1-2. (a) Yunise e be e le mang, gona ke mathata afe ao a ilego a kopana le ona ge a be a ruta morwa wa gagwe ka Jehofa le Jesu? (b) Hlalosa seswantšho sa letlakala la ka ntle.

 LE GE Beibele e sa re botse ka kolobetso ya Timotheo, eupša re ka nagana gore mmagwe o be a thabile bjang ka letšatši leo. (Die. 23:25) Nagana gore o be a thabile bjang ge morwa wa gagwe a eme ke meetseng. O a semaela gomme makgolo wa Timotheo o eme kgauswi le yena o mo gokaretše. O gogela moya ka gare ge Timotheo a inwa ka meetseng. Ge a boa a semaela, mmagwe o ntšha megokgo ya lethabo. Yunise o ile a ruta morwa wa gagwe go rata Jehofa le Morwa wa gagwe Jesu Kriste le ge go be go le thata. O ile a kopana le mathata afe ge a be a leka go ruta morwa wa gagwe?

² Batswadi ba Timotheo ba be ba se bodumeding bjo tee. Tatagwe e be e le Mogerika gomme makgolo wa gagwe le mmagwe e be e le Bajuda. (Dit. 16:1) Go ka direga gore Timotheo e be e sa le mofsa ge Yunise le Loisa e e ba Bakriste. Eupša tatagwe ga se a ka a fetoga go ba Mokriste. Timotheo o be a tla kgetha bodumedi bo fe? O be a godile ka mo go lekanego gore a ka kgona go itirela phetho. Na o be a tla kgetha bodumedi bja tatagwe? Na o be a tla latela meetlo ya Sejuda yeo a e rutilwego go tloga e sa le ngwana? Goba na e be e tla ba molatedi wa Jesu Kriste?

3. Go ya ka Diema 1:8, 9, Jehofa o lebelela bjang mošomo wo bomma ba o dirago wa go thuša bana ba bona gore e be bagwera ba gagwe?

³ Bomma ba bantši ba Bakriste ba rata malapa a bona go swana le Yunise. Ba nyaka go thuša bana ba bona gore ba be  le segwera sa kgauswi le Jehofa. Modimo wa rena o tloga a tšeela maiteko ao a bona godimo. (Bala Diema 1:8, 9.) Jehofa o thušitše bomma ba bantši gore ba thuše bana ba bona gore ba mo rate le go mo hlankela.

4. Ke mathata afe ao bomma ba kopanago le ona lehono?

⁴ Ke ga tlhago gore bomma ba ipotšiše ge e ba bana ba bona ba tla hlankela Jehofa go swana le ge Timotheo a dirile. Batswadi ba a tseba gore lefase le la Sathane le bea bana ba bona ka tlase ga kgatelelo. (1 Pet. 5:8) Bomma ba bantši ba godiša bana ba nnoši goba o hwetša molekane wa bona e se Hlatse ya Jehofa. Ka mohlala, kgaetšedi yo mongwe yo a bitšwago Christine * o re: “Molekane wa ka e be e le tate wa go loka e bile a rata lapa la gagwe, eupša o be a sa ntumelele gore ke godiše bana ba rena gore e tle e be Dihlatse tša Jehofa. Ke be ke dula ke lla le go ipotšiša ge e ba ka letšatši le lengwe bana ba ka ba tla kgona go hlankela Jehofa.”

5. Re tlo ithuta ka’ng sehlogong se?

⁵ Bjalo ka mma wa Mokriste, o ka kgona thuša bana ba gago go rata Jehofa le go mo hlankela go swana le Yunise. Mo sehlogong se re tlo ithuta gore o ka ekiša mohlala wa gagwe ge o ruta bana ba gago ka seo o se bolelago le seo o se dirago. Re tlo bona le gore Jehofa a ka go thuša bjang.

6. Go ya ka 2 Timotheo 3:14, 15, ke eng seo se dirilego gore Timotheo e be Mokriste?

⁶ Ge Timotheo e be e sa le mošemanyana, mmagwe o ile a šoma ka thata gore a mo rute “mangwalo a makgethwa” go ya kamoo Bajuda ba bego ba a kwešiša ka gona. Ke nnete gore Yunise o be a sa tsebe selo ka Jesu Kriste. Le ga go le bjalo, seo Timotheo a ithutilego sona go tšwa mangwalong se ile sa mo thuša gore e be Mokriste. Eupša na o be a tla kgetha go ba Mokriste? Timotheo o be a ka kgetha ge e ba a tla ba Mokriste goba aowa. Go molaleng gore Timotheo o ile a ‘kgodišwa gore a dumele’ therešo ka Jesu ka baka la maiteko ao mmagwe a a dirilego. (Bala 2 Timotheo 3:14, 15.) Yunise o ile a thaba kudu gore o ile a kgona go ruta morwa wa gagwe ka Jehofa le ge go be go le thata go dira bjalo. Yunise o ile a phelela leina la gagwe leo le tšwago lentšung leo le bolelago gore “mofenyi.”

7. Yunise o be tla ruta bjang morwa wa gagwe gore e be Mokriste yo mokaone ka morago ga gore a kolobetšwe?

⁷ Ge Timotheo a be a kolobetšwa o be a fihleletše pakane e kgolo bophelong bja gagwe. Eupša Yunise o be a sa na le dipotšišo tšeo a bego a ipotšiša tšona. Na morwa wa gagwe o be a tlo phela bjang? Na o be a tla ba le bagwera ba babe? Na o be a tla ya sekolong kua Athene gomme a amogela dithuto tša difilosofi tša boheitene? Na o tla senya matla a gagwe, bofsa bja gagwe le nako ya gagwe a kitimiša mahumo? Yunise o be a ka se tšeele Timotheo diphetho eupša o be a tla mo thuša gore a dire diphetho tše bohlale. Bjang? O be a ka tšwelapele a ruta morwa wa gagwe gore a rate Jehofa ka mo go tseneletšego le go leboga seo Jesu a ba diretšego sona. Bomma bao balekane ba bona e sego Dihlatse tša Jehofa, ga se bona fela ba kopanago le mathata ge ba ruta bana ba bona gore ba rate Jehofa. Le ge batswadi ka bobedi e le Dihlatse tša Jehofa, go ka ba boima gore ba rute bana ba bona gore ba rate Jehofa. Batswadi ba ithuta eng mohlaleng wa Yunise?

8. Mma a ka thuša bjang molekane wa gagwe yo e lego Hlatse go ruta bana ba bona ka Jehofa?

 ⁸ Ithute Beibele le bana ba gago. Dikgaetšedi, ge e ba molekane wa gago e le yo mongwe wa Dihlatse tša Jehofa, mo thuše go ruta bana ba lena ka Jehofa. O ka dira seo ka go thekga thulaganyo ya borapedi bja lapa. Bolela dilo tše dibotse ka borapedi bja lapa gomme o nagane le ka dilo tšeo le ka di dirago gore le bo thabele. Mohlomongwe o ka thuša molekane wa gago go beakanya dilo tšeo le ka ithutago ka tšona thutong ya Beibele. Go oketša moo, ge e ba bana ba gago ba ka holwa ke thuto ya motho ka noši ba diriša puku ya Thabela Bophelo go ya go Ile! mohlomongwe o ka šoma le molekane wa gago go ba nea thušo yeo ba e hlokago.

9. Mma yo molekane wa gagwe e sego Hlatse ya Jehofa a ka hwetša kae thušo?

⁹ Bomma ba bangwe ba gapeletšega go etelela pele go ithuta Beibele le bana ba bona, mohlomongwe ka gobane ba godiša bana ba nnoši goba balekane ba bona ga se Dihlatse tša Jehofa. Ge e ba go le bjalo ka lapeng la gago o se ke wa tshwenyega kudu. Jehofa o tlo go thuša. Diriša dithulusi tšeo Jehofa a go neilego tšona a diriša mokgatlo wa gagwe go ithuta le bana ba gago. O ka boledišana le batswadi bao ba nago le phihlelo gomme wa kwa gore ba diriša bjang dithulusi tšeo borapeding bja bona bja lapa. * (Die. 11:14) Jehofa a ka go thuša le gore o kgone go boledišana le bana ba gago. Rapela Jehofa, o mo kgopele gore a go thuše gore o kgone go botšiša bana ba gago dipotšišo tšeo di tla ba thušago gore ba bo go botše gore ba nagana eng le gore ba ikwa bjang. (Die. 20:5) Potšišo ya go swana le gore, ‘Ke mathata afe ao o kopanago le ona sekolong?’ e ka le thuša gore le be poledišano e kaonekaone.

10. Ke’ng se sengwe seo o ka se dirago go thuša bana ba gago gore ba ithute ka Jehofa?

¹⁰ Diriša ditsela tše di sa swanego go ruta bana ba gago ka Jehofa. Bolela ka Jehofa le dilo tše dibotse tšeo a go diretšego tšona. (Doit. 6:6, 7; Jes. 63:7) Se e tloga e le sa bohlokwa kudu ge e ba o sa kgone go ithuta Beible le bana ba gago ka mehla. Christine, yo re boletšego ka yena pejana o re: “Ke be ke se na dibaka tše dintši kudu tša go boledišana le bana ba ka ka Jehofa, ka gona ke diriša nakonyana e nngwe le e nngwe yeo ke e hwetšago go dira bjalo. Nakong ya ge re itšhudolla, re kgona go lebelela tlhago ke moka ra bolela ka dilo tša moya tšeo di ka ba thušago gore e be bagwera ba Jehofa. Ge ba dutše ba gola ke ile ka ba kgothaletša gore ba ithute Beibele ka noši.” Go oketša moo, bolela dilo tše dibotse ka mokgatlo wa Jehofa le ka bana beno le dikgaetšedi. O se ke wa bolela gampe ka bagolo. Ge e ba o bolela dilo tše dibotse ka bagolo, bana ba gago ba tlo kgona go ya go bona ge ba nyaka thušo.

11. Go ya ka Jakobo 3:18, ke ka baka la’ng re swanetše go dira gore go be le khutšo ka lapeng?

¹¹ Dira gore go be le khutšo ka lapeng. Dula o bontšha molekane wa gago le bana ba gago gore o a ba rata. Bolela ka molekane wa gago gabotse le ka tsela e hlomphegago gomme o tlwaetše le bana ba gago go dira bjalo. Ge o dira bjalo go tlo ba bonolo go thuša bana ba gago gore ba ithute ka Jehofa. (Bala Jakobo 3:18.) Nagana ka mohlala wa Jozsef yo a hlankelago e le mmulamadibogo yo a kgethegilego kua Romania. Ge a sa gola, tatagwe o be a ba šitiša go hlankela Jehofa.  Jozsef o re: “Mma o be kgonthišetša gore ka gae go dula go na le khutšo. Ge tate a galefa, ke mo mma yena a bego a bontšha botho. Ge mma a lemoga gore re be re thatafalelwa ke go hlompha tate le go mo kwa, o be a re balela Baefeso 6:1-3. Ke moka o be a re botša ka dika tše dibotse tša tate le go re thuša gore re mo kwešiše le gore re swanetše go mo hlompha. Seo se be se thuša gore go be le khutšo ka gae.”

12. Go ya ka 2 Timotheo 1:5, mohlala wa Yunise o thušitše Timotheo bjang?

¹² Bala 2 Timotheo 1:5. Yunise o ile a beela Timotheo mohlala o mobotse. A ka no ba a ile a mo ruta gore tumelo ya nnete re e bona ka mediro. (Jak. 2:26) Timotheo o ile a bona gore dilo tšeo mmagwe a bego a di dira, di be di šušumetšwa ke gore o rata Jehofa. O ile a bona gore mmagwe o be a thabišwa ke go hlankela Jehofa. Mohlala wa Yunise o ile wa kgoma bjang Timotheo? Moapostola Paulo o boletše gore Timotheo o be a na le tumelo e tiilego go swana le ya mmagwe. Tumelo ya Timotheo ga se ya no itlela. O be a bone mohlala wa mmagwe gomme a o ekiša. Ka mo go swanago bomma ba bantši ba Bakriste ba thušitše ba malapa a bona gore ba hlankele Jehofa ntle le gore “go bolelwe lentšu.” (1 Pet. 3:1, 2) Le wena o ka kgona go dira seo se swanago. Bjang?

13. Ke ka baka la’ng mma a swanetše go dira gore segwera sa gagwe le Jehofa e be selo seo se tlago pele bophelong?

¹³ Dira gore segwera sa gago le Jehofa e be selo seo se tlago pele bophelong. (Doit. 6:5, 6) Go swana le bomma ba bantši, le wena o a ikgafa. O kgona go gafa nako ya gago, tšhelete goba dilo tšeo dingwe tše dintši gore o kgone go nea bana ba gago dilo tšeo ba di hlokago. Eupša ga se wa swanela go dumelela go dira dilo tšeo di go šitiša go ba le segwera le Jehofa. Dula o beela nako ka thoko ya gore o rapele, o ithute Beibele le gore o be gona dibokeng. Ge o dira bjalo, o tlo batamela kgauswi kudu le Jehofa e bile wa beela lapa la gago le batho ba bangwe mohlala o mobotse.

14-15. O ithuta eng mohlaleng wa Leanne, Maria, le João?

¹⁴ A re boneng mehlala ya bafsa bao bommago bona ba ilego ba ba thuša go rata Jehofa. Morwedi wa Christine e lego Leanne o re: “Re be re sa kgone go ithuta Beibele ge tate a be a le gona ka gae. Eupša mma o be a dula a e ba gona dibokeng. Le ge re be re sa tsebe Beibele gabotse, mohlala wa gagwe o re thušitše gore re be le tumelo e tiilego. Re be re tseba gore Dihlatse tša Jehofa di ruta nnete pele re ka ya dibokeng.”

¹⁵ Maria yo tatagwe ka dinako tše dingwe a bego a tlaiša lapa la gagwe ka baka la go ya dibokeng, o re: “Mma ke yo mongwe wa dikgaetšedi tša go ba le sebete tšeo ke di tsebago. Ge ke be ke sa le ngwana, go be go na le dilo tše dingwe tšeo ke bego ke tšhaba go di dira ka gobane ke ipotšiša gore batho ba tla reng. Eupša ge ke bona mma a bontšha sebete e bile a bea Jehofa pele bophelong bja gagwe, seo se ile sa nthuša gore ke se sa hlwa ke tšhaba batho.” João yo tatagwe a bego a ba ganetša go bolela ka Jehofa goba ka Beibele, o re: “Mohlomongwe seo se nthušitšego ke go bona mma a ikemišetša go tlogela dilo ka moka gore a kgahliše tate, eupša ga se a ka a tlogela go rata Jehofa.

16. Mohlala wa bomma o ka kgothatša ba bangwe bjang?

¹⁶ Gopola gore mohlala wa gago o ka  kgothatša batho ba bangwe. Bjang? Bona kamoo mohlala wa Yunise o ilego wa kgothatša moapostola Paulo ka gona. O ngwadile gore tumelo yeo e se nago boikaketši ya Timotheo, ‘pele e be e le go Yunise.’ (2 Tim. 1:5) Paulo o bone neng tumelo ya Yunise? Go ka direga gore o kopane le Yunise le Loisa kua Listara nakong ya leeto la gagwe la mathomo la boromiwa, le gona go ka direga gore ke yena a ba thušitšego gore e be Bakriste. (Dit. 14:4-18) Nagana fela, ka morago ga mengwaga e ka bago e 15 ge Paulo a ngwalela Timotheo lengwalo, o be a sa dutše a gopola ditiro tša tumelo tša Yunise gomme a mo diriša e le mohlala wo o swanetšego go ekišwa. Go molaleng gore mohlala wa gagwe o ile wa kgothatša moapostola Paulo kudu, le gona wa kgothatša la Bakriste ba bantši bao ba bego ba phela ka nako yeo. Ge e ba o godiša bana ba gago o nnoši goba o ba godiša ka lapeng le sego bodumeding bjo tee, kgodišega gore mediro ya gago ya tumelo e tiiša le go kgothatša batho bao ba lego kgauswi le wena.

17. O swanetše go dira eng ge o bona eka bana ba gago ga ba arabele gabotse ge o ba tlwaetša gore ba hlankele Jehofa?

¹⁷ O swanetše go dira eng ge e ba ngwana ba bontšha okare ga a na taba le seo o mo rutago sona? Gopola gore go tlwaetša ngwana go tšea nako. Go etša ka ge re bona mo seswantšhong, ge o bjala peu ka dinako tše dingwe o ipotšiša ge e ba e tla gola ya ba sehlare gomme sa enywa dienywa. Le ge o se wa  kgodišega gore mafelelo a sona e tlo ba afe, o tšwela pele o se nošetša gore se gole. (Mar. 4:26-29) Ka tsela e swanago, bjalo ka mma ka dinako tše dingwe o fela o ipotšiša ge e ba o tla kgona go thuša bana ba gago gore ba rate Jehofa. O ka se kgone go laola diphetho tšeo bana ba gago ba di dirago. Eupša ge o tšwelapele o šoma ka thata gore o ba tlwaetše, o ba nea sebaka se sebotse sa gore e be bagwera ba Modimo.—Die. 22:6.

18. Jehofa a ka thuša bjang bana ba gago gore e be bagwera ba gagwe?

¹⁸ Go tloga mehleng ya ge Beibele e sa ngwalwa, Jehofa o ile a thuša bafsa ba bantši gore e be bagwera ba gagwe. (Ps. 22:9, 10) Ge e ba bana ba gago ba rata go hlankela Jehofa, a ka kgona go ba thuša. (1 Bakor. 3:6, 7) Le ge go ka bonala eka bana ba gago ba tšwa tseleng, Jehofa o tlo tšwela pele a ba rata. (Ps. 11:4) Ge ba bontšha gore ba nyaka go kgahliša Jehofa, o tlo dula a le gona gore e be mogwera wa bona. (Dit. 13:48; 2 Dikor. 16:9) A ka go thuša gore o bolele dilo tšeo di kgothatšago go bana ba gago ka nako yeo ba swanetšego go di kwa. (Die. 15:23) Goba a ka diriša ngwanabo rena goba kgaetšedi ka phuthegong gore a ba thuše. Le ge bana ba gago ba godile, Jehofa a ka ba thuša gore ba gopole dilo tšeo o ba rutilego tšona nakong e fetilego. (Joh. 14:26) Ge e ba o tšwelapele o ruta bana ba gago ka seo o se bolelago le ka seo o se dirago, Jehofa o tlo go šegofatša.

19. Ke ka baka la’ng o ka kgodišega gore Jehofa o a go amogela?

¹⁹ Lerato leo Jehofa nago le lona go wena ga se la ithekga ka gore bana ba gago ba kgetha go dira eng ka bophelo bja bona. Eupša o go rata ka gobane le wena o mo rata. Ge e ba o le mma yo a godišago bana a nnoši, Jehofa o go tshepiša gore o tla ba Tatago bana ba gago e bile o tla go šireletša. (Ps. 68:5) O ka se kgethele bana ba gago gore ba hlankele Jehofa goba ba se ke ba mo hlankela. Eupša ge e ba o tšwelapele o ithekga ka Jehofa ge o tlwaetša bana ba gago, o tlo go amogela.