MOROKAMI wa September 1, 1915, o hlalositše ntwa ya pele ya lefase yeo e ilego ya kgoma dinaga tše e ka bago tše 30 ka gore: “Dintwa ka moka tše di fetilego . . . ga se selo ge di bapišwa le tlaišego yeo e tšwelago pele kua Yuropa.” Ka baka la go lwa moo, Morokami woo o begile gore: “Modiro wa go bolela ka [Mmušo wa Modimo] o ile wa thibelwa ka tekanyo e itšego, kudukudu kua Jeremane le Fora.”

Nakong ya dintwa tšeo tša lefase, barutwana ba Beibele ba be ba sa kwešiše ka botlalo molao wa motheo wa gore Bakriste ga se ba swanela go tšea karolo dipolotiking. Lega go le bjalo, ba be ba ikemišeditše go bolela ditaba tše dibotse. Ka ge Wilhelm a be a nyaka go phetha karolo ya gagwe tirelong ya Modimo, o ile a otara dipuku tša The Bible Students Monthly ka Sefora. Ka nako yeo, Wilhelm o be a le kua Fora e le lešole la Jeremane, e sego mmapatši wa dipuku tša bodumedi (mmulamadibogo). Motho yo yo a bego a lebelelwa e le lenaba, yo a bego a apere yunifomo ya mašole, o ile a botša Mofora yo mongwe ditaba tše dibotse, yoo a ilego a šala a maketše.

Mangwalo ao a ilego a gatišwa ka Morokaming a ile a bontšha gore Barutwana ba bantši ba Beibele ba Jeremane ba be ba nyaka go bolela ditaba tše dibotse tša Mmušo le ge e be e le mašole. Ngwanabo rena Lemke, yo e bego e le lešole la dikepeng tša ntwa, o begile gore o ile a hwetša batho ba bahlano bao ba thabelago therešo sehlopheng sa mašole ao a bego a šoma le ona. O ngwadile gore gaešita le ka sekepeng sa ntwa, o be a ruta batho go ithuta ka Jehofa.

Georg Kayser o ile a ya ntweng e le lešole gomme a boa gae e le mohlanka wa Modimo wa therešo. Seo se diragetše bjang? Ka tsela e itšego o ile a hwetša kgatišo ya Barutwana ba Beibele, a amogela therešo ya Mmušo wa Modimo ka pelo ka moka, gomme a kgaotša go ba lešole. Ka ge e be e se sa le lešole, o ile a šoma mošomo o mongwe. Ka morago ga ntwa, o ile a hlankela e le mmulamadibogo yo a fišegago ka nywaga e mentši

Le ge Barutwana ba Beibele ba be ba sa kwešiše ka botlalo taba ya gore Mokriste ga se a swanela go tšea lehlakore dintweng, boitshwaro bja bona le boemo bja bona bja kgopolo di be di tloga di fapane le tša batho bao ba bego ba thekga dintwa. Ge boradipolotiki le baetapele ba bodumedi ba be ba thekga dintwa,  Barutwana ba Beibele ba ile ba thekga “Kgošana ya Khutšo.” (Jes. 9:6) Gaešita le ge ba bangwe ba be ba fela ba tšea karolo dipolotiking, ba be ba dutše ba na le boemo bja kgopolo bja go swana le bja Morutwana wa Beibele e lego Konrad yo a itšego: “Ke be ke tseba gore Lentšu la Modimo le re Mokriste ga se a swanela go bolaya.”—Ek. 20:13. *

Kua Jeremane, moo molao wa naga o bego o sa dumelele motho go se tšee lehlakore dipolotiking ka baka la letswalo, Barutwana ba Beibele bao ba fetago 20 ba ile ba gana go tšea karolo bošoleng. Ba bangwe ba bona ba be ba tšewa e le digaswi. Gustav Kujath e be e le yo mongwe wa bona gomme o ile a išwa sepetleleng sa digaswi gomme ba mo taga. Hans Hölterhoff, yo le yena a ilego a gana go ya ntweng, o ile a golegwa, moo a ilego a gana mešomo ka moka yeo e bego e sepedišana le ntwa. Bahlapetši ba kgolego ba ile ba mo apeša jase yeo e dirišetšwago go tlema motho yo kotsi go fihlela maoto le matsogo a gagwe di ehwa bogašu. Ka ge a ile a dula a botega, bahlapetši bao ba ile ba mmea pele ga batho gomme ba mo kwera o šoro. Lega go le bjalo, Hans o ile a dula a botega nakong ka moka ya ntwa.

Bana babo rena ba bangwe bao ba ilego ba laelwa gore ba ye ntweng ba ile ba gana go swara dibetša gomme ba kgopela mešomo yeo e sa akaretšego go lwa. * Johannes Rauthe o ile a dira se se swanago gomme a romelwa go yo šoma diporong. Konrad Mörtter o ile a abelwa go šoma bookelong, gomme Reinhold Weber a šoma e le mooki. August Krafzig o ile a leboga gore mešomo ya gagwe e be e sa akaretše go ba ntweng. Barutwana ba ba Beibele le ba bangwe, ba be ba ikemišeditše go hlankela Jehofa go ya kamoo ba bego ba kwešiša seo se bolelwago ke go botega le go rata Modimo le moagišani.

Ka ge Barutwana ba Beibele ba be ba sa thekge naga ya gabo bona nakong ya ntwa, mmušo o ile wa thoma go ba bea leihlo. Mengwageng e latetšego, Barutwana ba Beibele ba ile ba pharwa ka melato e diketekete kgorong ya tsheko kua Jeremane ya mabapi le go ya tšhemong. E le go ba thuša melatong yeo, ofisi ya lekala ya Jeremane e ile ya hloma lefapha la tša semolao kua Bethele ya Magdeburg.

Dihlatse tša Jehofa di ile tša tšwela pele di kaonefatša kwešišo ya tšona mabapi le go se tšee karolo dintweng. Ge ntwa ya bobedi ya lefase e be e thoma, Dihlatse di ile tša se tšee karolo ntweng yeo gomme tša se tsenele bošole. Ka baka leo, di ile tša lebelelwa e le manaba a Mmušo wa Jeremane gomme tša tlaišwa o šoro. Eupša re tla bolela ka taba ye dihlogong tše dingwe tša “Go tšwa Bobolokelong bja Rena.”​—Go tšwa bobolokelong bja Rena kua Yuropa Bogare.