1. O dira’ng gore o gwerane le motho yo a itšego?

GANTŠI selo sa pele seo motho a se dirago gore a gwerane le motho yo mongwe, ke go fetša nako ba le mmogo. Ge le dutše le boledišana, le botšana ka tša bophelo, le thoma go ba bagwera. Eupša ka dinako tše dingwe ga go bonolo gore re be bagwera ba Jesu. Ke dilo dife tšeo di dirago gore go se be bonolo?

2. Selo sa pele seo se dirago gore go se be bonolo go gwerana le Jesu, ke sefe?

² Selo sa pele seo se dirago gore go be thata go ba bagwera ba Jesu ke gore, ga se ra ka ra mmona. Bakriste ba bantši bao ba phetšego mehleng ya baapostola, le bona ga se ba ka ba bona Jesu. Eupša moapostola Petro o itše: “Le ge le sa ka la mmona, fela le a mo rata. Le ge le sa mmone ga bjale, fela le bontšha tumelo go yena.” (1 Pet. 1:8) Ka gona, go a kgonega gore re be bagwera ba bagolo ba Jesu le ge re se ra ka ra mmona.

3. Selo sa bobedi seo se dirago gore go be thata go ba bagwera ba Jesu, ke sefe?

³ Selo sa bobedi seo se dirago go be thata gore re be bagwera ba Jesu ke gore ga re kgone go boledišana le yena. Ge re rapela, re bolela le Jehofa. Ke nnete gore ge re rapela re diriša leina la Jesu, eupša ga re rapele yena. Ge e le gabotse, Jesu ga  a nyake gore re mo rapele. Ka baka la’ng? Ke ka gobane go rapela ke karolo ya go hlankela Modimo, e bile Modimo o nyaka gore re hlankele yena feela. (Mat. 4:10) Eupša go na le ditsela tšeo re ka bontšhago ka tšona gore re rata Jesu.

4. Selo sa boraro seo se dirago gore go be thata gore re be bagwera ba Jesu ke sefe, gona re tlo ithuta’ng sehlogong se?

⁴ Selo sa boraro seo se dirago gore go be thata gore re be bagwera ba Jesu ke gore o dula legodimong, ka gona, re ka se kgone go phela le yena. Le ge re sa phele le Jesu, go a kgonega gore re tsebe dilo tše dintši ka yena. Sehlogong se, re tlo ithuta ka dilo tše nne tšeo di tlago go re thuša gore re be bagwera ba bagolo ba Jesu. Eupša a re thomeng pele ka go boledišana ka gore ke ka baka la eng go le bohlokwa gore re be bagwera ba bagolo ba Jesu.

5. Ke ka baka la’ng re swanetše go ba bagwera ba Jesu? (Bona le lepokisi leo le rego, “ Go ba Bagwera ba Jesu go re Thuša go ba Bagwera ba Jehofa,” le leo le rego, “ Re se ke ra Rata Jesu go Feta Jehofa.”)

⁵ Re swanetše go ba bagwera ba Jesu, ge e ba re nyaka go ba le segwera se sebotse le Jehofa. Ka baka la’ng? Nagana ka mabaka a a mabedi. Sa pele, Jesu o ile a botša barutiwa ba gagwe gore: “Tate ka noši o a le rata ka ge lena le nthatile.” (Joh. 16:27) Le gona o ile a re: “Ga go yo a tlago go Tate ge e se ka nna.” (Joh. 14:6) Go nyaka go ba bagwera ba Jehofa mola re se bagwera ba Jesu, go no swana le go nyaka go tsena ka ntlong re sa diriše mojako. Jesu o ile a diriša papišo e swanago ge a be a re ke yena “mojako wa dinku.” (Joh. 10:7) Sa bobedi, Jesu o ile a ekiša dika tša Tatagwe ka mo go feletšego. O ile a botša barutiwa ba gagwe gore: “Yo a bonego nna o bone le Tate.” (Joh. 14:9) Ka gona, tsela e bohlokwa  ya gore re tsebe Jehofa, ke ka go ithuta ka bophelo bja Jesu. Ge re dutše re ithuta ka Jesu, re tlo mo rata le go feta. Le gona ge re rata Jesu, re tlo rata Jehofa le go feta.

6. Lebaka le lengwe la gore re be bagwera ba Jesu ke lefe? Hlalosa.

⁶ E le gore Modimo a tle a arabe dithapelo tša rena, re swanetše go ba bagwera ba Jesu. Se se ra gore mafelelong a dithapelo tša rena ga se ra swanela go no phetha molao ka go bolela mantšu ao a rego, “ka leina la Jesu.” Re swanetše go kwešiša kamoo Jehofa a dirišago Jesu go araba dithapelo tša rena. Jesu o ile a botša baapostola ba gagwe gore: “Selo le ge e le sefe seo le se kgopelago ka leina la ka ke tla se dira.” (Joh. 14:13) Le ge Jehofa e le yena a theetšago dithapelo tša rena le go di araba, o neile Jesu matla a gore a dire dilo tšeo a nyakago di dirwa. (Mat. 28:18) Ka gona, pele Jehofa a ka araba dithapelo tša rena, o lebelela pele ge e ba re dirile seo Jesu a rilego re se dire. Ka mohlala, Jesu o itše: “Ge e ba le lebalela batho dikarogo tša bona, Tatago lena wa legodimong le yena o tla le lebalela; anthe ge e ba le sa lebalele batho dikarogo tša bona, Tatago lena le yena a ka se le lebalele dikarogo tša lena.” (Mat. 6:14, 15) Ka gona, go bohlokwa gore re sware ba bangwe ka tsela e botse yeo Jehofa le Jesu ba re swarago ka yona.

7. Ke bomang bao ba holwago ka mo go feletšego ke sehlabelo sa Jesu?

⁷ Ke feela batho bao e lego bagwera ba Jesu bao ba tlago go holwa ka mo go feletšego ke sehlabelo sa gagwe. Re tseba bjang seo? Re tseba se ka gobane Jesu o itše o be a tla “[gafa] moya wa gagwe ka baka la bagwera ba gagwe.” (Joh. 15:13) Batho ba botegago bao ba phetšego pele Jesu a ka tla mo lefaseng, ba tlo swanelwa ke go ithuta ka yena le go ithuta go mo rata. Batho ba bjalo ka Aborahama, Sara, Moshe le Rahaba ba tlo tsošwa bahung, eupša le bona batho ba ba botegago, ba tlo swanelwa ke go ba bagwera ba Jesu gore ba tle ba hwetše bophelo bjo bo sa felego.—Joh. 17:3; Dit. 24:15; Baheb. 11:8-12, 24-26, 31.

8-9. Go ya ka Johane 15:4, 5, go ba bagwera ba Jesu go re thuša gore re kgone go dira modiro ofe, gona ke ka baka la’ng seo se le bohlokwa?

⁸ Re thabela go šoma le Jesu modirong wa go botša batho ditaba tše dibotse le go ba ruta. Ge Jesu a be a le mo lefaseng, e be e le morutiši. Re a tseba gore gona bjale Jesu o boetše legodimong, gomme ka ge e le hlogo ya phuthego ya Bokriste, o tšwela pele a eteletše pele modiro wa go bolela ditaba tše dibotse. Jesu o bona maiteko ao o a dirago a gore o thuše batho ba bantši kamoo o ka kgonago ka gona gore ba mo tsebe e bile ba tsebe le Tatagwe, le gona o leboga seo. Ge e le gabotse, re kgona go dira modiro wo feela ka gobane Jehofa le Jesu ba a re thuša.—Bala Johane 15:4, 5.

⁹ Beibele e re ruta gore ge e ba re nyaka go kgahliša Jehofa, re swanetše go rata Jesu e bile re dule re mo rata. Ga bjale a re ithuteng ka dilo tše nne tšeo re ka di dirago gore re be bagwera ba Jesu.

10. Selo sa pele seo re swanetšego go se dira gore re be bagwera ba Jesu ke sefe?

¹⁰ Sa pele, ithute ka Jesu. O ka dira se ka go bala puku ya Beibele ya Mateo, Mareka, Luka le ya Johane. Ge o dutše o naganišiša ka dipuku tšeo di bolelago ka bophelo bja Jesu, o tlo rata Jesu le go mo hlompha ka baka la tsela e botse yeo a bego a dirišana le batho ka yona. Ka mohlala, le ge e be e le Moetapele wa barutiwa ba gagwe, ga se a ka a ba swara bjalo ka makgoba. Go e na le moo, o ile a ba ntšhetša sa mafahleng. (Joh. 15:15) Ge ba be ba nyamile, Jesu o be a nyama le bona e bile a lla le  bona. (Joh. 11:32-36) Gaešita le manaba a Jesu a ile a bona gore bao ba bego ba amogela molaetša wa gagwe, ba be ba fetoga bagwera ba gagwe. (Mat. 11:19) Ge re ekiša tsela yeo Jesu a bego a dirišana le barutiwa ba gagwe ka yona, tsela yeo re swarago ba bangwe ka yona e a kaonefala, re thaba kudu e bile re rata Jesu le go mo hlompha kudu.

11. Selo sa bobedi seo re swanetšego go se dira gore re be bagwera ba Jesu ke sefe, gona ke ka baka la’ng selo seo se le bohlokwa?

¹¹ Sa bobedi, nagana ka tsela yeo Jesu a bego a nagana ka yona le go dira dilo ka yona. Ge e ba re dira dilo ka tsela yeo a bego a di dira ka yona, le go nagana ka tsela yeo a bego a nagana ka yona, re tla ba bagwera ba gagwe ba bagolo. (1 Bakor. 2:16) Re ka mo ekiša bjang? Nagana ka mohlala wo. Jesu o be a dula a naganne ka go thuša ba bangwe, go e na le go dira seo se mo kgahlago. (Mat. 20:28; Baroma 15:1-3) Ka ge a be a nagana ka tsela ye, o be a kgona go direla batho dilo tše dibotse, le go ba lebalela. O be a sa kgopišege gabonolo ge batho ba bolela dilo tše itšego ka yena. (Joh. 1:46, 47) Le gona ge motho a be a dirile phošo e itšego, Jesu o be a mo lebalela gomme bophelo bja tšwela pele. (1 Tim. 1:12-14) Go bohlokwa gore re ekiše Jesu ka gobane o itše: ‘Bohle ba tla tseba gore le barutiwa ba ka, ge e ba le ratana.’ (Joh. 13:35) Ipotšiše gore: “Na ke ekiša Jesu ka go dira sohle seo nka se kgonago gore ke dule ke na le khutšo le bana bešo le dikgaetšedi?”

12. Selo sa boraro seo re swanetšego go se dira gore re be bagwera ba Jesu ke sefe, gona re ka dira seo bjang?

¹² Sa boraro, thekga bana babo Jesu. Jesu o lebelela seo re se direlago bana babo ba batlotšwa, bjalo ka ge eka re se direla yena. (Mat. 25:34-40) Tsela e bohlokwa yeo ka yona re thekgago batlotšwa ke ka go dira modiro woo Jesu a re laetšego gore re o dire, wa go bolela ditaba tše dibotse le go dira batho barutiwa. (Mat. 28:19, 20; Dit. 10:42) Bana babo Kriste ba kgona go dira modiro o mogolo wa go bolela ditaba tše dibotse woo o dirwago gona bjale ka baka la thušo ya dinku tše dingwe. (Joh. 10:16) Ge e ba o se motlotšwa, nako e nngwe le e nngwe ge o bolela ditaba tše dibotse o bontšha gore o rata Jesu e bile o rata le batlotšwa.

13. Re ka diriša bjang keletšo ya Jesu yeo e lego go Luka 16:9?

¹³ Re bontšha gore re bagwera ba Jehofa le Jesu ka go thekga modiro woo ba o eteletšego pele. (Bala Luka 16:9.) Ka mohlala, re ka ntšha moneelo wa go thekga modiro wa rena wo o dirwago lefaseng ka moka. Le gona, meneelo ye re e ntšhago e thuša gore ditaba tše dibotse di bolelwe mafelong a kgole, le go hlokomela Diholo tša Mmušo le meago e mengwe ya mokgatlo, le go thuša bao ba wetšwego ke dikotsi tše šoro. Le gona re ka thuša phuthego ya gabo rena ka go ntšha meneelo gore e kgone go patela ditshenyagalelo, gotee le go thuša ba bangwe bao re tsebago gore ba hloka thušo. (Die. 19:17) Tše ke ditsela tšeo ka tšona re ka thekgago bana babo Kriste.

14. Go ya ka Baefeso 4:15, 16, selo sa bone seo re swanetšego go se dira gore re be bagwera ba Jesu ke sefe?

¹⁴ Sa bone, thekga mokgatlo wa Jehofa. Re ba bagwera ba bagolo ba Jesu, yoo e lego hlogo ya phuthego, ge e ba re dirišana le bao a ba kgethilego go re etelela pele. (Bala Baefeso 4:15, 16.) Ka mohlala, gona bjale mokgatlo o nyaka gore Diholo tša Mmušo di dirišwe ka mo go feletšego. E le gore se se kgonege, diphuthego tše dingwe di kopantšwe, gomme ditšhemo tša fetošwa. Se se dirile gore meneelo e dirišwe ka tsela e botse kudu. Ka baka leo, bagoeledi ba bangwe ba ile ba swanelwa ke gore ba tlwaelane le maemo a mafsa. Bagoeledi bao ba botegago, ba ka ba ba ile ba kopanela  le phuthego e itšego ka mengwaga e mentši gomme ba tlwaelane le bana babo rena ba moo. Eupša ga bjale mokgatlo o ba kgopetše gore ba ye phuthegong e nngwe. Ruri Jesu o a thaba ge a bona bana babo rena ba ba botegago, ba thekga thulaganyo ye ya mokgatlo! 

15. Segwera sa rena le Jesu se tlo kaonefala bjang nakong e tlago?

¹⁵ Batlotšwa ba na le kholofelo ya go tlo ba le Jesu ka mo go sa felego, e le bajabohwa ba Mmušo wa Modimo. Ba tlo ba le Jesu, ba mmona, ba boledišana le yena e bile ba phela le yena. (Joh. 14:2, 3) Bao ba nago le kholofelo ya go tlo phela mo lefaseng, le bona Jesu o tlo ba rata le go ba hlokomela. Le ge bona ba ka se kgone go bona Jesu, segwera sa bona le yena se tla kaonefala ge Jesu le Modimo ba tla be ba ba direla dilo tšeo ba ba tshepišitšego tšona.—Jes. 9:6, 7.

16. Go ba bagwera ba Jesu go re hola bjang?

¹⁶ Go ba bagwera ba Jesu go dira gore re hwetše ditšhegofatšo tše dintši. Ka mohlala, gona bjale Jesu o a re rata e bile o a re thekga. Re na le kholofelo ya go tlo phela ka mo go sa felego. E bile segwera sa rena le Jesu se tla dira gore re hwetše selo se sengwe sa bohlokwahlokwa, e lego go ba bagwera ba Jehofa. Ruri ke tokelo e kgolo go ba bagwera ba Jesu!