Ke ka baka la’ng pele ga ge Jesu a ka hwa a ile a bolela mantšu a Dafida ao a lego go Psalme 22:1?

A mangwe a mantšu a mafelelo ao Jesu a ilego a a bolela pele ga ge a ka hwa ke ao a lego go Mateo 27:46 ao a rego: “Modimo wa ka, Modimo wa ka, o ntlogeletše’ng?” Jesu o boletše se go phethagatša mantšu a mopsalme Dafida ao a lego go Psalme 22:1. (Mar. 15:34) E tla ba phošo go phetha ka gore Jesu o boletše mantšu a ka gobane a nyamišitšwe ke Jehofa goba a be a se sa na tumelo ka nako yeo. Jesu o be a tseba gabotse gore ke ka baka la eng a be a swanetše go hwa, e bile o be a ikemišeditše go hwa. (Mat. 16:21; 20:28) O be a tseba le gore ka nako ya ge a tla be a bolawa, Jehofa o be a ka se mo šireletše. (Jobo 1:10) Jehofa o ile a se sa šireletša Jesu, gore Jesu a kgone go bontšha gore go a kgonega go dula a botega le ge a be a tlo bolawa ga sehlogo.—Mar. 14:35, 36.

Ke ka baka la’ng Jesu a ile a bolela mantšu ao a lego mo psalmeng ye? Le ge re sa kgodišege, a re boleleng ka a mangwe a mabaka ao a ka bego a dirile gore a bolele mantšu ao. *

Na Jesu ge a be a bolela mantšu a o be a gatelela taba ya gore Jehofa o be a ka se mo thuše ge a bolawa? Jesu o be a swanetše go neela bophelo bja gagwe e le sehlabelo sa topollo ntle le thušo ya Jehofa. O be a swanetše go hwa gore “a hwele motho yo mongwe le yo mongwe.”—Baheb. 2:9.

Ge Jesu a be a bolela mantšu a sego kae a psalme ye, na o be a nyaka gore ba bangwe ba  nagane ka psalme ye ka moka? Ka nako yeo go be go tlwaelegile gore Bajuda ba tsebe dipsalme tše dintši ka hlogo. Ge motho a be a ekwa temana e itšego ya psalme e be e mo gopotša ditemana tše dingwe tša yona psalme yeo. Ge e ba Jesu a be a nyaka gore Bajuda ba gopole ka ditemana tše dingwe, gona o be a tla be a ba thušitše gore ba gopole diporofeto tše dingwe tše dintši tšeo di lego gona ka psalmeng ye tše di bolelago ka dilo tšeo di bego di tla direga nakong ya ge a be a bolawa. (Ps. 22:7, 8, 15, 16, 18, 24) Ditemana tša mafelelo tša psalme yeo di tumiša Jehofa e bile di mo hlalosa e le kgoši ya lefase ka moka.—Ps. 22:27-31.

Na Jesu o be a bontšha gore ga a na molato ge a be a bolela mantšu a a Dafida? Pele ga ge Jesu a ka bolawa, o ile a sekišwa ke moka a bewa molato wa gore o rogile Modimo. (Mat. 26:65, 66) Lekgotla la Sanhedrine le ile la kopana kapejana bošego ke moka la mo sekiša ka tsela e sego molaong. (Mat. 26:59; Mar. 14:56-59) Ge Jesu a be a botšiša gore: “Modimo wa ka, Modimo wa ka, o ntlogeletše’ng?” a ka be a be a bontšha gore ga a na molato e bile ga go na lebaka la gore a bolawe.

Na Jesu o be a gopotša ba bangwe gore le yena Modimo o sa mo amogela? Le ge Modimo a ile a dumelela Dafida a tlaišega, seo se be se sa re gore Modimo ga a sa amogela Dafida. Potšišo ya Dafida e be e sa re gore ga a sa na tumelo go Modimo. Ka morago ga gore a botšiše potšišo ye, o ile a bolela gore o be a tshepa gore Jehofa o tla phološa batho ba gagwe e bile Jehofa o ile a tšwela pele a mo šegofatša. (Ps. 22:23, 24, 27) Ka mo go swanago, le ge Jesu “Morwa wa Dafida” a ile a tlaišwa koteng ya tlhokofatšo, seo se be se sa re gore Jehofa ga a sa mo amogela.—Mat. 21:9.

Na Jesu ge a be a bolela mantšu a o be a bontšha gore o kwa bohloko ka gore Jehofa o ile a tlogela go mo šireletša ka nakwana gore a kgone go bontšha gore o botegela Jehofa? Mathomong e be e se morero wa Jehofa gore Morwa wa gagwe a tle a tlaišwe le go bolawa. Sehlabelo sa Jesu sa topollo se ile sa hlokagala feela ka morago ga gore Adama le Efa ba se kwe Modimo. Jesu o be a se na molato. O ile a swanelwa ke go tlaišwa le go bolawa gore go arabje dipotšišo tšeo Sathane a dirilego gore batho ba ipotšiše tšona. Le gona, o be a swanetše go neela bophelo bja gagwe e le sehlabelo sa topollo gore batho ba tle ba kgone go hwetša dilo ka moka tšeo Adama a bego a dirile gore ba se ke ba di hwetša. (Mar. 8:31; 1 Pet. 2:21-24) Se se ile sa kgonega feela ka gobane Jehofa a ile a tlogela go šireletša Jesu ka nakwana. E be e le la mathomo Jehofa a dira seo.

Na Jesu o be a leka go thuša balatedi ba gagwe go nagana gore ke ka baka la eng Jehofa a ile a dumelela gore a bolawe ka tsela ye? * Jesu o be a tseba gore tsela yeo a bego a tla bolawa ka yona koteng ya tlhokofatšo le go latofatšwa gore ke yena sesenyi e be e tla kgopiša batho ba bantši. (1 Bakor. 1:23) Ge balatedi ba gagwe ba be ba ka kwešiša gore ke ka baka la eng a be a bolawa, ba be ba tla bona bohlokwa bja lehu la gagwe. (Bagal. 3:13, 14) Ba be ba tla tseba gore ke Mophološi wa bona e sego sesenyi.

Go sa šetšwe gore ke ka baka la eng Jesu a ile a bolela mantšu ao, o be a tseba gore o dira thato ya Jehofa ka go hwela koteng ya tlhokofatšo. Ka moragonyana ga gore Jesu a bolele mantšu ao a lego psalmeng yeo, o ile a re: “Go phethegile!” (Joh. 19:30; Luka 22:37) Taba ya gore Jehofa o ile a tlogela go šireletša Jesu ka nakwana, e ile ya mo dira gore a kgone go dira dilo ka moka tšeo Jehofa a bego a mo rometše mo lefaseng gore a tle a di dire. E ile ya dira le gore a kgone go phetha dilo ka moka tšeo di bego di ngwadilwe ka yena “Molaong wa Moshe, mangwalong a Baporofeta le Dipsalmeng.”—Luka 24:44.