa bjang?

⁸ Maaka a Sathane a mabapi le lehu a senya leina la Jehofa. Maaka ao a akaretša thuto ya  maaka ya gore bahu ba tlaišega diheleng ka go swa ka mo go sa felego. Thuto e bjalo e senya Modimo leina. Bjang? Dithuto tša go swana le ye di dira gore batho ba dumele gore Modimo yo a re ratago o sehlogo go swana le Diabolo. (1 Joh. 4:8) Seo se dira gore o ikwe bjang? Sa bohlokwa le go feta, maaka ao a dira gore Jehofa yena a ikwe bjang? Go feta moo, Jehofa o hloile mekgwa ka moka e sehlogo.—Bala Jeremia 19:5.

9. Maaka a Sathane a dira gore batho ba ikwe bjang ka sehlabelo sa topollo sa Kriste seo go bolelwago ka sona go Johane 3:16 le 15:13?

⁹ Maaka a Sathane a mabapi le lehu a dira gore batho ba se ke ba dumela sehlabelong sa Kriste sa topollo. (Mat. 20:28) Maaka a mangwe a Sathane ke gore batho ba na le moya wo o sa hwego. Ge e ba go be go le bjalo, ka moka ga rena be re tla phela ka mo go sa felego. Ka gona go be go ka se hlokagale gore Kriste a re hwele e le gore re tle re hwetše bophelo bjo bo sa felego. Dula o gopola gore sehlabelo sa Kriste ke tsela e kgolokgolo yeo Jehofa le Morwa wa gagwe ba re bontšhitšego gore ba re rata kudu. (Bala Johane 3:16; 15:13.) Nagana feela gore Jehofa le Morwa wa gagwe ba ikwa bjang ka dithuto tšeo di dirago gore mpho ye e bohlokwa ya sehlabelo sa Kriste e nyatšege!

10. Maaka a Sathane a mabapi le lehu a dirile bjang gore batho ba tlaišege le go kwa bohloko?

¹⁰ Maaka a Sathane a dira gore batho ba tlaišege kudu le go kwa bohloko. Batswadi bao ba kwešitšwego bohloko ke lehu la ngwana wa bona ba ka botšwa gore Modimo o tšere ngwana yoo, mohlomongwe gore a yo ba morongwa legodimong. Na maaka a a Sathane a dira gore batswadi ba ba homotšege? Aowa, a ba kweša bohloko le go feta! Thuto ya maaka ya gore batho ba fišwa diheleng e dira gore batho ba dumele gore ga go na bothata ge ba tlaiša ba bangwe, go akaretša go fiša batho koteng ge ba sa dumelelane le dithuto tša kereke ya Katholika. Go ya ka puku e nngwe yeo e bolelago ka dilo tšeo di bego di direga kgorong ya tsheko yeo e bego e tlaiša batho bao ba bego ba sa dumelelane le dithuto tša Kereke ya Katholika, ba bangwe ba batho bao ba bego ba tlaiša batho ba be ba dumela gore “ba be ba no ba latswiša gore diheleng go bjang” e le gore ba kgone go sokologa pele ba ka hwa gore ba se tlo ya diheleng. Dinageng tše dintši batho ba bantši ba ikwa ba gapeletšega go rapela batho ba gabo bona bao ba hlokofetšego, go ba hlompha goba go ba kgopela mahlatse. Ba bangwe ba re ba phasa badimo ka ge ba nagana gore ba ka se ba tlaiše. Se se nyamišago ke gore dithuto tšeo di theilwego maakeng a Sathane ga di dire gore batho ba homotšege. Go e na le moo di dira gore ba tshwenyege goba ba boife.

11. Ba leloko goba bagwera bao ba re ratago ba ka dira’ng go re gapeletša go se latele Beibele?

¹¹ Ge re rata Modimo le Lentšu la gagwe, seo se dira gore re ikemišetše go kwa Jehofa le ge ba leloko goba bagwera bao ba re ratago ba re gapeletša go tšea karolo meetlong ya mabapi le lehu yeo e sa dumelelanego le Mangwalo. Mohlomongwe ba ka leka go re tlontlolla ka go bolela gore re be re sa rate motho wa gabo rena yo a hlokofetšego goba go mo hlompha. Goba mohlomongwe ba ka re re tla dira gore motho yo a hlokofetšego a re bakele madimabe. Re ka dira’ng go lwela therešo ya Beibele? Bona kamoo o ka dirišago melao ya motheo ya Beibele e latelago.

12. Ke meetlo efe ya mabapi le bahu yeo e sego ya Mangwalo?

¹² Ikemišetše go ‘itlhaola’ go ditumelo le meetlo yeo e sego ya Mangwalo. (2 Bakor. 6:17) Batho ba bantši ba sehlakahlakeng se sengwe sa kua Caribbean ba dumela gore ge motho a hlokofetše, moya wa gagwe o tšwela pele o tlaiša bao ba bego ba sa mo sware gabotse ge a be a sa  phela. Puku e nngwe e re moya woo wa gagwe “o ka ba wa tsoša mmudubudu mo setšhabeng.” Dinageng tše itšego tša Afrika batho ba tlwaetše go khupetša diipone ge go na le motho yo a hlokofetšego ka gae le go phekgola dinepe tša gagwe tšeo di lego lebotong. Ke ka baka la’ng ba dira seo? Ba bangwe ba bolela gore bahu ga se ba swanela go ipona. Ka ge re le bahlanka ba Jehofa, ga re dumele dinonwane lege e le dife e bile ga re tšee karolo meetlong le ge e le efe yeo e sepedišanago le maaka a Sathane.—1 Bakor. 10:21, 22.

13. Go ya ka Jakobo 1:5, o swanetše go dira’ng ge e ba o sa kgodišege ka moetlo o itšego?

¹³ Ge e ba o sa kgodišege ka mokgwa o itšego goba moetlo, rapela Jehofa gomme o mo kgopele gore a go nee tumelo le bohlale. (Bala Jakobo 1:5.) Ka morago ga moo o dire nyakišišo ka dikgatišong tša rena. Ge e ba go nyakega, boledišana le bagolo ba phuthegong ya geno. Ba ka se go botše seo o swanetšego go se dira, eupša ba tla go thuša go hwetša melao ya motheo ya Beibele ya go swana le yeo re boletšego ka yona sehlogong se. Ge o dutše o dira dilo tše, o tlwaetša ‘matla a gago a go hlatha,’ gomme matla ao a tla go thuša go “[kgethologanya] se se nepagetšego le se se fošagetšego.”—Baheb. 5:14.

14. Re ka dira’ng gore re pheme go kgopiša batho ba bangwe?

¹⁴ “Dirang dilo tšohle gore le tagafatše Modimo. Phemang go ba ba kgopišago.” (1 Bakor. 10:31, 32) Ge re nagana ka go tšea karolo moetlong o itšego, re swanetše go nagana kamoo phetho ya rena e ka kgomago matswalo a ba bangwe, kudukudu Bakristegotee le rena. Ga re nyake go kgopiša batho ba bangwe. (Mar. 9:42) Le gona ga re nyake go kgopiša batho bao e sego Bakriste go sa hlokagale. Lerato le tla dira gore re ba hlomphe ge re bolela le bona, e lego selo seo se tla dirago gore Jehofa a tumišwe. Ga re nyake go ngangišana le batho goba go nyatša ditšo tša bona. Dula o gopola gore lerato le na le matla. Ge re bontšha lerato ka go naganela ba bangwe le go ba hlompha, re ka ba ra dira gore baganetši ba rena ba se sa re tlaiša.

15-16. (a) Ke ka baka la’ng e le mo gobotse gore re botše ba bangwe seo re se dumelago? Nea mohlala. (b) Re ka diriša bjang mantšu a Paulo ao a lego go Baroma 1:16?

¹⁵ Botša batho ba moo o dulago gona gore o yo mongwe wa Dihlatse tša Jehofa. (Jes. 43:10) Ge yo mongwe a ka hlokofala ka gae, ba leloko le baagišani ba ka ferekana kudu ge o sa tšee karolo meetlong e itšego. Eupša go tla ba bonolo kudu go lebeletšana le boemo bjo ge e ba o be o šetše o ba hlaloseditše seo o se dumelago.  Francisco yo a dulago Mozambique o ngwadile gore: “Ge nna le mosadi wa ka Carolina re be re thoma go ithuta Beibele, re ile ra botša ba gabo rena gore re ka se sa rapela bahu. Bothata bo ile bja tšwelela ge sesi wa Carolina a hlokofala. Moetlo wa lefelong leo ke gore setopo se swanetše go hlapišwa nakong ya tirelo e itšego ya bodumedi. Ke moka motho yo mongwe yo a tswalanago kgauswi le mohu, o swanetše go fetša mašego a mararo a robala moo meetse ao setopo seo se hlapišitšwego ka wona a tšholotšwego gona. Meetlo ya mohuta wo e direlwa gore meoya ya bahu e robale ka khutšo. Ba gabo Carolina ba ile ba nyaka gore e be yena a robalago moo.”

¹⁶ Francisco le Carolina ba ile ba dira’ng? Francisco o re: “Ka ge re rata Jehofa e bile re nyaka go mo thabiša, re ile ra gana gore Carolina a robale moo. Ba gabo Carolina ba ile ba galefa kudu. Ba ile ba re ga re hlomphe bahu gomme ba re ba ka se sa hlwa ba re etela goba go re thuša. Ka ge re be re šetše re kile ra ba hlalosetša ditumelo tša rena, ga se ra ka ra boledišana le bona ka taba yeo ge ba be ba sa galefile. Ba bangwe ba leloko ba ile ba re lwela, ba bolela gore re be re šetše re kile ra ba hlalosetša seo re se dumelago. Ge nako e dutše e eya, ba gabo Carolina ba ile ba iša maswafo fase gomme ra kgona go kwana. E bile ba bangwe ba ile ba tla ntlong ya rena go tlo kgopela dikgatišo tšeo di theilwego Beibeleng.” Anke le ka mohla re se ke ra lewa ke dihlong tša go lwela therešo ya mabapi le lehu.—Bala Baroma 1:16.

17. Ke’ng seo se ka thušago motho go ba mogwera wa kgonthe go Mokristegotee le yena yo a hlokofaletšwego?

¹⁷ Ge Mokristegotee le rena a hlokofaletšwe, re swanetše go dira sohle seo re ka se kgonago go ba “mogwera wa kgonthe . . . , ngwanabo motho yo o ka ithekgago ka yena mohlang wa tlalelo.” (Die. 17:17) Motho a ka dira’ng gore e be “mogwera wa kgonthe,” kudukudu ge ngwanabo rena goba kgaetšedi yo a hlokofaletšwego a gapeletšwa go tšea karolo mekgweng yeo e sego ya Mangwalo? Ela hloko melao ya motheo e mebedi ya Beibele yeo e ka go thušago go homotša bao ba hlokofaletšwego.

18. Ke’ng seo se ilego sa dira gore Jesu a lle, gona re ka ithuta’ng mohlaleng wa gagwe?

¹⁸ ‘Lla le bao ba llago.’ (Baroma 12:15) Re ka no se tsebe gore re reng go motho yo a nyamilego  kudu ka ge a hlokofaletšwe. Le ge re sa tsebe gore re reng, ge motho yo a ka bona re lla o tla tseba gore re mo kwela bohloko. Ge mogwera wa Jesu e lego Latsaro a be a hwile, Maria, Mareta le ba bangwe ba ile ba llela ngwanabo bona yoo le mogwera wa bona. Ge Jesu a fihla ka morago ga matšatši a mane o ile “a ntšha megokgo,” le ge a be a tseba gore o kgauswi le go tlo tsoša Latsaro bahung. (Joh. 11:17, 33-35) Taba ya gore Jesu o ile a lla e be e bontšha kamoo Jehofa a bego a ikwa ka gona ka lehu la Latsaro. Le gona seo se ile sa bontšha gore Jesu o be a rata lapa leo, gomme sa homotša Maria le Mareta. Ka mo go swanago, ge bana babo rena ba bona gore re a ba rata e bile re tshwenyegile ka bona, ba a tseba gore ga ba noši eupša ba na le bagwera bao ba nago le taba le bona le bao ba ba thekgago.

19. Re ka diriša bjang Mmoledi 3:7 ge re homotša Mokristegotee le rena yo a hlokofaletšwego?

¹⁹ “Nako ya go homola le nako ya go bolela.” (Mmo. 3:7) Tsela e nngwe yeo re ka homotšago Mokristegotee le rena yo a hlokofaletšwego, ke ka go mo fa tsebe. Mo dumelele gore a bolele kamoo a ikwago ka gona, gomme o se ke wa kgopišega ge a bolela ‘mantšu a bošilo.’ (Jobo 6:2, 3) A ka ba a gateletšegile kudu ka baka la ge ba leloko bao e sego Bakriste ba mo gapeletša go dira dilo tše itšego. Ka gona, rapela le yena. Kgopela “Mokwi wa thapelo” gore a mo nee matla le go mo thuša gore a hlaphogelwe monaganong. (Ps. 65:2) Ge e ba maemo a dumela, bala Beibele le yena. Goba bala sehlogo se itšego ka dikgatišong tša rena, se bjalo ka kanegelo ya bophelo ya motho yo a itšego yeo e kgothatšago.

20. Re tlo bolela ka’ng sehlogong se se latelago?

²⁰ Ruri re thaba kudu go tseba therešo mabapi le bahu le go tseba gore bao ba lego mabitleng ba tlo tsošwa! (Joh. 5:28, 29) Ka gona anke ka mantšu a rena le ditiro re lwele ka sebete therešo ya Beibele gomme re e botše ba bangwe nako e nngwe le e nngwe ge sebaka se bulega. Sehlogong se se latelago re tlo bolela ka tsela e nngwe yeo Sathane a e dirišago gore batho ba se tsebe therešo ya Beibele. Re tlo bona gore ke ka baka la eng re swanetše go phema mekgwa le boithabišo bjo bo sepedišanago le molaba wa botemona.