1. Mošemane yo mongwe o bontšhitše bjang gore o na le kholofelo ya tsogo?

 MOŠEMANE yo a bitšwago Matthew, o be a na le bolwetši bjo bo bego bo dira gore a dire diophareišene tše dintši. Ge a be a na le mengwaga e šupago, yena le lapa la gabo ba ile ba bogela lenaneo la kgwedi le kgwedi la Kgašo ya JW. Ge lenaneo leo le eya mafelelong, ba ile ba bogela bidio ya mmino yeo e bego e bolela ka go amogela batho bao ba tsošitšwego bahung. b Ka morago ga lenaneo, Matthew o ile a swara batswadi ba gagwe ka matsogo ke moka a re go bona: “Le a bona gore le ge nka hlokofala, ka letšatši le lengwe ke tlo tsoga. Le tla nkemela, go tla loka.” Nagana gore batswadi bao ba be ba thabile bjang ge ba bona gore ngwana wa bona o na le tumelo ya gore bahu ba tlo tsošwa.

2-3. Ke ka baka la’ng go le bohlokwa gore re naganišiše ka kholofetšo ya go tsošwa ga bahu?

² Re dira gabotse ge nako le nako re naganišiša ka dikholofetšo tša Beibele tša go tsošwa ga bahu. (Joh. 5:28, 29) Ka baka la’ng? Ka gobane ga re tsebe gore ke neng moo re tlago go babja kudu goba ra hlokofalelwa ke motho yo re mo ratago. (Mmo. 9:11; Jak. 4:13, 14) Ge re na le kholofelo ya gore bahu ba tlo tsošwa, re tlo kgona go kgotlelela mathata ao. (1 Bathes. 4:13) Beibele e re kgonthišetša gore Tatago rena wa legodimong o re tseba gabotse e bile o re rata kudu. (Luka 12:7) Jehofa o re tseba gabotse mo e lego gore o tlo re tsoša re dira dilo ka tsela yeo re di dirago ka yona gona bjale le go nagana ka tsela yeo re naganago ka yona gona bjale. Le gona, Modimo o re rata kudu e bile o re tshepiša bophelo bjo bo sa felego le go re tsoša bahung ge re ka hlokofala!

³ Sehlogong se, re tlo kwa gore ke ka baka la’ng re ka dumela gore re tlo tsošwa bahung. Ke moka ra boledišana ka mohlala  wa ka Beibeleng wo o tiišago tumelo wo o nago le mantšu a sehlogo sa rena ao a rego: “Kgaetšedi ya gago o tla tsoga.” (Joh. 11:23) Mafelelong re tlo bona gore re ka dira eng gore kholofelo ya tsogo e be ya kgonthe go rena.

4. Re swanetše go kgodišega ka’ng e le gore re dumele selo seo re se tshepišitšwego? Nea mohlala.

⁴ E le gore re kgone go dumela seo motho a se tshepišago, re swanetše go dumela gore o tloga a nyaka go dira selo seo le gore o na le matla a go se dira. Ka mohlala, nagana ntlo ya gago e sentšwe ke ledimo ke moka mogwera wa gago a tla a go tshepiša gore: ‘Ke tlo go thuša go lokiša ntlo ya gago.’ Mogwera wa gago o bolela go tšwa pelong, e bile wena o a tshepa gore o tloga a nyaka go go thuša. Ge e ba a kgona go aga e bile a na le dithulusi tšeo di nyakegago, o a bona gore ka nnete o tlo kgona go go thuša. Ka gona o dumela seo a go tshepišago sona. Bjale, go thwe’ng ka tshepišo ya Modimo ya go tsoša batho bao ba hlokofetšego? Na o tloga a nyaka go ba tsoša, goba na o na le matla a go dira bjalo?

5-6. Ke ka baka la’ng re ka kgodišega gore Jehofa o tloga a nyaka go tsoša bahu?

⁵ Na Jehofa o tloga a nyaka go tsoša bahu? Ga go pelaelo gore o nyaka go dira bjalo. O ile a budulela bangwadi ba mmalwa ba Beibele gore ba ngwale gore bahu ba tlo tsošwa. (Jes. 26:19; Hos. 13:14; Kut. 20:11-13) Ge Jehofa a tshepiša go dira selo se itšego o dula a se phethagatša. (Josh. 23:14) Ge e le gabotse Jehofa o fela pelo ya go tsoša bahu. Ke ka baka la’ng re re’alo?

⁶ Nagana ka seo mopatriareka Jobo a se boletšego. O be a kgodišegile gore le ge a ka hwa, Jehofa o tlo nyaka go mmona a phela gape. (Jobo 14:14, 15.) Jehofa o ikwa ka tsela yeo le ka bahlanka ba gagwe bao ba hlokofetšego ba mmotegela. O fela pelo ya go ba tsoša le go ba bona ba phetše gabotse mmeleng e bile ba thabile. Bjale go tlo direga’ng ka batho ba dibilione bao ba hlokofetšego ba se ba hwetša sebaka sa go ithuta ka Jehofa? Le bona, Modimo wa rena yo lerato o nyaka go ba tsoša. (Dit. 24:15) O nyaka gore le bona ba hwetše sebaka sa go ba bagwera ba gagwe le go tlo phela ka mo go sa felego mo lefaseng. (Joh. 3:16) Go molaleng gore Jehofa o tloga a nyaka go tsoša bahu.

7-8. Ke ka baka la’ng re ka kgodišega gore Modimo o na le matla a go tsoša bahu?

⁷ Na Jehofa o na le matla a go tsoša bahu? Ee go bjalo! Ke “Ramatlaohle.” (Kut. 1:8) O na le matla a go fenya lenaba le lengwe le le lengwe, go akaretša le lehu. (1 Bakor. 15:26) Go tseba seo go re nea matla le go re homotša. Nagana ka mohlala wa kgaetšedi Emma Arnold. Nakong ya Ntwa ya Bobedi ya Lefase yena le ba lapa la gabo ba ile ba lebana le mathata ao a lekago tumelo ya bona. Ge Emma a kgothatša morwedi wa gagwe ka morago ga go hlokofalelwa ke batho bao ba ba ratago dikampeng tša tlaišo tša Nazi, o itše: “Ge e ba batho bao ba hlokofetšego ba ka se boele ba phela, gona go ra gore lehu le na le matla go feta Modimo, eupša re a tseba gore seo ga se nnete.” Ka nnete ga go na selo seo se ka fetago Jehofa ka matla! Modimo ramatlaohle, yena yo a dirilego gore go be le bophelo, o na le matla a go tsoša bao ba hlokofetšego.

⁸ Lebaka le lengwe leo le dirago gore re tshepe gore Modimo o na le bokgoni bja go tsoša batho bahung ke gore ga a lebale. O bitša naledi e nngwe le e nngwe ka leina. (Jes. 40:26) Le gona, o gopola batho bao ba hlokofetšego. (Jobo 14:13; Luka 20:37, 38) O gopola selo se sengwe le se sengwe ka batho bao a tlago go ba tsoša, go akaretša tsela yeo ba bopegilego ka yona, dilo tšeo ba di dirilego le dilo tšeo ba di gopolago.

9. Ke ka baka la’ng re na le kholofelo ya gore Jehofa o tlo tsoša bahu?

 ⁹ Ruri re ka tshepa kholofetšo ya Modimo ya go tlo tsoša bahu ka gobane re a tseba gore o na le matla e bile o tloga a nyaka go dira bjalo. Lebaka le lengwe la gore re dumele kholofetšo ye ke ka gobane go šetše go bile le batho bao Modimo a ilego a ba tsoša. Mehleng ya Beibele, o ile a diriša banna bao ba botegago, go akaretša le Jesu, go tsoša bahu. Ga bjale a re boleleng ka pego e nngwe ya nakong ya ge Jesu a tsoša bahu, yeo go bolelwago ka yona go Johane kgaolo 11.

10. Ke’ng seo se ilego sa direga ge Jesu a be a le ka mošola wa noka ya Jorodane, gona o ile a ikemišetša go dira’ng? (Joh. 11:1-3)

¹⁰ Bala Johane 11:1-3. Nagana ka seo se ilego sa direga kua Bethania mafelelong a 33 C.E. Jesu o na le bagwera motseng woo, e lego Latsaro le dikgaetšedi tša gagwe tše pedi, Maria le Mareta. (Luka 10:38-42) Latsaro o thoma go babja ke moka dikgaetšedi tša gagwe di a tshwenyega. Ke moka di romela molaetša go Jesu yo a lego ka mošola wa Noka ya Jorodane, e lego leeto la matšatši a mabedi go tloga Bethania. (Joh. 10:40) Ka maswabi Latsaro o hlokofala pele motho yo ba mo romilego a fihla go Jesu. Le ge Jesu a tseba gore mogwera wa gagwe o sa tšwa go hlokofala, o dula moo matšatši a mangwe a mabedi ke moka ka morago a tšea leeto la go ya Bethania. Ka gona ge Jesu a fihla, Latsaro o be a na le matšatši a mane a hwile. Jesu o ikemišeditše go dira selo se sengwe seo se tlago go thuša bagwera ba gagwe le go dira gore Modimo a tagafatšwe.—Joh. 11:4, 6, 11, 17.

11. Re ithuta thuto efe mabapi le go ba mogwera wa nnete pegong ye?

¹¹ Pego ye ya Beibele e re ruta thuto e bohlokwa mabapi le go ba mogwera wa nnete. Nagana ka se: Ge Maria le Mareta ba romela molaetša go Jesu, ga se ba mo kgopela gore a tle Bethania. Ba no mmotša fela gore mogwera wa gagwe o a babja. (Joh. 11:3) Ge Latsaro a hlokofala, Jesu nkabe a ile a no mo tsoša a le moo a bego a le gona. Eupša o ile a kgetha gore a ye Bethania gore a kgone go thekga bagwera ba gagwe e lego Maria le Mareta. Na o na le mogwera yo a ka tlago go go thuša ntle le gore o mo kgopele? Gona o a tseba gore o ka ithekga ka yena gore a tle a go thuše “mohlang wa tlalelo.” (Die. 17:17) Eka reka ekiša Jesu gomme ra ba bagwera ba mohuta woo! Ga bjale a re boeleng pegong yeo gomme re boneng seo se diregago ka morago.

12. Ke’ng seo Jesu a se tshepišitšego Mareta, gona ke ka baka la’ng Mareta a be a swanetše go mo tshepa? (Joh. 11:23-26)

¹² Bala Johane 11:23-26. Mareta o kwa gore Jesu o kgauswi le Bethania. Ke moka o a tšwa go yo mo gahlanetša, gomme a re yena: “Morena, ge nkabe o be o le mo, kgaetšedi ya ka nkabe a se a hwa.” (Joh. 11:21) Ke nnete gore nkabe a ile a fodiša Latsaro. Eupša Jesu o ba direla selo seo se makatšago. O tshepiša gore: “Kgaetšedi ya gago o tla tsoga.” O thuša Mareta go dumela seo  a mmotšago sona ka go bolela gore: “Ke nna tsogo le bophelo.” Ruri Modimo o neile Jesu matla a go tsoša bahu. Pejana ga moo o be a tsošitše mosetsana yo a sa tšwago go hlokofala, e bile o be a tsošitše le lesogana le lengwe, mohlomongwe letšatšing leo le bego le hlokofetše ka lona. (Luka 7:11-15; 8:49-55) Eupša na a ka tsoša motho yo a šetšego a na le matšatši a mane a hwile e bile mmele wa gagwe o thoma go senyega?

13. Go ya ka Johane 11:32-35, Jesu o ile a dira’ng ge a bona Maria le ba bangwe ba lla? (Bona le seswantšho)

¹³ Bala Johane 11:32-35. Nagana ka seo se ilego sa direga ka morago. Kgaetšedi e nngwe ya Latsaro e lego Maria, o ya go gahlanetša Jesu. O bušeletša mantšu ao ngwanabo e lego Mareta a a boletšego, o re: “Morena, ge nkabe o be o le mo, kgaetšedi ya ka nkabe a se a hwa.” Yena gotee le ba bangwe bao a bego a na le bona ba nyamile kudu. Ge Jesu a bona ba lla o kwa bohloko kudu. Ka ge a be a kwela bagwera ba gagwe bohloko, o ile a thoma go lla. O be a kwešiša gabotse bohloko bjo bo tlišwago ke ge motho yo o mo ratago a hlokofala. Ruri o be a fela pelo ya go tloša selo seo se bego se ba kweša bohloko!   

14. Tsela yeo Jesu a arabetšego ka yona ge a bona Maria a lla e re ruta’ng ka Jehofa?

¹⁴ Tsela yeo Jesu a ilego a arabela ka yona ge a be a bona Maria a lla e re ruta gore Jehofa ke Modimo yo a kwelago bohloko. Ke ka baka la’ng re re’alo? Sehlogong se se fetilego, re kwele gore Jesu o ekiša tsela yeo Tatagwe a naganago ka yona le go ikwa ka yona. (Joh. 12:45) Ka gona, ge re ekwa gore Jesu o ile a kwa bohloko ge a bona bagwera ba gagwe ba lla, re ka phetha ka gore Jehofa le yena o kwa bohloko ge a bona re lla. (Ps. 56:8) Ruri se se dira gore re nyake go batamela kgauswi le Modimo wa rena yo a nago le kwelobohloko.

15. Go ya ka Johane 11:41-44, ke’ng seo se ilego sa direga lebitleng la Latsaro. (Bona le seswantšho)

¹⁵ Bala Johane 11:41-44. Jesu o fihla lebitleng la Latsaro ke moka o laela gore leswika leo le tswaletšego lebitla le tlošwe. Mareta o leka go thibela seo ka go bolela gore mmele wa gagwe o swanetše go ba o nkga.  Eupša Jesu o re go yena: “Na ga se ka go botša gore ge e ba o ka dumela o tla bona letago la Modimo?” (Joh. 11:39, 40) Jesu o lebelela godimo ke moka o rapela batho ba mo lebeletše. O nyaka gore go tumišwe Jehofa ka baka la seo se tlago go direga ka morago. Ke moka Jesu o goeletša ka lentšu leo le hlabošago, o re: “Latsaro, tšwaa!” Ke moka Latsaro a tšwa kamoo lebitleng! Jesu o be a sa tšwa go dira selo seo batho ba bantši ba bego ba nagana gore se ka se kgonege.

16. Pego yeo e lego go Johane kgaolo 11 e tiiša bjang kholofelo ya rena ya gore bahu ba tlo tsošwa?

¹⁶ Pego yeo e lego go Johane kgaolo 11 e tiiša tumelo ya rena ya gore bahu ba tlo tsošwa. Bjang? Gopola gore Jesu o ile a tshepiša Mareta gore: “Kgaetšedi ya gago o tla tsoga.” (Joh. 11:23) Go swana le Tatagwe, Jesu o be a nyaka go tsoša batho bao ba hlokofetšego e bile o na la matla a go dira bjalo. Megokgo ya gagwe e re ruta gore o nyaka go fediša lehu le manyami ao le a bakago. Jesu o ile a bontšha gape gore o na le matla a go tsoša bahu ge Latsaro a be a etšwa ka lebitleng. Le gona, gopola gore Jesu o ile a gopotša Mareta gore: “Na ga se ka go botša gore ge e ba o ka dumela o tla bona letago la Modimo?” (Joh. 11:40) Re na le mabaka a kwagalago a go tshepa gore kholofetšo ya Modimo ya gore bahu ba tlo tsošwa e tlo phethagala. Ke’ng seo re swanetšego go se dira go bontšha gore re dumela kholofetšo ye?

17. Re swanetše go dula re nagana ka’ng ge re bala ka dipego tša ka Beibeleng tša batho bao ba ilego ba tsošwa bahung?

¹⁷ Bala le go naganišiša ka batho bao ba ilego ba tsošwa bahung nakong e fetilego. Beibele e bolela ka batho ba seswai bao ba ilego ba tsošwa bahung gomme ba boela ba phela mo lefaseng. c Ke ka baka la’ng o sa ipeele  nako ya go ithuta ka dipego tšeo? Ge o dutše o dira bjalo, gopola gore e be e le batho ba kgonthe. Nyaka dilo tšeo o ka ithutago tšona. Nagana kamoo pego e nngwe le e nngwe e bontšhago gore Modimo o tloga a nyaka go tsoša bahu e bile o na le matla a go dira bjalo. Ge o dutše o dira bjalo, nagana le ka motho yo bohlokwa yo a ilego a tsošwa bahung e lego Jesu. Gopola gore ge Jesu a be a tsošwa o bonwe ke batho ba bantši kudu, gomme seo se tiiša tumelo ya rena.—1 Bakor. 15:3-6, 20-22.

18. O ka diriša bjang dikopelo tša rena tšeo di bolelago ka kholofelo ya tsogo? (Bona le mongwalo wa tlase.)

¹⁸ Diriša “dikopelo tša moya” tšeo di bolelago ka kholofelo ya tsogo. d (Baef. 5:19) Dikopelo tše di dira gore kholofelo yeo re nago le yona ya gore bahu ba tlo tsošwa e be ya kgonthe e bile di tiiša tumelo ya rena. Di theetše le go itlwaetša tšona ke moka le boledišane ka tšona nakong ya borapedi bja lapa. Tseba mantšu a tšona ka hlogo. Ke moka ge o ka babja kudu goba motho yo o mo ratago a hlokofala, moya wa Jehofa o tla go thuša gore o di gopole ke moka tša go homotša le go go nea matla.

19. Ke’ng seo re ka lekago go bona se direga ge re naganišiša ka tsogo? (Bona lepokisi leo le rego, “ O ka ba Botšiša Eng?”)

¹⁹ Nagana ka seo se tla bego se direga. Jehofa o re neile bokgoni bja gore re ipone re le lefaseng le lefsa. Kgaetšedi yo mongwe o re: “Ke fetša nako e ntši ke naganišiša ka lefase le lefsa e bile ke šetše ke ipona ke le paradeiseng ke nkgelela matšoba ao a hlogago.” Nagana o kopana le banna le basadi ba tumelo bao ba phetšego mehleng ya Beibele. O fela pelo ya go tlo kopana le mang? O tla mmotšiša dipotšišo dife? Nagana o kopana le motho wa geno yo o mo ratago, yo a bego a hlokofetše gomme o gokarelana le yena, le bolela mantšu a mathomo e bile le ntšha megokgo ya lethabo.

20. Re swanetše go ikemišetša go dira’ng?

²⁰ Re tloga re leboga gore Jehofa o holofetša go tlo tsoša bahu! Re a tshepa gore kholofetšo ye e tlo phethagala ka gobane Jehofa o nyaka go e phethagatša e bile o na le matla a go dira bjalo. Eka ka moka ga rena re ka tšwela pele re tiiša tumelo ya rena kholofetšong ye e kgahlišago. Ge re dira bjalo, re gwerana le Modimo yo ge e le gabotse a tshepišago yo mongwe le yo mongwe wa rena gore, ‘Batho ba geno bao o ba ratago, ba tlo tsoga!’