PHIHLELO
Kamoo ke Hweditšego Lethabo go Neeng
GE KE be ke na le mengwaga e 12, ke ile ka lemoga gore ke na le selo se bohlokwa seo nka se neago ba bangwe. Kopanong e nngwe, ngwanabo rena yo mongwe o ile a mpotšiša ge e ba nka thabela go ya tšhemong. Ke ile ka re “ee” le ge e be e tlo ba la mathomo ke eya tšhemong. Re ile ra ya tšhemong, gomme a mpha dipukwana tšeo di bego di bolela ka Mmušo wa Modimo. O ile a re go nna: “Wena thoma ka lehlakoreng lela la seterata gomme nna ke tla thoma ka mo.” Ke ile ka thoma go ya ka ntlo le ntlo ke tšhogile, gomme ka makatšwa ke gore ke ile ka sepediša dipukwana tšeo ka moka ka nakwana. Ruri batho ba be ba rata seo ke bego ke ba nea sona.
Ke belegwe ka 1923 kua Chatham, Kent, Engelane. Ke goletše lefelong le le bego le tletše ka batho bao ba nyamilego. Ntwa e Kgolo yeo e bilego gona pejana e be e se ya tlišetša batho khutšo. Batswadi ba ka le bona ba be ba nyamišitšwe ke baruti ba kereke ya Baptist bao ba bego ba se na taba le batho ba bangwe. Ge ke be ke na le mengwaga e senyane, mma o ile a thoma go ya holong ya International Bible Students Association, yeo go yona batho bao ba ilego ba amogela leina la Dihlatse tša Jehofa ba bego ba swarela “diklase,” goba diboka tša bona. Holong yeo, yo mongwe wa dikgaetšedi o be a re ruta Beibele a diriša puku ya The Harp of God. Ke be ke rata seo ke bego ke ithuta sona.
GO ITHUTA GO BANA BABO RENA BA TŠOFETŠEGO
Ka ge ke be ke le mofsa, ke be ke thabela go botša batho ka kholofelo e tšwago lentšung la Modimo. Gaešita le ge ke be ke eya tšhemong ka ntlo le ntlo ke nnoši, ke ile ka ithuta dilo tše dingwe ka go šoma tšhemo le ba bangwe. Ka mohlala, ka letšatši le lengwe ge nna le ngwanabo rena yo a tšofetšego re be re eya tšhemong ka dipaesekela, ke ile ka bona moruti yo mongwe gomme ka re: “Bona pudi yela.” Ngwanabo rena yoo o ile a emiša paesekela ya gagwe gomme a nkgopela gore re dule koteng e nngwe. O ile a re: “O filwe ke mang matla a go ahlola batho gore ke dipudi? Rena a re no botša batho ditaba tše dibotse gomme re tlogelele Jehofa gore a ba ahlole.” Matšatšing ao a mathomo, ke ile ka ithuta mo gontši ka lethabo la go nea.—Mat. 25:31-33; Dit. 20:35.
Ngwanabo rena yo mongwe yo a tšofetšego o nthutile gore ge e ba re nyaka go hwetša lethabo go neeng, re swanetše go kgotlelela ka go se fele pelo. Mosadi wa gagwe o be a sa rate Dihlatse tša Jehofa. Ka letšatši le lengwe ge re le tšhemong o ile a re ke ye le yena legaeng la gagwe. Mosadi wa gagwe o be a ferekane kudu gore o tšere nako e telele a le tšhemong, gomme a thoma go re foša ka mahlare a tee. Go e na le gore ngwanabo rena a omanye mosadi wa gagwe, o ile a fo topa mahlare ao
a myemyela. Ka morago ga mengwaga e mentši, Modimo o ile a putsa go se fele pelo ga gagwe ge mosadi wa gagwe a kolobetšwa gore e be Hlatse ya Jehofa.Ka September 1939, ge ke be ke na le mengwaga e 16, Brithania e be e thomile go lwa le Jeremane. Ge nako e dutše e eya, ke ile ka rata go botša ba bangwe ka bokamoso gomme nna le mma ra kolobetšwa kua Dover ka March 1940. Ka June 1940, ke ile ka lebelela ke le setupung sa ntlo ya gešo gomme ka bona diketekete tša mašole ao a tšhogilego a feta ka dilori. A be a phonyokgile Ntwa yeo e lwetšwego kua Dunkirk. A be a bonagala a se na kholofelo gomme ke be ke duma go a botša ka Mmušo wa Modimo. Ka morago wona ngwageng woo, Brithania e ile ya hlaselwa ka dipomo. Bošego bjo bongwe le bjo bongwe, ke be ke bogela difofane tša mašole a Jeremane tša go thuthupiša dipomo di fofafofa motseng wa gabo rena. Dipomo tšeo di be di dira lešata le legolo, e bile di be di kwagala ge di theogela fase gomme seo se be se tšhoša le go feta. Ge re eya ka ntle mesong, re be re bona dintlo tše dintši tše di sentšwego. Ke ile ka kgodišega le go feta gore Mmušo wa Modimo ke wona feela o bego o tla lokiša lefase.
GO THOMA BOPHELO BJA GO NEA
Ke thomile go phela bophelo bjo bo thabišago ka 1941. Ke be ke šoma go dira dikepe le go di lokiša khamphaning ya Royal Dockyard kua Chatham, e lego mošomo wa maemo wa go lefa. Ka nako yeo bahlanka ba Jehofa ba be ba šetše ba kwešiša gore Bakriste ga se ba swanela go ya ntweng. Ka 1941, re ile ra thoma go kwešiša gore ga se ra swanela go šoma difemeng tša go dira dibetša. (Joh. 18:36) Ka ge ke be ke šoma khamphaning ya go aga dikepe tša ntwa, ke ile ka phetha ka gore ke tlogele mošomo woo gomme ke tsenele tirelo ya nako e tletšego. Kabelo ya ka ya mathomo e be e le kua Cirencester, e lego toropo e botse ye e lego mebotong.
Ge ke na le mengwaga e 18, ke ile ka golegwa ka dikgwedi tše senyane ka baka la gore ke ganne go dira mediro ya bošole. Ke be ke tšhogile kudu ge mojako wa sele ya ka o be o tswalelwa gomme ke šala ke nnoši. Eupša go se go ye kae, bahlapetši le bagolegwa ba ile ba thoma go mpotšiša gore ke golegetšwe eng gomme ka lethabo ka ba hlalosetša ditumelo tša ka.
Ge ke se na go lokollwa, ke ile ka kgopelwa go šoma tšhemo le Leonard Smith * ditoropong tše mmalwa tša seleteng sa gabo rena sa Kent. Go thoma ka 1944, difofane tše diketekete tšeo di bego di laolwa ka diremouto, tšeo di bego di tletše ka dipomo, di ile tša wela seleteng sa Kent. Re be re dula moo difofane tše di bego di feta gona. Difofane tše tša dipomo di be di bitšwa doodlebug ka gore di be di swana le dikhunkhwane tše. E be e le ntwa e boifišago, ka gore ge o be o ka kwa entšene ya sefofane se e tima, e lego selo seo se bego se direga gantši, o be o tseba gore ka morago ga metsotswana sefofane seo se be se tlo wa gomme sa thuthupa. Re be re badiša lapa le lengwe la ditho tše hlano. Ka dinako tše dingwe, re be re dula ka tlase ga tafola ya tšhipi yeo e bego e diretšwe go ba šireletša ge ntlo ya bona e be e ka wa. Mafelelong ditho ka moka tša lapa leo di ile tša kolobetšwa.
GO IŠA DITABA TŠE DIBOTSE DINAGENG DIŠELE
Ge re be re tsebiša batho ka kopano nakong ya ge ke sa tšwa go thoma go bula madibogo kua Ireland
Ka morago ga ntwa, ke ile ka bula madibogo ka mengwaga e mebedi ka borwa bja Ireland. Re be re sa tsebe gore bophelo bja Ireland bo fapana le bja Engelane. Re ile ra ya ka ntlo le ntlo re kgopela marobalo, re bolela gore re baromiwa, e bile re sepediša dimakasine tša rena seterateng. Ruri e be e le bošilo go dira seo nageng yeo ka gore go be go tletše Makatholika! Ge monna yo mongwe a be a re tšhošetša, ke ile ka tšhabela lephodiseng le lengwe, leo le ilego la re: “Wena o be o letetše’ng?” Re be re sa tsebe gore baruti ba moo ba na le matla a go laola batho. Ba be ba dira gore batho ba rakwe mešomong ge ba be ba ka amogela dipuku tša rena, e bile ba be ba dira gore batho bao ba re amogetšego ba re rake magaeng a bona.
Go se go ye kae re ile ra ithuta gore ge re fihla lefelong le lefsa, re nyake marobalo kgole le tšhemo yeo re e šomago, ka ge baruti ba moo ba tla be ba sa re tsebe. Ke moka re be re feleletša ka go etela batho ba kgauswi le mo re dulago. Kua Kilkenny, re be re bala le lesogana le lengwe gararo ka beke go sa šetšwe go tšhošetšwa ke dihlopha tša bahlolampherefere. Ke be ke thabela go ruta batho therešo ya Beibele moo ke ilego ka phetha ka gore ke tlatše fomo ya go ya Sekolong sa Beibele sa Gilead e le gore ke tle ke be moromiwa.
Seketswana se se bitšwago Sibia e be e le ntlo ya rena go tloga ka 1948 go fihla ka 1953
Ka morago ga tlhahlo ya dikgwedi tše hlano sekolong seo kua New York, nna le ba bangwe ba bararo re ile ra abelwa go yo hlankela dihlakahlakeng tše dinyenyane tša Lewatleng la Caribbean. Ka November 1948, re ile ra huduga New York City gomme ra namela seketswana seo se bitšwago Sibia sa bogolo bja dimithara tše 18. Ke be ke thabile kudu ka ge e be e le la mathomo ke namela sekepe. Yo mongwe wa rena e lego Gust Maki, o be a kgona go sesiša sekepe. O ile a re ruta dilwana tše itšego ka go sesiša sekepe, bjalo ka go rotoša diseila tša sekepe le go di theoša, go šomiša khamphase le go sesiša sekepe ka lehlakore ge go na le moya. Gust o ile a sesiša seketswana sa rena ka bokgwari ka matšatši a 30 madimong a boifišago go fihlela re goroga Bahamas.
‘BOLELANG LENTŠU LA JEHOFA DIHLAKAHLAKENG’
Ka morago ga go fetša dikgwedi tše sego kae re bolela ka Mmušo wa Modimo dihlakahlakeng tše dinyenyane tša Bahamas, re ile ra ya Dihlakahlakeng tša Leeward le Dihlakahlakeng tša Windward, tšeo di lego bokgole bja dikhilomithara tše 800 go tloga Dihlakahlakeng tša Virgin kgauswi le Puerto Rico, gomme di fihla mo e nyakilego go ba Trinidad. Re ile ra fetša mengwaga e mehlano re bolela ditaba tše dibotse dihlakahlakeng tše di lego kgole le kgole moo go bego go se na Dihlatse. Ka dinako tše dingwe, re be re fetša dibekebeke re sa kgone go romela mangwalo goba go a amogela. Go sa šetšwe seo, re be re ipshina ka go bolela lentšu la Jehofa dihlakahlakeng.—Jer. 31:10.
Baromiwa ba nametše Sibia (go tloga ka go le letshadi go ya ka go le letona): Ron Parkin, Dick Ryde, Gust Maki le Stanley Carter
Ge re fihla lebopong la sehlakahlaka le ge e le sefe, batho ba metsaneng ya moo ba be ba re lebelela kudu e bile ba kgobokana boemakepe go tlo bona gore re bomang. Ba bangwe ba be ba se ba ka ba bona sekepe goba lekgowa. Badudi ba dihlakahlakeng ba be ba rata bodumedi e bile ba tseba Beibele. Gantši ba be ba re fa dihlapi, di-avocado le dimake. Seketswana sa rena se be se na le lefelo le lenyenyane la go robalela, la go apeela le la go hlatswetša diaparo, eupša re be re kgona go phela.
Re be re sesa go bapa le mabopo re ruta batho Beibele letšatši ka moka. Gantši re be re ba laletša go tla polelong ya Beibele. Ke moka ge letšatši le sobela, re be
re ba bitša ka go letša tšhipi ya seketswana. Go be go thabiša go bona batho ba e tla. Ge ba theoga mebotong ba etla polelong, mabone ao ba bego ba a swara a be a swana le dinaledi tšeo di benyabenyago. Ka dinako tše dingwe go be go etla batho ba lekgolo, gomme ba be ba dula go fihla bošego ba re botšiša dipotšišo. Ba be ba rata go opela, ka gona re ile ra ba ngwalela dikopelo tša rena tša Mmušo gomme ra ba fa tšona. Ge bone bja rena re leka ka thata go opela, batho bao ba be ba re tlatša gomme mantšu a bona a sepedišana le a rena gabotse. Ruri go be go thabiša!Ka dinako tše dingwe ge re feditše go badiša barutwana ba bangwe, ba be ba eya ntlong e latelago le rena gomme ba theetša thuto gape. Ka ge lefelong le lengwe le le lengwe re be re dula dibeke tše sego kae, gantši re be re kgopela batho bao ba thabelago go tšwela pele ba ithuta le ba bangwe go ba go fihlela re boa. Go be go thabiša go bona ba bangwe ba bona ba tšeela dikabelo tšeo godimo.
Lehono, bontši bja dihlakahlaka tšeo di etelwa ke batho ba bantši bao ba sepelago ba boga dinaga, eupša mehleng ya rena, dihlakahlaka tšeo e be e le mafelo a go hloka mohola. Gantši re be re tloga sehlakahlakeng se sengwe go ya go se sengwe bošego. Dihlapi tše di bitšwago di-dolphin di be di ralokela kgauswi le seketswana sa rena ge re dutše re sesa, gomme selo feela seo o bego o ka se kwa e be e le modumo wa seketswana sa rena ge se dutše se sesa. Ngwedi o be o phadimetše lewatleng gomme kua pejana go bonala eka lewatle le a felela.
Ka morago ga go fetša mengwaga e mehlano re bolela ditaba tše dibotse dihlakahlakeng, re ile ra ya Puerto Rico gore re yo ananya seketswana sa rena ka sa go ba le dientšene. Ge re fihla moo, ke ile ka kopana le kgaetšedi yo mobotse wa moromiwa yo a bitšwago Maxine Boyd gomme ra ratana. O thomile go bolela ditaba tše dibotse ka phišego go tloga bjaneng. Ge a godile, o ile a hlankela e le moromiwa kua Dominican Republic go fihlela mmušo wa Khatolika o mo raka nageng yeo ka 1950. Ka ge ke be ke le yo mongwe wa basesiši ba sekepe, ke ile ka dumelelwa go dula Puerto Rico ka kgwedi e tee feela. Ka ge ke be ke tlo fetša mengwaga e mentšinyana ke le dihlakahlakeng tše dingwe kgole le Puerto Rico, ke ile ka bolela ke nnoši ka re: ‘Ronald, ge e ba o rata kgarebe ye, gona o swanetše go e nyala.’ Ka morago ga dibeke tše tharo, ke ile ka kgopela Maxine gore re nyalane gomme ka morago ga dibeke tše tshela ra nyalana. Nna le Maxine re ile ra abelwa go ba baromiwa Puerto Rico, e be e le gona ge ke laetše go namela sekepe sa rena se sefsa.
Ka 1956 re ile ra thoma go etela diphuthego ke le molebeledi wa tikologo. Bana babo rena ba bantši ba be ba diila, eupša re be re rata go ba etela. Ka mohlala, motsaneng wa Potala Pastillo, go be go na le malapa a mabedi a Dihlatse ao a bego a na le bana ba bantši, gomme ke be ke rata go ba leletša naka. Ke ile ka botšiša yo mongwe wa banenyana ba malapeng ao, e lego Hilda, ge e ba a ka rata go ya tšhemong le rena. O ile a re: “Ee, ke a rata, eupša nka se kgone. Ga ke na dieta.” Re ile ra mo rekela dieta, gomme a ya le rena tšhemong. Ka morago ga mengwaga e mentši, ka 1972, ge nna le Maxine re be re etetše Bethele ya Brooklyn, kgaetšedi yo a bego a sa tšwa go aloga Sekolong sa Gilead o ile a tla go rena. O be a le kgauswi le go ya kabelong ya gagwe kua Ecuador, gomme o ile a re: “Na le sa nkgopola? Ke nna ngwanenyana yola wa go tšwa Pastillo yo a bego a hloka dieta.” E be e le Hilda! Re ile ra thaba kudu moo re ilego ra lla!
Ka 1960 re ile ra abelwa go hlankela ofising ya lekala ya Puerto Rico, yeo e bego e le ntlong ya mabato a mabedi kua Santurce, San Juan. Mathomong, mošomo o montši o be o dirwa ke nna le Lennart Johnson. Yena le mosadi wa gagwe e be e le Dihlatse tša Jehofa tša mathomo kua Dominican Republic, gomme ba tlile Puerto Rico ka 1957. Ka morago, Maxine o ile a šoma go romela batho dipeeletšo tša bona tša dimakasine—tše di fetago sekete ka beke. O be a thabela mošomo wo ka gore o be a nagana ka batho ka moka bao ba bego ba amogela dijo tše tša moya.
Ke thabela tirelo ya Bethele, ka gobane ke bophelo bja go nea. Eupša mathata le wona a gona. Ka mohlala, kopanong ya ditšhabatšhaba ya mathomo ya Puerto Rico ka 1967, ke ile ka ikwa ke imelwa ke mošomo. Ngwanabo rena Nathan Knorr, yoo ka nako yeo a bego a eteletše pele Dihlatse tša Jehofa, o ile a tla Puerto Rico. Ka phošo o ile a nagana gore ga se ka nyakela baromiwa bao ba bego ba e tla go etela Bethele senamelwa, le ge ke be ke dirile bjalo. Ka morago, o ile a nkgalemela kudu a re ga ke na thulaganyo gomme a mpotša gore ke mo nyamišitše. Ke be ke sa nyake go ngangišana le yena, eupša ke ile ka kgopišega ka nako e teletšana. Go sa šetšwe seo, nakong e nngwe ge nna le Maxine
re be re kopana le ngwanabo rena Knorr, o ile a re laletša phapošing ya gagwe gomme a re apeela dijo.Ge re be re le Puerto Rico, re be re etela lapa la gešo gantšinyana kua Engelane. Tate ga se a ka a amogela therešo ge nna le mma re be re e amogela. Eupša ge diboledi tše di tšwago Bethele di tlile Engelane, mma o be a di amogela. Tate o ile a bona kamoo balebeledi ba bao ba tšwago Bethele ba bego ba ikokobeditše ka gona ge a ba bapiša le baruti bao ba ilego ba mo tena mengwageng e fetilego. Mafelelong o ile a kolobetšwa ka 1962 gore a be Hlatse ya Jehofa.
Ke na le Maxine kua Puerto Rico ka moragonyana ga gore re nyalane gotee le ka 2003 letšatšing la ngwaga wa bo-50 re nyalane
Mosadi wa ka yo a rategago e lego Maxine, o hwile ka 2011. Ke tloga ke lebeletše pele go tlo mmona gape ge bahu ba tsošwa. Ruri seo se a nkgothatša! Mengwaga e 58 yeo re e feditšego mmogo, nna le Maxine re ile ra bona batho ba Jehofa kua Puerto Rico ba oketšega go tloga go Dihlatse tše e ka bago tše 650 go ya go tše 26 000! Ke moka ka 2013, ofisi ya lekala ya Puerto Rico e ile ya kopanywa le ya United States, gomme ke ile ka kgopelwa gore ke hlankele kua Wallkill, New York. Ka morago ga go fetša mengwaga e 60 sehlakahlakeng, ke be ke ikwa ke le motho wa Puerto Rico, ke le bjalo ka coquí, e lego segwagwa sa mehlareng ya kua Puerto Rico seo se opelago ka gore: ko-kee, ko-kee ge letšatši le sobetše. Eupša e be e le nako ya go fetela pele.
“MODIMO O RATA MONEI YO A NEAGO KA GO HLALALA”
Ke sa dutše ke thabela go hlankela Modimo Bethele. Ga bjale ke na le mengwaga e fetago 90, gomme mošomo wa ka ke go kgothatša ditho tša lapa la Bethele ke le modiši. Ke boditšwe gore ke šetše ke etetše batho ba fetago 600 ga e sa le ke fihla mo Wallkill. Ba bangwe ba bao ba tlago go mpona ba mpotša mathata a bona goba a malapa a bona. Ba bangwe ba nyaka go tseba kamoo ba ka swarelelago tirelong ya bona ya Bethele. Bao ba sa tšwago go nyalana ba nyaka dikeletšo mabapi le lenyalo. Ba bangwe ba ile ba abelwa go ya tšhemong. Ke theetša bohle bao ba kgopelago go bolela le nna, gomme gantši ge go swanetše, ke ba botša gore: “‘Modimo o rata monei yo a neago ka go hlalala.’ Ka gona thabela mošomo wa gago. O direla Jehofa.”—2 Bakor. 9:7.
Mathata a go hlankela Bethele a swana le a go hlankela lefelong le ge e le lefe: E le gore o dule o thabile, o swanetše go dula o ikgopotša bohlokwa bja seo o se dirago. Mošomo o mongwe le o mongwe wo re o dirago Bethele ke tirelo e kgethwa. Re thuša “mohlanka yo a botegago le wa temogo” go nea bana babo rena lefaseng ka moka dijo tša moya. (Mat. 24:45) Go sa šetšwe gore re hlankela re le kae, re na le dibaka tša go mo tumiša. Anke re thabeleng go dira seo a re kgopelago sona, ka gobane “Modimo o rata monei yo a neago ka go hlalala.”
^ par. 13 Phihlelo ya Leonard Smith e tšweletše ka Morokaming wa April 15, 2012.