1. Jehofa o letetše’ng go rena?

 E NNGWE ya dilo tše di thabišago bophelong bja banyalani ke go ba le ngwana yo a phetšego gabotse. Le ge batswadi bao ba rata lesea la bona, ba ka tshwenyega kudu ge lesea leo le ka se gole. Ka mo go swanago, Jehofa o thaba kudu ge re tšea kgato ya mathomo ya go ba balatedi ba Jesu eupša o nyaka gore re bontšhe gore re gola moyeng. (1 Bakor. 3:1) Ge e le gabotse o nyaka gore re be Bakriste ba “gotšego ka mo go feletšego.”—1 Bakor. 14:20.

2. Re tlo boledišana ka’ng sehlogong se?

² Sehlogong se re tlo hwetša dikarabo tša dipotšišo tšeo di rego: Go ba Mokriste yo a godilego moyeng go bolela’ng? Re ka dira’ng gore re be Bakriste bao ba godilego moyeng? Dijo tša moya tše di tiilego di re thuša bjang gore re be batho bao ba godilego moyeng? Ke ka baka la’ng re se ra swanela go ikholofela kudu.

GO BA MOKRISTE YO A GODILEGO MOYENG GO BOLELA’NG?

3. Go ba Mokriste yo a gotšego ka mo go feletšego go bolela’ng?

³ Ka Beibeleng lentšu la Segerika leo le fetoletšwego e le “go gola ka mo go feletšego” le ka bolela go ba motho yo mogolo. a (1 Bakor. 2:6.) Go swana le ge ngwana a gola gore e be motho yo mogolo, le rena re swanetše go ba Bakriste bao ba godilego moyeng e le gore re be le segwera sa kgauswi le Jehofa. Go ba Mokriste yo a godilego moyeng ga go bolele gore o ka se tsoge o kaonefaditše go dilo tše dingwe. (1 Tim. 4:15) Go a kgonega gore batho ba bagolo le baswa e be batho bao ba godilego moyeng. Eupša ke’ng seo se bontšhago gore motho ke Mokriste yo a godilego moyeng?

4. Mokriste yo a godilego moyeng re mmona ka’ng?

 ⁴ Mokriste yo a godilego ke motho yo a phelago ka melao ya motheo ya Modimo ka moka ga yona, e sego yo a kgethago yeo yena a nyakago go e latela. Ka ge a se a phethagala o tlo fela a dira diphošo. Lega go le bjalo tsela yeo a phelago ka yona e bontšha gore o nagana le go dira dilo ka go dumelelana le thato ya Modimo. Motho yo o apere semelo se seswa e bile o dula a leka go nagana go swana le Modimo. (Baef. 4:​22-24) O itlwaeditše go dira diphetho tše bohlale tšeo di dumelelanago le melao le melao ya motheo ya Jehofa, ka gona ga a hloke melao e mentšhi gore e laole bophelo bja gagwe. Ge a dira diphetho o šoma ka thata gore a latele seo a phethilego gore o tlo se dira.—1 Bakor. 9:​26, 27.

5. Bakriste bao ba sego ba gola moyeng ba ka kopana le mathata a mohuta mang? (Baef. 4:​14, 15)

⁵ Ka lehlakoreng le lengwe Mokriste yo a sego a gola moyeng a ka lahletšwa ke batho “bao ba forago ba bangwe”, a amogela “dithuto tša maaka” le go theetša bahlanogi. b (Bala Baef. 4:​14, 15.) A ka ba le mona, a baka dikarogano, a kgopišega ka pela goba a palelwa ke go lebeletšana le diteko.—1 Bakor. 3:3.

6. Ke bjang re ka bapetšago motho yo a golago moyeng le tsela yeo ngwana a golago ka yona? (Bona le seswantšho.)

⁶ Ka ge re boletše pejana, mangwalo a bapetša tsela yeo motho a golago ka yona moyeng le tsela yeo ngwana a golago ka yona. Ka ge ngwana a se na temogo o hloka gore motho yo mogolo a mo šireletše le go mo hlokomela. Ka mohlala, mma a ka re morwedi wa gagwe a sware letsogo la gagwe ge ba tshela seterata. Ge ngwana yoo a dutše a gola, mmagwe a ka thoma go mo dumelela gore a tshele seterata a nnoši eupša a mo lemoša gore a lebelele dikoloi pele a tshela tsela. Ngwana yoo ge šetše a gotše o tlo kgona go itšhireletša ge a tshela seterata. Go swana le ge bana ba hloka batho ba bagolo gore ba ba thuše go phema dikotsi, Bakriste bao ba sego ba gola moyeng ba hloka thušo ya Bakriste bao ba godilego moyeng gore ba pheme go dira dilo tšeo di ka senyago segwera sa bona le Jehofa le go dira diphetho tše bohlale. Ge Mokriste yo a godilego a swanetše go dira phetho e itšego, o naganišiša ka melao ya  motheo ya Beibele gore a kgone go bona kamoo Jehofa a ikwago ka gona ka taba yeo ke moka a latela tlhahlo ya gagwe.

7. Na Bakriste bao ba godilego moyeng ba hloka thušo ya batho ba bangwe?

⁷ Na go ba Mokriste yo a godilego go bolela gore motho ga a hloke thušo ya batho ba bangwe? Aowa. Batho bao ba godilego le bona ba hloka go kgopela thušo ka dinako tše dingwe. Motho yo a sa dutšego a gola moyeng a ka letela gore batho ba bangwe ba mmotše gore a dire’ng goba ba mo direle diphetho tšeo yena a swanetšego go itirela tšona. Ka lehlakoreng le lengwe Mokriste yo a godilego o kgona go lebelela tsela yeo ba bangwe bao ba nago le phihlelo ba dirago dilo ka gona gomme a ekiša mohlala wa bona eupša o gopola gore Jehofa o letetše gore yo mongwe le yo mongwe a “rwale morwalo wa gagwe.” —Bagal. 6:5.

8. Bakriste bao ba godilego moyeng ba fapana bjang?

⁸ Go swana le ge batho ba sa swane ka tsela yeo ba bopegilego ka yona, Bakriste bao ba godilego le bona ba a fapana ka dika tša moya tše bjalo ka bohlale, sebete, botho le kwelobohloko. Ka mo go swanago Bakriste ba babedi ba ka lebeletšana le boemo bjo bo swanago eupša ba dira diphetho tša go se swane tšeo di dumelelanago le mangwalo. Se se direga kudu ge go tliwa diphethong tšeo di ithekgilego ka letswalo la motho. Bakriste bao ba godilego moyeng ba ka se ahlole ba bangwe ka baka la ge diphetho tša bona di sa swane, go ena le moo ba lwela gore ba dule ba na le botee.—Baroma 14:10; 1 Bakor. 1:10.

RE SWANETŠE GO DIRA’NG GORE RE BE BAKRISTE BAO BA GODILEGO MOYENG?

9. Na go gola moyeng go no itiragalela feela? Hlalosa.

⁹ Ngwana o no gola ka tlhago ya ba motho yo mogolo. Eupša gore motho e be Mokriste yo a godilego moyeng ga go no itiragalela feela. Ka mohlala bana babo rena le dikgaetšedi ba kua Korinthe ba ile ba amogela ditaba tše dibotse ba kolobetšwa, ba amogela moya o mokgethwa, ba ba ba ithuta dilo tše dintšhi go Moapostola Paulo. (Dit. 18:​8-11) Le ga go le bjalo, mengwaga e mentšhi ka morago ga kolobetšo ya bona, ba bantšhi ba be ba sa dutše ba sa gola moyeng. (1 Bakor. 3:2) Re ka dira’ng gore selo sa mohuta wo se se ke sa direga go rena?

10. Re swanetše go dira’ng gore re gole moyeng? (Juda 20)

¹⁰ E le gore re gole moyeng re swanetše go thoma pele ka go nyaka go ba batho bao ba godilego. “Bao ba hlokago tsebo e ntšhi” e bile ba sa dire maiteko a go gola, ba ka se tsoge ba gotše moyeng. (Die. 1:22) Ga re nyake go swana le batho bao ba godilego bao ba sa nyakago gore batswadi ba bona ba ba direle diphetho. Go ena le moo re kwešiša gore ke boikarabelo bja rena gore re be batho bao ba godilego moyeng. (Bala Juda 20.) Ge eba o nyaka go gola moyeng, rapela Jehofa gomme o mo kgopele gore a go ‘nee kganyogo le matla a gore o dire dilo tšohle tšeo a di ratago.’—Bafil. 2:13.

11. Jehofa o re thuša bjang gore re be Bakriste bao ba godilego moyeng? (Baef. 4:​11-13)

¹¹ Jehofa o re thuša gore re be batho bao ba godilego moyeng. Bao e lego badiši le barutiši ka phuthegong ba ikemišeditše go thuša yo mongwe le yo mongwe gore a ‘gole ka mo go feletšego go fihlela a eba le dika tša Kriste ka moka.’ (Bala Baefeso 4:​11-13.) Jehofa o re nea le moya wa gagwe o mo kgethwa go re thuša gore re be le “monagano wa Kriste.” (1 Bakor. 2:​14-16) Go oketša moo Modimo o ile a budulela gore go ngwalwe Diebangedi tše nne tšeo di re bontšhago kamoo Jesu a bego a nagana ka gona, a bolela ka gona le go dira  dilo nakong ya bodiredi bja gagwe bja mo lefaseng. O ka kgona go ba Mokriste yo a godilego moyeng ge o ka ekiša tsela ya Jesu ya go nagana le go dira dilo.

KAMOO DIJO TŠE DI TIILEGO TŠA MOYA DI RE THUŠAGO KA GONA

12. “Dithuto tša motheo ka Kriste” ke dife?

¹² E le gore re be Bakriste bao ba godilego moyeng re swanetše go ithuta ka mo go tseneletšego ka Kriste. Tše dingwe tša dithuto tša motheo tšeo re ilego ra ithuta tšona di akaretša boitsholo, tumelo, kolobetšo le tsogo ya bahu. (Baheb. 6:​1, 2) Tšeo e no ba dithuto tša motheo tšeo Bakriste ka moka ba di dumelago. Ka baka la se moapostola Petro o ile a bolela ka tšona ge a be a ruta lešaba nakong ya Pentekoste. (Dit. 2:​32-35, 38) Re swanetše go amogela dithuto tše gore re be barutiwa ba Kriste. Ka mohlala, Paulo o ile a re lemoša gore re ka se bolele gore re Bakriste ba therešo ge eba re sa dumele go tsogo ya bahu. (1 Bakor. 15:​12-14) Eupša ga se ra swanela go no kgotsofalela go tseba ditherešo tša motheo feela.

13. Re swanetše go dira’ng gore re holwe ke dijo tša moya tšeo di tiilego tšeo go bolelwago ka tšona go Baheberu 5:14? (Bona le seswantšho)

¹³ Go fapana le dithuto tša motheo, dijo tša moya tše di tiilego ga di no akaretša melao ya Jehofa eupša di akaretša le melao ya gagwe ya motheo e lego seo se re thušago go kwešiša tsela yeo a naganago ka yona. E le gore re holwe ke dijo tšeo, re swanetše go ithuta, re naganišiše re be re diriše seo re ithutilego sona. Ge re dira bjalo re itlwaetša go dira diphetho tšeo di thabišago Jehofa. c—Bala Baheberu 5:14.

14. Paulo o thušitše Bakorinthe bjang gore ba gole moyeng?

¹⁴ Bakriste bao ba sego ba gola moyeng ba thatafalelwa ke go dira diphetho tše dibotse, kudu ge go se na molao wo o lebanyago wa Beibele mabapi le boemo bjo ba lebeletšanego le bjona. Ba bangwe ba nagana gore ba ka dira dilo ka go rata ge eba go se na molao wa Beibele wo o ba thibelago. Ba bangwe ba ka nyaka gore go be le melao le moo e sa nyakegego  gona. Ka mohlala, go bonagala Bakriste ba kua Korinthe ba ile ba botšiša Paulo ge e ba go na molao wo o ba thibelago go ja dijo tšeo di diretšwego medingwana goba aowa. Go ena le gore Paulo a ba botše gore ba dire eng, o ile a ba botša gore letswalo la bona le swanetše go šoma e bile motho yo mongwe le yo mongwe o na le “tshwanelo ya go ikgethela.” O ile a ba bontšha gore melao ya motheo ya Beibele e ka ba thuša gore ba dire diphetho tšeo di ka ba tlogelago ba na le letswalo leo le hlwekilego e bile ba sa kgopiše ba bangwe. (1 Bakor. 8:​4, 7-9) Paulo o be a thuša Bakorinthe gore e be batho bao ba godilego moyeng le gore ba kgone go diriša maatla a bona a tlhaologanyo go ena le go ithekga ka batho ba bangwe gore ba ba direle diphetho goba go nyakana le melao mo e sa nyakegego gona.

15. Paulo o thušitše bjang Bakriste ba Baheberu gore ba tšwele pele ba gola moyeng?

¹⁵ Re ithuta thuto ya bohlokwa go seo Paulo a se ngwaletšego Bakriste ba Baheberu. Ba bangwe ga se ba ka ba tšwela pele go gola moyeng, ge e le gabotse ba ‘boetše ba nyaka le maswi e sego dijo [tša moya] tše di tiilego.’ (Baheb. 5:12) Ba be ba sa nyake go ithuta le go amogela dilo tše diswa tšeo Jehofa a bego a ba ruta tšona a diriša phuthego. (Die. 4:18) Ka mohlala, Bajuda ba bantšhi ba be ba sa dumela go molao wa Moshe le ge mengwaga e 30 pele ga moo, molao wo o fedišitšwe ke sehlabelo sa Jesu. (Baroma 10:4; Tito 1:10) Ruri mengwaga yeo e 30 e be e swanetše go thuša Bakriste ba Bajuda go bona gore ga ba sa hloka molao wa Moshe. Yo mongwe le yo mongwe yo a ilego a bala lengwalo leo Paulo a le ngwaletšego Baheberu o tla dumela gore puku ye e na le dijo tša moya tše di tiilego. Lengwalo le le ile la thuša Bakriste bao go bona gore tsela ya go hlankela Jehofa yeo a e hlomilego ka Jesu Kriste e be e le yona e kaone e bile e be e ba thuša go lebeletšana le kgateletšo yeo Bajuda ba bego ba ka ba bea ka tlase ga yona.—Baheb. 10:​19-23.

PHEMA GO IKHOLOFELA KUDU

16. Re swanetše go dira’ng se sengwe gape gore re kgone go tšwela pele re gola moyeng?

¹⁶ Re swanetše go šoma ka thata gore re be Bakriste bao ba godilego e bile re lwele go dula re le ka tsela yeo. E le gore re kgone go dira se, re swanetše go phema go ikholofela  kudu. (1 Bakor. 10:12) Re swanetše “go itekola” go bona ge eba re sa tšwela pele go gola moyeng.—2 Bakor. 13:5.

17. Lengwalo leo Paulo a le ngwaletšego Bakolose le re thuša bjang go bona gore re swanetše go tšwela pele re gola moyeng?

¹⁷ Ge Paulo a be a ngwalela Bakolose lengwalo, o ile a ba bontšha bohlokwa bja gore ba dule ba gola moyeng. Le ge Bakriste bao ba be ba gotše ka mo go feletšego, Paulo ile a ba lemoša gore ba se ke ba forwa ke tsela ya lefase ya go dira dilo. (Bakol. 2:​6-10) Epafora yo a bego a tseba phuthego yeo gabotse, o ile a rapela ka mehla a rapelela gore ‘mafelelong ba eme ba feletše’ goba ba gotše moyeng. (Bakol. 4:12) Re ka ithuta’ng go se? Epafora le Paulo ba be ba kwešiša gore go nyakega maiteko le thušo ya Jehofa gore motho a dule a gotše moyeng. Ba be ba nyaka gore Bakolose ba dule ba tiile goba e be Bakriste bao ba godilego ka mo go feletšego go sa šetšwe mathata ao ba bego ba kopana le ona.

18. Mokriste yo a godilego moyeng a ka diragalelwa ke’ng? (Bona le seswantšho.)

¹⁸ Paulo o ile a lemoša Bakriste ba Baheberu gore motho le ge e le Mokriste yo a godilego moyeng go ka direga gore ka letšatši le lengwe Jehofa a se sa mo amogela. Ge Mokriste a ka gana go theetša Jehofa gomme a se itsholele dibe tša gagwe, a ka dira gore Jehofa a se sa mo lebalela. Re leboga gore Baheberu ba be ba se boemong bjo bjalo. (Baheb. 6:​4-9) Go direga’ng ka bao lehono ba folago moyeng goba ba kgaolwago ke moka ka morago ba itshola? Ge ba itshola ba bontšha gore ga ba swane le batho bao Paulo a ngwadilego ka bona. Ba tlo hloka thušo yeo Jehofa a e neago ge ba boela go yena. (Hesek. 34:​15, 16) Bagolo ba ka kgopela ngwanabo rena goba kgaetšedi yo a godilego moyeng gore a thuše Mokriste yoo go tsošološa segwera sa gagwe le Jehofa.

19. Re swanetše go ba le pakane efe?

¹⁹ O ka kgona go fihlelela pakane ya gago ya go ba Mokriste yo a godilego moyeng. Tšwela pele o eja dijo tše di tiilego tša moya gomme o leke go nagana go swana le Jehofa. Ge e ba o šetše o le Mokriste yo a godilego ka mo go feletšego, dula o le ka yona tsela yeo.