1. Ke ka baka la’ng re araba dibokeng?

 KE KA baka la’ng re e ba gona dibokeng? Lebaka le legolo ke gore re nyaka go tumiša Jehofa. (Ps. 26:12; 111:1) Lebaka le lengwe ke gore re nyaka go kgothatšana, kudukudu dinakong tše tše thata. (1 Bathes. 5:11) Ge re emiša letsogo gore re arabe re bontšha gore re nyaka go dira dilo tše ka moka.

2. Ke neng moo re ka arabago ge re le dibokeng?

² Beke e nngwe le e nngwe re ba le sebaka sa go araba dibokeng. Ka mohlala, mafelobekeng re ka tšea karolo ka go araba Thutong ya Morokami. Dibokeng tša gare ga beke re ka araba nakong ya Matlotlo a ka Beibeleng, ra araba go Thuto ya Beibele ya Phuthego, ra ba ra araba le dikarolong tše dingwe tša poledišano.

3. Ke dilo dife tšeo di ka re šitišago go araba, gona Baheberu 10:24, 25 e ka re thuša bjang?

³ Ka moka ga rena re nyaka go tumiša Jehofa le go kgothatša bana babo rena le dikgaetšedi. Eupša go ka ba le dilo tšeo di ka re šitišago go araba: Re ka tšhoga. Goba re ka ba re nyaka go araba gantši eupša ba sa re kgethe ge re emiša letsogo. Re ka thušwa ke eng? Re hwetša karabo lengwalong leo moapostola Paulo a le ngwaletšego Baheberu. Ge a be a bolela ka bohlokwa bja go bokana gotee, o itše: ‘Re swanetše go kgothatšana.’ (Bala Baheberu 10:24, 25.) Re ka se tšhoge kudu ge re gopola gore mediro ya go bontšha tumelo yeo re e dirago e kgothatša bana  babo rena. Ge e ba ba sa re kgethe gantši re ka thabišwa ke gore bana babo rena le dikgaetšedi ba bangwe ka phuthegong ba tlo ba le sebaka sa go araba.—1 Pet. 3:8.

4. Re tlo boledišana ka’ng sehlogong se?

⁴ Sehlogong se re tlo boledišana ka gore re ka kgothatšana bjang ge re le phuthegong e nyenyane moo go se nago batho ba bantši ba go araba. Ke moka ra kwa gore re ka kgothatšana bjang ge re le phuthegong e kgolo moo go nago le batho ba bantši ba go araba. Mafelelong re tlo kwa gore re ka kgothatšana bjang ka seo re se bolelago.

5. Le ka kgothatšana bjang ge le le ba banyenyane dibokeng?

⁵ Ge e ba phuthego e le e nyenyane goba e le sehlopha, ga go na batho ba bantši bao ba emišago matsogo gore ba arabe. Ka dinako tše dingwe moswari wa thuto a ka swanelwa ke go emanyana pele motho yo mongwe a emiša letsogo. Diboka tše di ka bonala di tšea nako e bile di tšwafiša. O ka dira’ng? Ikemišetše go emiša letsogo la gago gantši. Ge o dira bjalo o tlo thuša ba bangwe gore le bona ba emiše matsogo gantši.

6-7. Ke eng seo se ka re thušago gore re se ke ra tšhoga ge re araba?

⁶ O ka dira’ng ge e ba o tšhoga go araba? Batho ba bantši ba ikwa ka tsela yeo. Eupša e le gore o kgone go kgothatša bana beno le dikgaetšedi, o ka leka mekgwa e mengwe yeo e ka go thušago gore o se ke wa tšhoga ge o araba. O ka dira seo bjang?

⁷ O ka bala ditšhišinyo tše dingwe tšeo di tšwelelago ka go Merokami e mengwe ya nakong e fetilego. b Ka mohlala, lokišetša gabotse. (Die. 21:5) Ge o tseba ditaba gabotse, go tlo ba bonolo gore o arabe ge o le dibokeng. Le gona dikarabo tša gago e be tše dikopana. (Die. 15:23; 17:27) Karabo e kopana e dira gore o se ke wa tšhoga kudu. Le gona karabo e kopana, mohlomongwe ya lefoko le tee goba a mabedi, e ka dira gore bana beno le dikgaetšedi ba e kwešiše gabonolo go feta karabo e telele yeo e nago le ditaba tše dintši. Ge e ba o nea karabo e kopana ka mantšu a gago, o tlo bontšha gore o lokišeditše gabotse le gore o tseba ditaba tšeo go bolelwago ka tšona gabotse.

8. Jehofa o lebelela bjang maiteko ao re a dirago?

⁸ O swanetše go dira’ng ge e ba o dirišitše ditšhišinyo tše, eupša o sa ikwa o tšhoga ge o swanetše go araba? Kgodišega gore Jehofa o tlo leboga maiteko ka moka ao o a dirago. (Luka 21:1-4) Jehofa ga a re kgopele gore re dire dilo tšeo re ka palelwago ke go di dira. (Bafil. 4:5) Tseba seo o nyakago go se dira. Ipeele pakane ya go se dira, ke moka o rapele gore Jehofa a go thuše. O ka thoma ka go ipeela pakane ya go nea karabo e tee e kopana.

9. Ke eng seo se ka go šitišago go araba phuthegong e kgolo?

⁹ Le ka ba le bothata bjo bo fapanego ge e ba phuthegong ya lena go na le bagoeledi ba bantši. Mohlomongwe go araba batho ba bantši eupša wena ga ba go kgethe gantši. Ka mohlala, Danielle o be  a dula a thabela go araba dibokeng. c O bona go araba e le karolo ya go hlankela Jehofa, tsela ya go kgothatša ba bangwe e bile e tiiša tumelo ya gagwe ka seo a ithutago sona ka Beibeleng. Eupša ge a hudugela phuthegong e nngwe, o be a se sa hlwa a kgethwa gantši, e bile ka dinako tše dingwe o be a sa kgethwe ge a le dibokeng. O re: “Seo se ile sa ntshwenya. Ke be ke ikwa okare go na le seo se hlaelelago ka nna. Ge seo se direga gantši le gantši, ke ile ka thoma go bona okare ba dira ka boomo.”

10. Re ka dira’ng gore re kgone go araba dibokeng?

¹⁰ Na o kile wa ikwa go swana le Danielle? Ge e ba go le bjalo, o ka ipotša gore ge o fihla dibokeng o tla no theetša feela. Eupša o se ke wa tlogela go leka go araba. Ke eng seo o ka se dirago? O ka thušwa ke go lokišeletša dikarabo tše mmalwa tša seboka se sengwe le se sengwe. Ge e ba ba sa go kgethe ge thuto e sa thoma, o ka tla wa hwetša sebaka sa go araba ge diboka di dutše di tšwela pele. Ge o dutše o lokišeletša thuto ya Morokami, nagana kamoo serapa se sengwe le se sengwe se sepedišanago le sehlogo ka gona. Ge e ba o ka dira bjalo, o ka tla wa kgona go araba. Le gona o ka lokišeletša go araba dirapeng tšeo go nago le dithuto tša Beibele tšeo go sego bonolo go di hlalosa. (1 Bakor. 2:10) Ka baka la’ng? Ka gobane batho ba bantši ba ka no se emiše matsogo dirapeng tšeo. Bjale o swanetše go dira’ng ge e ba ka morago ga go diriša ditšhišinyo tše ka moka o sa dutše o palelwa ke go araba? O ka ya go moswari wa thuto pele ga diboka ke moka wa mo kgopela go araba potšišo ya serapa se itšego.   

11. Bafilipi 2:4 e re kgothaletša gore re dire’ng?

¹¹ Bala Bafilipi 2:4. Moapostola Paulo o ile a budulelwa gore a kgothaletše Bakriste gore ba kgahlegele batho ba bangwe. Re ka diriša bjang keletšo ye ge re le dibokeng? Ka go gopola gore batho ba bangwe le bona ba nyaka go tšea karolo go swana le rena.

12. Tsela e kaone ya go kgothatšana dibokeng ke efe? (Bona le seswantšho)

 ¹² Nagana ka mohlala wo. Ge o boledišana le bagwera ba gago, na o ka bolela kudu moo e lego gore bona ga ba hwetše sebaka sa go bolela? Le ga tee! O nyaka gore le bona ba bolele. Ka mo go swanago, ge re le dibokeng re nyaka gore batho ba bantši ba nee dikarabo. Ge e le gabotse tsela e nngwe e kaone ya go kgothatša bana babo rena le dikgaetšedi ke ka go ba nea sebaka sa gore ba hlalose ditumelo tša bona. (1 Bakor. 10:24) A re boneng gore re ka dira seo bjang.

13. Re ka dira’ng gore ba bangwe le bona ba kgone go araba?

¹³ Re ka dira gore dikarabo tša rena e be tše dikopana, gore batho ba bangwe le bona ba tle ba kgone go araba. Bagolo le bagoeledi ba bangwe bao ba nago le phihlelo ba ka re beela mohlala. O se ke wa tšea dintlha ka moka le ge o nea karabo e kopana. Ge o ka tšea dintlha ka moka batho ba bangwe ba ka se kgone go araba. Ka mohlala, serapa se se na le ditšhišinyo tše pedi, o ka nea karabo e kopana e bile wa se tšee dintlha ka moka. Ge e ba o ka kgethwa pele serapeng se, o ka nea ntlha e tee feela.

14. Ke eng seo se ka re thušago ge re kgetha gore re tlo emiša matsogo gakae? (Bona le seswantšho)

¹⁴ Diriša temogo ge o kgetha gore o tlo emiša letsogo gakae. Ge e ba re emiša letsogo gantši, re ka dira gore moswari wa thuto a ikwe a gapeletšega go re kgetha le ge batho ba bangwe ba se ba hlwa ba hwetša sebaka sa go araba. Se se ka dira gore ba bangwe ba se ke ba emiša matsogo.—Mmo. 3:7.

15. (a) Re swanetše go arabela bjang ge ba sa re kgethe? (b) Moswari wa thuto a ka bontšha bjang gore o naganela batho ba bangwe? (Bona lepokisi leo le rego: “ Ge e ba o Swere Thuto.”)

¹⁵ Ge bagoeledi ba bantši ba emiša  matsogo nakong ya thuto, re ka no se hwetše sebaka sa go araba gantši kamoo re nyakago ka gona. Ka dinako tše dingwe moswari wa thuto a ka no se re kgethe. Se se ka re nyamiša eupša ga se ra swanela go kgopišega.—Mmo. 7:9.

16. Re ka kgothatša bjang bao ba arabago?

¹⁶ Ge e ba o palelwa ke go araba gantši ka mo o dumago ka gona, o ka theetša ke moka ka morago ga diboka wa reta ba bangwe ka dikarabo tša bona. Seo se ka kgothatša bana beno le dikgaetšedi go no swana le ge eka o be o araba ka dibokeng. (Die. 10:21) Go reta ba bangwe ke e nngwe ya ditsela tša go kgothatšana.   

17. (a) Batswadi ba ka thuša bjang bana ba bona gore ba lokišetše dikarabo tšeo di ba swanetšego? (b) Go ya ka bidio, ke megato efe e mene ya go lokišeletša karabo? (Bona le mongwalo wa tlase)

¹⁷ Ditsela tše dingwe tšeo re ka kgothatšanago ka tšona ge re le dibokeng ke dife? Ge e ba o le motswadi, thuša bana ba gago gore ba lokišeletše dikarabo tšeo di ba swanelago. (Mat. 21:16) Ka dinako tše dingwe, nakong ya thuto go ka bolelwa ka mathata a tša lenyalo, goba a boitshwaro, gomme ngwana wa gago a ka no se kgethwe goba a kgethwa serapeng setee goba tše pedi. Le gona thuša ngwana wa gago go kwešiša gore ke ka baka  la’ng a ka no se kgethwe nako le nako ge a emiša letsogo. Go mo hlalosetša go tlo mo thuša gore a se ke a nyama ge batho ba bangwe ba kgethwa.—1 Tim. 6:18. d

18. Re ka dira’ng gore re pheme go bolela ka rena kudu ge re araba? (Diema 27:2)

¹⁸ Ka moka ga rena re ka lokišetša dikarabo tšeo di tumišago Jehofa le go kgothatša Bakristegotee le rena. (Die. 25:11) Le ge ka dinako tše dingwe re ka swanelwa ke go nea karabo e kopana, re swanetše go phema go bolela kudu ka rena. (Bala Diema 27:2; 2 Bakor. 10:18) Go e na le moo, re swanetše go lwela go bolela ka Jehofa, Lentšu la gagwe le batho ba gagwe. (Kut. 4:11) Ga se phošo go bolela ka diphihlelo tša rena ge e ba potšišo ya serapa e re re dire bjalo. Mohlala wa se re tlo o bona serapeng se se latelago.

19. (a) Go tlo direga’ng ge re naganela batho ba bangwe bao ba lego dibokeng? (Baroma 1:11, 12) (b) Wena ke eng seo o se thabelago ka go araba dibokeng?

¹⁹ Le ge go se na molao wa gore re ka araba bjang, ka moka ga rena re ka nea dikarabo tšeo di kgothatšago. Se se ka no ra gore re se arabe gantši. Goba re ka kgotsofalela dibaka tšeo re di hweditšego tša go araba le go thabela gore ba bangwe le bona ba bile le dibaka tše bjalo. Ge re etiša dikgahlego tša batho ba bangwe pele nakong ya diboka, ka moka ga rena re tlo thabela go “kgothatšana.”—Bala Baroma 1:11, 12.