1, 2. (a) Jesaya 60:22 e phethagetše bjang mehleng ye ya bofelo? (b) Ke tlhokagalo efe yeo e lego gona lehono ka mokgatlong wa Jehofa?

“YO MONYENYANE e tla ba ba sekete (1 000) gomme mmotlana a ba setšhaba se matla.” (Jes. 60:22) Mantšu a a boporofeta a a phethagala mehleng ye ya bofelo. Ka mohlala, ngwageng wa tirelo wa 2015, bagoeledi ba Mmušo ba 8 220 105 ba be ba bolela ditaba tše dibotse lefaseng ka moka! Mantšu a mafelelo a boporofeta bjo a swanetše go kgoma Mokriste yo mongwe le yo mongwe, ka gobane Tatago rena wa legodimong o re: “Nna Jehofa, ke tla akgofiša se ka nako ya gona.” Go swana le batho bao ba nametšego koloi ya go kitima, le rena re a bona gore modiro wa boboledi o dirwa ka lebelo le legolo. Wena o arabela bjang lebelong leo? Na o dira sohle se o ka se kgonago go bolela ditaba tše dibotse ka mafolofolo? Bana babo rena ba bantši le dikgaetšedi ba tšea bobulamadibogo bja ka mehla goba bja go thuša. Le gona na ga re thabe ge re bona ba bangwe ba hudugela moo go nyakegago bagoeledi ba oketšegilego ba Mmušo goba ba tšea karolo medirong e mengwe ya Modimo?

² Lega go le bjalo, re a bona gore go sa nyakega bašomi ba oketšegilego. Ngwaga o mongwe le o mongwe go hlongwa diphuthego tše e ka bago tše 2 000. Ka mohlala, ge bagolo ba bahlano ba ka hlankela go e nngwe le e nngwe ya diphuthego tšeo, go ra gore ngwaga  le ngwaga go be go tla nyakega gore bahlanka ba bodiredi ba 10 000 e be bagolo. Se se ra gore go be go tla nyakega gore bana babo rena ba diketekete ba fihlelele ditshwanelego tša go ba bahlanka ba bodiredi. Go oketša moo, go sa šetšwe gore re bana babo rena goba dikgaetšedi, ruri re na le ‘mo gontši mo re ka go dirago modirong wa Morena.’​—1 Bakor. 15:58.

3, 4. Ke dipakane dife tšeo o nyakago go di fihlelela go bontšha gore o gatela pele moyeng?

³ Bala 1 Timotheo 3:1. Lediri la Segerika leo le fetoletšwego e le “katanela go fihlelela” le bolela go obelela selo se itšego, mohlomongwe seo se lego kgole le wena. Paulo o dirišitše lentšu leo go gatelela gore go gola moyeng go nyaka maiteko. Akanya ka ngwanabo rena yo a naganago ka bokamoso bja gagwe ka phuthegong. Ga bjale a ka no ba a se mohlanka wa bodiredi, eupša o a lemoga gore o swanetše go hlagolela dika tšeo di enywago ke moya wa Modimo. Sa pele, o katanela go ba mohlanka wa bodiredi. Ge nako e dutše e eya, o ipona a swanelega go hlankela e le mogolo. Boemong le ge e le bofe, o šoma ka thata gore a fihlelele ditshwanelego tše di nyakegago gore a tle a rwale maikarabelo a oketšegilego ka phuthegong.

⁴ Ka mo go swanago, bana babo rena le dikgaetšedi bao ba nyakago go ba babulamadibogo, ditho tša Bethele goba baithaopi medirong ya go aga Diholo tša Mmušo, ba swanetše go šoma ka thata gore ba fihlelele dipakane tšeo. Anke re ahlaahleng kamoo Lentšu la Modimo le re kgothaletšago go gatela pele borapeding bja therešo.

5. Bafsa ba ka šomiša matla a bona bjang tirelong ya Jehofa?

⁵ Bafsa ba na le matla a go dira dilo tše dintši tirelong ya Jehofa. (Bala Diema 20:29.) Masogana a mantši Bethele a šoma metšheneng ya go gatiša le ya go dira Dibeibele le dikgatišo tše di theilwego Beibeleng. Masogana a mantši le makgarebe a tšea karolo medirong ya go aga Diholo tša Mmušo le go di lokiša. Ge go eba le dikotsi tša tlhago, bafsa ba šoma gotee le Dihlatse tše di nago le phihlelo go thuša modirong wa tlhakodišo. Le gona bafsa ba bantši ba babulamadibogo ba bolela ditaba tše dibotse metseng ya gabo bona le ditšhemong tša maleme a šele.

6-8. (a) Mofsa yo mongwe o ile a lokiša bjang tsela yeo a bego a ikwa ka yona ka go hlankela Modimo, gona mafelelo e bile afe? (b) Re ka ‘latswa bjang gomme ra bona gore Jehofa o lokile’?

⁶ Ga go pelaelo gore o tseba bohlokwa bja go hlankela Modimo ka pelo ka moka. Eupša go thwe’ng ge e ba o ikwa go swana le kamoo ngwanabo rena yo a bitšwago Aaron a kilego a ikwa ka gona? Gaešita le ge a goletše therešong, o dumela ka gore: “Ke be ke tšwafišwa ke go ya dibokeng le tšhemong.” Aaron o be a nyaka go hlankela Modimo ka lethabo eupša a ipotšiša gore go reng a be a sa thaba. O ile a dira’ng?

⁷ Aaron o ile a itirela lenaneo la dilo tša moya leo le bego le akaretša go bala Beibele, go lokišetša diboka le go araba. Sa bohlokwa kudu ke gore o ile a thoma go rapela ka mehla. Ge a thoma go rata Jehofa kudu, o ile a thoma go dira tšwelopele e botse ya moya. Go tloga ka yona nako yeo, Aaron o thabetše bobulamadibogo, go šoma le ba bangwe medirong ya tlhakodišo le go bolela ditaba tše dibotse nageng e šele. Ga bjale o hlankela Bethele e bile ke mogolo. O ikwa bjang ka tsela yeo a e tšerego? O re: “Ke ‘latswitše gomme ka bona gore Jehofa o lokile.’ Ka ge a ntšhegofaditše, ke ikwa ke mo kolota le go tutueletšega go šoma ka thata tirelong ya gagwe, e bile seo se dira gore a ntšhegofatše le go feta.”

⁸ Mopsalme o opetše ka gore: “Bao ba  tsomago Jehofa ba ka se hloke selo se sebotse.” (Bala Psalme 34:8-10.) Ruri Jehofa le ka mohla ga a nyamiše bao ba mo hlankelago ka mafolofolo. Ka moka ga rena re a ‘latswa gomme ra bona gore Jehofa o lokile’ ge re dutše re dira sohle se re ka se kgonago tirelong ya gagwe. Le gona ge re hlankela Modimo ka dipelo tša rena ka moka, re ba le lethabo leo go se nago mo re ka le hwetšago gona.

9, 10. Ke ka baka la’ng go le bohlokwa gore o be le “moya wa go leta”?

⁹ Ge o dutše o katanela go fihlelela dipakane tša gago, “bontšha moya wa go leta.” (Mika 7:7) Jehofa o dula a thekga bahlanka ba gagwe ba botegago, gaešita le ge a ka fetša nako e itšego a sa ba nee ditokelo goba go ba imolla maemong a itšego. O ile a holofetša Aborahama morwa, eupša mopatriareka yo o ile a swanelwa ke go bontšha tumelo le go se fele pelo. (Baheb. 6:12-15) Gaešita le ge Aborahama a ile a leta ka mengwaga e mentši pele Isaka a ka belegwa, ga se a ka a fela matla, e bile Jehofa ga sa nka a mo nyamiša.​—Gen. 15:3, 4; 21:5.

¹⁰ Go leta ga go bonolo. (Die. 13:12) Ge re ka dula re nagana ka go nyamišwa ga rena, re ka fela matla. Go e na le go dira seo, anke re dirišeng nako ya ge re sa letile go ikaga moyeng. Bona ditsela tše tharo tšeo re ka dirago seo ka tšona.

11. Ke dika dife tša Modimo tšeo re ka di hlagolelago, gona ke ka baka la’ng di le bohlokwa?

¹¹ Hlagolela dika tša Modimo. Ka go bala Lentšu la Modimo le go naganišiša ka seo re se balago, re ka ba le bohlale, temogo, kahlolo e botse, tsebo, tlhaologanyo le go hlaphogelwa monaganong. Bao ba re eteletšego pele borapeding  bja therešo ba swanetše go bontšha dika tše. (Die. 1:1-4; Tito 1:7-9) Le gona ge re dutše re bala dikgatišo tša rena tše di theilwego Beibeleng, re ka bona dilo go swana le Modimo. Letšatši le letšatši re lebeletšana le ditaba tša boithabišo, go apara le go itokiša, go diriša tšhelete gabotse le go phedišana le ba bangwe. Ge re diriša seo re ithutago sona ka Beibeleng, re tla dira diphetho tše di thabišago Jehofa.

12. Ditho tša phuthego di ka bontšha bjang gore di a botega?

¹² Bontšha gore o a botega. Go sa šetšwe gore re bana babo rena goba dikgaetšedi, re swanetše go dira sohle se re ka se kgonago go phetha dikabelo tšeo Modimo a re neago tšona. Ka ge Nehemia e be e le mmuši, o ile a swanelwa ke go kgetha batho ba itšego gore ba okamele batho ba Modimo. O ile a kgetha bomang? O ile a kgetha banna bao ba boifago Modimo, bao ba botegago le bao ba ka botwago. (Neh. 7:2; 13:12, 13) Le lehono, “seo se letetšwego go balaki ke gore ba hwetšwe ba botega.” (1 Bakor. 4:2) Ruri mediro ya rena e mebotse e bonwa ke ba bangwe.​—Bala 1 Timotheo 5:25.

13. O ka ekiša bjang mohlala wa Josefa ge ba bangwe ba go swara makgwakgwa?

¹³ Dumelela Jehofa gore a go bope. O ka dira’ng ge ba bangwe ba go swara makgwakgwa? O ka nagana gore o ba lokiše di tloga fase. Eupša ka dinako tše dingwe go itwela go ka senya ditaba. Josefa o ile a swarwa makgwakgwa ke bana babo, eupša ga se a ka a ba swara ka pelo. Ka morago, Josefa o ile a pharwa ka molato wo a sa o dirago gomme a golegwa. Lega go le bjalo, o ile a dumelela Jehofa gore a mo hlahle dinakong tšeo tše thata. Mafelelo e bile afe? Beibele e re: ‘Lentšu la Jehofa le ile la mo dira gore e be yo a sekilego.’ (Ps. 105:19) Ge diteko tšeo di fetile, Josefa o ile a swanelega go phetha kabelo e kgethegilego. (Gen. 41:37-44; 45:4-8) Ge o dutše o elwa le mathata a gago, kgopela bohlale go Modimo, eba boleta ka dinako tšohle gomme o kgopele Modimo gore a go nee matla. Jehofa o tla go thuša.​—Bala 1 Petro 5:10.

14, 15. (a) Ke ka baka la’ng re swanetše gore ‘ka mehla re hlokomele’ tsela yeo re rutago batho ka yona? (b) O ka dira’ng gore o kgone go hwetša batho tšhemong? (Bona seswantšho seo se lego mathomong a sehlogo le lepokisi le le rego, “ Na o ka Leka Mokgwa o Mongwe?”)

¹⁴ Paulo o kgothaleditše Timotheo gore: “Tšwela pele o ikgafela go baleng phatlalatša, go eletšeng le go ruteng. O itlhokomele ka mehla, o hlokomele le go ruta ga gago.” (1 Tim. 4:13, 16) Ge Paulo a be a bolela mantšu a, Timotheo e be e šetše e le mogoeledi wa ditaba tše dibotse yo a nago le bokgoni. Lega go le bjalo, o be a tla atlega tšhemong ge feela ‘ka mehla a be a ka hlokomela’ go ruta ga gagwe. O be a ka se no ipotša gore batho ba tla dula ba arabela gabotse le ge a sa kaonefatše mekgwa yeo a ba rutago ka yona. E le gore Timotheo a tšwele pele a kgoma batho dipelo, o be a swanetše go fetofetoša tsela yeo a ba rutago ka yona go ithekgile ka dinyakwa tša bona. Ka ge re le bagoeledi ba Mmušo wa Modimo, re swanetše go dira se se swanago.

¹⁵ Gantši ge re eya ka ntlo le ntlo re hwetša batho ba se gona ka gae. Ditikologong tše dingwe, ga re kgone go tsena dintlong tše itšego le metseng e ageleditšwego ka mabota. Ge e ba go le bjalo tšhemong ya lena, ke ka baka la’ng o sa leke mekgwa e mengwe ya go bolela ditaba tše dibotse moo?

16. Ke’ng se se dirago gore go nea bohlatse mafelong a batho bohle go atlege?

¹⁶ Go nea bohlatse mafelong a batho bohle ke mokgwa o mongwe o mobotse kudu wa go bolela ditaba tše dibotse. Dihlatse tše dintši di ba le mafelelo a mabotse kudu modirong wo. Di kgetha nako ya go yo boledišana le batho diteišeneng tša diterene, mo go emago dipese, mabenkeleng, diphakeng gotee le mafelong a mangwe  a batho bohle. Ka bohlale, Hlatse e ka thoma poledišano le motho ka go bolela seo e se kwelego ditabeng, ka go reta bana ba gagwe, goba ka go mmotšiša ka mošomo wa gagwe. Ge poledišano e dutše e tšwela pele, Hlatse yeo e ka thekga taba yeo ka Beibele gomme ya kgopela motho yoo go bolela seo a se naganago. Gantši seo motho yoo a tlago go se bolela se dira gore poledišano yeo e tle e tšwetšwe pele.

17, 18. (a) Ke’ng se se ka go neago sebete sa go bolela ditaba tše dibotse mafelong a batho bohle? (b) Taba ya gore Dafida o ile a leboga Jehofa e ka go thuša bjang tšhemong?

¹⁷ Ge e ba o thatafalelwa ke go bolela ditaba tše dibotse mafelong a batho bohle, o se ke wa fela matla. Eddie, e lego mmulamadibogo wa kua New York City, o be a tšhaba go bolela le batho ka Beibele mafelong a batho bohle. Eupša ge nako e dutše e eya o ile a ba le sebete. O thušitšwe ke’ng? O re: “Nakong ya borapedi bja lapa, nna le mosadi wa ka re dira nyakišišo mabapi le kamoo re ka arabago batho ba go ganetša le bao ba nago le ditumelo tše itšego. Le gona re kgopela ditšhišinyo tša go dira mošomo wo go bana babo rena.” Gona bjale Eddie o dira modiro wo ka mafolofolo.

¹⁸ Ge o dutše o eba le bokgoni le sebete modirong wa go bolela ditaba tše dibotse, tšwelopele ya gago ya moya e tla bonagala. (Bala 1 Timotheo 4:15.) Go feta moo, o tla reta Tatago rena wa legodimong go swana le Dafida, yo a opetšego ka gore: “Ke tla reta Jehofa ka dinako tšohle; tumišo ya gagwe e tla dula e le molomong wa ka. Moya wa ka o tla ikgantšha ka Jehofa; ba boleta ba tla di kwa gomme ba thaba.” (Ps. 34:1, 2) Le gona go ka direga gore batho ba boleta ba tle borapeding bja therešo ka baka la go bolela ga gago ditaba tše dibotse.

19. Ke ka baka la’ng mohlanka yo a botegago wa Jehofa a swanetše go thaba gaešita le ge a na le mathata?

¹⁹ Le gona Dafida o opetše ka gore: “Wena Jehofa, mediro ya gago ka moka e tla go reta, bohle bao ba go botegelago ba tla go reta. Ba tla bolela ka letago la bogoši bja gago, ba bolela ka matla a gago, gore ba tsebiše bana ba batho ditiro tša gago tše matla le letago le le phadimago la bogoši bja gago.” (Ps. 145:10-12) Ruri Dihlatse ka moka tše di botegago tša Jehofa di dumelelana le mantšu a! Eupša go thwe’ng ge e ba bolwetši goba botšofadi bo šitiša tirelo ya gago ya tšhemo? Ka mehla gopola gore ge o botša bao ba go hlokometšego le ba bangwe ditaba tše dibotse, o reta Modimo wa rena yo lerato. Ge e ba o le kgolegong ka baka la tumelo ya gago, ga go pelaelo gore le wena o botša ba bangwe ka Modimo ge maemo a go dumelela, gomme seo se thabiša pelo ya Jehofa. (Die. 27:11) Go bjalo le ka wena yoo o swareletšego tirelong ya Modimo le ge ditho tša lapa la geno e se Dihlatse. (1 Pet. 3:1-4) Gaešita le ge o le maemong a thata kudu, o ka reta Jehofa gomme wa gatela pele moyeng.

20, 21. Ge e ba o neilwe maikarabelo a mantši ka mokgatlong wa Jehofa, o ka hola ba bangwe bjang?

²⁰ Ruri Jehofa o tla go šegofatša ge e ba o tšwela pele o gatela pele moyeng. Mohlomongwe ge o ka dira diphetogo lenaneong la gago goba bophelong bja gago, o ka tšea karolo ka botlalo go ruteng batho bao ba se nago kholofelo ya therešo e bohlokwa ya Modimo. Go feta moo, ge o ka tšwela pele o gola moyeng le go ikgafa, o tla hola badumedigotee le wena kudu. Le gona ge o thuša phuthego ka boikokobetšo, bao ba ratago Jehofa ba tla go rata, ba go leboga le go go thekga.

²¹ Go sa šetšwe gore ke kgale re hlankela Jehofa goba go se bjalo, ka moka ga rena re ka dira tšwelopele tirelong ya gagwe. Eupša Bakriste bao ba godilego moyeng ba ka thuša bjang bao ba se nago phihlelo go gatela pele moyeng? Re tla ahlaahla taba ye sehlogong se se latelago.