1-2. Ke eng seo re swanetšego go se dira ge re sa letetše lefase le lefsa gore le tle?

 RE TLOGA re leboga gore Jehofa o tshepiša go tloša tshepedišo ye ya dilo, ke moka a tliše lefase le lefsa la go loka. (2 Pet. 3:13) Le ge re sa tsebe gore lefase leo le lefsa le tlo fihla neng, eupša dilo tšeo di diregago gona bjale di a bontšha gore le tlo fihla e se kgale.—Mat. 24:32-34, 36; Dit. 1:7.

² Go sa šetšwe gore re na le nako e kaaka’ng re tseba therešo, ka moka ga rena re swanetše go tiiša tumelo ya rena go dilo tšeo Modimo a di tshepišitšego. Ka baka la’ng? Ka gobane le ge e ba motho a na le tumelo e tiilego, ka nako e nngwe e ka fokola. Ge e le gabotse, moapostola Paulo o itše tumelo e fokolago e swana le “sebe se se re tatetšago gabonolo.” (Baheb. 12:1) E le gore tumelo ya rena e se ke ya fokola, re swanetše go dula re naganišiša ka dilo tšeo di diregago tšeo di bontšhago gore lefase le lefsa le tlo fihla e se kgale.—Baheb. 11:1.

3. Re tlo boledišana ka’ng sehlogong se?

³ Sehlogong se, re tlo boledišana ka ditsela tše tharo tšeo di tlago go re thuša go tiiša tumelo go dilo tšeo Jehofa a tshepišitšego go re direla tšona lefaseng le lefsa: (1) go naganišiša ka topollo, (2)  go naganišiša ka matla a Jehofa, le (3) go dula re dira dilo tša Jehofa. Ke moka re tlo boledišana ka gore molaetša woo Jehofa a ilego a o nea Habakuku o tiiša bjang tumelo ya rena lehono. A re thomeng ka go boledišana ka dilo tše dingwe tšeo di ka re diragalelago gona bjale, tšeo di nyakago gore re tiiše tumelo ya rena go dilo tšeo Modimo a tshepišitšego go tlo re direla tšona lefaseng le lefsa.

 MAEMO AO A NYAKAGO GORE RE BE LE TUMELO E TIILEGO

4. Ke diphetho dife tšeo di hlokago gore re be le tumelo e tiilego ge re di dira?

⁴ Letšatši le lengwe le le lengwe re dira diphetho tšeo di hlokago gore re be le tumelo e tiilego. Ka mohlala, re dira diphetho ge go etla tabeng ya go kgetha bagwera, go ithabiša, thuto, go nyala, go ba le bana le mošomo. Re swanetše go ipotšiša gore, ‘na diphetho tšeo ke di dirago di bontšha gore ke dumela gore tshepedišo ye ke ya nakwana gomme e se kgale e tla tšeelwa legato ke lefase le lefsa la Modimo? Goba na diphetho tšeo ke di dirago di swana le tša batho bao ba phelago tše e kego lehu ke mafelelo a dilo ka moka?’ (Mat. 6:19, 20; Luka 12:16-21) Re tlo dira diphetho tše bohlokwa ge e ba re tiiša tumelo ya rena ya gore lefase le lefsa le kgauswi.

5-6. Ke ka baka la’ng re swanetše go ba le tumelo e tiilego ge re lebeletšane le mathata? Nea mohlala.

⁵ Re swanetše go ba le tumelo e tiilego e le gore re kgone go kgotlelela mathata. Re ka tlaišwa, ra ba le bolwetši bjo šoro goba dilo tše dingwe tšeo di ka re nyamišago. Mathomong re ka bona eka re ka kgona go kgotlelela mathata a rena. Eupša ge mathata ao a tšea nako e telele, go ka nyakega gore re be le tumelo e tiilego gore re kgone go a kgotlelela le gore re kgone go hlankela Jehofa re thabile.—Baroma 12:12; 1 Pet. 1:6, 7.

⁶ Ge re dutše re lebeletšane le mathata ao re ka bona eka lefase le lefsa leo Jehofa a re tshepišitšego lona le ka se tsoge le tlile. Na se se bolela gore tumelo ya rena e a fokola? Ga go bjalo. Nagana ka mohlala wo. Ge marega a tonya kudu, re ka bona eka selemo se ka se tsoge se fihlile. Eupša ge nako e dutše e eya, selemo se tla fihla. Ka mo go swanago, ge e ba re nyamile kudu, re ka bona eka lefase le lefsa le ka se tsoge le bile gona. Eupša ge tumelo ya rena e tiile kudu, re a tseba gore dilo tšeo Jehofa a re tshepišitšego tšona di tlo direga. (Ps. 94:3, 14, 15; Baheb. 6:17-19) Se se ka dira gore go hlankela Jehofa go tle pele maphelong a rena.

7. Ke tsela efe ya go nagana yeo re swanetšego go e phema?

⁷ Re hloka tumelo e tiilego gore re kgone go bolela ditaba tše dibotse. Batho ba bantši bao re ba botšago “ditaba tše dibotse” ba nagana gore lefase le lefsa la Modimo le ka se tsoge le bile gona. (Mat. 24:14; Hesek. 33:32) Ga re nyake gore re feleletše re swana le bona. E le gore re se ke ra swana le bona, re swanetše go dula re tiiša tumelo ya rena. A re boledišaneng ka ditsela tše tharo tšeo di ka re thušago go dira seo.

NAGANIŠIŠA KA TOPOLLO

8-9. Go naganišiša ka topollo go tiiša bjang tumelo ya rena?

⁸ Tsela ya mathomo yeo re ka tiišago tumelo ya rena ka yona ke ka go naganišiša ka topollo. Topollo e re kgonthišetša gore dilo tšeo Modimo a di tshepišitšego di tlo direga ka nnete. Ge re naganišiša ka gore go tlile bjang gore go be le topollo le gore e akaretša’ng, re tla ba le tumelo ya gore Modimo o tla re nea bophelo bjo bo sa felego bjo a re tshepišitšego bjona lefaseng le le kaone. Ke ka baka la’ng re re’alo?

⁹ Topollo e akaretša’ng? Jehofa o romile Morwa wa gagwe wa leitšibulo, yena yoo a mo ratago, mogwera wa gagwe yo mogolo, gore a tloge legodimong e le gore a tle a phele mo lefaseng e le motho yo a phethagetšego. Jesu o ile a kgotlelela mehuta ka moka ya mathata nakong ya ge a be a le mo lefaseng. O ile a tlaišega le go hwa lehu le sehlogo. Ruri Jehofa o re diretše selo se segolo kudu! Modimo wa rena yo lerato o be  a ka se dumelele Morwa wa gagwe gore a tlaišege le go hwa gore re no ipshina ka bophelo ka nako e nyenyane. (Joh. 3:16; 1 Pet. 1:18, 19) Ka ge Jehofa a re neile morwa wa gagwe gore a re thuše, o tlo kgonthišetša gore re phela go ya go ile lefaseng le lefsa.

NAGANIŠIŠA KA MATLA A JEHOFA

10. Go ya ka Baefeso 3:20, ke dilo dife tšeo Jehofa a kgonago go di dira?

¹⁰ Tsela ya bobedi yeo re ka tiišago tumelo ya rena ka yona, ke ka go naganišiša ka matla a Jehofa. O na le matla a go dira dilo ka moka tšeo a tshepišitšego go di dira. Lehono batho ba bantši ba nagana gore bophelo bjo bo sa felego lefaseng le lefsa bjoo Modimo a re tshepišitšego bjona bo ka se kgonege. Eupša Jehofa o dula a tshepiša go re direla dilo tšeo batho ba ka se tsogego ba kgonne go di dira. Modimo a ka kgona go dira dilo tšeo ka gobane ke Ramatlaohle. (Jobo 42:2; Mar. 10:27) Re ka se makatšwe ke go bona a re tshepiša go re direla dilo tše dibotse.—Bala Baefeso 3:20.

11. Nea mohlala wa dilo tše di makatšago tšeo Modimo a ilego a tshepiša go di dira. (Bona lepokisi leo le rego “ Tše Dingwe tša Ditshepišo tše di Makatšago Tšeo di Phethagetšego.”)

¹¹ Ekwa ka tše dingwe tša dilo tšeo go bego go bonagala eka di ka se kgonege tšeo Jehofa a bego a di tshepišitše batho ba gagwe ba nakong e fetilego. O ile a botša Aborahama le Sara gore ba be ba tlo ba le morwa le ge ba be ba tšofetše. (Gen. 17:15-17) Le gona, o ile a botša Aborahama gore ditlogolo tša gagwe di be di tlo fiwa naga ya Kanana. Mengwageng e mentši yeo Baisiraele bao e lego ditlogolo tša Aborahama ba e feditšego ba le Egipita, go be go ka bonagala eka seo Modimo a se tshepišitšego se ka se tsoge se diragetše. Eupša se ile sa direga. Ka morago, Jehofa o ile a tsebiša gore Elisabetha yoo a bego a tšofetše o be a tlo ba le ngwana. Tshepišo e nngwe yeo e ilego ya phethagala, ke yeo Jehofa a e boditšego Maria yoo a bego a se a ka a robala le monna gore o tlo mmelegela Morwa. E be e le kgale Jehofa a boletše ka tshepišo yeo kua serapeng sa Edene!—Gen. 3:15.

12. Joshua 23:14 le Jesaya 55:10, 11 di re kgonthišetša bjang gore Jehofa o na le matla?

¹² Re ka tiiša tumelo ya rena ya gore Jehofa o na le matla a go tliša lefase le lefsa ka go naganišiša ka dilo tšeo di ngwadilwego ka Beibeleng, tšeo Jehofa a ilego a di dira. Go dira bjalo go tlo dira gore re kgone go thuša ba bangwe go kwešiša gore lefase le lefsa leo Modimo a le tshepišitšego ga se toro feela. (Bala Joshua 23:14; Jesaya 55:10, 11.) Ge Jehofa a be a bolela ka magodimo a mafsa le lefase le lefsa, o itše: “Mantšu a a botega e bile ke a therešo.”—Kut. 21:1, 5.

DULA O DIRA DILO TŠA MODIMO

13. Diboka di ka tiiša tumelo ya rena bjang? Hlalosa.

¹³ Tsela ya boraro yeo re ka tiišago tumelo ya rena ka yona ke ka go dula re dira dilo tša Modimo. Ka mohlala, ekwa kamoo re holegago ka gona ge re le dibokeng. Anna yo a feditšego mengwaga e mentši a hlankela go mehuta ya go fapafapana ya tirelo ya nako e tletšego o re: “Go ya dibokeng go nthuša gore ke dule ke na le tumelo e tiilego. Le ge motho yo a rutago a sa kgone go ruta gabotse goba a sa bolele selo se itšego se sefsa, ka mehla ke dula ke hwetša selo se sengwe seo se nthušago gore ke kwešiše Beibele gakaone. Le gona seo se tiiša tumelo ya ka.” b Le rena tumelo ya rena e a tia ge re ekwa dikarabo tša bana babo rena le dikgaetšedi dibokeng.—Baroma 1:11, 12; 10:17.

14. Go bolela ditaba tše dibotse go tiiša tumelo ya rena bjang?

 ¹⁴ Re tiiša tumelo ya rena ka go ya tšhemong. (Baheb. 10:23) Barbara yo a nago le mengwaga e fetago e 70 a hlankela Jehofa o re: “Ke lemogile gore mošomo wa go bolela ditaba tše dibotse o tiiša tumelo. Nako le nako ge ke bolela le batho ka ditshepišo tša Jehofa tšeo di kgahlišago, tumelo ya ka e tia le go feta.”

15. Thuto ya motho ka noši e tiiša bjang tumelo ya rena? (Bona le diswantšho.)

¹⁵ Thuto ya motho ka noši ke e nngwe ya dilo tšeo di tiišago tumelo ya rena. Susan yena o re o thušwa ke go tseba gore o tlo bala ka matšatši afe. O re: “Ka Sontaga, ke lokišetša Thuto ya Morokami woo o tlago go swarwa bekeng e latelago. Ka Mošupologo le Labobedi ke lokišeletša diboka tša gare ga beke. Matšatši a mangwe ao a šetšego ke dira thuto ya motho ka noši. Susan o tšwela pele a tiiša tumelo ya gagwe ka ge a kgomaretše lenaneo la gagwe la go ithuta. Irene yoo a hlanketšego ntlongkgolo ya Dihlatse tša Jehofa ka mengwaga e mentši, o re o tiiša tumelo ya gagwe ka go ithuta boporofeta bja Beibele. O re: “Ke makatšwa ke gore dilo tšeo Jehofa a ilego a bolela e sa le pele gore di tlo direga, di phethagetše le go dilo tšeo di ka bonagalago eka ke tše dinyenyane.” c

“E TLA PHETHEGA E LE KA KGONTHE”

16. Ke ka baka la’ng mantšu ao Jehofa a a boditšego Habakuku a re hola lehono? (Baheberu 10:36, 37)

¹⁶ Ke kgale bahlanka ba bangwe ba Jehofa ba letetše gore tshepedišo ye ya dilo e fele. Batho ba bangwe ba nagana gore go tšea nako gore dilo tšeo Jehofa a di tshepišitšego di direge. Eupša Jehofa o a tseba gore bahlanka ba gagwe ba ikwa bjang. Ge e le gabotse, o ile a kgonthišetša moporofeta  Habakuku gore: “Pono e letetše lebaka la yona, e akgofetše bofelong gomme e ka se aketše. Gaešita le ge e ka diega, e letele; gobane e tla phethega e le ka kgonthe. E ka se diege!” (Habak. 2:3) Na seo Modimo a se boletšego se be se hola Habakuku feela? Goba na mantšu ao a a re hola lehono? Jehofa o ile a budulela moapostola Paulo gore a diriše mantšu a ge a be a kgothaletša Bakriste bao ba bego ba fela pelo ya gore lefase le lefsa le tle. (Bala Baheberu 10:36, 37.) Le ge go ka bonagala eka dilo tšeo Modimo a re tshepišitšego tšona di a diega, re ka kgodišega gore di ‘tlo phethega e le ka kgonthe, di ka se diege!’

17. Kgaetšedi yo mongwe o ile a diriša bjang keletšo yeo Jehofa a ilego a e nea Habakuku?

¹⁷ Bahlanka ba bantši ba Jehofa ba ile ba fetša mengwaga e mentši ba diriša keletšo ya Jehofa ya gore ba ‘dule ba letile.’ Ka mohlala, Louise yo a thomilego go hlankela Jehofa ka 1939, o re: “Ka nako yeo ke be ke nagana gore Haramagedone e tlo fihla pele ke fetša sekolo, eupša ga se ya ka ya fihla. Ge nako e dutše e eya ke ile ka hwetša go le bohlokwa gore ke ithute ka dipego tša ka Beibeleng tšeo di bolelago ka go ‘leta,’ e lego dipego tšeo di bolelago ka batho ba go swana le Noa, Aborahama, Josefa, le ba bangwe bao ba ilego ba leta ka nako e telele gore Jehofa a ba putse. Go dula ke letile go thušitše nna le ba bangwe gore re kgodišege gore lefase le lefsa le kgauswi.” Batho ba bangwe ba bantši bao le bona e lego kgale ba hlankela Jehofa, ba dumelelana le seo!

18. Go naganišiša ka tlholo go tiiša bjang tumelo ya rena ya gore lefase le lefsa le kgauswi?

¹⁸ Ke nnete gore lefase le lefsa ga se la tšwa le fihla, eupša nagana ka dilo tšeo di šetšego di le gona. Tša go swana le dinaledi, mehlare, diphoofolo le batho. Ga go na motho yo a ka belaelago gore dilo tše ka moka ke tša kgonthe le ge mathomong di be di se gona. Ga bjale di gona ka gobane Jehofa o di bopile. (Gen. 1:1, 26, 27) Modimo wa rena o tshepišitše le gore o tlo tliša lefase le lefsa. O tlo dira dilo tšeo a di tshepišitšego. Lefaseng le lefsa, batho ba tla thabela go phela go ya go ile ba sa babje. Re ka kgodišega gore lefase le lefsa le tla fihla ka nako ya maleba yeo Modimo a e beilego.—Jes. 65:17; Kut. 21:3, 4.

19. O ka tiiša tumelo ya gago bjang?

¹⁹ Ge o sa letile, dira sohle seo o ka se kgonago gore o tiiše tumelo ya gago. Dula o leboga topollo. Naganišiša ka matla a Jehofa. Dula o dira dilo tša Modimo. Ge o ka dira dilo tše, o tla ba gare ga “bao ka tumelo le go se fele pelo ba jago bohwa bja dikholofetšo.”—Baheb. 6:11, 12; Baroma 5:5.