1. Hlalosa seo se diregilego ge Jesu a be a dira mohlolo wa gagwe wa mathomo.

 NAGANA gore mafelelong a 29 C.E. go be go le bjang ge Jesu a thoma bodiredi bja gagwe. Jesu le mmagwe e lego Maria le ba bangwe ba barutiwa ba gagwe ba laleditšwe lenyalong kua Kana e lego motse wo o lego ka leboa la Natsaretha mo a bego a etšwa gona. Maria ke mogwera wa batho ba ka lapeng leo le nago le lenyalo e bile go ka direga gore o thuša go hlokomela baeng. Eupša nakong ya lenyalo go tšwelela bothata. Beine e a fela, e lego seo se ka dirago gore ba lapa le banyalani bao ba lewe ke dihlong. b Mohlomongwe baeng ke ba bantši go feta kamoo go bego go letetšwe ka gona. Maria o ya go morwa wa gagwe kapelapela ke moka a re go yena: “Ga ba na beine.” (Joh. 2:1-3) Jesu o dira’ng? O dira selo se se makatšago, e lego go fetoša meetse gore e be “beine e bose.”—Joh. 2:9, 10.

2-3. (a) Jesu o dirile mehlolo ya mohuta mang? (b) Re tlo holega bjang ge re ithuta ka mehlolo ya Jesu?

² Jesu o ile a dira mehlolo e mengwe e mentši nakong ya bodiredi bja gagwe. c O ile a diriša matla a gagwe ao a makatšago go thuša batho ba bantši kudu. Ka mohlala, mehlolo e mebedi yeo a ilego a e dira, e lego wa go fepa banna ba 5 000 ke moka ka morago a fepa ba bangwe ba 4 000, e ka ba e ile ya kgoma batho ba 27 000 ge e ba re bala basadi le bana bao ba bego ba le gona. (Mat. 14:15-21; 15:32-38) Go ditiragalo tše ka moka Jesu o fodišitše le bao ba bego ba babja. (Mat. 14:14;  15:30, 31) Nagana gore batho ba bantši ba be ba thabile bjang ge Jesu a be a ba fodiša le go ba fepa ka mohlolo.

³ Lehono go na le dilo tše dintši tšeo re ka ithutago tšona go mehlolo ya Jesu. Sehlogong se, re tlo boledišana ka dilo tšeo re ithutago tšona mehlolong ya Jesu le kamoo dithuto tšeo di tiišago tumelo ya rena ka gona. Ke moka re tlo ithuta le gore re ka ekiša bjang boikokobetšo le kwelobohloko tšeo Jesu a di bontšhitšego ge a be a dira mehlolo.

4. Mehlolo ya Jesu e re ruta gore re tiiše tumelo ya rena go mang?

⁴ Mehlolo ya Jesu e re ruta dithuto tšeo di dirago gore re be le tumelo e tiilego go yena le go Tatagwe, ka gobane Jehofa ke yena yo a bego a thuša Jesu gore a kgone go dira mehlolo yeo. Ditiro 10:38 e re botša gore: “Modimo o mo tloditše ka moya o mokgethwa le ka matla gomme a sepela le naga ka moka a dira botse le go fodiša bohle bao ba gateletšwego ke Diabolo, gobane Modimo o be a na le yena.” Gopola gore dilo ka moka tšeo Jesu a bego a di bolela le go di dira go akaretša le mehlolo yeo a e dirilego di be di bontšha gore o be a nagana le go ikwa go swana le Jehofa. (Joh. 14:9) A re boledišaneng ka dilo tše tharo tšeo re ka ithutago tšona go mehlolo ya Jesu.

5. Ke’ng seo se dirilego gore Jesu a dire mehlolo? (Mateo 20:30-34)

⁵ Sa pele, Jesu le Tatagwe ba re rata kudu. Ge Jesu a be a le mo lefaseng, o ile a bontšha gore o rata batho kudu ka go diriša matla a gagwe go fediša dilo tšeo di bego di ba tshwenya. Ka nako e nngwe, banna ba babedi bao e bego e le difofu ba ile ba mo kgopela gore a ba thuše. (Bala Mateo 20:30-34.) Hlokomela gore Jesu o ile a ba hlomogela pelo ke moka a ba fodiša. Lentšu la Segerika leo le fetoletšwego e le “go hlomoga pelo” le šupa go go ba le maikwelo ao a tseneletšego. Maikwelo ao a kwelobohloko e lego ao a bontšhago gore Jesu o rata batho, a mo dirile gore a fepe batho bao ba bego ba swerwe ke tlala le go fodiša motho yoo a bego a swerwe ke lephera. (Mat. 15:32; Mar. 1:41) Re kgodišegile gore Jehofa e lego Modimo yo a nago le lešoko le legolo le Morwa wa gagwe, ba re rata kudu, e bile ba kwa bohloko ge ba bona re tlaišega. (Luka 1:78; 1 Pet. 5:7) Ruri ba fela pelo ya go fediša mathata ka moka ao a tlaišago batho.

6. Modimo o neile Jesu matla a go dira’ng?

⁶ Sa bobedi, Modimo o neile Jesu matla a go fediša mathata ka moka ao batho ba nago le ona. Ge Jesu a be a dira mehlolo, o be a bontšha gore o na le matla a go fediša mathata ao rena re ka se tsogego re kgonne go a fediša. Ka mohlala, o na le matla a go re lokolla sebeng seo re se hweditšego ka lebaka la Adama, le dilo tšeo di sepedišanago le sona tše bjalo ka bolwetši le lehu. (Mat. 9:1-6; Baroma 5:12, 18, 19) Mehlolo yeo Jesu a e dirilego e bontšhitše gore a ka kgona go fodiša mohuta o mongwe le o mongwe wa bolwetši a ba a tsoša le batho bao ba hlokofetšego. (Mat. 4:23; Joh. 11:43, 44) Le gona, o be a na le matla a go laola madimo a matla le go dira gore meoya e mebe e tšwe bathong. (Mar. 4:37-39; Luka 8:2) Go tloga go kgothatša go tseba gore Jehofa o neile Morwa wa gagwe matla a go dira mehlolo.

7-8. (a) Re kgodišega ka’ng ge re nagana ka mehlolo yeo Jesu a e dirilego? (b) Ke mohlolo ofe wo o felago pelo ya go tlo o bona o direga lefaseng le lefsa?

⁷ Sa boraro, re ka kgodišega gore dilo tše dibotse tšeo re di letetšego Mmušong wa Modimo di tlo direga. Mehlolo yeo Jesu a e dirilego ge a be a le mo lefaseng, e re bontšha seo a tlago go se direla batho mo lefaseng ka  ge e le Kgoši ya Mmušo wa Modimo legodimong. Nagana ka seo Jesu a tlago go re direla sona e se kgale ge e tla be a buša mo lefaseng. Re tlo phela gabotse ka gobane o tlo tloša malwetši ka moka le dilo tše dingwe tšeo di tlaišago batho. (Jes. 33:24; 35:5, 6; Kut. 21:3, 4) Re ka se sa bolawa ke tlala le go tlaišega ka baka la dikotsi tša tlhago. (Jes. 25:6; Mar. 4:41) Re tlo thaba kudu ge re tla be re amogela batho ba gabo rena bao ba tlago go tsošwa “mabitleng.” (Joh. 5:28, 29) Ke mohlolo ofe wo o felago pelo ya go tlo o bona o direga lefaseng le lefsa?

⁸ Ge Jesu a be a dira mehlolo, o ile a bontšha gore o na le boikokobetšo le gore o kwela batho bohloko, e lego dika tšeo re swanetšego go di ekiša. A re boledišaneng ka mehlala e mebedi. A re thomeng ka seo se ilego sa direga monyanyeng wa lenyalo kua Kana.

9. Jesu o ile a dira’ng lenyalong le lengwe? (Joh. 2:6-10)

⁹ Bala Johane 2:6-10. Na Jesu o be a gapeletšega go dira se sengwe ge beine e be e fela lenyalong? Aowa. Ga go na boporofeta bjo bo boletšego e sa le pele gore Mesia o be a tlo dira beine ka mohlolo. Ipotšiše gore o ka ikwa bjang ge e ba dino di ka fela lenyalong la gago. Go ka direga gore Jesu o ile a kwela lapa leo bohloko, kudukudu banyalani. Ke moka a dira se sengwe gore ba se ke ba lewa ke dihlong. Ka gona, ka ge re boletše mathomong a sehlogo se, o ile a dira mohlolo.  O ile a fetoša meetse ao e ka bago dilithara tše 390 gore e be beine e bose kudu. Mohlomongwe o be a dirile beine e ntši e le gore e nngwe e tle e dirišwe nakong e tlago goba e rekišwe e le gore banyalani bao ba bafsa ba be le tšhelete ya go iphediša. Ruri banyalani bao ba bafsa ba ka ba ba ile ba leboga kudu.

10. Ke dilo dife tše dingwe tše bohlokwa tšeo re ithutago tšona go Johane kgaolo 2? (Bona le seswantšho.)

¹⁰ A re boledišaneng ka dilo tšeo re ithutago tšona tšeo go bolelwago ka tšona go Johane kgaolo 2. Na o lemogile gore Jesu ga se a tšhela meetse ka gare ga dinkgo? Go e na le gore a tlatše dinkgo tšeo ka boyena, o ile a botša bahlanka ba moo lenyalong gore e be bona ba di tlatšago. (Ditemana 6,7) Le gona ka morago ga gore Jesu a dire mohlolo woo, ga se a tšea e nngwe ya beine a iša go molaodi wa lenyalo. Go e na le moo, o ile a laela bahlanka gore e be bona ba e išago. (Temana 8) Jesu ga se a ka a tšhela beine ke moka a e emišetša godimo pele ga baeng, a bolela ka go ikgantšha a re, “Enwang beine yeo e dirilwego ke nna.”

11. Mohlolo woo Jesu ao dirilego o re ruta’ng?

¹¹ Mohlolo wa Jesu wa go fetoša meetse gore e be beine o re ruta’ng? Re ithuta go ba le boikokobetšo. Jesu ga se a ikgantšha ka gore o kgona go dira mohlolo, ge e le gabotse ga se a ka a ikgantšha ka dilo tšeo a bego a di dira. O be a ikokobeditše e bile a dula a iša ditheto le ditumišo go Tatagwe. (Joh. 5:19, 30; 8:28) Ge e ba re ka ekiša Jesu gomme ra ba le boikokobetšo, re ka se ikgantšhe ka dilo tšeo re di fihleletšego. Go sa šetšwe dilo tšeo re di dirago ge re hlankela Jehofa, ga se ra swanela go ikgantšha ka tšona eupša re swanetše go ikgantšha ka Modimo yo a thabišago yoo re nago le tokelo ya go mo hlankela. (Jer. 9:23, 24) Re swanetše go mo nea ditheto tšeo di mo swanelago. Re a tseba gore ga go na selo se sebotse seo re ka se dirago ka ntle le thušo ya Jehofa.—1 Bakor. 1:26-31.

12. Tsela e nngwe yeo re ka ekišago boikokobetšo bja Jesu ke efe? Nea mohlala.

¹² A re boneng gore ke tsela efe e nngwe yeo re ka ekišago mohlala wa Jesu wa boikokobetšo. Nagana ka mohlala wo. Mogolo o fetša nako e ntši a thuša mohlanka wa bodiredi wa mofsa go lokišetša polelo ya gagwe ya mathomo ya phatlalatša. Mafelelong ngwanabo rena wa mofsa o nea polelo e kgothatšago, ke moka batho ka phuthegong ba a thaba. Ka morago ga diboka, motho yo mongwe o ya go mogolo yoo ke moka a re go yena: ‘Na o kwele gore ngwanešo semangmang o file polelo e kgahlišago gakaakang?’ Na mogolo yoo o swanetše gore: ‘Ee, eupša ke feditše nako e ntši ke mo thuša.’ Goba na o swanetše go bolela ka boikokobetšo gore, ‘Ee, e be e kgahliša, e bile ke ikgantšha ka yena.’ Ge e ba re ikokobeditše re ka se nyake go retwa ka lebaka la dilo tše dibotse tšeo re di direlago batho ba bangwe. Ka ge re tseba gore Jehofa o bona dilo tšeo re di dirago e bile o di tšeela godimo, re a kgotsofala. (Bapiša le Mateo 6:2-4; Baheb. 13:16) Ke nnete gore re thabiša Jehofa ge re ekiša Jesu ka go bontšha boikokobetšo.—1 Pet. 5:6.

13. Jesu o bona’ng ge a eya motseng wa Naini, gona o ile a dira’ng? (Luka 7:11-15)

¹³ Bala Luka 7:11-15. Nagana ka boemo bjo bongwe bjo bo ilego bja direga Nakong ya bodiredi bja Jesu. O be a sepela a eya motseng wa Naini ya kua Galilea yeo e lego kgauswi le motse woo moporofeta Elisha a ilego a tsoša morwa wa mosadi wa Moshunema. Morwa yoo o be a hlokofetše mengwaga e ka bago e 900 pele ga moo. (2 Dikg. 4:32-37)  Ge Jesu a batamela kgorong ya motse, o bona lešaba leo le rwelego mohu le etšwa. Boemo bjo bo kweša bohloko kudu ka ge mosadi yoo a hlokofaletšwego ke monna, a lahlegetšwe le ke ngwana wa gagwe a nnoši. Eupša mma yoo a hlokofaletšwego ke ngwana ga a noši, o na le lešaba leo le tšwago motseng. Bjale Jesu o a ba emiša ke moka o direla mma yoo a hlokofaletšwego selo seo se makatšago, o tsoša morwa wa gagwe. Yo ke motho wa mathomo go batho ba bararo bao Jesu a ba tsošitšego bahung, bao go bolelwago ka bona ka di Ebangeding.

14. Ke dilo dife tše dingwe tše bohlokwa tšeo re ithutago tšona go Luka kgaolo 7? (Bona le seswantšho.)

¹⁴ A re boledišaneng ka dilo tšeo re ithutago tšona tšeo go bolelwago ka tšona go Luka kgaolo 7. Na o lemogile gore Jesu “o ile a bona” mma yo a bego a hlokofaletšwe a lla, ke moka “a mo šokela”? (Temana 13) Go ka direga gore ge Jesu a be a bona mosadi yoo a sepela pele ga ngwana wa gagwe yo a hlokofetšego a lla, o ile a mo kwela bohloko. Jesu ga se a no šokela mosadi yoo feela, eupša o ile a mmontšha gore o mo kwela bohloko. Ga go pelaelo gore o ile a bolela le yena ka go mo kgothatša, a re: “Lesa go lla,” ke moka a dira se sengwe go thuša mosadi yoo. O ile a tsoša ngwana yoo gomme a “mo nea mmagwe.”—Temana 14, 15.

15. Mohlolo wo Jesu a o dirilego o re ruta’ng?

¹⁵ Mohlolo wa Jesu wa go tsoša morwa wa mosadi wa mohlologadi o re ruta’ng? Re ithuta gore re swanetše go bontšha batho bao ba hlokofaletšwego kwelobohloko. Ke nnete gore re ka se kgone go tsoša batho bao ba hlokofetšego go swana le ge Jesu a dirile. Eupša re ka mo ekiša ka go ba šedi gomme ra ithuta go kwela batho bao ba hlokofaletšwego bohloko. Re ka bontšha batho ba bangwe gore re ba kwela bohloko ka go bolela le go dira dilo tšeo di ka ba thušago le go ba homotša. d (Die. 17:17; 2 Bakor. 1:3, 4; 1 Pet. 3:8) Go no bolela mantšu a sego kae goba go no ba direla dilo tše dinyenyane le gona go ka ba kgothatša kudu.

16. Go ya ka seo re se bonago seswantšhong, o ithuta’ng go seo se ilego sa diragalela mma yo a bego a sa tšwa go hlokofalelwa ke ngwana wa gagwe?

 ¹⁶ Ekwa ka seo se ilego sa direga mengwaga e sego kae e fetilego. Ge go be go opelwa dibokeng kgaetšedi yo mongwe o ile a lemoga gore mma yo a bego a le kgauswi le yena o be a lla. Kopelo yeo e be e bolela ka kholofelo ya tsogo, le gona mma yoo o be a sa tšwa go hlokofalelwa ke morwedi wa gagwe yo monyenyane. Ka ge kgaetšedi yoo a be a tseba seo, o ile a ya go mma yoo kapelapela, a mo gokarela gomme a feleletša kopelo yeo le yena. Mma yoo ka morago o itše: “Ke ile ka bona gore bana babo rena ba nthata kudu.” O leboga gore o ile a ya dibokeng letšatšing leo. O tšwela pele ka gore: “Re hwetša thušo Holong ya Mmušo.” Re ka kgodišega gore Jehofa o a bona e bile o tšeela godimo le dilo tše dinyenyane tšeo re di dirago go bontšha gore re kwela bao ba hlokofaletšwego bohloko, e lego bao “meoya ya bona e nyamilego o šoro.”—Ps. 34:18.

17. Re ithutile’ng sehlogong se?

¹⁷ Go ithuta Diebangedi tšeo di bolelago ka mehlolo yeo Jesu a e dirilego go ka re hola kudu. Di re ruta gore Jehofa le Jesu ba re rata kudu. Jesu o na le matla a go fediša mathata a batho ka moka, e bile re ka tshepa gore re kgauswi le go hwetša ditšhegofatšo tšeo re di tshepišitšwego ge Mmušo wa Modimo o tla be o buša mo lefaseng. Ge re dutše re bala Diebangedi tše, re ka naganišiša kamoo re ka ekišago dika tša Jesu Kriste ka gona. O ka itirela lenaneo la thuto ya motho ka noši goba wa dira lenaneo la borapedi bja lapa moo le tlago go boledišana ka mehlolo e mengwe yeo Jesu a e dirilego. Bona dithuto tšeo o ka di hwetšago gomme o abelane le ba bangwe ka seo o ithutilego sona. Ruri le tlo kgona go boledišana ka dilo tše dintši tšeo di kgothatšago.—Baroma 1:11, 12.

18. Re tlo boledišana ka’ng sehlogong se se latelago?

¹⁸ Go ya mafelelong a bodiredi bja gagwe, Jesu o ile a tsoša motho wa boraro go batho ba bararo bao go bolelwago ka bona ka Diebangeding. Eupša tsogo ye e be e fapane. O ile a tsoša mogwera wa gagwe yo a bego a mo rata e bile o dirile seo ka tlase ga maemo a fapanego. Ke’ng seo re ithutago sona ka Ebangeding yeo e bolelago ka mohlolo woo? Le gona, re ka dira’ng gore re tiiše tumelo ya rena ya gore bahu ba tlo tsošwa? Re tlo araba dipotšišo tše sehlogong se se latelago.