1. Re kgodišegile ka’ng?

 RE BAHLANKA ba Jehofa e bile re a tseba gore o nyaka re thabela bophelo. (Baroma 8:35-39) Re kgodišegile gore go diriša melao ya motheo ya Beibele go a re hola. (Jes. 48:17, 18) Bjale, go thwe’ng ge e ba re kopana le mathata re sa letela?

2. Re ka kopana le mathata a mohuta mang, gona a ka dira gore re ipotšiše dipotšišo dife?

² Bahlanka ba Jehofa ka moka ba na le mathata. Ka mohlala, yo mongwe wa leloko a ka re nyamiša ka tsela e itšego. Re ka babja gomme ra palelwa ke go hlankela Jehofa ka tsela yeo re nyakago ka yona. Re ka lebeletšana le mathata ao a bakwago ke kotsi ya tlhago, goba re ka tlaišwa ka lebaka la ditumelo tša rena. Ge re kopana le mathata ao, re ka ipotšiša gore: ‘Ke ka baka la’ng se se ntiragalela? Na go na le phošo yeo ke e dirilego? Na se se bontšha gore Jehofa ga a ntšhegofatše?’ Na o ile wa ikwa ka tsela yeo? Ge e ba go le bjalo, o se ke wa tshwenyega, ga o noši.—Ps. 22:1, 2; Habak. 1:2, 3.

3. Re ithuta’ng go Psalme 34:19?

³ Bala Psalme 34:19. Hlokomela dintlha tše pedi tša bohlokwa mo temaneng ye: (1) Batho ba go loka ba kopana le mathata. (2) Jehofa o a re hlakodiša ge re kopana le mathata. O re hlakodiša bjang? Tsela e nngwe ke ka go re thuša gore re gopole gore mathata a tlo dula a le gona mo lefaseng le. Le ge Jehofa a re tshepiša gore re tlo thaba ge re mo hlankela, eupša ga a re tshepiše gore re ka se be le mathata. (Jes. 66:14) O re kgothaletša gore re naganišiše ka bokamoso bjo bo kgahlišago, moo re tla bego re mo hlankela ka mo go sa felego. (2 Bakor. 4:16-18) Gona bjale o re thuša gore re tšwele pele re mo hlankela letšatši le lengwe le le lengwe.—Dillo 3:22-24.

4. Re tlo boledišana ka’ng sehlogong se?

 ⁴ A re boledišaneng ka seo re ka ithutago sona go bahlanka ba Jehofa bao ba botegago ba mehleng ya Beibele le ba mehleng ya rena. Le rena re ka kopana le mathata re se ra letela. Eupša ge re ithekga ka Jehofa, a ka se tsoge a re tlogetše. (Ps. 55:22) Ge re dutše re boledišana ka mehlala ye, ipotšiše gore: ‘Ke be ke tla arabela bjang ge e nkabe e le nna ke kopanego le bothata bjo? Mehlala ye e nthuša bjang gore ke tshepe Jehofa le go feta? Nka e diriša bjang bophelong bja ka?’

5. Labane o ile a dira gore Jakobo a kopane le mathata afe? (Bona seswantšho sa letlakala la ka ntle.)

⁵ Mehleng ya Beibele, bahlanka ba Jehofa ba ile ba kopana le mathata ao ba bego ba se ba a letela. Nagana ka mohlala wa Jakobo. Tatagwe o ile a mo laela gore a yo nyala mosadi go barwedi ba Labane e lego wa leloko yo a bego a hlankela Modimo, e bile o ile a mo kgonthišetša gore Jehofa o tlo mo šegofatša kudu. (Gen. 28:1-4) Jakobo o ile a kwa taelo yeo ke moka a tloga nageng ya Kanana gomme a ya lapeng la Labane yo a bego a na le barwedi ba babedi e lego Lea le Ragele. Jakobo o ile a rata morwedi yo monyenyane wa Lebane e lego Ragele gomme a dumela go šoma mengwaga e šupago gore a tle a kgone go mo nyala. (Gen. 29:18) Eupša dilo ga se tša sepela kamoo Jakobo a bego a gopotše ka gona. Labane o ile a mo hlalefetša gore a nyale morwedi wa gagwe yo mogolo e lego Lea. Labane o ile a botša Jakobo gore a ka nyala Ragele ka morago ga beke, eupša o swanetše go šoma mengwaga e mengwe e šupago. (Gen. 29:25-27) Labane o be a sa dirišane le Jakobo gabotse ditabeng tša kgwebo. Ge e le gabotse Labane ga se a ka a swara Jakobo gabotse ka mengwaga e 20!—Gen. 31:41, 42.

6. Jakobo o ile a kgotlelela mathata afe a mangwe?

⁶ Jakobo o ile a kgotlelela mathata a mangwe. O be a na le lapa le legolo eupša barwa ba gagwe ba be ba sa phedišane ka khutšo. Ba ile ba rekiša le ngwanabo bona e lego Josefa gore e be lekgoba. Barwa ba babedi ba Jakobo e lego Simeone le Lefi, ba ile ba goboša lapa la gabo bona le go senya leina la Jehofa. Go oketša moo, mosadi yo Jakobo a bego a mo rata kudu e lego Ragele o ile a hlokofala ge a be a belega ngwana wa bona wa bobedi. Le gona, moo ba bego ba dula gona go ile gwa wa tlala ke moka Jakobo a swanelwa ke go hudugela Egipita le ge a be a tšofetše.—Gen. 34:30; 35:16-19; 37:28; 45:9-11, 28.

7. Jehofa o ile a bontšha Jakobo bjang gore o a mo rata?

⁷ Jakobo ga se a ka a lahla tumelo ya gagwe go Jehofa le ditshepišo tša Gagwe le ge a be a na le mathata. Gomme Jehofa o ile a bontšha Jakobo gore o a mo rata. Ka mohlala, Jehofa o ile a nea Jakobo mahumo a mantši le ge Labane a be a sa mo sware gabotse. Le gona, nagana gore Jakobo o ile a thaba bjang ge a be a kopana le Josefa gape mola a be a nagana gore o hwile! Ka ge Jakobo a be a na le segwera sa kgauswi le Jehofa, o ile a kgona go kgotlelela mathata ao a bego a na le ona. (Gen. 30:43; 32:9, 10; 46:28-30) Le rena re ka kgona go lebeletšana le mathata ao re kopanago le ona ge e ba re gwerana le Jehofa.

8. Kgoši Dafida o be a nyaka go dira’ng?

⁸ Kgoši Dafida ga se a kgona go dira dilo ka moka tšeo a bego a nyaka go di dira ge a hlankela Jehofa. Ka mohlala, o be a tloga a nyaka go agela Modimo wa gagwe tempele. O ile a botša moporofeta Nathane ka seo a bego a nyaka go se dira. Nathane o ile a mo araba ka gore: “Dira se sengwe le se sengwe seo se lego pelong ya gago, gobane Modimo  wa therešo o na le wena.” (1 Dikor. 17:1, 2) Nagana kamoo mantšu ao a ilego a kgothatša Dafida ka gona. Mohlomongwe o ile a thoma go itokišeletša go thoma mošomo woo o mogolo di tloga fase.

9. Dafida o ile a arabela bjang ge a hwetša ditaba tšeo di nyamišago?

⁹ Ka moragonyana, moporofeta wa Jehofa o ile a boa ke moka a botša Dafida ditaba tšeo di nyamišago. “Bošegong bjoo,” Jehofa o boditše Nathane gore Dafida e ka se be yena a tlago go aga tempele yeo, eupša e be e tlo agwa ke yo mongwe wa barwa ba gagwe. (1 Dikor. 17:3, 4, 11, 12) Dafida o ile a arabela bjang ge a hwetša molaetša woo? Ga se a ka a ngala. O ile a kgoboketša tšhelete le dilo tša go aga tšeo Solomone a bego a tlo di hloka ge a dira mošomo woo.—1 Dikor. 29:1-5.

10. Jehofa o ile a šegofatša Dafida bjang?

¹⁰ Ka morago ga gore Jehofa a botše Dafida gore e ka se be yena a tlago go aga tempele, o ile a dira kgwerano le yena. Jehofa o ile a tshepiša Dafida gore yo mongwe wa ditlogolo tša gagwe o tlo buša ka mo go sa felego. (2 Sam. 7:16) Nagana gore Dafida o tla ba a thabile bjang lefaseng le lefsa ge a ekwa gore Jesu yoo a bušago ka Mengwaga e Sekete ke setlogolo sa gagwe! Pego ye e re ruta gore le ge re ka se kgone go hlankela Jehofa ka dilo ka moka tšeo re nyakago go di dira, a ka re šegofatša ka dilo tšeo re sa di letelago.

11. Bakriste ba lekgolong la pele la mengwaga ba ile ba šegofatšwa bjang le ge Mmušo wa Modimo o se wa fihla ka nako yeo ba bego ba o letetše? (Ditiro 6:7)

¹¹ Bakriste ba lekgolong la pele la mengwaga ba ile ba kopana le mathata. Ka mohlala, ba be ba fela pelo ya gore Mmušo wa Modimo o tle le ge ba be ba sa tsebe gore o tlo tla neng. (Dit. 1:6, 7) Bjale ba ile ba dira eng? Ba ile ba swarega ka go botša batho ba bangwe ditaba tše dibotse. Ge ba dutše ba botša batho ba bantši ditaba tše dibotse ba ile ba bona gore Jehofa o šegofatša maiteko a bona.—Bala Ditiro 6:7.

12. Bakriste ba lekgolong la pele la mengwaga ba ile ba dira eng ge go ewa tlala?

¹² Ka nako e nngwe, tlala e kgolo e ile ya “wela lefase ka moka.” (Dit. 11:28) Bakriste ba lekgolong la pele la mengwaga le bona ba ile ba welwa ke tlala yeo. O nagana gore tlala e ile ya ba kgoma bjang? Ga go pelaelo gore dihlogo tša malapa di ile tša tshwenyega ka gore di tlo fepa bjang malapa a tšona. Go thwe’ng ka bafsa bao ba bego ba ikemišeditše go oketša tirelo ya bona? Na ba ile ba swanelwa ke go emanyana go fihlela tlala e fela? Go sa šetšwe maemo a ka moka, Bakriste bao ba ile ba kgona go lebeletšana la mathata ao. Ba ile ba tšwela pele ba bolela ditaba tše dibotse kamoo ba bego ba kgona ka gona e bile ba thabela go abelana le bana babo bona le dikgaetšedi ba kua Judea dilo tšeo ba bego ba na le tšona.—Dit. 11:29, 30.

13. Jehofa o ile a šegofatša bjang Bakriste ba lekgolong la pele la mengwaga ge go be go wele tlala?

¹³ Bakriste ba lekgolong la pele la mengwaga ba ile ba hwetša ditšhegofatšo dife nakong ya ge go be go wele tlala? Bao ba ilego ba amogela dijo ba ile ba bona gore Jehofa o a ba thuša. (Mat. 6:31-33) Ba swanetše go ba ba ile ba gwerana kudu le bana babo bona bao ba bego ba ba thuša. Le gona, bao ba ilego ba neela ba ile ba hwetša lethabo leo le tlišwago ke go nea. (Dit. 20:35) Jehofa o ile a ba šegofatša ka moka ga bona ge ba dutše ba tlwaelana le maemo ao a bego a fetoga.

14. Go diregile’ng ka moapostola Paulo la Baranaba, gona go bile le mafelelo afe? (Ditiro 14:21, 22)

¹⁴ Bakriste ba lekgolong la pele la mengwaga ba be ba fela ba tlaišwa, ka dinako  tše dingwe ba se ba letela. Nagana ka seo se ilego sa diragalela Baranaba le moapostola Paulo ge ba be ba bolela ditaba tše dibotse kua Lisitara. Mathomong bao ba bego ba ba theeditše ba ile ba ba amogela ka lerato. Ka morago, baganetši ba ile ba “hlohleletša mašaba” gomme ba kgatla Paulo ka maswika ke moka ba mo tlogela ba nagana gore o hwile. (Dit. 14:19) Eupša Paulo le Baranaba ba ile ba tšwela pele ka go bolela ditaba tše dibotse lefelong le lengwe. Go bile le mafelelo afe? Ba ile ba dira “barutiwa ba bantši,” gomme badumedigotee le bona ba ile ba tiišwa ke mantšu a bona gotee le mohlala wa bona. (Bala Ditiro 14:21, 22.) Batho ba bantši ba ile ba holega ka ge Paulo le Baranaba ba sa ka ba fela matla ge ba be ba tlaišwa. Ge e ba re sa fele matla mošomong wo Jehofa re neilego ona, o tlo re šegofatša.

15. O ithuta’ng mohlaleng wa ngwanabo rena A. H. Macmillan?

¹⁵ Pejana ga ngwaga wa 1914, bahlanka ba Jehofa ba be ba nagana gore go tlo direga dilo tše itšego. Nagana ka mohlala wa ngwanabo rena A. H. Macmillan. Go swana le bana babo rena ba bangwe ka nako yeo, ngwanabo rena Macmillan o be nagana gore o tlo hwetša moputso wa gagwe wa go ya legodimong ka nako yeo. Polelong yeo a e neilego ka September 1914, o itše: “Mohlomongwe ye ke polelo ya ka ya mafelelo ya phatlalatša.” Ruri yeo e be e se polelo ya gagwe ya mafelelo. Ka morago, ngwanabo rena Macmillan o ile a ngwala gore: “Mohlomongwe ba bangwe ba rena re ile ra no kitimela go nagana gore re tlo ya legodimong ka nako yeo.” O okeditše ka gore: “Se sekaone ke gore re swarege ka modiro wa Morena.” Ke nnete gore ngwanabo rena Macmillan o ile a swarega ka modiro woo. O be a botša batho ditaba tše dibotse ka mafolofolo. O ile a thabela tokelo ya go ya go kgothatša bana babo rena bao ba bego ba le kgolegong ka baka la go gana go tsenela bošole. Le gona o be a dula a eya dibokeng le ge a be a šetše a tšofetše. Ngwanabo rena  Macmillan o ile a holega bjang ge a be a diriša nako ya gagwe gabotse ge a dutše a letetše moputso wa gagwe? Pejana ga ge a ka hlokofala ka 1966, o ngwadile gore: “Ga bjale tumelo ya ka e tiile go feta mathomong. Ruri wo ke mohlala o mobotse wo re ka o ekišago, kudukudu ge re kgotleletše mathata ka nako e telele!—Baheb. 13:7.

16. Ngwanabo rena Herbert Jennings le mosadi wa gagwe ba ile ba kopana le mathata afe? (Jakobo 4:14)

¹⁶ Bahlanka ba bantši ba Jehofa ba na le malwetši. Ka mohlala, ngwanabo rena Herbert Jennings b o hlalositše kanegelong ya gagwe ya bophelo gore yena le mosadi wa gagwe ba be ba thabela kabelo ya bona ya go ba baromiwa kua Ghana. Eupša ge nako e dutše e eya o ile a botšwa gore o na le bolwetši bja go fetofetoga ga maikwelo. Ngwanabo rena Jennings o ile a tsopola mantšu ao a lego go Jakobo 4:14 ke moka a bolela gore “‘gosasa’ moo re bego re se ra go letela.” (Bala.) O ngwadile gore: “Ka go lebeletšana le therešo, re ile ra rulaganya go tlogela Ghana le bagwera ba rena ba kgauswi ke moka ra boela Canada.” Jehofa o ile a thuša ngwanabo rena Jennings le mosadi wa gagwe gore ba tšwele pele ba mo hlankela le ge ba na le mathata.

17. Mohlala wa ngwanabo rena Jennings o hotše badumedigotee le yena bjang?

¹⁷ Dilo tšeo ngwanabo rena Jennings a di boletšego ka kanegelong ya gagwe ya bophelo di ile tša hola batho ba bantši. Kgaetšedi yo mongwe o ngwadile gore: “Ke ile ka kgomega kudu ge ke be ke bala kanegelo  ye ya bophelo. . . . Go bala kamoo ngwanabo rena Jennings a ilego a swanelwa ke go tlogela kabelo ya gagwe ka lebaka la bolwetši go dirile gore ke lebelele bolwetši bja ka gabotse.” Ngwanabo rena yo mongwe le yena o ngwadile gore: “Ka morago ga go hlankela bjalo ka mogolo ka mengwaga e lesome, Ke ile ka swanelwa ke go tlogela ka ge ke be ke na le bolwetši bja monagano. Ke be ke se ne mohola e bile ke palelwa le ke go no bala dikanegelo tša bophelo. . . . Eupša ke ile ka kgothatšwa ke gore ngwanabo rena  Jennings o ile a kgotlelela.” Se se re gopotša gore re ka kgothatša ba bangwe ge re kgotlelela mathata. Le ge dilo di sa sepele kamoo re bego re letetše ka gona, re ka kgona go ba mehlala e mebotse ya tumelo le go kgotlelela.—1 Pet. 5:9.

18. Ka ge re bona mo seswantšhong, re ithuta’ng mohlaleng wa kgaetšedi wa mohlologadi wa kua Nigeria?

¹⁸ Mathata ao a swanago le leuba la COVID-19 a ile a kgoma bahlanka ba Jehofa ba bantši. Ka mohlala, kgaetšedi yo mongwe wa mohlologadi wa kua Nigeria o ile a šala ka dijo tše dinyenyane le tšhelete e nyenyane kudu. Mesong e mengwe morwedi wa gagwe o ile a mmotšiša gore ba tlo ja eng ka ge ba be ba apeile komiki ya mafelelo ya reisi. Kgaetšedi ya gabo rena o ile a botša morwedi wa gagwe gore ga ba na tšhelete goba dijo tše di šetšego eupša ba swanetše go ekiša mohlala wa mohlologadi wa kua Tsarepata ka gore ba apee dijo tša bona tša mafelelo ke moka ba tshepe Jehofa ka mo go feletšego. (1 Dikg. 17:8-16) Pele ga ge ba ka nagana ka seo ba bego ba ka se ja mosegareng woo, bana babo rena ba ile ba ba tlišetša dijo. Dijo tšeo ba bego ba di hweditše di be di tlo ba thuša ka dibeke tše pedi. Kgaetšedi yoo o itše o be a sa lemoge gore Jehofa o be a mo theeditše ka kelohloko ge a dutše a boledišana le morwedi wa gagwe. Ruri ge re dutše re ithekga Jehofa, mathata ao re kopanago le ona a ka dira gore re mmatamele le go feta.—1 Pet. 5:6, 7.

19. Aleksey Yershov o kgotleletše tlaišo ya mohuta mang?

 ¹⁹ Mengwageng ya moragonyana, bana babo rena le dikgaetšedi ba ile ba tlaišwa ba sa letela. Nagana ka mohlala wa ngwanabo rena Aleksey Yershov yo a dulago Russia. Ge ngwanabo rena Yershov a be a kolobetšwa ka 1994, bana babo rena ba nageng yeo ba be ba na le tokologo. Eupša ka morago maemo a ile a fetoga kua Russia. Ka 2020, Maphodisa a ile a tsena lapeng la ngwanabo rena Yershov, a phuruphutša ke moka a tšea dilo tša gagwe tše dintši. Ka morago ga dikgwedi tše sego kae, mmušo o ile wa phara ngwanabo rena ka molato. O be a pharilwe ka molato woo ka baka la bidio yeo motho a e tšerego nakong ya ge a be a itira okare o nyaka go ithuta Beibele. Ruri motho yoo o ile a radia ngwanabo rena!

20. Ngwanabo rena Yershov o ile a tiiša bjang segwera sa gagwe le Jehofa?

²⁰ Na ngwanabo rena Yershov o ile a ba le mafelelo a mabotse? Ee. Segwera sa gagwe le Jehofa se ile sa tia kudu. O re: “Nna le mosadi wa ka re dula re rapela ka mehla. Ke a bona gore ka ntle le thušo ya Jehofa, ke be nka se kgone go kgotlelela boemo bjo.” O oketša ka gore: “Thuto ya motho ka noši e nthuša gore ke se ke ka nyama kudu. Ke naganišiša ka mehlala ya bahlanka ba Jehofa ba botegago ba nakong e fetilego. Go na le mehlala e mentši ya ka Beibeleng yeo e bontšhago gore go bohlokwa go se tshwenyege le gore re swanetše go tshepa Jehofa.”

21. Re ithutile’ng sehlogong se?

²¹ Re ithutile’ng sehlogong se? Re ithutile gore re tlo fela re kopana le mathata bophelong. Eupša Jehofa o dula a thuša bahlanka ba gagwe ge ba ithekga ka yena. Lengwalo la sehlogo le re, “mathata a moloki ke a mantši, eupša Jehofa o mo hlakodiša go ona ka moka.” (Ps. 34:19) Eka re ka tšwela pele re naganišiša ka matla ao Jehofa a re neago ona, e sego mathata ao re kopanago le ona. Ke moka re tla bolela go swana le moapostola Paulo ra re: “Dilong tšohle ke na le matla ka baka la yo a mphago matla.”—Bafil. 4:13.