1. Batho ba Modimo ba be ba rulagantšwe bjang lekgolong la pele la mengwaga?

 GE JEHOFA a nea batho ba gagwe dikabelo, o letetše gore ba di phethe ka tsela e rulagantšwego. (1 Bakor. 14:33) Ka mohlala, ke thato ya Jehofa gore ditaba tše dibotse di bolelwe lefaseng ka moka. (Mat. 24:14) Jehofa o neile Jesu boikarabelo bja go kgonthišetša gore mošomo wo o a dirwa. Jesu o ile a kgonthišetša gore mošomo wo o dirwa ka tsela e rulagantšwego gabotse. Lekgolong la pele la mengwaga ge diphuthego di be di hlongwa mafelong a fapanego, go ile gwa kgethwa bagolo gore ba etelele pele le gore ba nee tlhahlo. (Dit. 14:23) Kua Jerusalema go ile gwa kgethwa sehlopha sa bagolo, seo se bego se na le baapostola le banna ba bagolo bao ba bego ba dira diphetho tšeo go bego go letetšwe gore diphuthego ka moka di di latele. (Dit. 15:2; 16:4) “Diphuthego di ile tša tšwela pele di matlafatšwa tumelong le go oketšega ka palo” ka gobane bana babo rena le dikgaetšedi ba be ba latela tlhahlo yeo ba bego ba e hwetša go bagolo.—Dit. 16:5.

2. Ga e sa le go tloga ka 1919, Jehofa o be a hlahla bjang batho ba gagwe le go ba nea dijo tša moya?

² Jehofa o sa tšwela pele go rulaganya batho ba gagwe lehono. Ga e sa le go tloga ka 1919, Jesu o be a dutše a diriša sehlopha sa banna ba tloditšwego gore ba rulaganye modiro wa go bolela ditaba tše dibotse le go nea balatedi ba gagwe dijo tša moya. a (Luka 12:42) Go molaleng gore Jehofa o šegofatša mošomo wa sehlopha seo.—Jes. 60:22; 65:​13, 14.

3-4. (a) Bontšha kamoo re holegago ka gona ge re rulagantšwe gabotse. (b) Re tlo boledišana ka’ng sehlogong se?

 ³ Ge nkabe re be re sa rulaganywa gabotse, re be re ka se kgone go phetha mošomo wo Jesu a re neilego ona. (Mat. 28:​19, 20) A re re ka mohlala, go be go se na ditšhemo tšeo di abilwego, motho yo mongwe le yo mongwe o be a ka šoma moo a ratago gona. Mafelo a mangwe a be a ka šongwa gantšhi le gantšhi mola a mangwe a be a ka se fihlelelwe ka ditaba tše dibotse. Nagana ka ditsela tše dingwe tšeo re holegago ka tšona ka baka la go rulaganywa gabotse.

⁴ Jesu o sa tšwela pele go re rulaganya le lehono go swana le ge a ile a rulaganya balatedi ba gagwe nakong ya ge a be a le mo lefaseng. Sehlogong se, re tlo boledišana ka mohlala wo Jesu a o beilego le kamoo mokgatlo wa rena o o latelago ka gona lehono. Re tlo bona le gore re ka bontšha bjang gore re bota mokgatlo wa Jehofa.

MOKGATLO WA RENA O EKIŠA MOHLALA WA JESU

5. Ke tsela efe e nngwe yeo re latelago mohlala wa Jesu ka yona? (Joh. 8:28)

⁵ Jesu o ithutile go Tatagwe wa legodimong ka dilo tšeo a swanetšego go di dira le dilo tšeo a swanetšego go di bolela. Mokgatlo wa Jehofa o ekiša mohlala wa Jesu ka go thea dithuto tša wona Lentšung la Modimo. (Bala Johane 8:28; 2 Tim. 3:​16, 17) Re dula re gopotšwa gore re bale Lentšu la Modimo le go le diriša. Re holega bjang ge re diriša keletšo ye?

6. Ke tsela efe e bohlokwa yeo re holegago ka yona ge re ithuta Beibele?

⁶ Re holega kudu ge re ithuta Beibele le go diriša dikgatišo tšeo di theilwego go yona. Ka mohlala, re kgona go bapetša seo Beibele e se rutago le tlhahlo yeo re e hwetšago go mokgatlo. Ge re bona gore tlhahlo yeo re e hwetšago e theilwe Mangwalong, re tlo kgona go bota mokgatlo wa Jehofa kudu.—Baroma 12:2.

7. Ke molaetša ofe woo Jesu a bego a bolela ka wona, gona mokgatlo wa Jehofa o ekiša bjang mohlala wa gagwe?

⁷ Jesu o ile a “bolela ditaba tše dibotse tša Mmušo wa Modimo.” (Luka 4:​43, 44) Le gona, Jesu o ile a laela barutiwa ba gagwe gore le bona ba bolele ka Mmušo. (Luka 9:​1,2; 10:​8,9) Lehono, batho ka moka bao ba lego ka mokgatlong wa Jehofa ba bolela ka Mmušo go sa šetšwe gore ba dula kae le gore ba na le maikarabelo afe ka mokgatlong.

8. Re neilwe tokelo efe?

⁸ Ke tokelo go botša batho ba bangwe ka Mmušo wa Modimo! Ga se mang le mang a hwetšago tokelo yeo. Ka mohlala, nakong ya ge Jesu a be a le mo lefaseng, ga se a dumelela meoya e mebe gore e nee bohlatse ka yena. (Luka 4:41) Lehono, pele motho a ka ya tšhemong le batho ba Jehofa, o swanetše go phela ka tsela yeo e kgahlišago Jehofa. Re bontšha gore re tšeela godimo tokelo ya go bolela ditaba tše dibotse ka go nea bohlatse go gongwe le go gongwe mo re ka kgonago. Le rena re nyaka go swana le Jesu, ka gona re dira sohle seo re ka se kgonago gore re botše batho ditaba tše dibotse le go ba ruta therešo.—Mat. 13:​3, 23; 1 Bakor. 3:6.

9. Mokgatlo o dira’ng gore o tsebiše batho ka leina la Modimo?

⁹ Jesu o ile a tsebatša leina la Modimo. Ge a be a rapela Tatagwe wa legodimong, o itše: “Ke ba tsebišitše leina la gago.” (Joh. 17:26) Mokgatlo wa Jehofa o ekiša mohlala wa Jesu ka go dira sohle seo o ka se kgonago gore o tsebiše batho ka leina la Modimo. Beibele ya Phetolelo ya Lefase le Lefsa ya Mangwalo a Makgethwa, e bapetše karolo e kgolo ka go bušetša leina la Modimo mo le swanetšego go ba gona. Ga  bjale phetolelo ya Beibele ye e feletšego goba karolwana ya yona e hwetšagala ka maleme a fetago a 270. Ge o ka bala Appendix A4 le A5 ka phetolelong ya Seisemane, o tlo hwetša dintlha tše di oketšegilego mabapi le go bušetšwa ga leina la Modimo ka Beibeleng. Appendix C, yeo le yona e lego ka phetolelong yeo, e tlo go thuša go hwetša bohlatse bjo bo oketšegilego bja gore leina la Modimo le tšwelela ka makga a 237 ka Mangwalong a Bakriste a Segerika.

10. Phihlelo ya mosadi wa kua Myanmar e go ruta’ng?

¹⁰ Go swana le Jesu, re nyaka go thuša batho ba bantšhi kamoo re ka kgonago ka gona gore ba tsebe leina la Modimo. Ka morago ga gore mosadi yo mongwe wa mengwaga e 67 wa go tšwa Myanmar a ithute gore Modimo o na le leina, o ile a thoma go lla gomme a re: “Ke mathomo bophelong bja ka ke ekwa gore leina la Modimo ke Jehofa. . . . Le tloga le nthutile selo sa bohlokwa kudu.” Phihlelo ye e re ruta gore ge batho ba dipelo tšeo di lokilego ba ithuta ka leina la Modimo, seo se ka fetoša maphelo a bona.

TŠWELA PELE O BONTŠHA GORE O BOTA MOKGATLO WA RENA

11. Bagolo ba ka bontšha bjang gore ba tshepa mokgatlo wa Jehofa? (Bontšha le seswantšho.)

¹¹ Tsela e nngwe yeo bagolo ba ka bontšhago ka yona gore ba bota mokgatlo wa Modimo ke efe? Ge ba hwetša tlhahlo, ba swanetše go e bala ka kelohloko ke moka ba e diriše kamoo ba ka kgonago ka gona. Ka mohlala, ga ba no hwetša tlhahlo ya go nea dipolelo goba go rapela ge ba le dibokeng eupša ba hwetša le tlhahlo yeo e ka ba thušago go hlokomela dinku tša Kriste ka gona. Bagolo bao ba dirišago tlhahlo ya mokgatlo ba thuša bao ba ba hlokomelago gore ba ikwe ba bolokegile e bile ba ratwa.

12. (a) Ke ka baka la’ng re swanetše go kwa bao ba etelelago pele? (Baheb. 13:​7, 17) (b) Ke ka baka la’ng re swanetše go šetša dika tše dibotse tša bao ba etelelago pele?

¹² Ge bagolo ba re nea tlhahlo re swanetše go e latela ka go rata. Ge re dira bjalo, go tlo ba bonolo gore bao ba etelelago pele ba dire mošomo wa bona. Beibele e re kgothaletša gore re theetše le go ikokobeletša bao ba etelelago pele. (Bala Baheberu 13:​7, 17.) Seo se ka ba thata ka dinako tše dingwe. Ka baka la’ng? Ka gobane banna ba ga se ba phethagala. Eupša ge e ba re ka šetša kudu mafokodi a bona go e na le dika tša bona tše dibotse, re tla ba re thuša manaba a rena. Ke ka baka la’ng re re’alo? Re tla be re bontšha gore ga re bote mokgatlo wa Modimo, e lego seo baganetši ba rena ba nyakago re se dira. Re swanetše go dira’ng gore re tsebe le go ganetša maaka ao manaba a rena a a bolelago?

O SE KE WA DUMELELA BATHO BA GO ŠITIŠA GO BOTA MOKGATLO WA JEHOFA

13. Manaba a Modimo a leka bjang go dira gore mokgatlo wa gagwe o bonagale eka ke o mobe?

¹³ Batho bao ba ganetšanago le Modimo ba rata go dira gore go bonagale eka dilo tše dibotse tšeo di dirwago ka mokgatlong, di bonagale eka ke tše mpe. Ka mohlala, Mangwalo a re ruta gore Jehofa o letetše gore batho bao ba mo hlankelago, e be bao ba hlwekilego mmeleng le boitshwarong e bile ba mo rapele ka tsela yeo a e amogelago. O letetše gore motho yo mongwe le yo mongwe yo a sa itshwarego gabotse e bile a sa itshole, a ntšhwe ka phuthegong. (1 Bakor. 5:​11-13; 6:​9, 10) Re kwa taelo yeo ya Mangwalo. Eupša batho bao ba ganetšanago le rena ba rata go re latofatša ka gore ga re rate batho, ga re theetše e bile re a ahlola.

14. Ke mang yo a phatlalatšago ditaba tša maaka ka mokgatlo wa Jehofa?

¹⁴ Re swanetše go tseba gore ke mang a hlaselago  mokgatlo. Sathane Diabolo ke yena a phatlalatšago ditaba tša maaka ka mokgatlo. Ke “tatago maaka.” (Joh. 8:44; Gen. 3:​1-5) Re swanetše go letela gore Sathane a diriše bao ba mo thekgago go phatlalatša ditaba tša maaka ka mokgatlo wa Jehofa. Se se bonagetše lekgolong la pele la mengwaga.

15. Ke’ng seo baetapele ba bodumedi ba ilego ba se dira Jesu le balatedi ba gagwe?

¹⁵ Lekgolong la pele la mengwaga, bao ba thekgago Sathane, ba ile ba bolela maaka ka Morwa wa Modimo yo a phethagetšego yo a bego a dira mehlolo. Ka mohlala, baetapele ba bodumedi ba ile ba botša batho gore matla ao Jesu a nago le ona a go leleka batemona, o a neilwe ke “mmuši wa batemona.” (Mar. 3:22) Nakong ya ge Jesu a sekišwa, baetapele ba bodumedi ba ile ba latofatša Jesu ka gore o senya Modimo leina ba ba ba kgothaletša batho gore ba mmolaye. (Mat. 27:20) Ka morago ge balatedi ba Kriste ba be ba bolela ditaba tše dibotse, bao ba bego ba ba ganetša ba ile ba “hlohleletša gampe batho ba ditšhaba” gore ba tlaiše Bakriste bao. (Dit. 14:​2, 19) Ge Morokami wa December 1, 1998 o bolela ka lengwalo la Ditiro 14:​2, o itše: “Batho bao ba thekgago Sathane, ba ile ba gana molaetša woo Bakriste ba bego ba o bolela ba ba ba bolela dilo tše mpe ka bona le go dira gore batho ba se ke ba ba theetša e bile ba ba hloye.”

16. Ke’ng seo re swanetšego go se gopola ge re ekwa dipego tša maaka?

¹⁶ Sathane ga se a bolela maaka lekgolong la pele la mengwaga feela. Le lehono o sa dutše a “timetša lefase ka moka.” (Kut. 12:9) Ge o ka kwa dipego tša maaka ka mokgatlo wa Modimo goba bana babo rena bao ba etelelago pele, gopola gore manaba a Modimo a ile a swara bjang Jesu le barutiwa ba lekgolong la pele la mengwaga. Lehono batho ba Modimo  ba a tlaišwa le go senywa maina go etša ge Beibele e boletše e sa le pele. (Mat. 5:​11, 12) Re ka se tshepe ditaba tša maaka ge e ba re ka tseba gore di tšwa kae gomme ra dira se sengwe ka pelapela gore re itšhireletše. Re ka itšhireletša bjang?

17. Re ka dira’ng gore re se ke ra gobatšwa ke dipego tša maaka? (2 Tim. 1:13) (Bona le lepokisi leo le rego “ Seo re Swanetšego go se Dira ge re Ekwa Dipego tša Maaka.”)

¹⁷ Gana dipego tša maaka. Moapostola Paulo o ile a re botša ka go lebanya gore re swanetše go dira’ng ge re ekwa dipego tša maaka. O ile a botša Timotheo gore “o laele ba bangwe gore ba se [ke ba]. . . ela hloko dikanegelo tša maaka” le gore ba “[gane] dikanegelo tša maaka tšeo di senyago.” (1 Tim. 1:​3, 4; 4:7) Nagana ka se, ngwana a ka topa selo se itšego seo se nago le ditšhila gomme a se ja, eupša motho yo mogolo a ka se dire bjalo ka ge a tseba gore seo se kotsi. Re gana dipego tša maaka ka gobane re a tseba gore di tšwa go Sathane. Go ena le moo, re theetša “mantšu a phedišago” a therešo.—Bala 2 Timotheo 1:13.

18. Re ka bontšha bjang gore re tshepa mokgatlo wa Jehofa?

¹⁸ Re boletše ka ditsela tšeo mokgatlo wa Modimo o ekišago mohlala wa Jesu ka tšona. Ge o dutše o ithuta Beibele, leka go hwetša ditsela tše dingwe tšeo mokgatlo o ekišago mohlala wa Jesu ka tšona. Thuša ba bangwe ka phuthegong gore ba tšwele pele ba bota mokgatlo wa Modimo. Bontšha gore o tshepa mokgatlo ka go botegela Jehofa le go dula o le ka mokgatlong wo a o dirišago go phethagatša thato ya gagwe. (Ps. 37:28) Eka re ka tšeela godimo tokelo yeo re nago le yona ya go hlankela Jehofa re na le batho ba gagwe bao ba nago le lerato le bao ba botegago.