Re ka swantšha go tshwenyega le morwalo o boima. (Die. 12:25) Na o ile wa ikwa o tshwenyegile kudu e bile o se sa kgona go kgotlelela? Ge e ba go le bjalo ga o tee. Bontši bja rena re ka ba re lapile, re tshwenyegile e bile re gateletšegile monaganong ka mabaka a go se swane. Ka mohlala re ka ba re hlokomela batho babo rena bao ba babjago, re hlokofaletšwe ke batho bao re ba ratago goba re ile ra welwa ke dikotsi tša tlhago. Eupša re ka thušwa ke eng gore re kgotlelele ge re tshwenyegile? *

Mohlala wa Kgoši Dafida o ka re ruta dilo tše dintši gore re swanetše go kgotlelela bjang ge re tshwenyegile. O ile a lebeletšana le mathata a mantši bophelong bja gagwe moo ka dinako tše dingwe bophelo bja gagwe bo bego bo e ba kotsing. (1 Sam. 17:34, 35; 18:10, 11) Dafida o thušitšwe ke eng go kgotlelela le ge a be a tshwenyegile? Rena re ka mo ekiša bjang?

Dafida o ile a ba le mathata a mantši ka nako e tee. Ka mohlala, nagana ka seo se ilego sa mo diragalela ge a be a tšhabela Kgoši Saulo yo a bego a nyaka go mmolaya. Ge Dafida le banna bao a bego a sepela le bona ba boa ntweng, ba ile ba hwetša gore manaba a bona a utswitše dilo tša bona, a fiša dintlo tša bona a ba a thopa le malapa a bona. Dafida o ile a ikwa bjang? “Dafida le batho bao ba bego ba na le yena ba kgitla sello go fihlela ba se sa kgona go lla.” Dafida o ile a tshwenyega le go feta ge banna bao a bego a sepela le bona ba be ba nyaka “go mo kgatla ka maswika.” (1 Sam. 30:1-6) Dafida o be lebeletšane le mathata a mararo ka nako e tee. Lapa la gagwe le be le le kotsing, banna bao a bego a sepela le bona ba be ba nyaka go mmolaya le Kgoši Saulo o be a sa mo rakediša. Se se ile sa dira gore Dafida a tshwenyege kudu.

Dafida o ile a dira’ng? O ile a “imatlafatša ka Jehofa Modimo wa gagwe.” Dafida o ile a dira seo bjang? O ile a rapela Jehofa gore a mo thuše go no swana le ge a ile a mo thuša peleng. (1 Sam. 17:37; Ps. 18:2, 6) Dafida o be a tseba gore o swanetše go botšiša Jehofa gore a dire eng, ka gona o ile a kgopela moperisita Abiathara gore a mo “tlišetše efoda” gore a kwe Jehofa gore o re a dire eng. * Ka morago ga gore Dafida a kwe Jehofa gore o re a dire eng o ile a dira sona seo. Jehofa o ile a šegofatša Dafida le banna bao a bego a sepela le bona gomme ba lata malapa a bona le dilo tša bona tšeo di bego di thopilwe. (1 Sam. 30:7-9, 18, 19) Na o bone dilo tše tharo tšeo Dafida a di dirilego? O ile a rapela Jehofa gore a mo thuše, a nagana ka dilo tšeo Jehofa a mo diretšego tšona gomme a dira seo Jehofa a mo laelago sona. Re ka ekiša Dafida bjang? A re boledišaneng ka ditsela tše tharo.

1. Rapela. Nako le nako ge re ikwa re tshwenyegile re ka rapela Jehofa gore a re thuše le go re fa bohlale. Thapelo e ka re thuša go ikwa re le kaone ge re botša Jehofa ka mathata a rena. Ge e ba maemo a gago a sa go dumelele gore o rapele ka lentšu, o ka rapela thapelo e kopana ka pelong. Ge re dula re nyaka thušo go Jehofa, re bontšha gore re mo tshepa go swana le Dafida yo a ilego a re: “Jehofa ke leswika la ka le legolo, sebo sa ka le Mohlakodiši wa ka. Modimo wa ka ke leswika  la ka. Ke tla tšhabela go yena.” (Ps. 18:2) Na thapelo e ya šoma? Kgaetšedi wa mmulamadibogo yo a bitšwago Kahlia o re: “Ka morago ga go rapela ke ile ka kwa ke na le khutšo. Thapelo e nthuša gore ke tshepe Jehofa e bile ke nagane go swana le yena.” Ke nnete gore thapelo ke mpho e botse e tšwago go Jehofa yeo e re thušago go kgotlelela ge re tshwenyegile.

2. Nagana kamoo Jehofa a ilego a go thuša ka gona nakong e fetilego. Ge o nagana ka seo se ilego sa direga bophelong bja gago, na o kgona go nagana ka mathata ao Jehofa a ilego a go thuša gore o a kgotlele? Ge re naganišiša ka tsela yeo Jehofa a ilego a re thuša ka gona le go thuša bahlanka ba gagwe ba peleng, re ba le khutšo le go tshepa gore o sa tlo re thuša. (Ps. 18:17-19) Mogolo yo a bitšwago Joshua o re: “Jehofa o arabile dithapelo tše dintši tša ka. Seo se nthušitše go gopola dinako tšeo ke bego ke kgopela selo se itšego gomme a nnea sona selo seo.” Ge re naganišiša ka dinako ka moka tšeo Jehofa a re thušitšego ka tšona nakong e fetilego re ba le matla a go kgotlelela.

3. Diriša seo o ithutago sona. Pele re ka dira phetho e itšego re swanetše go thoma pele ka go bala Lentšu la Modimo go bona gore re ka dira eng. (Ps. 19:7, 11) Batho ba bantši ba hweditše gore ge ba nyakišiša temana e itšego ya Beibele ba kgona go bona gore ba ka e diriša bjang maphelong a bona. Mogolo yo a bitšwago Jarrod o re: “Ge ke dira nyakišišo ka temana e itšego ke kgona go bona gore ge e le gabotse e bolela ka eng le gore Jehofa o nyaka go mpotša eng. Se se nthuša gore ke dumele seo ke ithutago sona e bile ke se diriše.” Ge re nyaka tlhahlo ya Jehofa ka Lentšung la Modimo e bile re diriša seo re ithutago sona, go tlo ba bonolo gore re thabe, le go ba khutšo le ge re tshwenyegile.

Dafida o be a kwešiša gabotse gore o hloka thušo ya Jehofa e le gore a kgone go kgotlelela ge a tshwenyega. O be a leboga gore Jehofa o a mo thuša mo a ilego a re: “Ka thušo ya Modimo wa ka nka kgona go namela morako. Modimo wa therešo ke yena a ntlhamago ka matla.” (Ps. 18:29, 32) Re ka kwa okare re ka se kgone go kgotlelela mathata a rena. Eupša ge Jehofa a re thuša re ka kgona go kgotlelela bothata bjo bongwe le bjo bongwe. Ge re rapela Jehofa gore a re thuše, ra nagana ka dilo tšeo a šetšego a re diretše tšona, ra ba ra diriša seo a re botšago sona re ka tshepa gore o tlo re fa matla le bohlale bja go kgotlela ge re tshwenyegile.